Buidulá wayusurunu Garüdia Atalaya tuma ¡Despertad! to binaduraühaaruboun
Úabei unti teseriwida Garüdia Atalaya tuma ¡Despertad! anhein areidañu tiña lubéi wama o anhoun wágura, ligíati lunti lubéi wáfaagun lun wafanreinhanu. Gayarati tadügün ábanrügü garüdia lun labusenrun aban gürigia lafurendeiruni inarüni luma lun tínchahani agúarei liri Heowá (Rom. 10:13, 14). Lidan párafu le asigirubei, wadariruba fiu adundehani libügürü ida luba lan wayusurunu garüdia burí to binaduraühaaruboun buidu.
Danme le wapurichihan lidan aban fulasu le ídanbei dísegua lan wapurichihan, gayarati wígirunu garüdia tidan burí muna to ídanboun madari wamá gürigia, lidan aban fulasu le ídanti marihin hamanu ásügürütiña.
Danme le wapurichihan lidan guririguaü kéiburi lidan fulasu le ñein lubéi tagurabahóua busu o íngiini, gayarati wálügüdüniña gürigia ha agurabahabaña ñein anhein busén habéi haliihan somu katei, ábameti warufudun fiu garüdia houn lun hanúadirunu to hínsiñeboun houn.
Danme le woudin lidan fulasu le ñein lubéi tachibawagúa daüguaü, tidan muna to ídanboun hóunigirua wéiyaaña mutu, tidan luban agaranihani o lidan amu fulasu lídangiñe le atokarubei lun wani damuriguaü, gayarati wígirun átiri garüdia lidan fulasu le ñein lubéi hagurabaha gürigia. Liibe-agei dan, anhein wariha gürigia le arihibei lau fulasu ligía, buídubei wamuriahan üma luma furumiñe. Gama lumoun, anhein anuheinharu lubéi garüdia ñein, mígira wamá amu.
Danme le waranserun lubá wagiribudun bisidaña gürigia, samina wamá luagun le gayarabei labusenrun kada aban lasubudirun. Gasaaniguti san? Hínsiñeti san aweiyasuhani lun? Hínsiñeti san lábunawagun nadü lun? Adaraha wamóun burí Garüdia Atalaya tuma ¡Despertad! to binaduraühaaruboun wama lun warihini anhein anihein lubéi somu arütíkulu tidan le gayarabei labusenruni gürigia ligía laliirun, ábameti wanügünu lun danme wabisidahani.
Dánmeya le wadimurehan luma aban gürigia le barühali saragu hati lúmagiñe madari wamani lúbiñe, gayarati warufudun fiú Garüdia Atalaya tuma ¡Despertad! lun tídangiñe to mígirun wamagiruboun lun.