Lidan furumiñeti sígulu, anihein meha aban liraüraü sétanu hani “apostolugu hama tábutigu ligilisi [o wéiyaaña lidan afiñeni, NM]” ha Herusalénbaña, seriwitiña meha kei sétanu le arihibei lau luadigimari damuriguaü hani kristiánugu anuadirúaaña lidan dan ligía, ani desidírütiña luagu katei súdiniti lidan hiri súngubei (Adügaü 15:2). Lun úara lan le desidírü habéi, akutiha hamutu meha Lererun Bungiu ani ígiratiña lun ladundehaniña lau lani sífiri sandu (Adügaü 15:25). Ligiaméme adügǘbei uguñe weyu.

Ligía layusurubei Bungiu lun ladügüni lugundan. Íbirigu anuadirúaaña ha lídanbaña Sétanu le arihibei lau hawadigimari gefentiña luagu Heowá, wéiriti tisudinin Lererun Bungiu houn ani subuditiña giñe saragu luagu laransehóun katei burí le luáguti óundaruni luma luáguti relihión. Aban wéiyaasu luagu dimaasu damuriguatiña lun haturiahan luagu le hemegeirubei íbirigu lidan sun ubóu. Ítara kei meha lidan furumiñeti sígulu, rútiña adundehani tídangiñeti Bíbülia dandu tau gárada, lau hídehan óunigirutiña sirkuitu luma distritu o amu íbirigu. Ítara liña hadügün lun ábanmeme lan hasaminan lumutuniña Bungiu lidan sun le hadügübei (Adügaü 16:4, 5). Hagía giñe láubaña kárugu lun híchugun ariñahani le luáguti Bungiu, ínchaha hamutiwa lun wíchuguni apurichihani lidan furumiñeti lúgaaru ani arihatiña lau hiridún íbirigu lun somu kárugu lidan damuriguaü.

Falá hamuti ladundehan sífiri sandu. Sétanu le arihibei lau hawadigimari gefentiña luagu Heowá áluaha lumuti ladundehan Heowá le Labureme sun ubóu, luma ladundehan Hesusu le Lichügüdina damuriguaü (1 Korintuna 11:3; Éfesuna 5:23). Masandiraguntiña houngua keisi hábutigu lumutuniña Bungiu. Kei ha híbiri kristiánugu anuadirúaaña, falá hamuti “Mudún [Hesusu] le ñeinhin lumuti lidin” (Arufudúni 14:4). Seremei lumutiwa Sétanu le luagu wafurieidun luagu lufulesein.

• Kátaña meha lídanbaña sétanu le arihibei lau damuriguaü hani kristiánugu lidan furumiñeti sígulu?

• Ida liña láluahani Sétanu le arihibei lau hawadigimari gefentiña luagu Heowá lidan sun ubóu ladundehan Bungiu uguñe weyu?

Aban iri ebüréu Beteli ani mini lan “Luban Bungiu” (Agumesehani 28:17, 19). Buiti iri le tun muna burí to hámaboun gefentiña luagu Heowá lidan sun ubóu le ñéingiñe lubéi lalidihóua apurichihani. Tidan áfisi to wéiritimaboun ani to méinitimaboun ñeinñein Sétanu le arihibei lau hawadigimari gefentiña luagu Heowá, dariwatu áfisi tuguya Nueva York (Meriga), ani ñéingiñe lariha Sétanu le lau tuadigimari to tíbiri áfisi to burí lídanboun amu ageiraü. Subudiwatiña íbirigu ha nadagimeinbaña lidan fulasu burí le kei familia Beteli. Kei furumiñeguarügü familia, hóutiña úara, tídanñanu ábanmeme muna, nadagimeintiña ani aturiaha hamutu Bíbülia úara (Sálumu 133:1).

Ha nadagimeinbaña tidan Beteli arufudatiña sífiri lánina sákürifisiu. Lidan kada familia Beteli añahein bandi wügüriña hama würiña ha derebuguti hafiñen ani deregeguaaña houngua sunsuinagubei lun hadügüni lugundan Bungiu luma lun hídehan lidan lawanserun Larúeihan Bungiu (Matéu 6:33). Úati ni aban hádangiñe afayeirúti luagu luadigimari, gama lumoun resibitiña éigini, aban rumu lun ñeinba lan heredera, luma murusun seinsu lun hagañeihani le hemegeirubei. Kada aban hádangiñe ibihatiña aban wadagimanu: fiú tidan áfisi, gusinarugu o tidan éigagülei; híbiri ñein lubéi imprimírua tan agumeiraguagüdüni o le ñein lubéi taransehóua líburu; híbiri arumadahoun rumu, o le ñein lubéi tachibawagúa gamisa, o lidan taransehóun muna o furumiñeguarügü katei le agadeiruti.

Aban fulasu lánina saragu wadagimanu lun lawanserun lapurichihóun Larúeihan Bungiu. Kada Beteli lunti tadügün lun lachülürün inarüni le tídanbei Bíbülia houn sun gürigia ha hayaraatiña. Garüdia to aban hénpulu luagu katei le. Adügǘwatu lábugiñe ladundehan Sétanu le arihibei lau hawadigimari gefentiña luagu Heowá lidan sun ubóu, lárigiñe aba hayusurun konputadora lun hóunahanu lun saragu sétanu le lídanbei sun ubóu lun hásügüragüdünu lidoun amu burí iñeñein, lárigiñe aba imprimírua tan tidan máhina to fureseti tuadigimari ábati tounahóun lidoun lóugiñe 110,000 damuriguaü. Lidan kada pasu lidan wadagimanu le, ídehatiña lílana familia Beteli lidan dasi létima lunbei ladügǘn lau lóufudagun: lapurichihóun uganu buiti (Márükosu 13:10).

• Ka eseriwidubaña Betelirugu, ani ka hibihibei?

• Ka san wadagimanu súdiniti ídanbei lídeha wadagimanu le adügǘbei tidan kada Beteli?

Sun íbirigu ha eseriwidubaña Betelirugu nadagimeintiña lidan ámuñegueinarügü departamentu lun hídehan lun lawanserun apurichihani lidan aban o lóugiñe aban ageiraü; gayarati lídanñanu lan tásügürawagüdün agumeiraguagüdüni lidoun amu iñeñein, lidan imprimírua tan, lidan lapakühóun tubana luma lichugún tidáü, lidan ladügǘn CD luma DVD o lidan amu katei.

Sétanu le arihibei lau wadagimanu tidan aban áfisi hani gefentiña luagu Heowá. Ru lumuti Sétanu le arihibei lau hawadigimari gefentiña luagu Heowá lidan sun ubóu kárugu houn ǘrüwa o hóugiñe ǘrüwa wéiyaaña lidan afiñeni ha subuditi lahandilihóun wadagimanu houn lun hagía lan ariha tau burí áfisi to. Rútiña íbirigu ha ariñahani lun Sétanu le luagu ida liña lan lawanserun katei lidan burí fulasu le unbei hetenira luma burí turóbuli le gayarabei lasuseredun, ídehati le lun gayarabei lan hasubudiruni kaba lan tema hasagara tidan burí agumeiraguagüdüni to lunboun hadügünu, lidan burí adamuridaguni luma lidan adamurini. Kada átiri dan óunahati Sétanu le óunigirubalin hawadigimari gefentiña luagu Heowá lidan sun ubóu íbirigu íchiga adundehani houn íbirigu ha arihibaña tau áfisi lun gayarabei lan hagunfulirun lau hawadigimari buidu (Ariñawagúni 11:14). Lidan bisida ligía adügǘwati aban adamuridaguni espechaliti ñein lubéi líchiga íbiri le lóunahabei Sétanu le Arihibei lau Hawadigimari Gefentiña luagu Heowá lidan sun Ubóu aban yanu lun líchugun dǘgüdaguaü houn sun íbirigu ha erederubaña lidan fulasu burí le aubei tariha áfisi to labisidahaboun.

Rúati ídemuei lun burí damuriguaü. Tidan áfisi hani gefentiña luagu Heowá desidírü hamani ladügǘn iseri damuriguaü. Ñéingiñe giñe lalidihóua hawadigimari prekursorugu, misionerugu hama óunigirutiña sirkuitu ha lídanbaña fulasu le aubei tariha áfisi tuguya. Ñein laransehóua luáguti adamurini burí le wéinamuti, tabunawagún Luban Wadamuridagun luma tounahóun agumeiraguagüdüni lidoun burí damuriguaü. Sun wadagimanu le adügǘbei tidan aban áfisi hani gefentiña luagu Heowá ídehati lun ñein lan aban buiti aransehani lidan lapurichihóun uganu buiti (1 Korintuna 14:33, 40).

• Ida liña híderaguni íbirigu ha arihibaña tau Beteli Sétanu le arihibei lau hawadigimari gefentiña luagu Heowá lidan sun ubóu?

• Ka burí wadagimanu adügǘbei tidan aban áfisi hani gefentiña luagu Heowá?