Busentu meha Rebeka tagundaaragüdüni Heowá

Aban meha würi hínsiñehabutu lun Heowá Rebeka. Hínsiñeti meha giñe Heowá lun Isaakü le tani weiriei. Ida liña tasubudiruni Rebeka Isaakü? Ka katei tadügübei le arufudubalin busén tan tagundaaragüdüni Heowá? Wafurendeiraali lidan abahüdaguni le.

Abüraámü meha tuma Sara lagübürigubaña Isaakü. Kanán meha haganawa, aban fulasu le meha ídanbei máhuduragun hamá gürigia lun Heowá. Gama lumoun, busenti meha Abüraámü lamarieidun lisaani tuma aban würi to hínsiñehabutu lun Heowá. Ligía lóunahanbei aban hádangiñe lubúeingu lidoun aban uburugu gíriti Arán, le meha ñein lubéi haganawa liduheñu, lun láluaha aban würi ñein lun tamarieidun luma Isaakü. Másiñati Elieserü lan lóunahabei.

Adüga lumuti Elieserü lidise wéiyaasu ligía úara hama amu lubúeingu Abüraámü. Barüina haña meha 10 kameyu lau éigini luma idewesei. Ida lubati buga lasubudiruni Elieserü kaba lan würi lanúadira Heowá lun Isaakü? Dan le lachülürünbei Elieserü hama ha úarabaña luma uburugun Arán, aba lararamagun lurugabu aban fusu ladüga subudi lani aguñeeña lan buga würiña ha lílana fulasu adabura duna. Ábati lafurieidun lun Heowá ítara: “Namuriaha duna tuma aban nibureintu. Anhoun íchiga duna nun luma houn nilügüniña kameyu, nasubudirubei tuguya lan banúadiruboun lun lánime Isaakü weiriou”.

Ouraméme ligía aba tachülürün Rebeka adabura duna lídangiñe fusu. Ariñagatu Bíbülia weiri lan meha tumagadiñen. Aba lamuriahan Elieserü duna tuma, ábati tóunabuni: “Anha, gurá humá, níchiga giñe duna houn hilügüniña kameyu”. Kei gibe lubéi duna hatun kameyu, mosu meha tadaburagun Rebeka saragu duna lídangiñe fusu. Arihabéi furumiñeti dibuhu. Ka tadaagubei Rebeka ñein?... Dan le larihinbarun Elieserü Rebeka nadagimein saragu, aba taweiridun lanigi: Lóunabuñein buga Heowá lafurieidun!

Ruti Elieserü saragu idewesei buíduburiti tun Rebeka, ábati tamisurahani habu sun lupaanágu hábiñoun tiduheñu. Aba lariñaguni Elieserü houn ka lan lébunabei lóunahani Abüraámü ñein. Abahüdagua lumuti giñe houn ida liña lan lóunabuni Heowá lafurieidun. Wéiriti hagundaarun tiduheñu Rebeka dan le haganbunbalin katei le. Aba hariñagun lun Elieserü: “Gúndaatiwa lun tidin Rebeka amarieida luma Isaakü”.

Ánhatu funati Rebeka tidin amarieida luma Isaakü? Ka basaminarubei?... Subudi tumuti meha Rebeka Heowá lan óunahabalin Elieserü ñein. Ligíati, dan le hálügüdünbarun tiduheñu anhein busén tubéi tidin uburugun Kanán lun tamarieidun luma Isaakü, aba tóunabun: “Anha, busentina nidin”. Dan le hachülürünbei ñeinhin, aba tamarieidun luma Isaakü.

Óunigira lumutu Heowá Rebeka buidu ladüga gaganbadi tan lun. Ani saragu irumu lárigiñe, aba nasirua lan Hesusu hádangiñe tiduheñu. Lóunigirubadibu giñe Heowá ánhabu gaganbadi lun kei meha tadügüni Rebeka.