Ka san uganu buiti lunbei wibihini?

1. Ka uganu lúmabei Bungiu wabá?

Busenti Bungiu lun hagundaarun gürigia lau habagari. Adüga lumuti Ubóu lau sun le lídanbei ladüga hínsiñe hamá gürigia lun. Málühali agumucha lau sun katei le adügübei lun ñein lan asufuriruni lun gayara lan labuidurun habagari sun gürigia lidan sun ubóu. Aliiha huméi Heremíasi 29:11.

Úagili ni aban urúei gayarati lagumuchun lau wuribani, sandi luma óunweni. Gama lumoun, anihein uganu buiti: málühali Bungiu agumucha lau sun arúeihani le ubouagubei, ábameti larúeihanrügaali lan Bungiu agumadiha. Hagundaaruba lumutuniña lau darangilaü luma lubuidun átuadi. Aliiha huméi Isaíasi 25:8; 33:24 luma Danieli 2:44.

2. Ka uagu weiri lubéi lisudinin uganu buiti le?

Lun lagumuchun asufuriruni, mosu lagidaruniña Bungiu gürigia wuribatiña ubouagugiñe (Sofoníasi 2:3). Ídabati ladügei katei le? Ayanuhatu Bíbülia lidan aban profesía luagu katei burí le anügübei saragu igarigu houn gürigia uguñe weyu. Sun katei le arufudati málühali lan Bungiu agumucha lau wuribani. Aliiha huméi 2 Timotéu 3:1-5.

3. Ka lunbei wadügüni?

Mosu wafurendeirun luagu Bungiu lau waturiahanu Bíbülia, to ítaraboun kei aban gárada to lóunahaboun aban úguchili hínsiñehabuti houn lirahüñü. Arufuda tumuti woun ida luba lan wagundaarun lau wabagari guentó luma kaba lan wadüga lun wibihin ibagari magumuchaditi ámuñegü. Inarüni magundaarunbaña lan sun gürigia danme le hasubudiruni haturiahañoun lan Bíbülia. Gama lumoun, mígira humá lun heredehanün, lugundun abinirúni burí le lunbei hibihini, wéiriti lubuidun. Aliiha huméi Ariñawagúni 29:25 luma Arufudúni 14:6, 7.