Yusu wamóun burí tratadu lun waburuchaguagüdüni uganu buiti
1. Ida liña san tayusurún tratadu burí lidan óundaruni?
1 Luagu saragu irumu, yusu lumutu wóundarun tratadu lun lapurichihóun uganu buiti. Lidan irumu 1880, gumeseti C. T. Russell hama lánigu paaná adüga tratadu burí lun hafanreinhanu gürigia ha aliihabarun garüdia Watch Tower lidan dan ligía. Wéiriti tisudinin tratadu burí tugía darí lun dan le lan ladügünbei Russell aban óundaruni lidan irumu 1884 anihein dimurei tract (“tratadu”) lidan tiri óundaruni tugía, bürüwatu lábugiñe lúrudu lau iri: Zion’s Watch Tower Tract Society (uguñe weyu subudiwatu kei Watch Tower Bible and Tract Society of Pennsylvania). Óundaruni to mama lunti lagañeinrúniwa seinsu, lunti lawanserun katei le lánina Larúeihan Bungiu. Lúmounbei irumu 1918, afanreinhaaña Aturiahatiña Bíbülia tóugiñe 300 míñunu tratadu. Ani uguñe weyu, humémegiru tratadu saragu lidan ministeriu.
2. Ka uagu weiri lubéi tahuudun tratadu?
2 Ka uagu hu tubéi saragu. Buíduburiti tikolorun tratadu ani buiti taríawagun. Uganu le tídanbei, adügati lun hasigirun gürigia aliiha ani gíbeti tariñagun lidan fiú dimurei. Darangilutimati hasandiragun gürigia houngua dan le wígirun aban tratadu houn sügǘ lau dan le wígirun aban garüdia o aban líburu. Ani íbini irahüñü hama gürigia ha hagumeseruña apurichiha gayarati hapurichihan tau. Ani kei ñǘbüri tubéi, gayarati wanügünu wámagua ñeinhin lumuti woudin.
3. Abahüdaha humá aban sügǘ le hawinwandubei o le áfuachuti tidan burí wani agumeiraguagüdüni le arufuduti gebegi tan tratadu.
3 Gíbetiña gürigia asubudiruti inarüni táurügü aban tratadu. Anihán hénpulu tani aban würi Haití, aba tarihin aban tratadu ǘmadarugu, aba tabudunu, ani lárigiñe taliihanu aba tariñagun: “Anihán inarünibei!”. Lárigiñe, aba tidin tidan aban Luban Wadamuridagun, aba tagumeserun aturiahoun Bíbülia ani aba tabadiseirun. Sun le, seremei lun lubafu Lererun Bungiu le tídanbei aban tratadu!
4. Ka wabusenrubei wadügün lidan burí hati le lunbei wapurichihan tau tratadu?
4 Lidan apurichihani muna tuagu muna. Kei le weiri lubéi tahuudun tratadu lidan apurichihani, lúmagiñe lidan unsu-hati tayusurúba lun wapurichihan tau lidan fiú hati. Furanguti mama lan ñǘdünrügübadiwa ígira aban tratadu tidan kada muna, lunti wayusurunu lun wagumeserun ayanuha hama gürigia. Ánhaña arufuda gürigia busén hamá hasigirun afurendeira, lidan yebe furumiñeti bisida o dan le wagiribudun bisidaña, gayarati wafuranguagüdüni houn ida liña lan taturiahóun Bíbülia tau líburu Kátima san o tau amu agumeiraguagüdüni tídangiñe to auboun wíchiga aturiahani. Ida luba wígirunu tratadu houn gürigia? Kei le anuhein lubéi ámuñegueinarügü tratadu wama, furumiñe mosu waliihanu to lunboun wapurichihan tau lun wasubudiruni buidu ka lan uagu tayanuha.
5. Ida luba gayara lan wígirun tratadu houn gürigia lidan apurichihani muna tuagu muna?
5 Según tratadu to lunboun wayusurunu luma fulasu le ñein lubéi wapurichiha, ítara luba wagumeseruni wayanun. Gayarati wagumeserun lau wíchugun aban tratadu lun gürigia le úmabei wayanuha. Háfuga busén hamá hasigirun ayanuha danme le harihini dibuhu le tuágubei. Ábanya manera, warufudun fiú tratadu houn ani aba wígirun lun hanúadahan aban. Anhein lídanñadiwa lubéi fulasu le ñein lubéi hanufude hamá gürigia hadaaruni habenari, gayarati wárügüdünu tratadu burí tuguya wáhaburugu lun gayara lan harihinu gürigia súngubei o wálügüdahan anhein gayara lubéi wásügüragüdünu houn lábugiñegiñe bena lun hariñaguni woun ka lan hasaminarubei tuagu. Anhein aban lubéi álügüdahani tánibei tratadu títulu, gayarati wálügüdüniña ka lan hasaminarubei luagun álügüdahani ligía o wadügün amu álügüdahani le lunti ladügün lun busén hamá hayanuhan. Ábameti waliihan aban fánreinti houn tídangiñe tratadu tugía, ruina wagíame chansi houn lun hóunabuni álügüdahani burí le lídanbei párafu o wálügüdüniña ka lan hasaminarubei. Buídubei lun waliihani bérusu burí tídangiñe Bíbülia. Lásurun wayanuhan, ariñaga wamá houn kaba lan weyu gayara lan wagiribudun. Anhein hechu habéi lílana damuriguaü ígira agumeiraguagüdüni tidan muna to ñein lubéi madari hamá gürigia, gayarati wígirun aban tratadu lidan fulasu le ñein lumuti marihin hamanu ásügürütiña.
6. Ida liña gayara lan wígirun tratadu houn gürigia dan le wapurichihan ǘmadarugu?
6 Dan le wapurichihan ǘmadarugu. Yúsuhadün san tratadu dan le hapurichihan ǘmadarugu? Añahein gürigia fureseeña ani mabusenruntiña hararamagun ayanuha wama, ligíati hénrengu lubéi wasubudiruni anhein busén habei haganbuni uganu o mabusenrun hamá. Lubaragiñe wíchugunu iseri garüdia houn ibidiñeñu woun anhein haliihaboun lubéi, ru wamá aban tratadu houn. Kei le buíduburi lubéi dibuhu le tuágubei ani murusunrügüñein tila, háfuga busenbaña haliihanu danme le hadarirun aban liraüraü chansi. Ánhaña araramagua ayanuha wama, gayarati wayanuhan houn luagu ariñahani le tídanbei.
7. Írida humá fiú hénpulu luagu ida luba lan tayusurún tratadu lun wayanuhan luagu uganu buiti íbini mama lan wapurichihaña.
7 Dan le wayanuhan luagu uganu buiti íbini mama lan wóudiña apurichiha. Ménrengunti wayanuhani uganu buiti houn gürigia dan le wayusurun tratadu íbini mama lan wóudiña apurichiha. Anihein aban íbiri, súnwandan lachoururuni ládarun fiú libusedurugun lubaragiñe láfuridun lúbiñegiñe. Danti le layanuhan luma somu gürigia, kéiburi luma aban nadagimeinti tidan somu budigü, aba lígirun aban lun lun laliihanu. Aban feru maríeitiña ha ñǘdünbaña ebeluha Nueva York aba hanügünu garüdia Naciones tuma saragu tratadu lidan ámuñegueinarügü iñeñein, lugundun subudi hamuti harihiba lan gürigia lídangiñetiña saragu ageiraü ñein. Sun ha haganbubaña ayanuha lidan amu iñeñein —halugurahaña lan yebe ǘmadarugu, hemeraaguña lidan somu párüke o eiga tidan somu éigagülei— ábaha hígirun aban tratadu houn lidan hererun.
8. Ida liña ítara tiña lan tratadu kei ilaü?
8 “Bunabei binadüri.” Ítara tiña tratadu kei ilaü. Dan le hábunagun ábunagutiña, chü hamuti ilaü lidoun sun fulasu lugundun ibidiñeti houn halíaba lan láhücha. Ligía lariñagunbei Apurichihati 11:6: “Bunabei binadüri binaafin, bunabei giñe rábounweyu, lugundun ibidiñewati kaba lan buídutima, anhein le lubéi bábunubei furumiñe o le lan libiaman o buídubei lan biángubei”. Ligíati, sigí wamá ‘arufudahei lichú aau o subudi’ le tídanbei wani tratadu (Ari. 15:7).
[Ariñahani burí lidan létüra wéinamuti lidan páhina 3]
Kei le weiri lubéi tahuudun tratadu lidan lóurate wapurichihani uganu buiti, lúmagiñe lidan unsu-hati tayusurúba lun wapurichihan tau lidan fiú hati.