Ru waméi buiti achülürüni houn
1. Ka ókaasion íchugubei aban lubuidun chansi woun lun wíchugun aban lubuidun uganu, ani ka uagu?
1 Úati amu ókaasion buídutimati lun wíchugun aban lubuidun uganu houn gürigia luéidigia lidan luéyuri Aritaguagülei. Lubá irumu le, agurabatiwa hachülürün hóugiñe diisi-míñunu gürigia aganba luagu manera wéiritimati le aubei harufuda Heowá luma Hesusu ínsiñeni woun lau lebegi asalbaruni (Huan 3:16; 15:13). Haganbuba giñe gürigia luagu burí abinirúni le gayarabei heresibiruni seremei lun idewesei lúmagiñeti Bungiu le (Isa. 65:21-23). Mámarügübei íchuguti yanu ayanuha luagu lafiñen lidan ókaasion le. Súngubei wagía gachansinbadiwa lun wadügüni lau wíchugun aban lubuidun achülürüni houn sun gürigia ha achülürübaña lidoun Aritaguagülei (Rom. 15:7).
2. Ka lunbei wadügüni lun hasandirun achülürütiña lidoun Aritaguagülei resibiwa hamá buidu?
2 Lubaragiñe wañuurun maniñu agurabei lagumeserun programa, ka uagu mabusuragun wabéi houn gürigia ha yarafabaña woun hádangiñe ha achülürübaña lidoun Aritaguagülei ani ariñaga wameime wiri houn? Gayarati ibidiñe lan houn kábatimaba lan adügǘwa lidan adamuridaguni ligía o machourunbei lan hasandiragun houngua. Ligíati, ánhawa áhayacha hawagun busugua wagíame houn lau gamadouni gayarabei ladügün lira lun darangilu lan hasandiragun houngua. Másiñati ladüga lan tichugún aban amisuragülei houn añahán lubéi ñein. Lun wasubudiruni, gayarati wálügüdüniña anhein furumiñe lubéi hachülürün tidoun Luban Wadamuridagun, o anhein subudi lubéi somu íbiri houn. Gayarati wariñagun houn lun hañuurun wama eremuha wagíame hama, ani furedei wamounme wabibülian houn. Anhein tidan lubéi Luban Wadamuridagun ladügǘwa Aritaguagülei, buídubei warufuduni ámuñegueinarügü fulasu le tídanbei houn. Lárigiñe lichugún yanu, álügüda wamaña anhein anihein lubéi somu katei le úati gunfuranda hamani. Anhein mosu lubéi háfuridun tídangiñe Luban Wadamuridagun lau lóufudagun lun hebelurun lílana amu damuriguaü, gayarati wariñagun houn: “Hínsiñeti hamuga nun nasubudiruni ka lan hisaminanbei luagu adamuridaguni le. Ida luba hamuga nadüga lunya nadimurehan huma?”. Ani hadügame daradu hama lunya hadimurehan hama. Ánhañati achülüra íbirigu ha lǘhalibei lúmagiñe mapurichihan hamá madamuridagun hagía lidoun Aritaguagülei, lunti hadügün wéiyaaña lidan afiñeni aransehani hama lun híchugun dǘgüdaguaü luma ídemuei houn.
3. Ka uagu weiri lubéi lisudinin lun wáfaagun lun wíchugun aban lubuidun achülürüni houn ha lúnbaña hachülürün lidoun Aritaguagülei?
3 Saragu gürigia ha lúnbaña hachülürün lidoun adamuridaguni le anihánba furumiñeti wéiyaasu harihini ugundani, darangilaü luma úarani le hádanbei lumutuniña Heowá (Sal. 29:11; Isa. 11:6-9; 65:13, 14). Kaba hasaminara achülürütiña lidoun Aritaguagülei luagu damuriguaü le ñein wabéi? Segúnme áfaaguni le wadügübei lun wíchugun buiti achülürüni houn.