• Lani burí Kristu milaguru
    Bíbülia ka uganu tídanbei?

    • SEKSIÓUN 18

      Lani burí Kristu milaguru

      Arufuda lumuti Hesusu lau lani milaguru ida luba lan layusuruni lubafu danme le Larúeihan

      RUTI Bungiu ubafu lun Liráü le úati luagu ni aban gürigia lun ladügün milaguru, saragu lídangiñe hagibugiñe bandi gürigia. Ítara liña larufuduni Hesusu gabafu lan lun lagidaruni saragu katei le asufuriragüdübaliña gürigia lúmagiñe binadu dan. Ariha wamá fiú hénpulu.

      Ilamaü. Le furumiñeti milaguru le ladügübei Hesusu, lasaliraguagüdün duna diweinme. Le libiaman, hádangiñe fiú úduraü tuma fiú fein adügati lun heigin saragu milu gürigia. Lidan biángubei ókaasion buídurügüti éigini darí lun lígiragun.

      Sandi. Areidaguagüdati Kristu gürigia ha asufurirubaña “sun luwuyeri sandi” (Matéu 4:23). Areidaguagüdati marihintiña, maganbuntiña, méibuguntiña, gawagutiña lépüra hama góunwehaditiña. Le linarün katei, mébehati lubafu Hesusu lun lareidaguagüdün sandi.

      Chagaguaü ladüga liñawan dan. Aban guñoun, lidan lafayahaña lan Hesusu hama lani disipulugu baranaha Galiléa, aban liabin aban liñawan dan. Aba hanufudedagun lani disipulugu saragu, ánheinti Hesusu, íñurarügü lumuti larihin sielun aba lariñagun: “Maniba! Deregüdaguabá!”. Ourameme ligía, aba lagalumadun liñawan dan (Márükosu 4:37-39). Lidan amu ókaasion éibugati ligibuagu duna lidan liñawan dan (Matéu 14:24-33).

      Sífirigu wuribatiña. Sífirigu wuribatiña ha, gabafutimatiña wawéi. Súfurigüdatiña saragu gürigia, ani gíbetiña siñati hadügün ni kata lun hagidaruniña hawariua. Ánheinti Hesusu, manufudeti hawéi. Hagía adadagarubaña le hanufude dan le harihini ani gaganbaditiña dan le lariñagun houn lun hígiruniña gürigia houngua.

      Óunweni. Agúahatu Bíbülia lun óunweni “lagumuhóun ágani”, le áfaragubaliña sun gürigia (1 Korintuna 15:26). Gama lumoun, ni óunweni mama aban ágani hénrenguti lun Kristu, lugundun águyuguagüdati aban nibureintu lídangiñe óunweni luma tiráü aban würi hilaali tani weiriei. Águyuguagüda lumuti giñe Lásaru le lumada hagibugiñe saragu gürigia, íbini gádürü lan weyu lárigi lóunwen. Íbini láganiñu Hesusu mosu meha hánharun luagu gabafu lan (Huan 11:38-48; 12:9-11).

      Lau lásügürün dan, gürigia ha líderagubaña Hesusu aba hasandirun ani aba hóunwegun. Ka hu lan milaguru burí le ladügübei? Seriwiti saragu, lugundun arufudati gébuna lan profesía luáguti Larúeihan Bungiu. Chóuruti lagumuchuba lan Urúei le anúadira laalibei Bungiu lau ilamaü, sandi, chagaguaü lánina liñawan dan, máfianu íbini lau óunweni. Furanguti ru laali lan Heowá ubafu lun, lun ladügüni.

      (Tídangiñeti liliburun Matéu, Márükosu, Lúkasi luma Huan.)