Tani Watchtower LÍBURU-AGEI LIDAN INTERNET
Watchtower
LÍBURU-AGEI LIDAN INTERNET
Garifuna
Ǘ
  • á
  • Á
  • é
  • É
  • í
  • Í
  • ó
  • Ó
  • ú
  • Ú
  • ü
  • Ü
  • ǘ
  • Ǘ
  • Ñ
  • ñ
  • BÍBÜLIA
  • AGUMEIRAGUAGÜDÜNI
  • ADAMURIDAGUNI
  • mwbr17 bián-hati páh. 1-6
  • Ariñahani le lunbei lakutihóun lidan adamuridaguni Habagari Kristiánugu luma Heseriwidun

Úati bidéu lidan fánreinti le.

Sarí wamuti, anihein mégeiti, siñati larihíniwa bidéu.

  • Ariñahani le lunbei lakutihóun lidan adamuridaguni Habagari Kristiánugu luma Heseriwidun
  • Ariñahani le lunbei lakutihóun lidan adamuridaguni Habagari Kristiánugu luma Heseriwidun irumu 2017
  • Arütíkulu burí
  • 6-12 lidan Bián-hati
  • 13-19 lidan Bián-hati
  • 20-26 lidan Bián-hati
  • 27 lidan Bián-hati darí 5 lidan Ǘrüwa-hati
Ariñahani le lunbei lakutihóun lidan adamuridaguni Habagari Kristiánugu luma Heseriwidun irumu 2017
mwbr17 bián-hati páh. 1-6

Ariñahani le lunbei lakutihóun lidan adamuridaguni Habagari Kristiánugu luma Heseriwidun

6-12 lidan Bián-hati

ARUFUDAHANI GEBEGITI TÍDANGIÑETI BÍBÜLIA | ISAÍASI 47-51

“Barüti gaganbadi wamá lun Heowá saragu abinirúni”

(Isaíasi 48:17.)

ip-2-S páh. 131 pár. 18

Arufudahati Heowá woun lun wabuidun guánarügü

Adüga humá “gasu lau nererun”

18 Ínchaha lumuti lani Bungiu sífiri sandu profeta Isaíasi lun lariñagun: “Guentoti ru naali nubafu lun, au Aburemei, ani óunaha naali. Lariñahare Bungiu le besefuragüle, Bungiu Sánduti le Lubungiute Ísüraeli: ‘Au Aburemeibei le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni” (Isaíasi 48:16b, 17). Lunti hamuga ladügün dimurei burí le lariñagubei Bungiu lau ínsiñehabuni houn ísüraelina lun hachoururuni lesefurubaña lan Babilóniagiñe. Heowá Hesefuragülebei (Isaíasi 54:5), ani ayumahati tídangiñe sun lanigi lunya gamadagua hamá luma gaganbadiya hagíame lun lererun. Gaganbadi lun lugumadin Bungiu lébunabei áhuduraguni inarüniti. Ánhañagubeirügü adundehóua ísüraelina “luéigiñe üma le lunbei [h]afalaruni” ligíarügübei hasigirun lidan émeri le buídubei.

(Isaíasi 48:18.)

ip-2-S páh. 131 pár. 19

Arufudahati Heowá woun lun wabuidun guánarügü

19 Ariñaga lumuti Heowá lidan aban lubuidun igaburi mabusenrun lan lun hásügürün lumutuniña lídangiñe lamiselu ani ayumaha lan lun buidu lan lidin houn lidan habagari, lau dimurei burí le: “Adügaadibu hamuga gasu lau nererun! Aganwoundeina liña hamuga lubuidun dan bun kei duna éibaaguati, ítara liña hamuga bawanserun kei lugudi barana” (Isaíasi 48:18). Tídangiñe sun lanigi Bungiu suntigabafu le adügübalin sun katei lariñagei lubuidun burí dimurei le! (2 Lúrudu 5:29; Sálumu 81:13.) Lubaragiñe hanügǘn ísüraelina dise luéi hageira, rúati chansi houn lun hawinwandun lidan darangilaü le wéiriti kei duna éibaaguati (Sálumu 119:165). Gayaraabei gibe lan irichaü le hadügübei kei lawanserun lugudi barana (Amosu 5:24). Le lúgubu berese lan Heowá hau, arufuda lumuti houn lau ínsiñehabuni ka lan üma richabei ani ínchaha lumutiña lun héibugun luéigiñe. Wéiribei hamuga lugundan ánhaña gaganbadi lun!

(Isaíasi 48:19.)

ip-2-S páh. 132 pár. 20, 21

Arufudahati Heowá woun lun wabuidun guánarügü

20 Kaba burí abinirúni heresibira ísüraelina ánhaña asaküriha? Afuranguagüda lumuti Heowá houn: “Saragu haña hamuga badügawagun siñá hamuga habahüdün kei sagoun le lárubei beya; magünrinchagun numutiña hamuga, madireirun numutiña hamuga giñe luéi narihin” (Isaíasi 48:19). Haritaguagüda lumuti Bungiu houn lumutuniña füramase lan meha lun Abüraámü hagibedaguba lan ladügawagun “kei waruguma ha siélubaña, kei giñe lagu sagoun le lárubei beya” (Agumesehani 22:17; 32:12). Keiti maha habéi ladügawagun Abüraámü hadügüni le lubeibei Heowá madünatiña lun harihini lagunfulirun füramasei le. Wéiriti hamaganbadin lun lugumadin Bungiu lidan sun dan le sügühalibei darí lun lagumuchúniwa lan hau sunsuinagubei hadünabei (2 Lúrudu 28:45). Íbini ítara, mabusenrunti Heowá lagumuchun hau lumutuniña.

21 Huuti adundehani méiniti le lídanbei burí bérusu le houn sun ha áhuduragubaña lun Heowá uguñe weyu. Kei Heowá lan íchugubalin ibagari, ligíatima asubudirubalin ka lan ligaburi lanügǘniwa ibagari buídutimabei woun (Sálumu 36:9). Mama ladüga mabusenrun lan lun gunda wamá líchugunbei adundehani woun, adüga lumuti ladüga busén lan lun buidu lan lidin woun. Ligía háluahanbalin kristiánugu inarünitiña ladundehan Heowá (Mikeasi 4:2). Góunigi lumuti lugumadin wafiñen luma wamadagua luma, góunigi lumutiwa giñe luéi lagadeiruniwa Satanási. Dan le gunfuranda wamani ka lan adundehani labusenrubei Heowá larufudahan woun lídangiñe lúrudu burí le líchugubei woun, rútiwa fe arufudaha lan woun lun wabuidun guánarügü ani ménrengun lan “lagunfulirúniwa lugumadin”. Ánhawati gaganbadi lun, wabagariduba lun sun dan (1 Huan 2:17; 5:3).

Darí wamá pérüla lánina lichú aau

(Isaíasi 49:6.)

w07-S 15/1 páh. 9 pár. 8

Puntu méiniti tídangiñeti liliburun Isaíasi (fánreinti 2)

49:6. Ka uagu lariñawagúa aban lan meha leiti Mesíasi “houn néchanigu” anhein hóunrügüñein lubéi ísüraelina lapurichiha? Ladüga le asuseredubei lárigiñe lounwen Hesusu. Ariñagatu Bíbülia gúnfuli lan Isaíasi 49:6 hawagu lani Hesusu disipulugu (Adügaü 13:46, 47). Uguñe weyu, lau hídehan saragu gürigia ha áhuduragubaña lun Bungiu, heseriwiduña kristiánugu anuadirúaaña kei “leiti [...] houn néchanigu”, ani lanügǘña leiti le “chülǘ lumoun lidise-agei ubóu” lun larugoungadagüdün hau lílana sun fulasu (Matéu 24:14; 28:19, 20).

(Isaíasi 50:1.)

it-1-S páh. 715 pár. 5, 6

Ígiraguni

Layusurún ígiraguni keisi hénpulu. Anihein dan tayanuhan Bíbülia luagu amu katei kamá hamuga tayanuhaña hawagu maríeitiña. (Isa 54:1, 5, 6; 62:1-6.) Susereti giñe ligiaméme dan le tayanuhan luagu ígiraguni o tayusuruni tabugúniwa weiriou keisi hénpulu. (Her 3:8.)

Günringuawati meha arúeihani le Hudaabei lidan irumu 607 lubaragiñe Kristu, günringuawati giñe Herusalén ani barüwaguatiña lílana adaürǘwa Babilónia. Saragu meha irumu lubaragiñe lasuseredun lira, ariñagaali meha Heowá lidan profesía hanügǘba lan huríu adaürǘwa: “Maritagua humatia luagu ígiragua nan tuma Ísüraeli, to húguchu, kei lígiragun aban wügüri tuma lúmari”. (Isa 50:1.) Kei meha aba lubéi hafigounhan ísüraelina lau hadüraaguni lúrudu lánina daradu le ladügübei Heowá hama garichati meha lun lóuseruniña kamá hamuga lígiraguña tuma óundaruni to ítaraboun houn kei háguchu, lememe néchani Ísüraeli, mama meha ladüga ligía lan adüraagubalin lidaradun lau lagumeserun adüga aransehani lun hígiragun. Íbini ítara, furíeitiña meha ísüraelina asakürihaaña ha erederubaña lun hamuriahan luma Heowá lunya lanügagun lungua hama kei lanügagun aban maríeiti tuma lani weiriou, adüga ligíame lunya hagiribudun hageiroun. Luagu lineben liri guánarügü Bungiu lun, adügati lun hagiribudun lumutuniña hageiroun lidan irumu 537 lubaragiñe Kristu, dan le lagunfulirunbei ǘrüwa-wein-duusu irumu le meha lunbei ladurarun ageiraü málouga. (Sal 137:1-9; arihualá MARÍEI.)

13-19 lidan Bián-hati

ARUFUDAHANI GEBEGITI TÍDANGIÑETI BÍBÜLIA | ISAÍASI 52-57

“Súfuriti Kristu wawagu”

(Isaíasi 53:3-5.)

w09-S 15/1 páh. 26 pár. 3-5

Lubúein Heowá: súfuriti luéigiñe wafigoun

“Meberesenwati lau” ani barüwati “kei ni kata”

3 (Aliihoualá Isaíasi 53:3.) Ma funa meha ligürewein lun Liráü Bungiu le ábanrügüti lígiruni Lúguchi le wéiribei línsiñe lun, lun liabin ubouagun íchigei libagari keisi sákürifisiu lun lesefuruniña gürigia lídangiñe figóu luma óunweni (Fili. 2:5-8, Traducción del Nuevo Mundo). Libihibei meha sákürifisiu ligía, le lásiñarubei sákürifisiu hánina animaalugu le uágubei ladimureha Lilurudun Moisesi ibiha: ferudunawa lan figóu sunsuinagubei (Ebü. 10:1-4). Ligía mosu lubéi meha heresibiruni gürigia buidu, huríutima, lugundun lǘhaña meha agurabahei Mesíasi le füramase wáalibei (Huan 6:14). Gama lumoun, meberesentiña huríu lau Kristu ani barǘ hamuti “kei ni kata” ítara kei lariñaguni Isaíasi lidan lani profesía. Abürühati apostolu Huan: “Lageiroun yebe liabin, gama lumoun meresibirun hamuti lílana lageira” (Huan 1:11). Ánheinti apostolu Féduru ariñagati houn huríu: “Habungiute wagüchagu [...] areidaguagüdübalin wügüri le lun líchuguni liñun-agei uéiriguni lun Hesukrístu le Liráü; ligira le meha hederegerubei houn lúrudugu, ani dan lálugun Pilatu lígiragüdüni, máhatün. Lubaragiñe hamuriahan lun lígirawagüdün Hesusu le sándubei ani richagua, amuriaharügü huguya lun lígirawagüdün aban gáfarahati” (Adügaü 3:13, 14).

4 Ariñagati giñe Isaíasi lidan lani profesía héchubei lan Hesusu “luagu asufuriruni [o sandi, TNM ]”. Lau sun ariñaga tan Bíbülia anihein lan meha dan labuchadun luagu Hesusu, masandirunti ni aban wéiyaasu (Huan 4:6). Ida liñati léchudun luagu asufuriruni o sandi? Ladüga gíbetiña meha gürigia sánditiña lasubudirun dan le lagunfulirunbei lau lani ministeriu ani ínchaha lumuti meha lugudemehabu lun lareidaguagüdün saragu hádangiñe (Mar. 1:32-34). Ítara liña lagunfuliruni Hesusu profesía le: “Barǘ lumuti wasandi, gidaléi wagarigu” (Isa. 53:4a; Mat. 8:16, 17).

Kamá hamuga bulesei laali Bungiu

5 (Aliihoualá Isaíasi 53:4b.) Fiúrügüñanu hádangiñe gürigia ha awinwandubaña lidaaniwagu Hesusu gunfurandei lébuna lasufurirun luma lounwen. Saminatiña meha hiibe-agei labeichuñein lan Bungiu, kamá hamuga óunaharügüti aban lagübüri sandi luagun (Mat. 27:38-44). Ariñagatiña huríu anabagua lani Hesusu Bungiu (Mar. 14:61-64; Huan 10:33). Mafigounhanti Hesusu ni aban wéiyaasu. Ani kei meha weiri lubéi línsiñe Lúguchi lun, wéiritimati meha lasufurirun láurügü lasaminarun lóunweba lan ladüga hariñagun gürigia anabagua lani Bungiu. Íbini ítara, súnwandan meha aranseñu liña lan Hesusu lun ladügüni lugundan Heowá (Mat. 26:39).

(Isaíasi 53:7, 8.)

w09-S 15/1 páh. 27 pár. 10

Lubúein Heowá: súfuriti luéigiñe wafigoun

“Barǘ hamuti kei mudún ñǘraügili lun lafarún”

10 (Aliihoualá Isaíasi 53:7, 8.) Dan le larihinbalin Huan le abadiseihabei lidin Hesusu luagun, aba lariñagun lau umalali héreti: “Anihán mudún le lóunahabei Bungiu lun lagidaruni hafigoun gürigia” (Huan 1:29). Dan le layusurunbalin Huan dimurei “Mudún” másiñati lasaminaruña lan meha luagun dimurei burí le lariñagubei Isaíasi: “Barǘ hamuti kei mudún ñǘraügili lun lafarún” (Isa. 53:7). Ariñagati giñe Isaíasi luagu: “Deregeguati lungua lun lounwen” (Isa. 53:12). Buiti giñe lun wasaminarun luagun le ladügübei Hesusu dan le lagumeserunbalin Laritaguagüle lounwen, sügügüdati aban weru buin tau diwéin houn unsu lani apostolugu ha úaraguabaña lun, ábati lariñagun: “Nita le, le añuuragüdübalin iseri daradu, le giñe áwiyurubei hawagu saragu gürigia lun ferudunawa lan hafigoun” (Mat. 26:28).

(Isaíasi 53:11, 12.)

w09-S 15/1 páh. 28 pár. 13

Lubúein Heowá: súfuriti luéigiñe wafigoun

“Saragubaña lesefurun lubúein” Heowá

13 (Aliihoualá Isaíasi 53:11, 12.) Ariñagati Heowá luagu Lubúein le lanúadirubei: “Saragubaña lesefurun”. Ka mini lubéi le? Lidoun lagumuchun bérusu 12 darí wamuti dimurei burí le: “[Amuriahati lubúein Heowá] hawagu gafigountiña”. Lau figóu nasirua hamá sun ladügawagun Adán, ani kei gafigoun wabéi sun wagía hilaguatiwa ladüga ligía “lafayeihabei figóu” (Rom. 5:12; 6:23). Ligía megei wabéi warandarun luma Heowá. Lidan kapítulu 53 tidan liliburun Isaíasi afuranguagüdawati buidu ida liña lan lamuriahan Hesusu hawagu gürigia gafigountiña. Ariñagati: “Barüti abeichúni le lasufurirubei darangilaü woun; luéigiñe burí biti le libihubei wareidagua sungua luagu” (Isa. 53:5).

Darí wamá pérüla lánina lichú aau

(Isaíasi 54:1.)

w06-S 15/3 páh. 11 pár. 2

Hayusurún biama würiña keisi hénpulu le súdiniti woun

Ka meha uma konparárua tan Sara —“[würi] to mámaboun idamuni”— luma Isaakü, le tiráü? Ariñagati Pábulu yusua tan “würi maraüheitu” Sara kei hénpulu lun ladimurehóun luagu fánreinti tánina lóundarun Heowá le siélubei, óundaruni to uáguboun layanuha Bungiu kamá hamuga lani weiriou. Arihúatu meha kei aban würi siéluna to maraüheitu ladüga lubaragiñe meha liabin Hesusu ubouagun, úagiña meha kristiánugu anuadirúaaña lau sífiri sandu ubouagu ha ítarabaña tun kei “tirahüñü” (Galasiana 4:27; Isaíasi 54:1-6). Gama lumoun, lidan Pentekosutesi le lánina irumu 33 lárigiñe Kristu, aba lounahóun sífiri sandu hawagun wügüriña hama würiña ha meha óundaragubaña lidan aban fulasu, ítara liña lira houn kamá hamuga ábaya hágurahoun keisi tirahüñü würi siéluna tuguya. Barǘ lumutiña Bungiu tirahüñü óundaruni to lirahüñüme ani adügati lira lun gafanran hamá luma Hesukrístu lídangiñe alagan le lunbei heresibiruni lábugiñe iseri daradu (Rómana 8:15-17). Ligía meha gayara lubéi lariñagun apostolu Pábulu, le ábanbei hádangiñe isaanigu ha, tidan gárada to labürüdüboun: “Ánheinti Herusalén le siéluna, mama idamuni ligia; ani lirahüñü wagía” (Galasiana 4:26).

(Isaíasi 57:15.)

w05-S 15/10 páh. 26 pár. 3

Kipu waméi ǘnabuguni inarüniti

Hénpulu lánina ǘnabuguni le buídutimabei

3 Siñati gunfuranda wamani lanarime luéirigun Heowá; íbini ítara, “aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 Krónikasi 16:9). Kati ladügübei Heowá dan nidiheri hamá lubúeingu ha ǘnabugubaña ladüga saragu turobuli? Ruti Heowá sífiri sandu, “gurasu luma dǘgüdaguaü” houn, ani rédeiti luma “le ǘnabugubei ani nidiheri ligía” (Isaíasi 57:15). Ítara liña hárügüdün lubúeingu Heowá iseri erei lun hasigirun eseriwida lun lau ugundani. Hanarimeti ǘnabugu lan Bungiu!

20-26 lidan Bián-hati

ARUFUDAHANI GEBEGITI TÍDANGIÑETI BÍBÜLIA | ISAÍASI 58-62

“Apurichiha waméi luéyuri lesefuruniña Heowá lumutuniña”

(Isaíasi 61:1, 2.)

ip-2-S páh. 322 pár. 4

Ladügǘniwa irichaü Sión

“Luéyuri lesefuruniña Bungiu lumutuniña”

4 Abürühati Isaíasi: “Anihein lani Bungiu sífiri nuagu, lugundun anúadira láadina Bungiu; óunaha láadina apurichihei iseri uganu houn gudemetiña, awalidaguagüdaña ha nidiheribaña, adimureha houn adaürǘtiña ha furisunrugubaña luagu áfuriduni” (Isaíasi 61:1). Katei san gürigia le ounahóubei apurichihei uganu buiti? Másiñati luagu guánarügü lan Isaíasi layanuhóua lidan lagumeseha, lugundun ligía meha layusurubei Bungiu lun labürühan ñunsu buiti houn huríu ha adaürǘbaña Babilónia. Gama lumoun, ariñagati Hesusu luágutima lan lagunfulira profesía le (Lúkasi 4:16-21). Ítara liña, óunaha lumuti Heowá Kristu apurichihei uganu buiti houn ǘnabugutiña ani lun lira anúadira lumuti lau lani sífiri sandu ouraméme le labadiseirunbei (Matéu 3:16, 17).

(Isaíasi 61:3, 4.)

ip-2-S páh. 326, 327 pár. 13-15

Ladügǘniwa irichaü Sión

13 Lúmagiñe Pentekosutesi le lánina irumu 33 lárigiñe Kristu lábunaguña Bungiu amu burí “tídibu wewe” —kristiánugu anuadirúaaña ha ganigitiña— lidan “Ísüraeli le lani Bungiu”, iseri néchani le lanúadirubei (Galasiana 6:16, TNM). Lumoun dan le óustaraaña lílana 144,000 gürigia ani barühali lubuidun burí katei le hadügübei uéiriguni lun Bungiu Heowá (Arufudúni 14:3). Legelewehaña óunwenbu burí lagumuhóun “tídibu wewe” le lúmagiñe irumu 1919, lárigiñebei lásaaragüdüniña Heowá hagumuhóun hádangiñe lílana Ísüraeli le lani Bungiu lídangiñe hásügürün átiri dan madügünga ni kata. Kei ru lani Bungiu le adügübaliwa sun le hemegeirubei gürigia úaraguatiña ha houn lun derebugu lan hafiñen, ítara liña kamá hamuga bunaguaali aban dabíara le buin umuti tau tídibu burí wewe le ginti (Isaíasi 27:6).

14 Afuranguagüda lumuti Isaíasi ka lan luadigimaribei “tídibu [burí] wewe” le: “Lábunaguayaba le günringuawaalibei, tararamayaba binadu burí muna to meha günrinwaguaaruboun lúmagiñe binarü, aransehóua ligíame uburugu burí le günringuaalibei” (Isaíasi 61:4). Kei lariñawagún lidan gumadi le líchugubei Siru le lurúeite Pérüsia, giributiña huríu ha úaraguabaña Babilóniagiñe lunya hararamagüdüni lubarieirun Herusalén aranseha hamounme ténpulu to meha lǘharuboun gádeiñu. Arufuda lumuti meha giñe wadagimanu lánina aransehani ligía kaba burí lan sügǘ anüga fulasu lidan burí irumu le lárigiñebei irumu 33 l. K. luma le lárigiñebei irumu 1919.

15 Adügati meha ladaürǘn, laguserawagüdün luma lounwen Hesusu lidan irumu 33 lun hasandirun disipulugu aban óunwenbu igarigu (Matéu 26:31). Gama lumoun, sánsiti gádantiña lárigiñebei larufudagun hamaisturun lungua houn lárigiñe láguyugun ani lárigiñebei lounahóun sífiri sandu hawagun, aba híchaagun houngua lun hapurichihani uganu buiti “dandu Herusalén kei sun lóubawagu Hudéa, Samaria, chülǘ lumoun lidise-agei fulasu ubouagu” (Adügaü 1:8). Ítara liña hadügün lun lagumeserun áhuduraguni inarüniti árügüda erei. Ítarameme, adügaali giñe Hesukrístu lúmagiñe irumu 1919, lun hadügün líbirigu, kristiánugu anuadirúaaña ha añahaguabaña ubouagu, lunya tararamun “binadu burí muna to meha günrinwaguaaruboun lúmagiñe binarü”. Barühaña meha lábutigu relihión ha ariñagubaña hawougua kristiánugu hamá saragu sígulu marufudahanga subudi le lúmagiñeti Heowá, ábarüga harufudahan hagumadin wügüriña o amu burí arufudahani le múaranti luma le tarufudahabei Lererun Bungiu. Adügatiña kristiánugu anuadirúaaña lun masigirun hamá lílana burí damuriguaü afalara échuni le lídangiñeti relihión mama inarüniti, sigí láamuga áhuduraguni inarüniti árügüda erei. Gumese hamuti giñe wadagimanu lánina apurichihani le madügǘnwañahagilibei aban libe lúmagiñe ñein hamá gürigia ubouagu (Márükosu 13:10).

(Isaíasi 61:5, 6.)

w12 1/12 páh. 28 pár. 5, 6

“Aganóutiña bóugudi luéi hageira” eseriwida úara lun Bungiu inarüniti

5 Guentó, teni wamá lun le lariñagubei profesía le lídanbei kapítulu 61 tidan liliburun Isaíasi, profesía le agunfulirubei luagu damuriguaü hani kristiánugu. Ka uagu lariñaga bérusu 5 luma 6 luagu ñéinbaña lan buga “terencha” ídeha hamá “lufadirinigu” Heowá?

6 Kristiánugu anuadirúaaña fádirigu ha, ani hagíaba gafanran lidan “furumiñeti ásaaruni lídangiñe óunweni”. Ani “lufadirinigubaña Bungiu luma Kristu; ábame harúeihan úara luma luagu milu irumu” (Aruf. 20:6). Gama lumoun, añahein amu kristiánugu úaraguatiña ha hemenigibaña hawinwandun lun súnwandan ya ubouagu, mama hawinwandun sielu hemeniginbei. Kristiánugu úaraguatiña ha, hagía “terencha” ha wéiribei hídehan hama ha hemenigibaña houdin eseriwida sielu. Lau sun hagundan, ídehatiña hama “lufadirinigu” Heowá hawadigimariduña kamá hamuga ‘hóunigiruña ichari’ luma ‘beibei-agei’. Hídehaña lun lichugún uéiriguni lun Bungiu lau hapurichihan, adüga hagía iseri disipulugu. Ítarati, dandu kristiánugu anuadirúaaña kei “amu mudún” háluahañanu gürigia haruma tanigi ha busenbaña heseriwidun lun Bungiu lun súnwandan ani hóunigiruñanu lau ínsiñehabuni (Huan 10:16)

Darí wamá pérüla lánina lichú aau

(Isaíasi 60:17.)

w15 15/7 páh. 6-8 pár. 14-17

deha wamá lun laganwoundun úarani luma darangilaü

14 Gíbetiña gefentiña luagu Heowá ha lǘhaña lidan inarüni winwan hamuti fiú lídangiñe asansiruni le adügübei lun buídutima lan fánreinti tani lóundarun Bungiu le yaabei ubouagu. Kéiburi saragu irumu lubaragiñe le, anihein meha aban alidihati damuriguaü lidan kada damuriguaü, tidan kada sukursáli anihein meha aban alidihati sukursáli ani anihein meha giñe aban íbiri le agumadihabei tidan Watch Tower. Íbini añahein lan meha íbirigu úaraguatiña ha íderagubaliña íbirigu ha, ábanrügüñein meha gürigia desidírü kaba lan adügǘwa lidan damuriguaü, tidan kada sukursáli luma tidan sukursáli to Merigaboun. Gama lumoun, lárigiñe irumu 1970 aba ladügǘn aransehani lun mámarügü lan aban wéiyaali lidan afiñeni desidírü. Uguñe weyu lidan kada damuriguaü añahein wéiyaaña lidan afiñeni, tidan kada sukursáli anihein aban Sétanu le Arihibei tau Sukursáli ani anihein giñe aban sétanu hani kristiánugu anuadirúaaña le arihibei lau hawadigimari gefentiña luagu Heowá lidan sun ubóu.

15 Buiti meha asansiruni burí le tun lóundarun Bungiu. Ka uagu? Ladüga adügǘwati meha ladüga buídutimahali lan gunfuranda wamanu Bíbülia. Buiti katei le tun lóundarun Bungiu ladüga mámarügaali aban gürigia desidírü. Sun wéiyaaña lidan afiñeni ha líridubaña Heowá gayarati hídehan lau lubuidun burí hagaburi.

16 Ayanuha wamá luagu fiú asansiruni le adügǘwaalibei lidan lagumuhóun burí irumu. Guentó aniheinhali dibuhu buíduburiti tidan wani agumeiraguagüdüni. Ani yusu wamuti giñe iseri burí katei le áfuachuti lun gayara lan wapurichihan. Seremei lun wani páhina lidan Internet jw.org, hibihiñein saragu gürigia ídemuei le hemegeirubei. Sun asansiruni le arufudati hínsiñe hamá gürigia lun Heowá ani samina lan hawagun.

17 Gebegiti giñe asansiruni burí le adügǘwaalibei lidan adamuridaguni woun lun gayara lan waturiahanu Bíbülia wábuguarügü o hama waduheñu. Rútiwa giñe seremei luagu asansiruni burí le lídanbei wani programa lánina adamurini. Sagü irumu buídutimarügüti! Rútiwa giñe seremei luagu sun le wafurendeirubei tídangiñe ámuñegueinarügü leskuela to ñein lubéi wibiha arufudahani tídangiñeti Bíbülia. Sun asansiruni le arufudati Heowá lan adundehabarun lóundarun ani laganwoundagüdüñein lan úarani luma darangilaü le tídanbei lóundarun.

(Isaíasi 61:8, 9.)

w07-S 15/1 páh. 11 pár. 4

Puntu méiniti tídangiñeti liliburun Isaíasi (fánreinti 2)

Óunabagülei lun álügüdahani tídangiñeti Bíbülia:

61:8, 9. Ka “daradu magumuchaditi” uágubei ladimurehóua lidan bérusu le, ani kátaña adügawagúnibaña? Adimurehóuati ñein luagu iseri daradu le ladügübei Heowá hama kristiánugu anuadirúaaña. “Amu mudún” adügawagúnibaña, saragu míñunu gürigia ha ánharubaña lun uganu le hapurichihabei kristiánugu anuadirúaaña (Huan 10:16).

27 lidan Bián-hati darí 5 lidan Ǘrüwa-hati

ARUFUDAHANI GEBEGITI TÍDANGIÑETI BÍBÜLIA | ISAÍASI 63-66

“Ladügüba ‘iseri sielu’ luma ‘iseri ubóu’ lun wabuinchun lau ugundani”

(Isaíasi 65:17.)

ip-2-S páh. 383 pár. 23

“Buin humá lau ugundani lun sun dan luagu le lunbei nadügüni”

23 Tidan líburu Arufudúni, afuranguagüdawati katei burí le larihibei apostolu Huan lidan aban arufudúni libügürü luéyuri Heowá le anitebei, le ídanba lubéi lagumucha Bungiu lau ubóu wuribati le. Lárigiñe, aba lagurúniwa Satanási lidoun fusu le mébehabei (Arufudúni 19:11–20:3). Lárigiñe lafuranguagüdüni Huan sun lira, aba labürühani lememe meha lariñagubei Isaíasi lidan lani profesía: “Aba narihin aban iseri sielu luma aban iseri ubóu”. Lidan burí bérusu le lárigiñebei abahüdaguni luáguti arufudúni wéiriguti le, adimurehóuati luagu dan leme ídanba lubéi laransehei Bungiu sun mégeiti le ubouagubei (Arufudúni 21:1, 3-5). Chóuruti wéiribei lan lubuidun lagunfulirun füramasei le adügǘbei lun Isaíasi libügürü ñeinbei lan aban “iseri sielu luma aban iseri ubóu” le lunbei lanügüni Bungiu. Hawinwanduba iseri hawuyeri gürigia ha lúnbaña hawinwandun ubouagu lábugiñe lagumadihan iseri sielu lidan aban paraísu, dándume lidan sun le geyegubei hau kei lidan heseriwidun lun Bungiu. Sanditiwa aban óunwenbu awalidaguni lau ichouruni le ichugúbei woun luagu “labulieidúaba [lan] sun le sügühalibei, [sandi, asufuriruni luma amu burí lamiselu le wasufurirubei, ani] úaalime aritaguti luagun”. Meberesenga kaba burí lan aritaguni wakipura lidan wasaminan lídounme dan ligía, úabei ni aban lídangiñe adügüti lun wasandiruni óunwenbu igarigu le hasandirubei saragu wádangiñe tidan wanigi uguñe weyu.

(Isaíasi 65:18, 19.)

ip-2-S páh. 384 pár. 25

“Buin humá lau ugundani lun sun dan luagu le lunbei nadügüni”

25 Adügati giñe Heowá “aban Herusalén gúndaati” uguñe weyu. Ka mini lubéi le? Kei buga wafurendeiruni, gumeseti iseri sielu agumadiha lidan irumu 1914 ani lachülürüba dan lun hóustarun 144,000 gürigia ha lúnbaña houdin arúeiha luma Kristu sielu lidan Larúeihan Bungiu. Yúsuati dimurei “Iseri Herusalén” lun laguarún houn 144,000 ha danme le lídanhaña aban (Arufudúni 21:2). Luagu Herusalén le lariñaga Bungiu: “Nadügüba aban Herusalén gúndaati, hama gürigia gúndaatiña lun haganóun ñein”. Layusurubei Heowá Iseri Herusalén lun líchugun saragu abinirúni houn gürigia ha gaganbadibaña. Maganbúnhalime ayahuni, ua ligíame íruni, lugundun lagunfulirubei Heowá “tayumahan [w]anigi” (Sálumu 37:3, 4).

(Isaíasi 65:21-23.)

w12 1/9 páh. 14 pár. 4, 5

Milu irumu lau darangilaü... lúmaya saragu!

‘HÁBUNAGUBA GÜRIGIA HABAN, BUNAGUA HAGÍAME BEIBEI’

4 Ka gürigia mabusenrunbei aban muna to lani, to ñein lumuti chóuruñu lan hasandiragun liduheñu houngua? Gama lumoun, gaturobulintiña hibe-agei gürigia uguñe weyu lun hadarirun haban. Murugu haña gürigia lidan burí uburugu, ani saragu hádangiñe háfaguña lidere ibagari lidan burí fulasu gudemeti lidan aban óunwenbu gudemei. Houn gürigia ha aban uénedü hawinwandun tidan aban muna to gadünamatu.

5 Lábugiñe Larúeihan Bungiu harihibei sun gürigia lagunfulirun hayumahan lun gaban hamá, lugundun ariñagati Isaíasi lidan aban profesía: “Hábunaguba gürigia haban ábame haganóun tidan, hábunaguba beibei ábame héiginu tin” (Isa. 65:21). Inarüni añahein hamá gürigia ha gábantiña uguñe weyu, añahein hagía hawinwanduña tidan aban óunwenbu muna ani wéiriti hafulasun. Gama lumoun, súnwandan láuñanu lan anufudei luéi heferidirunu ladüga turóbuli lánina seinsu o ladüga híweruhoun o ladüga amu katei wuribatimati. Lagidarubei giñe Larúeihan Bungiu idiheri burí le, lugundun abürühati profeta Mikeasi: “Haganóuba súngubei manufudeuga, gayaraabei hemeraagun lábugiñe tamuñadiri hanadürigu” (Mik. 4:4).

Darí wamá pérüla lánina lichú aau

(Isaíasi 63:5.)

w07-S 15/1 páh. 11 pár. 5

Puntu méiniti tídangiñeti liliburun Isaíasi (fánreinti 2)

63:5. Ida liña lágüdahani ligañi Bungiu Bungiu guánarügü? Dan le garicha lan Bungiu lun lagañidun ligíarügüñein lagañidun. Ágüdaha lumuti ligañi Bungiu Bungiu guánarügü ladüga ínchaha lani lun laguseragüdün lau irichaü.

(Isaíasi 64:8.)

w13 1/6 páh. 24 pár. 3-5

Ígira humá lun luadigimaridunün lererehan Heowá

IDA LIÑA LAYUSURUNI HEOWÁ LUBAFU KEISI NADAGIMEINTI MÚA

3 Dan le tayanuhan Bíbülia luagu lubafu Heowá hawagu gürigia luma hawagu néchanigu, aba konparárü tani ítara: “[Heowá], buguya Wáguchibei, múa wagía, buguya nadagimeinti múa ligía, ladügün lubeiti búhabu sun wagía” (Isa. 64:8). Gayarati laranseruni nadagimeinti múa múa kei auti labusenra ani siñati lariñagun múa ni kata luagu lira. Ligiaméme asuseredubei hama gürigia luma Bungiu. Ítara kei siñá lan lariñagun múa lun nadagimeinti múa ka lan lunbei ladügüni lau, siñati giñe wariñaguni lun Bungiu ida luba lan lawadigimariduniwa (aliiha huméi Heremíasi 18:1-6).

4 Arufuda lumuti Heowá lau le ladügübei hau binadu ísüraelina gayara lan ladügüni lememe ladügübei nadagimeinti múa lau múa. Gama lumoun, anihein aban katei le ídanbei mítaran lan Heowá kei aban nadagimeinti múa. Gayarati lárügüdün aban nadagimeinti múa murusun múa lun ladügün furumiñeguarügü ágeidinaü lau ítara kei auti liabin lun lidoun lichügü. Anti Heowá, nadagimein lumutiña san gürigia hama néchanigu kei auti ladagaragua luagu lun ladügüniña híbiri buítiña híbiri wuribatiña? Ariñagatu Bíbülia mítaran lan. Rúhali Heowá aban idewesei súdiniti houn sun gürigia: líbürei lun desidírü hamá. Gabaroun lumuti Heowá idewesei le dan le layusuruni lubafu. Ligíati, lun gayara lan lawadigimaridun Bungiu luagu aban gürigia mosu gürigiaba lan ligía abusenrei (aliiha huméi Heremíasi 18:7-10).

5 Ida liñati layusuruni Heowá lubafu keisi Nadagimeinti Múa le Wéirigutimabei hawagu gürigia ha derebaña ani mígiraguagüdüntiña houngua lun hawadigimariduniwa? Dan le siñá lan layusurún aban murusun múa lun le yebe unbei labusenrúa, másiñati mosu lan ladügǘniwa amu luwuyeri ágeidinaü lau o lagünrinchawagun. Libe-agei dan, susereti lira ladüga mawadigimaridun lani nadagimeinti múa múa ligía buidu. Gama lumoun, maweiyasunti aban katei ítarati asusereda lun Nadagimeinti Múa le Wéirigutimabei (2 Lur. 32:4). Dan le masansirun lani Heowá ligaburi aban gürigia, ladügarügü liña mígiraguagüdün lan gürigia ligía lungua lun lawadigimariduniwa. Yusu lumuti Heowá lubafu lun lawadigimaridun hawagu gürigia según hígiraguagüdün houngua. Gürigia ha ígiraguagüdübaña houngua lun lawadigimaridun hawagu, awadigimarida lumutiña lun habuidun guánarügü. Aban hénpulu, ítara haña kristiánugu anuadirúaaña kei sóudieru “le unbei gudemehabu lan” le adügǘbei lun “sóudieru [lan] le díseguati layusurun [o le mayusurúnti lun furumiñeguarügü katei]”. Ánhañati ha mígiraguagüdünbaña houngua lun lawadigimaridun Bungiu hawagu, chülüti oura “lun larufuduni lueirin ligañi hawagu [lun] [...] hagünrinchawagun” (Rom. 9:19-23).

    Garifuna | Biblioteca en Línea (2009-2025)
    Áfurida lídangiñe sesióun
    Agumesera sesióun
    • Garifuna
    • afanreinha huméi
    • Ligaburi larihín
    • Copyright © 2025 Watch Tower Bible and Tract Society of Pennsylvania
    • Ida luba layusurún
    • Wani polítika
    • Laranserawagún dátosu
    • JW.ORG
    • Agumesera sesióun
    afanreinha huméi