Ariha humaali san tidan burí iyawaü to tídanboun garüdia to buidu lan hasansiragun gefentiña luagu Heowá lubá houdin adamuridagua? Ka uagu wóunigirei ligaburi wasansiragun luma waranseragun woungua?

Lun warufudun inebesei lun Wabungiute. Inarüni mámarügüñein lan le bóugudigiñebei lun gürigia lariha Bungiu (1 Samueli 16:7). Gama lumoun, dan le wóundaragun lun wáhuduragun lun, ayumahatiwa tídangiñe sun wanigi warufudun inebesei lun luma houn wíbirigu. Lun hamuga mosu lan woudin ayanuha luma aban aguseragüdüti, chóuruti waranseraguña lan hamuga woungua buidu ladüga lúmounbadiwa lan aban gürigia íñuti lubara. Ítarameme, dan le woudin adamuridagua arufudatiwa lau ligaburi wasansiragun luagu inebehabu wamá lun “aguseragüdüti íñugutimati lidan sun ubóu”, Heowá Bungiu, ítara giñe kei luagu fulasu le ñein lubéi wáhuduragua lun (Agumesehani 18:25).

Lun warufuduni lúrudu le wafalarubei lidan wabagari. Ariñagatu Bíbülia houn kristiánugu “lun hadaüragun keisi lubudubu” (1 Timotéu 2:9, 10). Mini lan “hadaüragun keisi lubudubu”, moun lumuti lan wadaürün daüguaü to adügütu lun sun lan gürigia aríaguawa kéiburi to chátitu o to murutu. Mini lan giñe lunti lan wanúadahan daüguaü to buiti taríawagun, mama to madünamatu ni to hanarimegutu. Gama lumoun, ígirati lúrudu le chansi woun lun wanúadahanu daüguaü to hínsiñetu woun. Dan le buidu lan waríawagun, wéndegüda wamuti “arufudahani le luáguti Bungiu le Wasalbaragüle” ani rútiwa uéiriguni lun (Titu 2:10; 1 Féduru 2:12). Dan le buidu lan waranseragun woungua lubá woudin lidan wadamuridagun, adügati lun buidu lan hayanuhan gürigia hawagu lumutuniña Heowá.

Lun haruma wamá ani buidu ligíame waríawagun, mama mosu seru tan wadaüragun o weiri lan tubuidun. Ligíati, mígira huméi hidin tidan Luban Wadamuridagun ladügarügü túan daüguaü to sérutu huma.

• Ka uagu súdini lubéi ligaburi wasansiragun dan le wáhuduragun lun Bungiu?

• Ka adundehani tídangiñeti Bíbülia wasigirubei lidan lóurate waranseragun woungua?

Anhein haturiahañoun lubéi Bíbülia luma aban gefenti luagu Heowá, chóuruti áfaagua humá lun haturiahani leksióun ligía lubaragiñe lóurate haturiahan. Lun buídutima lan gunfuranda humani sun katei, buiti lun hadügüni ligiaméme lubá hidin lidan adamuridaguni. Buídutimabei resultóu le lunbei hibihini ánhadün asigira aban programa.

Desidírü humá ídaba lan haturiaha luma halíaba lan hadügei. Ka oura ménrenguntima lan hun hetenirun buidu lun le haturiahabei? Binaafin lubaragiñe hagumeserun nadagimein, o guñoun dan le arumugaaña irahüñü? Íbini anhein murusunrügüñein lubéi hidaani, desidírü humá átiribei lan dan haturiahan ani mígira humá lun ladügün amu katei lun maturiahan humá. Áluaha humá aban fulasu le darangilati ani ñegú humóun bigibigitu, radiu o gágamuru luéi ladarasahanün. Furíei humá lubaragiñe hagumeserun, líderagubadün lun habulieiduni hidiheri luma lun hetenirun buidu tun Lererun Bungiu (Filipuna 4:6, 7).

Makü huméi dimurei burí le súdinitimabei ani aranseñu humá lun hóunabun. Furumiñe, aliiha huméi arütíkulu o kapítulu lun hasubudiruni ka lan uagu layanuha. Ariha huméi ka lan lánibei tema, ida liña lan úara lan tema luma kada subtítulu, ariha huméi sun dibuhu ani aliiha humeime álügüdahani lánina águyuguagüdüni le arufudubalin saminaü le súdinitimabei. Lárigiñe, aliiha huméi kada párafu ani áluaha huméi óunabagülei lun kada álügüdahani. Áluaha huméi ani aliiha huméi sun bérusu le bürüwañubei ani ariha huméi ida liña lan lídehan lidan tema (Adügaü 17:11). Danme le hadariruni óunabagülei, makü humá fiú dimurei le lunbei líderagunün aritaguei óunabagülei. Ítarati, danme le lidan humá adamuridaguni, ánhadün busén gayarabei hiñuruni húhabu lun hóunabun según le hafurendeirubei.

Dan le hakutihani ámuñegueinarügü tema le aturiahóubei kada dimaasu lidan adamuridaguni, laganwounduba subudi tídangiñeti Bíbülia le ‘areida humaalibei’ lidan hisaminan (Matéu 13:51, 52).

• Ida luba gayara lan hadügün aban programa lun haturiahan lubá adamuridaguni?

• Ida luba gayara lan haranserun lun híchugun aban óunabagülei lidan adamuridaguni?

Lúmagiñe binadu dan, busengubeiñein Heowá lun hásügürün iduheñu dan hámagua lun hederebudagüdüni hamadagua luma luma ínsiñeni le hasandirubei hóuniwagua (2 Lúrudu 6:6, 7). Ligíati, wagía gefentiña luagu Heowá ígiratiwa aban weyu lidan dimaasu lun wáhuduragun lun Bungiu kei iduheñu lau wakutihan ariñahani le lúmagiñeti Bungiu según lemegeirun kada aban. Lidan ókaasion ligía mama mosu wasansiragun kei dan le woudin lidan adamuridaguni. Íbini ha hábuguarügübaña gayarati hayusuruni dan le hígirubei lun Bungiu lun hakutihan somu tema tídangiñeti Bíbülia le hínsiñeti houn.

Aban chansi lúntima layarafadúniwa lun Heowá. “Yarafa humá lun Bungiu, ábame giñe layarafadun hun.” (Santiagu 4:8.) Subuditima wamuti Heowá buidu dan le wafurendeirun luagu tidan Bíbülia luagu ligaburi luma le ladügübei. Lun wagumeserun aban aturiahani lidan familia lau aban manera sensiyuti, gayarati waliihanu Bíbülia lau umalali héreti, gayarati wasigiruni programa to tánina Leskuela Kristiánu lánina Apurichihani. Kada aban hádangiñe lílana familia aba laliihan aban seksióun; lárigiñe aba hayanuhan súngubei luagu katei le hafurendeirubei.

Aban chansi lun habuiduragüdüni hanaagun houngua. Wügüriña hama würiña ha maríeihaña, ítara kei agübürigu hama isaanigu, buítimati hanaagun houngua dan le haturiahanu Bíbülia úara. Lunti lánina lan ugundani luma darangilaü ókaasion le, lun súngubei lan hagía agurabahei lau ugundani. Háfuga busén hamá agübürigu hakutihan tema burí le súdiniti tídangiñe Garüdia Atalaya tuma ¡Despertad! o lídangiñe páhina lidan Internet jw.org/cab, según harumudiri hasaanigu; o háfuga busenbaña hakutihan luagu somu turóbuli le úmabei hadunragua hasaanigu leskuelarugu luma ida luba lan haransehani. Gayarabei giñe hasayahani uremu le lunbei leremuhóun lidan adamuridaguni, lárigiñe ábame heigin somu katei.

Dan le wayusurubei kada dimaasu lun wáhuduragun lun Heowá úara ídehati lun hínsiñetima lan Lererun houn sun iduheñu, ani labinirubei sun áfaaguni le wadügübei (Sálumu 1:1-3).

• Ka uagu wígira dan lun wáhuduragun lun Bungiu lidan familia?

• Ka gayarabei hadügün agübürigu lun hínsiñe lan ókaasion burí le houn súngubei?