Máhara wamá lun relihión le mamabei inarüniti

Mabusenrunti Satanási hama lumáfianu lun waseriwidun lun Bungiu. Álugatiñu hadisedagüdüniñu sun gürigia ha gayara hamutiñu luéi Bungiu. Ida liña hadügüni? Relihión le mama inarüniti ligía aban lídangiñe sádara le hayusurubei (2 Korintuna 11:13-15). Aban relihión le marufudahanbalin inarüni le tídanbei Bíbülia mama inarüniti. Relihión le mamabei inarüniti ítara liña kei seinsu mama inarüniti: lenege inarüniti ani mebegiti ni kata. Gayararügüti lanügün saragu turóbuli woun.

Iyeeni le lídanbei relihión siñati línsiñedun lun Heowá, ladüga ligía Bungiubei lánina inarüni. Dan Ubouagu lubéi Hesusu ha adundehabarun relihión lidan dan ligía busentiñu meha háfaruni. Saminatiñu meha ligaburi lan hahuduragun richatimabei. Ariñagatiñu meha: “Ábanrügüñein waguchi, Bungiu”. Úarati san Hesusu luma katei le hariñagubei? Uá! Aba lóunabuniñu: “Mafia húguchibei; lánigu huguya” (Huan 8:41, 44). Uguñe weyu, gibetiña gürigia afiñetiña hahuduraguña lan lun Bungiu, ani le linarün aban katei, haseriwiduña lun Satanási hama lumáfianu (1 Korintuna 10:20).

Keisi aban tídibu wewe ñalaali wuribatu tin, relihión le mamabei inarüni alubahati gürigia ha adügatiñu katei wuribati. Buin liña ubóu lau turóbuli ladüga katei wuribati le hadügübei gürigia. Anihein déneiguaü (o figóu hadan aban wügüri tuma würi), ageindaguni, íweruhani, amudihani, áfarahani luma águrawaguni. Saragu hádangiñe gürigia ha adügübalin katei burí le gantiña relihión, ani relihión ligía mánhigichun lumutu hanigi lun hadügüni le buidubei. Siñati lumadagu hamá Bungiu anhein gubeirügü hígira hadaagun katei wuribati (Matéu 7:17, 18).

Relihión le mamabei inarüni arufudahati houn gürigia lun hafurieidun houn guáriua. Erengati Bungiu woun moun lumuti lan wafurieidun houn guáriua. Richati katei le. Hínsiñeti hamuga san woun ñein lan somu gürigia maweiyasunti adimureha wama ani adimurehati tuma wayawa? Gayarati hamuga san wamadabei lan gürigia ligía? Uá! Busénti Heowá hayanuhan gürigia lun mama lun aban guáriua ni lun aban dibuhu mabagariti (Áfuriduni [Éxodo] 20:4, 5).

Arufudahati relihión le mamabei inarüni gayara lan háfarun amu gürigia lidan lidaani wuribu. Erengati Hesusu hínsiñeguabaña lan lumadagu Bungiu hámagua. Máfaragun wamutiñu gürigia ha hínsiñebaña woun (Huan 13:35). Mabuidunti wáfaraguniñu íbini gürigia wuribatiñu. Dan le houdinbei laganiñu Hesusu lun harügüdüni lun ladaürün, mígirunti lun hageindagun lánigu disipulu lun hadouragun lau (Matéu 26:51, 52).

Arufudahati relihión le mamabei inarüni hasufuriruba lan gürigia salufuritiñu máfiougati. Gama lumoun, arufudahatu Bíbülia figóu lan anügübei lidoun óunweni (Rómana 6:23). Heowá ligía aban Bungiu hínsiñehabuti. Aban Bungiu le hínsiñehabuti houn gürigia, lasufuriragüdübaña hamuga lun súnwandan? Uá! madügün lubéi. Ábanrügübei relihión lidan paraísu, le relihión le unbei lánhara Heowá (Arufudúni 15:4). Sun le líbiri relihión le arufudahabalin liyeeni Satanási gumugualime.