Subudiwagubeiñanu gefentiña luagu Heowá luagu lisudinin arufudahani lúmagiñeti Bungiu houn. Adügǘwatu leskuela burí espechalitu houn sun ha ederegeragubaña houngua lidan dan dayarüti apurichihei Larúeihan Bungiu gayara láamuga ‘híchaaguntima houngua lun hapurichihani uganu le lánina asalbaruni’ (2 Timotéu 4:5).

Leskuela houn Prekursorugu. Lidoun lagumuchun furumiñeti irumu tau o lau aban íbiri eseriwida kei prekursoru le apurichihati ǘrüwa-wein-diisi oura sagü hati, bürüwati lun lidin eresibira külase luagu sisi weyu tidan aban Luban Hadamuridagun Gefentiña luagu Heowá, háfuga aban to madisetu tuéi luban. Adügǘwatu Leskuela to lun tíderaguniña prekursorugu ayarafada lun Heowá, lun buídutima lan hagunfulirun lau sun hani ministeriu luma lun hasigirun eseriwida lau úaraguni lun Heowá.

Leskuela houn ha Apurichihabalin Larúeihan Bungiu. Lidan bián hati le tidurabei Leskuela to, arufudahóuati houn prekursorugu ha barühañabaña dan eseriwida ítara ani ígira hamaaru haban lau sun hagundan lun houdin eseriwida ñein lumuti mégeiwa lan. Áyeiha hamuti Hesukrístu, Máisturu le Wéirigutimabei hádangiñe ha seriwihañabaña ubouagu, lau hariñagun: “Anahán, óunahabana” (Isaíasi 6:8; Huan 7:29). Háfuga mosu héchudun luagu aban ibagari sensiyutimati dan le houdin awinwanda dise tuéi haban. Másiñati mítaran lan éigini, échuni luma ligaburi dan lidan fulasu ligía kei le uágubei héchuda, ani háfuga mosu lan hafurendeirun amu iñeñein. Íderagua tumutiña Leskuela to íbirigu wügüriña kei würiña, maríeitiña kei mamarieiduntiña ha gúnfulihaña lúmagiñe 23 irumu darí 65 lun háyeihan igaburi le lunbei líderaguniña ñein lumuti heseriwida luma lun laranseruniña lúntima layusuruniña Heowá tuma lóundarun.

Leskuela Galaadü. Lidan ebüréu “bürübünu dübü íchuguti fe” mini lubéi dimurei “Galaadü”. Hóugiñehaaña widü-milu íbirigu eresibihatiña tídangiñe Leskuela to lúmagiñe tadügǘn lidan irumu 1943, ounahóuaaña kei mísionerugu asubudiragüdei uganu buiti “darí lumoun lagumuhóun fulasu ubouagu” ani ibihaaña buiti resultóu (Adügaü 13:47). Aban hénpulu, dan le hachülürünbei furumiñetiña mísionerugu lidoun ageiraü Perú, úagili meha ni aban damuriguaü ñein. Guentó aniheinhali lóugiñe milu. Dan le hagumeserunbei mísionerugu eseriwida Japón, úagiña meha ni diisi Gefentiña ñein. Guentó añaheinhaña hóugiñe bián-san-milu. Aturiaha hamutu Lererun Bungiu buidu buidu lidan seingü hati le lidurabei külase tidan Leskuela Galaadü. Amisurahóuatiña íbirigu tídangiñe sukursáli, ha eseriwidutiña kei prekursorugu espechalitiña, kei mísionerugu, o kei óunigiruti sirkuitu tidoun Leskuela to lun heresibirun arufudahani dǘgüdati ídeha hamaamuga lun derebugu lan wadagimanu lánina apurichihani lidan sun ubóu here ligíame.

• Ka un tadügǘwa Leskuela houn Prekursorugu?

• Ka íbirigu gayarabei heresibirun külase tidan Leskuela houn ha Apurichihabalin Larúeihan Bungiu?

Lidan wadamuridagun úatiña fádirigu o ábutigu ha resibitiña seinsu. Lubaragiñe lira, kei meha ladügǘniwa lidan furumiñeti damuriguaü kristiánu, iridúatiña wügüriña ha derebuguhali hafiñen lun hóunigiruniña “tánigu liligilisin Bungiu [o lílana lidamurin Bungiu, NM]” (Adügaü 20:28). Wéiyaaña lidan afiñeni ha, wügüriña ha buiti hamadagua luma Heowá, hagía adundehabaliña lílana damuriguaü, ani adüga hamuti ‘mama ladüga hafosuruña lan; adüga hamuti ladüga busén hamá heseriwidun lun Bungiu, mama ladüga línsiñe seinsu houn’ (1 Féduru 5:1-3). Ka hadügübei luagu wafulesein?

Góunigi hamutiwa. Adundeha hamutiña wéiyaaña lidan afiñeni lílana damuriguaü ani tóunigi hamutiña luéi heferidiruni hamadagua luma Bungiu. Kei subudi habalin Bungiu lan íchugubalin kárugu súdiniti le houn, míchugun hamuti halurudun, ídeharügütiña lun buidu lan lidin woun ani gunda wagía (2 Korintuna 1:24). Ítara kei lóunigiruni hóuniri mudún kada aban hádangiñe lilügüniña mudún, áfaaguatiña wéiyaaña lidan afiñeni lun hasubudiruniña kada aban hádangiñe lumutuniña Bungiu (Ariñawagúni 27:23).

Arufudahatiña woun lun wadügüni lugundan Bungiu. Dimaasu luagu dimaasu, alidiha hamuti wéiyaaña lidan afiñeni adamuridaguni le adügǘbei lun lederebudagüdüni wafiñen (Adügaü 15:32). Íbirigu ha, alidiha hamuti apurichihani, apurichihatiña giñe wama ani ru hagía adundehani woun luagu ámuñegueinarügü katei lidan wani ministeriu.

Rútiña dǘgüdaguaü lun kada aban wádangiñe. Lun híderaguniwa akipurei wamadagua luma Bungiu, ñǘdüntiña wéiyaaña lidan afiñeni abisidahawa wábiñe ayanuha hagía wama tidan Luban Wadamuridagun. Yusu hamutu Lererun Bungiu lun híchugun ídemuei woun luma gurasu (Santiagu 5:14, 15).

Amu luéi wadagimanu le hadügübei lidan damuriguaü, hibe-agei wéiyaaña lidan afiñeni nadagimeintiña giñe lun gayara lan híchuguni hemegeirun hafamilian houn ani tóunigi hamaña. Yuuti lun inebe hamá íbirigu ha woun lugundun hanarimeti hawadigimaridun (1 Tesalónikana 5:12, 13).

• Ka hawadigimaribei wéiyaaña lidan afiñeni lidan damuriguaü?

• Ida liña harufuduni berese hamá lau kada aban wádangiñe?

Ayanuhatu Bíbülia hawagu bián sétanu hani wügüriña kristiánugu ha adügübalin wadagimanu le mégeiwabei lidan damuriguaü: “Wéiyaaña lidan afiñeni” hama “ídehatiña lidan damuriguaü” (Filipuna 1:1, NM). Libe-agei dan, añahein saragu hádangiñe íbirigu ha lidan kada damuriguaü. Kati wadagimanu hadügübei ídehatiña lidan damuriguaü luagu wafulesein?

Íderagua hamutiña wéiyaaña lidan afiñeni. Wügüriña ha eseriwidubaña kei ídehatiña lidan damuriguaü buiti hamadagua luma Bungiu, chubalugutiña ani gayarati lafiñerúniwa hawagu dandu ha nibureingiña kei ha derebuguhaña. Ténitiña lun wadagimanu súdiniti le lunti ladügǘn lidan damuriguaü luma tidan Luban Wadamuridagun le mama lánina arufudahani. Ítarati, líbüretiña wéiyaaña lidan afiñeni lun hagunfulirun lau hani buligasion lun harufudahan luma lun hóunigiruniña lumutuniña Bungiu.

Adügatiña wadagimanu le huuti. Híbiri ídehatiña lidan damuriguaü seriwitiña lun híchuguni buiti achülürüni ani áluaha hagía haláü houn gürigia ha achülürübaña lidoun adamuridaguni. Añahein hádangiñe ténitiña lun amuri, afanreinha hamutu agumeiraguagüdüni, ténitiña lun tila gafu to lagei budagia ani ariñaga hamuti houn lílana damuriguaü halíaba lan houdin apurichiha. Ídehatiña giñe lidan tounigirún luma taransehóun Luban Wadamuridagun ani íderagua hamutiña íbirigu ha wéiyougaaña según adundehani le heresibirubei hámagiñe wéiyaaña lidan afiñeni. Furumiñeguarügü wadagimanu le ichugúti houn, adüga hamuti lau lubuidun igaburi, adügati le lun inebewa hamá (1 Timotéu 3:13).

Rútiña aban lubuidun hénpulu keisi wügüriña ha derebuguti hafiñen. Anuadirúatiña wügüriña ha keisi ídehatiña lidan damuriguaü ladüga lubuidun igaburi le harufudubei keisi kristiánugu. Dan le híchugun yanu lidan damuriguaü héregüda hamuti wafiñen; íderagua lumutiwa hani hénpulu lidan apurichihani lun giñe wapurichihan lau ubebeni, ani lau gídehadi hamá adügatiña lun ñein lan úarani luma ugundani (Éfesuna 4:16). Lau lásügürün dan, gayarabei hiridún kei wéiyaaña lidan afiñeni.

• Ka san hawuyeri wügüriña eseriwidubaña kei ídehatiña lidan damuriguaü?

• Ida liña hídehan ídehatiña lidan damuriguaü lun buidu lan léibugun sun katei lidan damuriguaü?