Gárada lúmagiñe sétanu le arihibei lau hawadigimari gefentiña luagu Heowá lidan sun ubóu
Íbirigu hínsiñewatiña:
Ínsiñeni Heowá, Wáguchi le siélubei. Ligía tariñagunbei Bíbülia: “Ínsiñeni Bungiu” (1 Huan 4:8). Lau sun ligía lan Suntigabafubei mariñaguntu Bíbülia ni aban wéiyaasu: “Bungiu ubafubei” o “Bungiu éreibei”. Ínsiñeni lébunabei larúeihan Heowá, ani ligía katei le adügübei lúntima wayarafadun lun.
Leti buídubei mafosu lániwa Heowá eseriwida lun. Busenti weseriwidun lun ladüga hínsiñe lan woun tídangiñe sun wanigi. Ítara luba warufuduni lun busén wamá larúeihaniwa ladüga chouru wamani lau lan irichaü luma ínsiñeni ladügei. Furangugubeiñein larihín katei le lúmagiñe hagumeserun gürigia ubouagu.
Mafosurun lumuti Heowá Adán tuma Ewa lun gaganbadi hamá lun; lubaragiñe lira, ígira lumutiña lun desidírü hamani kaba lan hadüga. Lun hamuga sandí hamá ínsiñeni inarüniti luagu Heowá luma eteingiruni luagu le ladügübei hawagu, mafalarun hamuti hamuga Satanási dan le línchahanbaliña lun hebedaagun.
Dan lárigiñe, aba lariñagun Moisesi lidan aban yanu lánina ayouraguni houn ísüraelina: “Níchuguña hun lun hanúadahan uguñe, aban lídangiñe bián katei le: Ibagari luma buiti luéigiñe aban oubaü, óunweni luma wuribati luéigiñe le aban oubaü” (2 Lur. 30:15). Gayarati meha hanúadiruni ísüraelina ida liña lan habusenrun hawinwandun. Ítara kei ladügün Moisesi ariñagati giñe Hosué houn: “Anhein mabusenrun hubéi heseriwidun lun Heowá, anúadaha humá uguñe kaba lan un heseriwida”. Ábati hóunabuni ísüraelina Hosué: “Masaminarungubeitiwa wígiruni Heowá” (Jos. 24:15, 16, TNM). Ligiaméme giñe wasandirubei. Hínsiñeti Heowá woun ani “masaminarungubeitiwa” wadisedun luéi.
Wagía kristiánugu subudi wamuti buidu ka lan mini lubéi líbüre wamá lun desidírü wamani kaba lan wadüga. Íbini ibiha hamá wéiyaaña lidan afiñeni kárugu lun híchugun adundehani luma lun hererehan, máluguntiña hagumadiruniña gürigia o hariñagun houn ka lan lunbei hafiñeruni. Abürühati apostolu Pábulu: “Mama hamugatia wabusenruña wariñagun hun: ‘Anihánba hafiñera’; ladüga deregüdaguaadün lidan hafiñen; busenrügütiwa wíderagunün lúntima laganwoundun hugundan” (2 Ko. 1:24).
Gúndaatimatiwa dan le wadügüni katei ladüga busén wamá sügǘ lau dan le wadügüni ladüga wafosurún. Agunbiraha lumutiwa Heowá adügei le buídubei ladüga ínsiñeni le wasandirubei. Arufuda lumuti Pábulu súdini lan wóuserun ítara dan le lariñagunbei: “Anhein níchiga sun le númabei murusun murusun houn gudemetiña, ani lun hamuga nederegeruni núgubu lun gayara lan napantan luagu, meseriwidunga nuguya lau ínsiñehabuni, málati [...] nun” (1 Ko. 13:3).
Barüti saragu ugundani luma uéiriguni lun Heowá larihini añahein lan saragu míñunu hádangiñe wíbirigu eseriwida lun ladüga línsiñe houn tídangiñe sun hanigi.
Le linarün katei, hanarimeti lueirin hínsiñe sun lubúeingu Heowá lun. Íbini huguya irahüñü hama nibureintiña ha hínsiñehabubaña lun lubaragiñe hínsiñehabu humá lun ubóu luma lun ugundani le líchugubei. Gayarati hachoururuni weiri lan giñe hínsiñe woun (Luk. 12:42, 43).
Ladüga ínsiñeni le hasandirubei luagu Heowá huguya íbirigu wügüriña, würiña hama nibureintiña, lidan irumu le ásügürübei apurichihóuati uganu buiti lidan 1,748,697,447 oura. Ani ladüga giñe ínsiñeni apurichiha habéi 7,782,346 íbirigu lidan sun ubóu. Wéiriti giñe wagundan lau warihini habadiseirun 268,777 iseri íbirigu, saragu nibureingiña haganagua, lun harufuduni deregeguaaña lan houngua lun Heowá. Mini lan lira, badisei hamá kéiburi 5,168 iseri íbirigu sagü samudi luma dimaasu. Le lúgubu ñuluguagüda lanu katei le wanigi!
Lidan lagumuhóun dan le ídanbei wawinwanda, wagagibudaguña wagía lubúeingu Bungiu luma turóbuli, lénrengunga, éibaahouni, sandi ani saragu wádangiñe luma aweiyaduni. Gama lumoun, desidírühadiwa mígiraguagüdünbadiwa lan woungua magiribudun wagíame wárigoun. Hínsiñetün súngubei hugaya woun (Ebü. 10:39; 2 Ko. 4:16).
Híbirigu,
Sétanu le arihibei lau hawadigimari gefentiña luagu Heowá lidan sun ubóu