Añahein besafu gürigia mabasihanhaña tidoun haligilisin ladüga mibihin hamá gurasu ni ídemuei lun hadariruni óunabagülei lun álügüdahani le súdinitimabei luagu ibagari. Kati uagu mosu lubéi hidin lidan hadamuridagun gefentiña luagu Heowá? Kaba hadarira ñein?

Ugundani lau haganagua humá gürigia hínsiñehabutiña ani areidatiña. Lidan furumiñeti sígulu, óundaragu haña meha kristiánugu lidan damuriguaü ani ábaha húaradun lun háhuduragun lun Bungiu, haturiahanu Lererun luma lun híchugun dǘgüdaguaü hóuniwagua (Ebüréu 10:24, 25). Dan meha le hádanñanu lan híbirigu lidan afiñeni, sanditiña hádanñanu lan umadagu ha inarünitiña ani hínsiñehabutiña (2 Tesalónikana 1:3; 3 Huan 14, 15). Sigí wamuti hani hénpulu ani sandí wamuti ligiaméme ugundani.

Buiti le lanügübei wafurendeirun agunfulirei lilurudun Bungiu lidan wabagari. Ítara kei meha lidan tidaani Bíbülia, dandu wügüriña, würiña hama irahüñü óundaraguatiwa lun waganbuniña máisturugu ha aransetiña lun híderaguniwa lun gunfuranda wamani ida luba lan wawinwandun sagü weyu según adundehani le tídanbei Bíbülia (2 Lúrudu 31:12; Neemíasi 8:8). Sun ha achülürütiña lidoun damuriguaü gayarati hóunabun lidan seksióun le lánina álügüdahani luma óunabagülei ani gayarati giñe heremuhan, ruti le chansi houn kada gürigia lun harufuduni hemenigin keisi kristiánugu (Ebüréu 10:23).

Lubuidun chansi lun hederebudagüdüni hafiñen luagu Bungiu. Abürühati meha apostolu Pábulu lun aban lídangiñe damuriguaü le lídanbei lidaani: “Lugundun busentina narihinün lun nafanreinhan abinirúnimeme le líchugubei lani Bungiu [s]ífiri nun, lúntima héredun lidan hafiñen; lun giñe wíchugun gurasu wóuniwagua lau afiñeni le wawagubei” (Rómana 1:11, 12). Dan le wadunragun hama wíbirigu lidan adamuridaguni, héregüda lumuti wafiñen ani desidírütimatiwa lun wawinwandun aban ibagari kristiánu.

Amisuraha wamutün lidoun leweñegua wadamuridagun lun hidin arihei hungua. Wíchuguba aban buiti achülürüni hun. Mafayeihanbadün lun hebelurun ani mamuriahóunti giñe seinsu ñein.

• Ka hénpulu wasigirubei lidan wadamuridagun?

• Ka buiti wibihibei lidan adamuridaguni kristiánu?

Íbini dan le mosu lan wéibugun labadinaguagiñe aban lanarime áraabu o lidan liñawan dan, mígirun wamuti wadamuridagun. Ka uagu wáfaagua saragu lun wadamuridagun hama wíbirigu íbini lídanñadiwa lan lénrengunga le lánina ibagari o lubucha uagu lárigi wawadigimaridun sun weyu?

Ídehati lun buidu lan wasandiragun woungua. Dan le layanuhan luagu lunti lan wadamuridagun, ariñagati apostolu Pábulu: “Lunti giñe wáfaagun wíderaguniña wíbirigu” (Ebüréu 10:24). Mini lan dimurei le mosu lan wasubudiragun woungua hama wíbirigu ani nidiheri wagíame hawagu. Dan le wasubudirun amu lílana damuriguaü, aba wíchugun fe luagu sügühaña lan lídangiñe lénrengunga libe le gádanbaliwa ani gayarati híderaguniwa.

Ídehati lun wadügün umadagu ha duratiña. Lidan adamuridaguni geyegu waña hau umadagu inarünitiña, mama hau gürigia ha subudirügü wamutiña murusun. Anihein giñe amu dan óundaraguatiwa lidan somu isebáhari le harumati. Ka buiti líchugubei umadaguaü le woun? Arufudahati woun lun hínsiñegua wamá wámagua. Ani dan le lídanñanu lan turóbuli wíbirigu, ñǘdüntiwa íderaguaña lau lóufudagun lugundun adügaadiwa aban umadaguaü le héreti (Ariñawagúni 17:17). Dan le wóundaragun hama sun íbirigu lidan damuriguaü, arufuda wamuti luagu ‘góunigigua wamá wóuniwagua’ (1 Korintuna 12:25, 26).

Amisuraha wamutün lun hanúadiruniña gürigia ha adügübalin lugundan Bungiu humadagume. Hadarirubaña umadagu ha haganagua gefentiña luagu Heowá. Mígira humá lun ñein lan somu katei le adügüti lun madamuridagun humá wama.

• Ka uagu buidu lubéi wadamuridagun hama wíbirigu lidan damuriguaü?

• Ídaba san hidin asubudirei wadamuridagun?

Dan le meha lagumeserunbei hadamuridagun kristiánugu, adügǘwati lau uremu, furíei, taliihóun luma takutihóun Lererun Bungiu, madügüntiña amu burí katei (1 Korintuna 14:26). Danme le hidin adamuridagua wama, harihibei genegegua lan saragu luma le adügǘbei lidan dan ligía.

Rúati arufudahani le huuti tídangiñe Bíbülia. Sagü samudi o dimaasu hóundaragun lílana sun damuriguaü lun haganbun aban yanu tídangiñeti Bíbülia, darandi minutu lidura yanu ligía ani lidan arufudúati ida liña lan tíderaguniwa Bíbülia lidan wabagari luma lidan dan le wawinwandubei. Amisurahóuatiña sun gürigia ha ñéinbaña lun háluahani bérusu burí tidan habibülian. Lárigiñe, aba lagumeserun Taturiahóun Garüdia Atalaya durati aturiahani le aban oura, ani amisurahóuatiña sun lílana damuriguaü lun hóunabun lidan lakutihóun aban arütíkulu lánina aturiahani tidan Garüdia Atalaya. Akutihani le, arufudati ida luba lan wayusuruni adundehani le tídangiñeti Lererun Bungiu lidan wabagari. Ligiaméme ariñahani aturiahóubei lidan kada aban lídangiñe lóugiñe san-diisi-milu damuriguaü le lídanbei sun Ubóu.

Íderagua lumutiwa lun buídutima lan warufudahan. Damuriguatiwa giñe aban guñoun labadinagua dimaasu lun ladügǘn aban programa le fanreinwagúati lidan ǘrüwa fánreinti. Le furumiñeti, Taturiahóun Bíbülia lidan Damuriguaü, durati durandi minutu ani ídehati lun laganwoundun wasubudin luagu profesía luma inarüni méiniti le tídanbei Bíbülia, adügǘwati lau álügüdahani luma óunabagülei. Lárigiñe, aba tagumeserun Leskuela Kristiánu lánina Apurichihani, darandi minutu tidura. Gumesetu lau lafuranguagüdüniwa aban fánreinti tídangiñe Bíbülia le aliiha hamaali íbirigu hábiñe lubaragiñe adamuridaguni. Lárigiñe, gürigia ha bürüwaañabaña tidan leskuela aba hásügürün igibugiñoun íchiga aban liraüraü yanu, ábati líchugun alidihati leskuela somu adundehani le lunti líderaguniwa sun wagía lun buídutima lan waliihan luma wayanuhan (1 Timotéu 4:13). Lagumuhóun, adügǘwati Adamuridaguni lánina Eseriwiduni, darandi minutu, íderagua lumutiwa lau burí yanu, demostrasión luma entrewista lun warufudahan houn amu gürigia tau Bíbülia.

Danme le hidin lidan wadamuridagun, taweiriduba hanigi lau lubuidun arufudahani tídangiñeti Bíbülia le ichugúbei ñein (Isaíasi 54:13).

• Kaba hariha danme le hidin lidan hadamuridagun gefentiña luagu Heowá?

• Ka lídangiñe wadamuridagun ídanbei habusenra hidin furumiñe?