Barǘ humaña profetagu keisi aban hénpulu: Oseasi
1. Dan le wasaminarun luagun lubuidun luma lugudemehabu Heowá, kaba katei wabusenra wadügün?
1 Másiñati adüga lan burí wararamagun asaminara luagun lubuidun luma lugudemehabu Heowá lun wálügüdagun woungua: “Ka burí sákürifisiu gayarabei nadügüni luagu?” (Sal. 103:2-4; 116:12). Mosu meha ladügün profeta Oseasi sákürifisiu lun gaganbadi lan lun Heowá, ani adüga lumuti lau sun lugundan. Ida luba wáyeihani lani hénpulu?
2. Ida luba wáyeihani lubuidun hénpulu lánina awanduni lidan apurichihani le líchugubei Oseasi?
2 Apurichiha wamá íbini ‘mabusenrun hamá gürigia haganbun’. Hóuntimañein meha lílana diisi türibu lánina arúeihani Ísüraeli luganute Oseasi. Ani máhuduraguntiña meha hibe-agei gürigia ha ñéinbaña lun Heowá. Íbini urúei Heroboamü biama “mabuidunti ligaburi ligibugiñe Bungiu” ani awanseragüda lumuti meha láhudurawaguniwa tun burí hayawa harahüñü bágasu le lagumeserubei Heroboamü aban adüga (2 Uru. 14:23, 24). Ani úati meha giñe ni aban hádangiñe urúeigu ha arúeihabaña lárigi áfaaguti lun líderaguniña gürigia ha lábugiñebaña lagumadihan lun hasansiruni ligaburi háhuduragun lun Heowá, ligíati aba lubéi lagumuchaguagüdüniwa arúeihani le lidan irumu 740 lubaragiñe lidaani Hesusu. Seriwiti meha Oseasi lau úaraguni lun Heowá dimí-san-nefu irumu sun añaha lan gürigia áhuduragua houn guáriua. Anihán le unbei wagúara ganigi! Wáyeihabei san Oseasi lau wasigirun apurichiha sagü irumu íbini arufuda hamá gürigia meberesehabuni o kóntüra hamá woun? (2 Tim. 4:2.)
3. Ida liña larihín lugudemehabu Heowá lidan libagari Oseasi?
3 Gabaroun waméi lugudemehabu Heowá. Ariñagati Heowá lun Oseasi: “Beiba banügame aban würi horu búmarime” (Ose. 1:2). Gasaanitu Gómerü to lani weiriou aban lau; gama lumoun genegeti mama lan ligía háguchibei ha híbiri biama. Lidan le ladügübei Oseasi lau lánharun ferudunalanu Gómerü to lani weiriou, arihúati lueirin lugudemehabu Heowá, le meha ferudunabaliña lílana diisi türibu ha asakürihabaña lárigiñe múaran hamá lun (Ose. 3:1; Rom. 9:22-26). Aranseñu waña san lun wadügün sákürifisiu lun warufudahan houn sun “hawuyeri gürigia” aban lan Bungiu gudemehabuti Heowá? (1 Ko. 9:19-23.)
4. Ka burí sákürifisiu gayarabei wadügüni lun warufuduni weteingiradi lun Heowá?
4 Añahein lubúeingu Heowá ha adügaañabaña sákürifisiu lau hígirun wadagimanu fáyeiti o le haturiahabei lun haganwoundagüdüni dan le hásügürübei agunfulirei hani ministeriu. Añahein amu, mamarieidúngiña o marahüñütiña lun hídehan lidan lawanserun wadagimanu lánina lapurichihóun ugunu buiti le luáguti Larúeihan Bungiu. Másiñati samina wamá siñaguabadiwa lan hamuga woungua lun wadügüni líbememe le ladügübei Oseasi. Gama lumoun, ánhawa asigira arufuda teinki wamani lueirin lareini Heowá, ani afiñe wagíame luagu layusurubei lan lani sífiri sandu lun líchugun erei woun, másiñati layusuruniwa lidan aban igaburi le masaminarungubei wamuti gayara lan lasuseredun, ítara kei meha lasuseredun lun Oseasi (Mat. 19:26; Fili. 2:13).