Wafurendeiruñein san sun le wayaraati lúmagiñe Heowá?

1. Ka wadagimanu lánina arufudahani adügǘbei uguñe weyu?

¹ Súdiniti lun Wamaisturun, Heowá, lun larufudahóun houn lubúeingu buidu (Isa. 30:20). Uguñe weyu, lalidihañein Heowá wadagimanu lánina arufudahani létima wéiritimabei lidan sun dan. Ítara kei lariñaguni lani Isaíasi profesía, hayabiña saragu míñunu gürigia lídangiñetiña sun Ubóu luagun “wübü le ñein tubéi litenpulun Wabureme” (Isa. 2:2). Ka un? Lun larufudahóun luáguti lémeri Bungiu houn, anha, lun larufudahan Heowá houn (Isa. 2:3).

2. Ida liña líderagunün arufudahani le líchugubei Heowá?

² Aranseñu waña buidu. Ma lueirin ídemuei le líchugubei arufudahani le resibi wamaalibei lúmagiñe Bungiu woun! Ligía subudi wabalin liri luma berese lan wau (Sal. 83:18, Traducción del Nuevo Mundo; 1 Fe. 5:6, 7). Óunaba laali giñe álügüdahani burí létima súdinibei, kéiburi: Ka uagu wasufurira? Ka uagu wóunwegua? Ida luba wadarirun ugundani le inarüniti? Ka lisuunibei ibagari? Adundeha lumutiwa giñe Heowá lun richagua wamá lidan wabagari, le adügübei lun buidu lan lidin woun (Hos. 1:8).

3. Ka mini lubéi külase lánina aliihani luma abürühani ani ka buiti gayaraabei wasagaruni lídangiñe?

³ Ruti giñe Heowá arufudahani le espechaliti lun líderaguniña gürigia ha maliihadibaña, mabürüdadi hagía. Íderaguaali külase lánina aliihani luma abürühani le burí ichugúbei lidan damuriguaü saragu íbirigu hama amu gürigia ha busenbaña hafurendeirun. Anhein mégeiwa lubéi, gayaraati hadügün wéiyaaña lidan afiñeni ha lídanbaña damuriguaü aransehani lun lichugúniwa külase le. “Hafurendeirun gürigia aliiha luma abürüha lun gayara lan haturiahanu Bíbülia luma lun harufudahani inarüni houn amu” lisuunibei külase le (km 10/11 páh. 4; be-S páh. 21-23). Ladügüba wafurendeiruni sun le wayaraati lídangiñe arufudahani le líchugubei Heowá lun gunda lan wabagari guentó luma ámuñegü lídanme iseri ubóu (Sal. 119:105; Huan 17:3).