Ariñahani le lunbei lakutihóun lidan adamuridaguni Habagari Kristiánugu luma Heseriwidun
6-12 lidan Ǘrüwa-hati
ARUFUDAHANI GEBEGITI TÍDANGIÑETI BÍBÜLIA | HEREMÍASI 1-4
“Búmabadina lun nóunigirunibu”
(Heremíasi 1:6.)
w11-S 15/3 páh. 29 pár. 4
Agagudúañu wamá kei meha Heremíasi
4 Másiñati kéiburi lan meha 25 irumu lau Heremíasi dan le liridúnbei keisi óunigiruti le íchaahati uganu lúmagiñe Bungiu (Her. 1:1, 2). Íbini ítara, sandiguati meha lungua kei aban irahü le siñaguati lungua lun ladimurehan houn wéiyaaña mutu ha lǘhañabaña alidihaña lílana Ísüraeli (Her. 1:6). Mosu meha líchugun aban uganu lánina asiadihani houn fádirigu, houn profetagu yéetiña, houn alidihatiña luma houn sun ha éibaagubaña “lidan hémeri” agarabaagua houngua luagun Bungiu “súnwandan” (Her. 6:13; 8:5, 6). Tagünrinchawagúa meha ténpulu wéirigutu to lábunaguagüdüboun urúei Salomón, fulasu le meha barühalibei yarafa lun gádürü-san irumu ágüdahei áhuduraguni inarüniti. Ani leredera meha Herusalén luma Hudá málouga, lugundun hanügǘwa meha lílana adaürǘwa dise luéi hageira. Mosu meha líchuguni profeta uganu lira meferidirunga dan!
(Heremíasi 1:7-10, 17-19.)
w05-S 15/12 páh. 23 pár. 18
Ka un gaganbadi humá: lun Bungiu, o houn gürigia?
18 Ariñagati Bungiu lun profeta Heremíasi: “Búmabadina lun nóunigirunibu” (Heremíasi 1:8). Ka gayaraabei ladügüni Heowá lun lesefuruniwa luéi éibaahouni uguñe weyu? Gayaraati ladügün lun ñein lan aban aguseragüdüti le úati himei lan ni aban, kei meha Gamalieli, o lun lárügüdüni aban gumadimati le buídutimati igaburi lubara le máhabei houn lumutuniña Heowá. Gama lumoun, ñeinbei dan, lígirun Heowá lun lasigirun éibaahouni (2 Timotéu 3:12). Anhein ígira Bungiu lun wéibaahoun, súnwandan líchugubei lan erei le wemegeirubei woun lun wawandun (1 Korintuna 10:13). Meberesenga ka lan desidírü lubéi Heowá lígirun lun lasuseredun, subudi wamaali lau ichouruni kaba lan asusereda: magañeirunbaña ha ageindagubaña hama lumutuniña Bungiu lugundun hageindaguña luma Bungiu.
jr-S páh. 88 pár. 14, 15
“Níchuguba saragu éigini luma uniñein houn ha buchaañabaña uagu”
RÚTIWA SAN DǗGÜDAGUAÜ HOUN HA BUCHAAÑABAÑA UAGU?
14 Buídubei wadüga ánhawa araramagua asaminara libügürü halíagiñe lan meha libiha Heremíasi dǘgüdaguaü luma ida liña lan giñe líchugun dǘgüdaguaü houn ha buchaañabaña uagu (Her. 31:25). Lúmagiñetima Heowá libiha profeta dǘgüdaguaü. Lun hamuga meha ñéinñadiwa lan, chóuruti wasagaruña lan hamuga saragu erei lídangiñe waganbuni Heowá ariñaga woun: “Ru numutibu uguñe keisi uburugu derebuguti [...]. Hawuribuhaba buma, gama lumoun magañeirun habadibu, lugundun búmabadina lun nóunigirunibu” (Her. 1:18, 19). Linarün lubeiti Heremíasi dan le lariñagunbei lun Heowá: “Buguya le nérebei, le ágüdahabalina, naramudaguagüle lidan lidere dan” (Her. 16:19).
15 Yuuti lun waritaguni ariñaga lan Heowá lun Heremíasi: “Búmabadina”. Íderagua lumutiwa san dimurei le asubudirei ka lan gayaraabei wariñaguni dan le megei lan somu wasubudirágun dǘgüdaguaü? Mama ligiaméme wasubudiruni ka lan lemegeirubei somu íbiri o iduhei lumoun wíchuguni katei ligía lun lidan dan. Liibe-agei dan, buítimabei wadügüni le ladügübei Bungiu lun Heremíasi: werederun lurugabu gürigia le nidiheribei, dánmeti wadarirun aban chansi buiti, wariñagun fiuraü dimurei le samina wamuti buidu lun lubaragiñe wásurun ariñaga. Mama mosu gariñagadi wamá lun wíchugun gurasu luma dǘgüdaguaü houn amu; buídurügüti lau wariñagun bianraü dimurei le arufudati lun gürigia berese wamá lau, adüga lan le gádanbalin lun wadiheridun ani hínsiñe lan woun. Adügati burí dimurei ítarati lun hasandiragun amu houngua buidu (aliihoualá Ariñawagúni 25:11).
Darí wamá pérüla lánina lichú aau
(Heremíasi 2:13, 18.)
w07-S 15/3 páh. 9 pár. 8
Puntu méiniti tídangiñeti liliburun Heremíasi
2:13, 18. Biámañein katei wuribati hadügün ísüraelina ha múaragunbaña: le furumiñeti, hígiruni Heowá —le úmagiñebei habihei sun buiti le hámabei, hadundehóun luma hounigirúniwa—, ánheinti libiaman, hóundarun hamoun lisudaranigu Ehiptu luma hamoun lisudaranigu Asiria, ítara liña lira kamá hamuga hadügüña hafusun houngua. Hadügüña giñe gürigia aban katei ítarati uguñe weyu, dan hígiruni Bungiu le inarünibei lun hafalaruni hasaminan luma harufudahan gürigia o hádaragun houngua lidoun polítika, lau hadügüni lira, ítara liña kamá hamuga hasansiruñein “lísensen duna wínwanti” luagu “fusu [...] le mágüdahanti duna”.
(Heremíasi 4:10.)
w07-S 15/3 páh. 9 pár. 4
Puntu méiniti tídangiñeti liliburun Heremíasi
4:10; 15:18. Ka uagu lariñawagúa yeeda lániña Heowá lumutuniña? Lidan meha lidaani Heremíasi añahein meha profetagu ariñagutiña iyeeni (Heremíasi 5:31; 20:6; 23:16, 17, 25-28, 32). Ani meredehan lumutiña Heowá luéi hariñaguni iyeeni burí ligía.
13-19 lidan Ǘrüwa-hati
ARUFUDAHANI GEBEGITI TÍDANGIÑETI BÍBÜLIA | HEREMÍASI 5-7
“Aba meha madügün hamaali lan lugundan Bungiu”
(Heremíasi 6:13-15.)
w88-S 1/4 páh. 11, 12 pár. 7, 8
Heremíasi... profeta mínsiñewati le asubudiragüdübalin lasiadihan Bungiu
7 “Hawuribuhaba buma —liña Heowá—, gama lumoun magañeirun habadibu.” (Heremíasi 1:19.) Kaba funati uagu habusenra huríu hama harúeitegu hageindagun luma profeta le? Ladüga arufuda lani uganu le lasubudirágüdübei mabuidun lan hóuserun lau darangilu haña lan houngua lidan gádantiña áhuduragua lun Bungiu láurügü hafalarun échuni. Furanguti lariñaguni Heremíasi: “Darú hamuti harigeirugu, luéi haganbun; mabusenrúntiña haganbuni bererun adügarügütiña bula lau. Súngubei, wéinamuhaña hama ñǘbürigiña luágunrügüñein íweruhani haritagua; dandu profetagu kei fádirigu [ha yebe lúnbaña mígirun hamá lun heferidiruni gürigia lubuidun hamene, housan, hechun luma hamadagua luma Bungiu], íweruhatiña lau eyeeraguni”. (Heremíasi 6:10, 13.)
8 Inarüni adundeha hamaniña meha wügüriña ha ísüraelina lidan luáguti adagaragüdüni. Lau sun meha falá hamani sun échuni le afalarúbei lidan áhuduraguni inarüniti, mama meha tídangiñe sun hanigi hadügei. Súdinitimati meha houn hafalaruni échuni burí ligía sügǘ lau hóuserun lau arumani. Ani híchuguña meha giñe lábutigu hani huríu relihión emenigini málati houn abayayahaña lau hariñagun houn “lídanñein lan dan sun katei”, dan le mítaran lan. (Heremíasi 6:14; 8:11.) Ítara liña, heyeeduñanu meha alidihatiña relihión lílana fulasu lau hadügün lun hasaminarun lídanñanu lan darangilaü luma Bungiu. Saminatiña meha ua lan kaba lan uagu hadiherida, ladüga lumutuniña hamá Heowá ha séfuñu haña lidan uburugu sánduti le ñein tubéi ténpulu. Saminati funá san Heowá kei hagía?
(Heremíasi 7:1-7.)
w88-S 1/4 páh. 12 pár. 9, 10
Heremíasi... profeta mínsiñewati le asubudiragüdübalin lasiadihan Bungiu
9 Ruti Heowá gumadi lun Heremíasi lun lararamun hagibugiñe gürigia lubadu tubenari ténpulu lun lasubudiragüdüni Luganute houn sun ha ebelurutiña áhuduragua ñein. Mosu meha lariñagun houn: “Memenigida humá hawagun ha eyeedubalün ariñaga: ‘Anuhán litenpulun Aburemei, anuhán litenpulun Aburemei!’ [...]. Meseriwínbei hun lun ni kata”. Míchugun hamuti meha huríu hafiñen luagu Bungiu, lúnrügüñein meha le harihibei habagarida sun añaha lan apantaha tau ténpulu. Bulíei hamá meha ínchaha lániña Heowá lun duari hamá lau dimurei burí le: “Sielu lálanabei narúeihan, ubóu lébubei nugudi. Halíaba gayara lan hadügün aban ubaraü nun?”. Le linarün katei, hásiñarubei meha Heowá, Bungiu le Suntigabafu, akipura tidan ténpulu to hadügüboun, ka lan yebe lanarimebei tuéirigun! (Heremíasi 7:1-8; Isaíasi 66:1.)
10 Aba lasigirun Heremíasi lau ladeinhan houn sun hagía: “Íweruhatün, áfaraha, agabarahatün, fiñú huguya le málati, águdaha huguya kupali lun Baali, seriwi huguya houn búngiugu [...]. Haritaguatün luagu chóurugua humá hungua ya; luagu gayara lan hasigirun adaaguei burí katei le, le aubei magundan nan”. Kei meha huríu lan lumutuniñabaña Bungiu ha hínsiñetimabaña lun, saminatiña meha lígirubaña lan lun hadügüni sun luwuyeri maricharaguni le habusenrun, merederunrügü hamaali ligía hadagaragüdün lun tidan ténpulu. Gama lumoun, anhein meha samina habéi huríu ítara liña lan Heowá kei aban úguchili huali tagumadihan le íchugubalin sun lamuriahan lisaani le ábanrügüti luma lun, lachülüra meha dan lun híchugun fe bulíeiguaaña lan. (Heremíasi 7:9, 10; Áfuriduni 19:5, 6.)
(Heremíasi 7:8-15.)
jr-S páh. 21 pár. 12
Seriwi wamá “lidoun burí lagumuhóun dan le”
12 Lidan lagumeserun larúeihan Hoakimü, óunaha lumuti Heowá Heremíasi ténpulurugu ariñagei houn huríu furangu wuriba lan hóuserun. Barǘ hamaaru meha ténpulu keisi aban lúyawa uraü; ani lígirubaña meha Heowá anhein mígirun hamá luriban burí katei le hadaagubei, kéiburi híweruhan, háfarahan, hagabarahan, háfiñurun luagu katei málati, hágudahan kupali lun Baali luma heseriwidun houn amu búngiugu. Ladügüba meha tun ténpulu luma houn biangua tigibu ha áhuduragubaña tidan kei ladüga tun sanduariu to meha Siloboun lidan lidaani fádiri le íñugutimati, Elí. Ladügüba méhati lira lun lerederun lumúan Hudá “kei aban fulasu mageirawati” (Her. 7:1-15, 34; 26:1-6). Chóuruti weiri lan meha ganigi le lemegeirubei Heremíasi lun líchuguni uganu le! Másiñati hagibugiñe lan saragu gürigia lariñagei, le ñein hamuti gürigia wéirigutiña ani gabafutiña. Susereeli giñe houn saragu wádangiñe, uguñe weyu, megei wamá ganigi lun wapurichihan ǘmada o houn wügüriña rísitiña ha súdiniti habara. Gama lumoun, gayaraati wachoururuni le: anihein Bungiu wamá, ítara kei meha lúmañein lan Heremíasi (Ebü. 10:39; 13:6).
Darí wamá pérüla lánina lichú aau
(Heremíasi 6:16.)
w05-S 1/11 páh. 23 pár. 11
Hawinwanduba san kei labusenruni Bungiu?
11 Ígiratiwa san lun Lererun lan Bungiu adundehei wabagari lidan sun katei? Buiti lun wararamagun asaminara kada átiri dan lun wakutihani ligaburi wóuserun. Lun wadügüni lira, gayaraabei lahuudun le lariñagubei bérusu le woun: “Lariñahare Aburemei houn lumutuniña: ‘Rárama humá luagu burí üma, ariha humá, hálügüdaha luagu binadu üma, hagéi lan üma le buídubei; falá huméi, ábame hadarirun emeraaguni’” (Heremíasi 6:16). Másiñati adüga lan dimurei burí le lun wasaminarun luagun aweiyasuhati le araramugubei lun lamuriahan adundehani. Ligía hamuga meha lunbei hadügüni ísüraelina, lumutuniña Heowá ha derebaña: hadariruni ida luba lan hagiribudun lidoun “binadu üma”. “Üma le buídubei” le meha hafalarubei binadu hagüchagu ha úaraguabaña ani le uéigiñebei hadireira lidan libidiounigan hau. Híruti mígirun hamani ísüraelina lidere haganbun lun adundehani le líchugubei Heowá houn lau ínsiñehabuni. Ariñagati bérusumeme le: “Aba hariñagun: ‘Uá, mabusenrúntiwa wafalaruni üma ligía’”. Ánhañati lumutuniña Bungiu ha uguñebaña weyu, mítaranti wóunabun lun adundehani le kei meha ísüraelina ha.
(Heremíasi 6:22, 23.)
w88-S 1/4 páh. 13 pár. 15
Heremíasi... profeta mínsiñewati le asubudiragüdübalin lasiadihan Bungiu
Lalubahani Hudá le lábunagubei
15 Kéiburi lidan irumu 632 lubaragiñe lidaani Hesusu. Ábürühaali meha Asiria háhaburugun babilóniana luma háhaburugun médiana, ánheinti Ehiptu, le luéigiñebei suru libiti Hudá, mámaali meha aban arúeihani le wéiriti lubafu. Luéigiñeba meha nórute liabin létima lunbei ladügün wuribati lun Hudá. Ligía, aban meha ñunsu wuribati lunbei líchuguni Heremíasi houn huríu líledi! “Laranseruña aban néchani héreti luéigiñe nórute [...]; fásitiña, magudemenihabutiña [...]. Aranseña lun hawuribuhan luma Sión.” Lidoun meha dan ligía, Babilónia meha arúeihani gabafuti le árügüdeinabei erei. Ligíaba meha layusura Bungiu lun labeichuniña lílana Hudá, ha mafiñebaña. (Heremíasi 6:22, 23; 25:8, 9.)
20-26 lidan Ǘrüwa-hati
ARUFUDAHANI GEBEGITI TÍDANGIÑETI BÍBÜLIA | HEREMÍASI 8-11
“Dánrügüñein hafalaruni gürigia ladundehan Heowá buidu lan lidin houn”
(Heremíasi 10:2-5, 14, 15.)
it-2-S páh. 633
Pepinu
Lun meha mayarafadun hamá animaalugu luagun bunaguaü, anihein meha giñe dan labunún burí wagabu, wewe o amu katei lidan ichari. Luagu meha lira ladimureha profeta Heremíasi dan le konparárü lubaliña haguariuan néchanigu ha áhuduragubaña houn búngiugu mama inarüniti hama “abugahatiña dunuru lidan ichari”. (Her 10:5.)
(Heremíasi 10:6, 7, 10-13.)
w04-S 1/10 páh. 11 pár. 10
Kátaña íchugubaña uéiriguni lun Bungiu uguñe weyu?
10 Dan lan yebe wiñuruni warihin sielun lun waríaguniña waruguma o waríaguni katei burí le ubouagubei, furanguti larihíniwa anihein lan adügüti sun katei (Heremíasi 10:12). Lunti lubeiti úara wamá tau sun wanigi hama gabagaritiña siéluna ha ariñagubaña lau umalali héreti lun Heowá: “Wabureme, Wabungiute, garichatibu lun beresibiruni uéiriguni, inebesei, luma ubafu, ladüga buguya adügübalin sun katei” (Arufudúni 4:11). Íbini ítara, mebeluti lidoun hasaminan saragu aturiahatiña siensia anihein lan adügüti sun katei, íbini weiri tan hanigi lau lubuidun ligaburi ladügǘn sun le larihibei hagu (Éfesuna 1:18). Ítara kei maguini lan lariñagun gürigia le aríagubei aban lubuidun dibuhu tuagu aban murusun manda ua lan ni aban adügüti lubuidun dibuhu ligía, ítara liña giñe maguini lan lariñawagún ua lan aban Suntigabafu le adügübalin lubuidun burí katei le ariawagúbei ubouagu. Ligía lariñawagúnbei maricha hamá ha mafiñenbaña luagu Bungiu!
(Heremíasi 10:21-23.)
w15-S 1/9 páh. 15 pár. 1
Sanditün san móuserun lanün Bungiu kei hagurabuni?
Arufudati luriban burí sügǘ le anügübei fulasu ubouagu meseriwín lan hagumadihan gürigia. Ani mámarügüñein ladüga manügün hamá gumadimatiña darangilaü, ichouruni ni ugundani houn gürigia, ladüga giñe gadurun hamá luagu chagaguaü le ubouagubei. Ligía tariñagunbei Bíbülia: “Mabafuti gürigia luagu lémeti” (Heremíasi 10:23, Diego Ascunce). Ánheingubeirügü lagumadiha Bungiu ubóu ligíarügübei wawinwandun lidan darangilaü le durati, ugundani luma lubuidun dan; ligía labusenrubei woun (Isaíasi 45:18).
Darí wamá pérüla lánina lichú aau
(Heremíasi 9:24.)
Sigí humá ayarafada lun Heowá
16 Anihein katei le uágubei gayara lan wapantahan. Kéiburi ladüga gefentiwa lan luagu Heowá (Her. 9:24). Ínsiñeni le wasandirubei wawougua íderagua lumutiwa lun desidírü wamá buidu luma lun madüraagun wamani lilurudun Bungiu le lánina laruman ibagari. Gama lumoun, ánhawa asaminara súdinitima lan le wasaminarubei o wabara gayarabei wadisedun luéi Heowá (Sal. 138:6; Rom. 12:3).
(Heremíasi 11:10.)
w07-S 15/3 páh. 9 pár. 2
Puntu méiniti tídangiñeti liliburun Heremíasi
3:11-22; 11:10-12, 17. Ka meha uagu líridaña Heremíasi lílana diisi türibu lánina arúeihani le nórutebei lidan le lariñagubei anhein ábürühaali lubéi meha Samaria lidan irumu 740 lubaragiñe lidaani Hesusu? Lugundun mámarügüñein meha hawagun lílana Hudá lábürügüdei Heowá ligañi lau lagünrinchawagun Herusalén lidan irumu 607, lábürügüdüñein meha giñe hawagun sun ísüraelina (Esekiéli 9:9, 10). Anihagua meha katei burí le súdinibei houn lílana arúeihani le lánina diisi türibu —íbini lárigiñe lábürühan— uburugu Herusalén, kei larufuduni uganu burí le híchugubei lani Bungiu profetagu.
27 lidan Ǘrüwa-hati darí 2 lidan Gádürü-hati
ARUFUDAHANI GEBEGITI TÍDANGIÑETI BÍBÜLIA | HEREMÍASI 12-16
“Bulíei hamuti ísüraelina Heowá”
(Heremíasi 13:1-5.)
jr-S páh. 51 pár. 17
Mígira wamá lun teyeeduniwa wanigi to geyeedaguadiboun
17 Lun meha gayara lan lagunfulirun Heremíasi buidu lau wadagimanu le ichugúbei lun, mosu meha gaganbadi lan lun ladundehan Bungiu. Lun hamuga meha wagía lan ligía, gaganbadibadiwa yebe san? Chülüti dan lun lariñagun Heowá lun Heremíasi lun lagañeihan aban gamisa linu to meha ayusurúboun kei béliti o galasunsiyu luma lun ladaürünu. Lárigiñe, aba líchugun Heowá gumadi lun Heremíasi lun laweiyasuhan darí duna Éufüratesi. Anhoun wariha mapa, warihibei séingüñein lan san kilometuru (300 maili) lidise duna Éufüratesi luéi Herusalén. Danme buga lachülürün Heremíasi ñeinhin, mosu meha laramudunu gamisa tuguya lidan luhuyun aban dübü ani lárigiñe, ábame lagiribudun Herusaléun. Dan lárigiñe, aba lamuriahan Bungiu luma Heremíasi lun lagiribudun áluahoun gamisa linu tuguya (aliihoualá Heremíasi 13:1-9). Lidan súngubei, yarafañein lun 2,000 kilometuru (1,200 maili) laweiyasuhan Heremíasi. Mafiñentiña saragu hádangiñe ha ayanuhabaña wuriba tuagu Bíbülia luagu dise lan laweiyasuhan Heremíasi ítara, ni luagu aweiyasuha lan saragu hati (Ésüd. 7:9). Gama lumoun, kei ligía lan lariñagubei Bungiu lun Heremíasi, ligía ladügübei.
(Heremíasi 13:6, 7.)
jr-S páh. 52 pár. 18
Mígira wamá lun teyeeduniwa wanigi to geyeedaguadiboun
18 Samina wamá luagun profeta éibugeina luéigiñe luwübüri Hudéa luagun duna Éufüratesi ani lárigiñe, según üma le lárügüdübei, ásügüreina lurageirugugiñe fulasu mageirawati. Sun lira, lúnrügü lidin aramuda aban gamisa linu! Másiñati adüga lan lilü luéiyasun lun hálügüdagun lubesinanigu houngua hagéi lan. Dan lagiribudunbei, úaaru gamisa linu luma. Lárigiñe, aba lariñagun Bungiu lun lunya ladügüni limigifen wéiyaasu ligía lun lidin anügoun gamisa tuguya, to ñalaaruboun ladarirunu ani “meseriwínharu lun ni kata”. Ma gayaraati ladügün lira lun lasaminarúniwa leferidiruñein lan meha Heremíasi lidaani lau lira ani láfaaguña lan luagu ni kata? Ánheinti Heremíasi, le meha ígiraalibei lun lawadigimariduni Bungiu, masaminarunti ítara. Mekeharunti, adügarügü lumuti le ariñawagúbei lun.
(Heremíasi 13:8-11.)
jr-S páh. 52 pár. 19, 20
Mígira wamá lun teyeeduniwa wanigi to geyeedaguadiboun
19 Lárigiñehali ladügüni Heremíasi libiaman luéiyasun lafuranguagüdei Heowá lun leseriwiduba lan buga le ladügübei keisi aransehani lubá lasubudiragüdün aban uganu dǘgüdati: “Gürigia wuribatiña ha, ha máhabaña haganbuni nererun, hadügei lagübüri haritagun. Houdin hárigi amu búngiugu lun heseriwidun houn luma lun háhuduragun houn. Ítara haña kei galasunsiyu to, meseriwínharu lun ni kata” (Her. 13:10). Ma lanarime ligaburi arufudahani le! Lau sun meha genege lan maweirin lan lisudinin laganbadi profeta le, wéiriti meha lisudinin lidan áfaaguni le ladügübei Heowá lun lánhingichunu hanigi gürigia (Her. 13:11).
20 Mama mosu wéibugun, wagía kristiánugu ha uguñebaña weyu, saragu san kilometuru lun wasubudiragüdün somu arufudahani lúmagiñeti Bungiu. Íbini ítara, gayaraati san ladügün ligaburi wawinwandun lun hálügüdagun wabesinanigu o wasubudirágun houngua ka lan uagu ítara wabéi o hayanuhan wuriba wawagu? Háfuga luagu lan ligaburi wasansiragun, luwuyeri furendei o wadagimanu le wanúadirubei o íbini luagu le wasaminarubei libügürü látuniwa binu. Aranseñu waba san lun wafalaruni ladundehan Bungiu kei meha ladügüni Heremíasi? Ánhawa ígira lun lawadigimaridunu Bungiu wanigi, másiñati wadariruba lan chansi lun wapurichihan houn amu. Meberesenga le asusereduti, súnwandan buídubei lan lidin woun ánhawa gaganbadi lun ladundehan Heowá le tídanbei Lererun luma le weresibirúbei lúmagiñe musu úaraguati. Lidan linarün katei, gayaraati wibihin lun meyeedun tániwa wanigi to geyeedaguadiboun lau ítara wamá kei meha Heremíasi. Ligíati, ígiraguagüda wamá woungua lun lawadigimariduniwa Bungiu; ígira waméi lun ladügün lun ítara wamá kei weru lánina uéiriguni lun layusuruniwa lun súnwandan.
it-1-S páh. 386 pár. 2
Iranaaguaü
Ariñagati Heowá ítara haña lan meha lílana Ísüraeli luma Hudá lun kei gamisa güragu Liranaagua; kipu laaña meha yarafa lun lun híchugun uéiriguni Lun. (Her 13:11.) Lidan profesía le ayanuhabei luagu Hesukrístu keisi urúei, ariñagati: “Súnwandan ladaüraguba lan lau irichaü luma inarüni”. Másiñati lariñawagúña lan lau lira lárügüdüba lan Hesukrístu luagu irichaü luma luagu úaraguni danme lagunfulirun lau luadigimari. Ítara kei ru tan gamisa to güragu umutu liranaagua gürigia erei lun, ítara luba giñe líchugun irichaü iderebugu lun Aguseragüdüti le líridubei Heowá danme lagunfuliruni luadigimari. (Isa 11:1, 5.)
Darí wamá pérüla lánina lichú aau
(Heremíasi 12:1, 2, 14.)
jr-S páh. 118 pár. 11
Sagü san weyu wálügüdagun woungua hagéi lan Heowá?
11 Úati meha gunfuranda lani Heremíasi ka lan uagu buidu lubéi lidin houn wuribatiña, ligíati lálügüdünbalin Heowá (aliihoualá Heremíasi 12:1, 3). Mama meha larufuduña Heremíasi machouruni luagu richagua lan Bungiu, láluaharügüña meha óunabagülei lun lálügüdahan. Adügati furangu le aubei ladimureha lun larihíniwa buidu lan lanaagun lungua luma Heowá, kei aban irahü luma lúguchi le hínsiñebei lun. Úarügü liña meha gunfuranda lani Heremíasi ka lan uagu buidu lubéi lidin houn saragu huríu lau sun hariban. Dariti san óunabagülei le ruti darangilaü lun? Ítara liña, chóurugüda lumuti Heowá lun láhulubaña lan wuribatiña hamúanrugugiñe (Her. 12:14). Chóuruti adüga lan ligaburi lóunabuni Heowá álügüdahani burí le ladügübei Heremíasi lun lúntima lachoururuni richagua lan Bungiu. Másiñati adüga lan lira, lúntima furangu lan ani gabügürügua ligía lafurieidun Heremíasi lun Lúguchi Bungiu.
(Heremíasi 15:17.)
w04-S 1/5 páh. 11 pár. 16
Ganigi wamá kei meha Heremíasi
Anúadira wamaña wamadagu buidu
16 Arufuda lumuti Heremíasi ka lan amu katei íderagubalin lun ganigi lan, dan le lariñagubei: “Móundaraguntina hama ha luágurügübei fedu haritagua; lúmagiñe banügünina bánime, nábuguañadina, ladüga gáñigüda lumutina figóu le hadaagubei” (Heremíasi 15:17). Himei lumuti meha profeta lerederun lábuguarügü sügǘ lau lásügürün dan hama hagübüri umadagu ha gayaraabei hagadeiruni ligaburi, ligiaméme giñe wasaminarubei. Mabulieida waméi eweridihani le líchugubei apostolu Pábulu: “Féridigüda hamuti hagübüri umadagu lubuidun igaburi”. Íbini lubuidun burí igaburi le áyeiha wamaalibei luagu saragu irumu (1 Korintuna 15:33).