Tidan Abürüdǘni Güriegu Kristiánu ayanuhóuati saragu luagu Berünawé luma apostolu Pábulu. Wügüriña ha, seriwitiña meha keisi óunigirutiña ha abisidahabalin burí damuriguaü lidan hadaani. Ka meha ínchahabaliña lun hadügüni? Ínsiñeni le hasandirubei hawagu híbirigu lidan afiñeni. Ariñagati meha Pábulu busén lan lagiribudun bisidaña líbirigu lun larihini ida liña lan lidin houn. Meberesegunti meha átiribei lan kilometuru laweiyasuhan, le labusenrubei líchugun iderebugu houn (Adügaü 15:36). Ligiaméme ínsiñeni le ínchahabaliña óunigirutiña sirkuitu luma distritu uguñe weyu.

Hayabiña íchiga dǘgüdaguaü woun. Kada óunigiruti sirkuitu abisidahati kéiburi wein damuriguaü ani rédeiti aban dimaasu lidan kada aban bián wéiyaasu luagu irumu. Gayarati wafurendeirun saragu katei buiti hámagiñe íbirigu ha luma hámagiñe hánigu weiriou anhein maríeihaña lubéi. Íbirigu ha áfaaguatiña lun hasubudiruniña nibureintiña hama íbirigu ha derebuguhaña ani wéiriti hagundan lun háfuridun apurichiha wama luma lun houdin wama hábiñe gürigia ha aturiahabarun Bíbülia wama. Íbirigu ha abisidahabalin damuriguaü ñǘdüntiña hama wéiyaaña lidan afiñeni abisidahaña íbirigu lun híchugun dǘgüdaguaü houn, rútiña giñe yanu lau saragu ubebeni dandu lidan damuriguaü kei lidan burí adamurini lun gayara lan híchugun dǘgüdaguaü woun (Adügaü 15:35).

Beresetiña hau sun íbirigu. Beresetiña óunigirutiña sirkuitu lau ida liña lan hamadagua lílana damuriguaü luma Bungiu. Óundaraguatiña hama wéiyaaña lidan afiñeni luma hama ídehatiña lidan damuriguaü lun hakutihani lawanserun katei lidan damuriguaü luma lun híchugun adundehani houn lun gayarabei lan hagunfulirun lau hadasin lidan damuriguaü. Íderagua hamutiña prekursorugu lun buídutima lan hagunfulirun lau hani ministeriu luma lun buídutima lan resultóu le hibihibei, ani gúndaatiña giñe lau hasubudiruniña iseri gürigia ha adamuridagubaña wama ani hawanseruña lidan hasubudin luagu Bungiu. Kada aban hádangiñe íbirigu ha yusu hamuti habagari lun ‘heseriwidun woun’ (2 Korintuna 8:23). Áyeiha waméi hafiñen luma ederegeraguni unguaü lun Bungiu le harufudubei (Ebüréu 13:7).

• Ka uagu habisidahei óunigirutiña sirkuitu damuriguaü?

• Ida liña gayara lan hasagarun buiti lídangiñe bisida le hadügübei íbirigu ha?

Dan le lasuseredun somu chagaguaü kéiburi hárabaganali o somu durumandei, wagía gefentiña luagu Heowá adügatiwa aransehani lau lóufudagun lun woudin íderaguaña wíbirigu ha asufurirubaña. Katei burí le arufudati hínsiñeguatiwa lan wámagua tídangiñe sun wanigi (Huan 13:34, 35; 1 Huan 3:17, 18). Ka luwuyeri ídemuei wíchugubei?

Ídehatiwa lau seinsu. Óunahatiña meha kristiánugu antiokíana seinsu lun híderaguniña hábirigu ha huríu dan le ladagarunbei aban lanarime ümi lidan sun Hudea (Adügaü 11:27-30). Ítarameme, dan le wíchugun fe luagu lídanñanu lan lénrengunga wíbirigu lidan furumiñeguarügü fulasu, rútiwa budagia lun lóunahani damuriguaü lun hibihini wíbirigu le hemegeirubei (2 Korintuna 8:13-15).

Ñǘdüntiwa ídeha. Wéiyaaña lidan afiñeni ha lídanbaña fulasu le ñein lubéi chagaguaü áluaha hamutiña kada aban hádangiñe lílana damuriguaü lun hachoururuni anhein sefu habéi. Háfuga añahein íbirigu ha lúntiña hafanreinhani éigini, duna, gamisa, añahein etenirutiña houn sánditiña hama áluahatiña halíaba lan híchigaña ha eferidirubarun haban. Gíbetiña gefentiña luagu Heowá ha subuditi wadagimanu houn aweiyasuhatiña lun híderaguniña gürigia o lun hawadigimaridun lidan taransehóun haban gürigia o Luban Wadamuridagun. Seremei úarani le wádanbei luma subudi wamaali lan ida luba lan wawadigimaridun úara, gayarati wamufurun lau lóufudagun lidan anihein lan mégeiti lidan somu fulasu. Súnwandan wíderaguniña “waduheñu lidan afiñeni”, gama lumoun, íderagua wamutiña giñe ha híbiri gürigia dan le gayara lan, meberesenga ka lan hánibei relihión (Galasiana 6:10).

Rútiwa dǘgüdaguaü houn tídangiñe Bíbülia ani íderagua wamutiña lun buidu lan hasandiragun houngua. Dǘgüdaguaütima hemegeirubei gürigia ha asufurirubaña damichi. Lidan burí dan ligía, ruti Heowá erei houn lugundun aranseñu liña lun “líchugun gurasu woun súnwandan” (2 Korintuna 1:3, 4). Ligía wayanuhanbei hama gürigia ha nidiheribaña luagu füramasei tídangiñeti Bíbülia le achoururagüdübalin woun lagumuchuba lan Larúeihan Bungiu lau sun katei le adügübei lun ñein lan igarigu luma asufuriruni (Arufudúni 21:4).

• Ka uagu gayara lubéi wamufurun lau lóufudagun dan le anihein lan somu chagaguaü?

• Ida liña wíchuguni gurasu le lúmagiñeti Bungiu houn ha ásügürübaña lídangiñe somu chagaguaü?

Murusun dan lubaragiñe lounwen Hesusu, ayanuhati hama gádürü hádangiñe lani apostolugu: Féduru, Santiagu, Huan luma Andürési. Dan le layanuhan luagu liseinin lagiribudun keisi urúei marihúaditi lidan lagumuhóun dan le, aba lariñagun: “Ítara humá keisi musu úaraguati ani gunfuranda ligía, le lígirubei liyubudiri lun larihin hau ha lúbiñebaña lun líchugun éigini houn lidan dan” (Matéu 24:3, 45; Márükosu 13:3, 4). Lau dimurei le, Hesusu kei aban iyubudiri, chóurugüda lumuti luagu líriduba lan aban sétanu lun líchuguni éigini le lánina lasubudirúniwa Bungiu houn lánigu lidan lidaani lagumuchagüle ubóu. Ka lílanabaña sétanu le?

Aban liraüraü sétanu wügüriña anuadirúaaña ha afalarubalin Hesusu. Subudiwatimati “musu” le kei Sétanu le Arihibei lau Hawadigimari Gefentiña luagu Heowá lidan sun Ubóu. Ligía íchugubei subudi luáguti Bungiu houn lánigu paaná lidan áhuduraguni lun Heowá. Megei wamuti musu úaraguati le lun ‘wibihini wéigin lidan dan’ (Lúkasi 12:42).

Ligía arihibei lau sun lumegen Bungiu (Lúkasi 12:44). Ru lumuti Hesusu óunwenbu wadagimanu lun sétanu le lun larihin lau fánreinti lánina lóundarun Heowá le yaabei ubouagu, mini lan le mosu lan lóunigiruni lumegegun, lalidihani apurichihani luma lun layusuruni damuriguaü lun larufudahan woun. Ligíati, lun gayara lan líchuguni “musu úaraguati ani gunfuranda ligía” sun le wemegeirubei woun dan le wemegeiruni, afanreinha lumuti éigini le o subudi luagu Bungiu tau agumeiraguagüdüni to wayusuruboun lidan wani ministeriu luma lau programa lánina adamuridaguni o adamurini wéinamuti.

Úaraguati “musu” le lugundun arufudaha lumuti inarüni le tídanbei Bíbülia ani gúnfuliti lau wadagimanu lánina lapurichihóun uganu buiti, ani gunfurandati lugundun góunigi lumuti lumegen Kristu lau lichú aau ya ubouagu (Adügaü 10:42). Labiniruñein Heowá luadigimari musu le lau laganwoundagüdüni hanumerun Gefentiña luma lau líderaguni íchiga subudi houn gürigia (Isaíasi 60:22; 65:13).

• Ka lanúadirubei Hesusu lun líchugun subudi luagu Bungiu houn lani disipulugu?

• Ka mini lubéi úaragua lan ani gunfuranda ligía musu le?