Mígiraguagüda humá hungua lun hanufude
1. Ka uagu añahein lubéi íbirigu hanufudetiña híchugun aturiahani tídangiñeti Bíbülia?
1 Hénrenguti san hun híchugun aturiahani tídangiñeti Bíbülia ladüga hanufude humá luéi mámabadün lan aban buiti máisturu? Añahein meha giñe lubúeingu Bungiu ha awinwandubaña lidan dan le sügühalibei kéiburi Moisesi luma Heremíasi ha meha asandirubaña siñabei lan hagunfulirun lau wadagimanu le líchugubei Heowá houn (Afu. 3:10, 11; 4:10; Her. 1:4-6). Ligíati, gayarati ñeinbei lan dan wasandiragun woungua ítara. Ka gayarabei wadügüni?
2. Ka uagu ua lubéi buídurügü lan wapurichihan muna tuagu muna ani lárigiñe aba wígirun lun ámuba lan íchiga aturiahani tídangiñeti Bíbülia?
2 Furumiñe, haritagua waméi luagu mamuriahanbei lan Heowá lóugiñe le wayarabei adüga (Sal. 103:14). Mini lan lira, anhein lan óunaha lubaliwa lun wadügün disipulugu luma lun warufudahan houn gürigia, gayararügü liña wadügüni (Mat. 28:19, 20). Mama houn gürigia ha subuditimabaña o ha gayaraguatimabaña houngua líchigei Heowá lubuidun chansi le (1 Ko. 1:26, 27). Ligíati, úati buídurügü lan wapurichihan muna tuagu muna ani lárigiñe aba wígirun lun ámuba lan íchiga aturiahani tídangiñeti Bíbülia.
3. Ida liña larufudahan Heowá woun lun wíchugun aturiahani tídangiñeti Bíbülia?
3 Arufudahati Heowá woun. Heowá guánarügü arufudahabei woun ida luba lan wadügün disipulugu (2 Ko. 3:5). Yusu lumutu lóundarun lun lasubudiragüdün inarüni woun le ibidiñebei houn ha chúbaña au según ubóu (1 Ko. 2:7, 8). Tidan Bíbülia ariha wamuti saragu manera le aubei larufudaha Hesusu, Máisturu le Wéirigubei. Ani lidan damuriguaü resibitiwa adundehani estodi. Huutu burí giñe wani agumeiraguagüdüni woun, kéiburi líburu Kátima san, to afuranguagüdübalin lau aban manera furanguti ani sensiyuti inarüni burí méiniti le tídanbei Bíbülia. Genegeti hénrengu lan lichugúniwa aturiahani tídangiñeti Bíbülia, gama lumoun mítaranti!
4. Ka uagu chouru wabalin luagu líderagubadiwa lan Heowá?
4 Lau lídehan Heowá gúnfuli lumuti dandu Moisesi kei Heremíasi wadagimanu le ichugúbei houn (Afu. 4:11 12; Her. 1:7, 8). Ligíati, amuriaha waméi lídehan Heowá. Gayarati wachoururuni líderagubadiwa lan lugundun dan le wíchugun aturiahani tídangiñeti Bíbülia wadügüña aban katei le hínsiñebei lun: warufudahañein inarüni luagu houn amu (1 Huan 3:22). Ligíati, áfaagua wamá lun wagumeserun íchiga aturiahani tídangiñe Bíbülia íbinirügü lun aban gürigia. Gúndaabadiwa ani wibihiba saragu abinirúni lúmagiñeti Heowá.