Ariñahani le lunbei lakutihóun lidan adamuridaguni Habagari Kristiánugu luma Heseriwidun — Tani Watchtower LÍBURU-AGEI LIDAN INTERNET

Ariñahani le lunbei lakutihóun lidan adamuridaguni Habagari Kristiánugu luma Heseriwidun

1-7 lidan Seingü-hati

ARUFUDAHANI GEBEGITI TÍDANGIÑETI BÍBÜLIA | HEREMÍASI 32-34

“Seini le arufudubalin hagiribuduba lan ísüraelina hageiroun”

(Heremíasi 32:6-9, 15.)

it-1-S páh. 134 pár. 6

Anatótu

Anatótuna meha Heremíasi ani seriwiti meha kei aban profeta le mabahüdün hamuti lílana lageira, darí lun háluahan háfaruni hilagubei ladüga magundan hamá lau uganu inarüniti lúmagiñeti Heowá le lapurichihabei (Her 1:1; 11:21-23; 29:27). Ligía lariñagunbei Heowá lidan aban profesía lanügüba lan lamiselu luagun uburugu ligía, ani gúnfuliti profesía le lidan lidaani, dan le hebelurunbei babilóniana lidoun ageiraü (Her 11:21-23). Lubaragiñe meha lábürühan Herusalén, ragüti meha Heremíasi luéigiñe liricha lun lagañeinhani lumúan lipürimun le Anatótubei kei seini le arufudubalin hagiribuduba lan ísüraelina hageiroun (Her 32:7-9). Hádangiñe furumiñetiña gürigia ha agiribudubaña luma Sorobaweli lídangiñe hadaürǘniwa, giributiña 128 wügüriña anatótuna ani Anatótu ábanbei lídangiñe uburugu leeya ídanbei hawinwanda gürigia, ítara liña lagunfulirun lani Heremíasi profesía (Ésüd 2:23; Neem 7:27; 11:⁠32).

(Heremíasi 32:10-12.)

w07-S 15/3 páh. 11 pár. 3

Puntu méiniti tídangiñeti liliburun Heremíasi

32:10-15. Ka meha uagu adügǘwa tubéi bián kopia lánina daradu le adügǘbei dan le lagañeihóun aban fulasu? Igirúatu meha kopia to “daraguboun” lun gayara lan takutihóun. Toti “daruguboun” huutu meha lun tachoururagüdüni inarüni lan le bürüwañubei tidan to daraguboun. Ígirati Heremíasi aban hénpulu woun lau ladügüni katei lábugiñe lúrudu íbini ladügüña lan daradu luma aban liduhe le giñe seriwiti lun Heowá kei ligía.

(Heremíasi 33:7, 8.)

jr-S páh. 152 pár. 22, 23

“Ladüga subudi lánina kei Lubungiute”

²² Áyeiha wamuti san Heowá dan le hagañidagüdüniwa gürigia lau le hariñagubei o le hadügübei? Ariñagati meha Bungiu larumadagüdübaña lan binadu huríu ha feruduna lubaña (aliihoualá Heremíasi 33:8). Gabafuti lun larumadagüdüniña ha asakürihabaña lau maritagun lan luagun hafigoun luma lau lígirun lunya gayara lan heseriwidun lun. Úati mini lan feruduna lani Bungiu gürigia mafigounhali lan gürigia ligía. Anihein aban katei le gayaraabei wafurendeiruni lídangiñe larumadagüdüniña Bungiu gürigia. Mosu wáfaagun lun maritagun wamá luagun wuribati le hadügübei amu woun, ítara liña lira, kamá hamuga warumadagüdüñein le wasaminarubei hawagun. Ida liña wadügüni?

²³ Samina humá lun hamuga ledewehóun aban ágeidinaü lauti múa hun le binaduhali ani wéiriti lebegi, háguruñein hamuga san lidoun lagei ifei anhein awiyeda huéi? Uá. Chóuruti háfaaguña hamuga lan lun hagidaruni iwiyei luéi lau góunigi lun buiduméme lan laríawagun. Ítarameme, mosu giñe wáfaagun lun mareidahan wamá igarihabu tidan wanigi lubá somu íbiri le achararubei woun. Ageindagua wamá luma igaburi lánina werederun asaminara luagu katei burí gáriti le ariñawagúbei o adügǘbei woun. Dan le maritagun wamá luagun wuribati le hadügübei amu woun, ítara liña kamá hamuga warumadagüdüñein le wasaminarubei luagu íbiri le feruduna wamaalibei. Dan le wagidaruni luriban saminaü wawariua, ábaya gamadagua wamá luma íbiri ligía.

Darí wamá pérüla lánina lichú aau

(Heremíasi 32:9-15.)

w07-S 15/3 páh. 11 pár. 3

Puntu méiniti tídangiñeti liliburun Heremíasi

(Heremíasi 33:15.)

jr-S páh. 172 pár. 10

Buiti le lanügübei iseri daradu

¹⁰ Wati Heremíasi lun Mesíasi le meha lunbei liabin ladügawagun Dawidi. Dan meha leseriwiduña lubéi Heremíasi kei profeta, úati meha ni aban hádangiñe ladügawagun Dawidi ñun luagu lálana arúeihani, gama lumoun, úati mini lan lira, úaali lanme ni aban hádangiñe ladügawagun Dawidi añuuruti arúeiha. Lau lásügürün dan, hádangiñeba meha ladügawagun urúei Dawidi liabin Hesusu ani laguarúba meha lun “Wabureme, Wasalbaragüle”, lidan iñeñein le ídanbei tabürüdǘwa Bíbülia furumiñe fuati dimurei le kei “Heowá warichabei”, arufudei ítara, weiri lan lisudinin igaburi le lun Heowá (aliihoualá Heremíasi 23:5, 6). Ígirati Heowá lun lasufurirun luma lun lounwen Liráü le ábanrügüti ubouagu. Lúmagiñe oura ligía, gayaraahali meha layusuruni Heowá lubafu sákürifisiu le ladügübei ladügawagun Dawidi lébuname feruduna lani figóu lau irichaü (Her. 33:15). Ligía adügübei lun gayara lan ñein hamá gürigia ha úntiña lagúara Bungiu lidoun “richaguaü le anügübei ibagari”, anuadirúa hagía lau sífiri sandu lun hebelurun lidoun iseri daradu. Íbini ha mebelubaña lidoun daradu le gayaraati hasagarun buiti lídangiñe, ligía amu katei arufudubalin weiri lan lisudinin irichaü lun Bungiu, sigí wamá akutiha luagu le (Rom. 5:18).

8-14 lidan Seingü-hati

ARUFUDAHANI GEBEGITI TÍDANGIÑETI BÍBÜLIA | HEREMÍASI 35-38

“Ewedi-mélekü: hénpulu lánina ganigi luma ínsiñehabuni”

(Heremíasi 38:4-6.)

it-2-S páh. 984 pár. 7

Sedekíasi

Aban meha gumadimati le wéiriti lanufude Sedekíasi, kei larihíniwa dan le hamuriahanbei ábutigu herusalénna üma luma lun háfaruni Heremíasi hilagubei ladüga nege áfara lani haritagun lílana fulasu ha egeyedawagúbaña. Ariñagati Sedekíasi houn: “Buiti, adüga huméi le habusenrun lau: Siñati nadügün ni kata kóntüra huguya”. Danti le lamuriahanbei Ewedi-mélekü üma luma lun lesefuruni Heremíasi, ruti üma lun ariñaga ligía lun lanügün 30 wügüriña lúmagua lun híderaguni. Lárigiñe, ábaya lóundaragun Sedekíasi luma Heremíasi lun hayanuhan hábuguarügü. Ábati füramase lan lun máfarun lubéi lan mederegerunleime háhaburugun ha busenbaña háfaruni. Ariñagati lun hanufude lan hawéi huríu ha ásügürübaña hamoun kalüdéana, ligía madügün lubéi Sedekíasi gasu lau uganu lúmagiñeti Bungiu le líchugubei Heremíasi lun libügürü lederegeragun lungua houn ábutigu babilóniana. Arufudaya lumuti Sedekíasi hanufude lan lau lamuriahan luma Heremíasi lun mariñagun lani houn ábutigu wuriba tisaminan hagía ka lan uagu hadimureha (Her 38:1-28).

(Heremíasi 38:7-10.)

w12-S 1/5 páh. 31 pár. 2, 3

Ruti Heowá hafayeiruaha sun ha eseriwidubaña lun

Katei meha san Ewedi-mélekübei? Genegeti aban lan meha hádangiñe gürigia ha agunfulirubaña lau wadagimanu súdiniti lúbiñe Sedekíasi le lurúeite Hudá. Wínwanti meha Ewedi-mélekü lidan ligiaméme dan luma Heremíasi, le lóunahabei Bungiu eweridiraña lílana Hudá luagu málühali lan hageira agünrinchawagúa ladüga múaragun hamá lun Bungiu. Lau sun meha geyegu liña lan Ewedi-mélekü hau gumadimatiña ha maganbaditiña lun Bungiu, úaraguati meha lun Heowá inebe ligía Heremíasi lun. Aban weyu, aba lasuseredun aban katei le adügübei lun larihíniwa lúaragun Ewedi-mélekü lun Heowá: da hamá meha gumadimatiña wuribatiña hagía Heremíasi lidoun aban fusu le buinbei lau baribarabu lun lounwen ñein, ladüga nege garabaguaali lan luagun urúei (Heremíasi 38:4-6). Kaba meha ladüga Ewedi-mélekü?

Arufudati meha Ewedi-mélekü ganigi lan ani másuhan lan. Meredeti chagü larüna le lanufude hawéi gumadimatiña. Ariñagati lun Sedekíasi hagibugiñe saragu gürigia louserúña lan Heremíasi lau marichaü. Másiñati ínchaheina lan hawagun ha gadurunbaña lariñaga lun urúei: “Mabuiduntitia le hadügübei wügüriña ha lau Heremíasi” (Heremíasi 38:9). Aganba lumuti Sedekíasi Ewedi-mélekü ru ligía üma lun lun lesefuruni profeta Heremíasi lau hídehan 30 wügüriña.

(Heremíasi 38:11-13.)

w12-S 1/5 páh. 31 pár. 4

Ruti Heowá hafayeiruaha sun ha eseriwidubaña lun

Arufudati Ewedi-mélekü ábanya lubuidun igaburi: ínsiñehabuni. Abahüdaguatu Bíbülia aba lan lanügün “gamisa wéiyaaru [...], aba larariragüdünu lun Heremíasi lau gúrudu”. Ka un? Lun líchugunu Heremíasi lábugiñe larüna luéi lélechuni gúrudu danme le hasagaruni fúsurugugiñe (Heremíasi 38:11-13).

Darí wamá pérüla lánina lichú aau

(Heremíasi 35:18, 19.)

it-2-S páh. 793

Rekabüna

Gúndaati meha Heowá lau gaganbadi luma inebesei le harufudubei rekabüna. Mítarantiña meha rekabüna kei huríu ha maganbadibaña lun Bungiu le adügübaliña, lugundun gaganbaditiña meha lun Honadábü le hagücha (Her 35:12-16). Ru lumuti Bungiu lubuidun füramasei le houn rekabüna: “Súnwandan [...] ñeinbei lan aban ladügawagun Honadábü eseriwida nun” (Her 35:19).

(Heremíasi 37:21.)

w98-S 15/1 páh. 18 pár. 16, 17

Adügaméme waméi lugundan Bungiu

¹⁶ Ariñaga lumuti Heowá woun lau ínsiñehabuni wibihiba lan awalidaguni lábugiñe Larúeihan Mesíasi (Sal 72:1-4, 16; Isa 25:7, 8). Íderagua lumutiwa giñe agagibudagua uguñe weyu luma lénrengunga lánina ibagari lau lariñaguni woun ka burí lan katei lunbei wíchuguni lidan furumiñeti lúgaaru (Matéu 4:4; 6:25-34). Yusu lumutu Heowá Lererun lun líchugun dǘgüdaguaü woun, to ídanboun labahüdagua woun ida liña lan meha líderaguniña lubúeingu lidan binadu dan (Heremíasi 37:21; Santiagu 5:11). Ruti erei woun lau lasubudiragüdüni woun úabei lan ni kata adügüti lun leferidiruni ínsiñeni le lasandirubei hawagu lubúeingu ha úaraguabaña lun, meberesenga turobuli le úmati hagagibudagua (Rómana 8:35-39). Ariñagati Heowá lun sun le afiñeruti luagu: “Nóunigirubadibu; mígirun nubadibu” (Ebüréu 13:5).

¹⁷ Kei subudi habalin kristiánugu inarünitiña lira, ligía merede lubéi hadügüni lugundan Bungiu ani magiribudúntiña lidoun katei lánina ubóu le. Saminatiña saragu gudemetiña ha lídanbaña saragu ageiraü mama lan híweruhaña dan le hagidarun hawéi ha gíbebaña úmati lun héigagüdüniña haduheñu. Ánhañati ha abagaridubaña afiñeñu luagu Bungiu, máyeihan hamuti ligaburi saminaü ubouaguna le lugundun wéiritima lisudinin houn lun gunda lan Bungiu hau ani agurabatiña labinirubei lan arumani le aubei hóusera (Ariñawagúni 30:8, 9; 1 Korintuna 10:13; Ebüréu 13:18). Buiti lidin tun aban würi hilaali túmari to lídanboun ageiraü India ladüga benefa tan chubalugu tuguya. Lubaragiñe terederun asaminara luagu lirun gádantu, afiñetu labinirubei lan Heowá áfaaguni le tadügübei lun tibihini le temegeirubei lau sun tisaani anhein tíchiga Larúeihan luma liricha Bungiu lidan furumiñeti lúgaaru (Matéu 6:33, 34). Añahein saragu milu gürigia ubouagu ha arufudubalin aban lan esefuragülei Heowá houn lidan furumiñeguarügü lénrengunga le úmabei hagagibudagua (Sal 91:2). Susereti giñe san hun?

w95-S 1/8 páh. 5 pár. 5, 6

Anite dan buítimati

Dan lárigiñe, aba legeyedaguniña lurúeite Babilónia lílana Herusalén ha meha garabaguaañabaña houngua luagun Bungiu, ani lidoun dan ligía, mosu meha afanreinhóuarügü lan éigini houn gürigia ani lau meha íruni heigei hafanran (Esekiéli 4:16). Wéiriti meha lirun gádantiña darí lun añahein lan meha úguchurunu éigitiña hasaanigu (Ayahuni 2:20). Lau sun meha furisunruguñein lan profeta Heremíasi ladüga lapurichihan, adügati Heowá lun libihinu leigan fein “sun dan le anuhein lubéi fein uburugu” (Heremíasi 37:21).

Bulíei lumuti san Heowá Heremíasi dan le tagumuchunbei fein uburugugiñe? Furanguti mabulieidagun lan Heowá luéi lugundun dan le lábürühanbei Herusalén lábugiñoun habafu babilóniana, resibiti Heremíasi “idewesei luma éigini” (Heremíasi 40:5, 6; arihualá giñe Sálumu 37:25).

15-21 lidan Seingü-hati

ARUFUDAHANI GEBEGITI TÍDANGIÑETI BÍBÜLIA | HEREMÍASI 39-43

“Fayei lumuti Heowá kada aban según le ladügübei”

(Heremíasi 39:4-7.)

it-2-S páh. 984 pár. 8

Sedekíasi

Lábürühan Herusalén. Danti lachülürünbei dan (irumu 607 lubaragiñe lidaani Hesusu), “weyu nefu lidan ligadürün hati lidan liunsun lirumudiri lagumadihan Sedekíasi”, aba hadarirun áganiñu halíagiñeba lan hebelura Herusaléun. Anurahati yebe Sedekíasi hau lisudaranigu áriebu, gama lumoun, ragǘ hamuti lidan fulasu mageirawati ani mawübüriti le Herikóbei, ábati hanügüni lun Nabukodonosoru uburugun Ribülá. Áfarawaguatiña lirahüñü Sedekíasi liñúarü. Kei yarafa lubéi meha lun darandi-biama irumu lau Sedekíasi lidoun dan ligía, chóuruti ñǘbürigiña lan meha lisaanigu. Lárigiñe larihini Sedekíasi hóunwegun lisaanigu, aba lasagarúniwa lagu, gürawagua ligía lau güringüri lauti kóbüre lun lanügǘn Babilónioun, ñein lubéi hadaürei furisunrugu darí lounwen (2 Uru 25:2-7; Her 39:2-7; 44:30; 52:6-11; konparáruala luma Her 24:8-10; Ese 12:11-16; 21:25-27).

(Heremíasi 39:15-18.)

w12-S 1/5 páh. 31 pár. 5

Ruti Heowá hafayeiruaha sun ha eseriwidubaña lun

Wéiriti meha san lebegi le ladügübei Ewedi-mélekü lun Heowá? Ítara liña. Adügati Heowá lun lariñagun Heremíasi lun Ewedi-mélekü málühali lan Hudá agünrinchawagúa ani füramaseti lun seingü wéiyaasu lesefurubei lan. Füramaseti Heowá lun: “Nesefurubadibu”, “lun mábürühan ban háhaburugun gürigia”, “nesefurubadibu luéi háfarunibu hilagubei” ani “besefuruba lau ibagari”. Ka uagu füramase lubalin Heowá lira lun Ewedi-mélekü? Ariñagati: “Ladüga hemenigitibu nuagu” (Heremíasi 39:16-18). Subudi lumuti meha Heowá mámarügüñein lan ladüga nidiheri lan Ewedi-mélekü luagu profeta Heremíasi líderaguei, ladüga meha afiñe lan luagu Bungiu ladügei.

(Heremíasi 40:1-6.)

it-2-S páh. 472

Nebusaradán

Ígiragüda lumuti Nebusaradán Heremíasi kei lariñaguni Nabukodonosoru lun ani álügüda lumuti lau gamadóuni halíñoun lan labusenra lidin, ariñagati giñe lun gayara lan lóunigiruni anhein busén, ru ligía fiu lídangiñe katei le lemegeirubei lun. Ru lumuti giñe Nebusaradán Gedalíasi keisi gumadimati lidan liri lurúeite Babilónia lun larihin hau ha erederubaña fulasurugu (2 Uru 25:22; Her 39:11-14; 40:1-7; 41:10). Yarafa lun seingü irumu lárigiñe, lidan irumu 602 lubaragiñe lidaani Hesusu, ábaya lasagarun Nebusaradán amu huríu hageiragiñe, genegeti ha lan meha anurahabaña lidoun burí ageiraü le yarafabei houn (Her 52:30).

Darí wamá pérüla lánina lichú aau

(Heremíasi 42:1-3; 43:2, 4.)

w03-S 1/5 páh. 10 pár. 10

Álügüdahatün san hagéi lan Heowá?

¹⁰ Lárigiñe lagünrinchawagun Herusalén sagá hamaña lisudaranigu Babilónia huríu hageiragiñe, aba laransehan Hoanán lun lanügüniña fiuraü huríu ha erederubaña Hudá Ehiptun. Aranseha hamuti haweiyasun, gama lumoun lubaragiñe háfuridun, amuriahatiña luma Heremíasi lun lafurieidun hawagu lun lamuriahani ladundehan Heowá. Keiti mibihin habalin óunabagülei le habusenrubei haganbun, aba hasigirun habaruaguóun lau le hasaminarubei hadügün (Heremíasi 41:16–43:7). Gunfuranda humuti san arufudahani huuti le gayaraabei lasagarúniwa lídangiñe sügǘ le libügürü le lunbei wadügüni lun lígiraguagüdün Heowá lungua lun wadariruni?

(Heremíasi 43:5-7.)

it-1-S páh. 600 pár. 3

Labahüdawagún sügǘ según lidaani lasuseredun

Geyeguawati Herusalén sunsuinagubei lidan linefun lirumudiri lagumadihan Sedekíasi (irumu 609 lubaragiñe lidaani Hesusu) ani ábürühati lidan liunsun lirumudiri lagumadihan (irumu 607 lubaragiñe lidaani Hesusu), úarati dan le luma lidisinéfun lirumudiri lagumadihan Nabukodonosoru (ánhawa abahüda lúmagiñe irumu 625 lubaragiñe lidaani Hesusu, warihubei ka lan irumu lagumesera arúeiha; 2 Uru 25:1-8). Lidan liseingün hati lidan irumu 607 (hati le gíribei Abü, le éiguadubei labadinagua sedü-hati luma widü-hati) ligía lagudún Herusalén, labouchawagun lubarieirun, sagawa hagía hiibe-agei huríu hageiragiñe. “Fiúrügüñanu hádangiñe gürigia gudemetiña lígira” Nabukodonosoru ñein ha anurahabaña Ehiptun dan le lafarúnbei Gedalíasi, le líridubei Nabukodonosoru keisi gumadimati, ábati lerederun Hudá málouga sunsuinagubei (2 Uru 25:9-12, 22-26). Susereti le lidan hati Etanímü le lisedün hati (o hati le gíribei Tísüri, le éiguadubei labadinagua nefu-hati luma diisi-hati). Ligíati, másiñati gumese lan ǘrüwa-wein-diisi irumu le lunbei lerederun Herusalén málouga abahüdǘwa lúmagiñe yarafa lun 1 lidan diisi-hati irumu 607 ani gumuti lidan irumu 537 lubaragiñe lidaani Hesusu. Lidan lisedün hati lidan irumu 537 hagumesera furumiñetiña huríu ha igirúbaña lun hagiribudun hageiroun achülüra uburugun Hudá, lídanmeme dan le lagunfulirunbei ǘrüwa-wein-diisi irumu lárigiñe lagumeserun Herusalén eredera málouga sunsuinagubei (2 Kro 36:21-23; Ésüd 3:1).

22-28 lidan Seingü-hati

ARUFUDAHANI GEBEGITI TÍDANGIÑETI BÍBÜLIA | HEREMÍASI 44-48

“Hebé báluahan ‘katei bungua le hanarimeguti’”

(Heremíasi 45:2, 3.)

jr-S páh. 104, 105 pár. 4-6

Hebé báluahan “katei bungua le hanarimeguti”

⁴ Másiñati ayumaha lan meha Baruku lun weiri lan laganbahóun luagu luma lun libihin uéiriguni. Lau sun meha seriwi lan Baruku kei lani Heremíasi abürühati, másiñati gúnfuli lan meha lau aban wadagimanu súdinitimati luéi lira. Lidan Heremíasi 36:32, ayanuhóuati luagu Baruku kei “le abürühabei lun” Heremíasi. Arufudati akutihani le adüga hamaalibei sásaamu ha akutihabalin katei burí le binadu, gúnfuli lan meha Baruku lau aban wadagimanu súdiniti lúbiñe urúei. Ítara liña giñe laguarúniwa lun “Elisamá le abürühabalin sun le asusereduti fulasurugu”, le iridúbei haganagua agumadihatiña ha meha íñugutimabaña Hudá. Mini lan lira, belú lan giñe Baruku “lirumunrugun le abürühabalin sun le asuseredubei fulasurugu” tidan “luban urúei” ítara kei Elisamá le meha lupaaná (Her. 36:11, 12, 14). Ligía gayara lubéi wasaminarun wéirigu lan meha lubara Baruku lúbiñe urúei. Gúnfuliti meha giñe Seraíasi, le líbiri Baruku, lau aban wadagimanu súdiniti lun urúei Sedekíasi ani ñǘdünti meha luma urúei lidan wéiyaasu súdiniti le ladügübei Babilónioun (aliihoualá Heremíasi 51:59). Seraíasi meha arihibei lau halíaba lan larumuga urúei luma kaba lan leiga dan le laweiyasuhan, mama meha furumiñeguarügü wadagimanu lira.

⁵ Gunfurandawati labuchaduba lan buga luagu aban gürigia le súdiniti abürüha uganu lánina asiadihani aban lárigi aban, houn lílana Hudá. Dántima le gayara lan ladügün lídehan Baruku luma lani Bungiu profeta lun leferidiruni lisudinin wadagimanu le lagunfulirubei. Samina wamá giñe luagun le gayaraabei lasuseredun anhein lagünrinchagua Heowá le lábunagubei, kei waliihani lidan Heremíasi 45:4. Mebegihalime katei burí “hanarimeguti” le layumahabei Baruku, meberesenga anhein busén lubéi meha laganwoundun luéirigun lúbiñe urúei o larisidun. Anhein meha busén lubéi Baruku lachoururagüdüni lubara lidan hagumadihan huríu le meha málühalibei agumucha, garichati meha Bungiu lun lererehan lun sansi láamugei ligaburi lisaminan.

⁶ Luéigiñe amu oubaü, másiñati giñe irisini lan “katei [...] hanarimeguti” le láluahabei Baruku. Luagu meha irisini híchigei lílana burí néchani le yarafabei lun Hudá hemenigin. Hemenigitiña meha lílana Moabü luagun here luma harisin, ítara kei amonna. Adügati giñe Heowá lun lariñagun Heremíasi anihein lan “irisini wéinamuti” Babilónia (Her. 48:1, 7; 49:1, 4; 51:1, 13). Íbini ítara, siadi lumuti Bungiu sun burí néchani le.

(Heremíasi 45:4, 5a.)

jr-S páh. 103 pár. 2

Hebé báluahan “katei bungua le hanarimeguti”

² “Fugiabu au” liña lekeharun Baruku, “míchuti [Heowá] amu katei nun luéidigia idiheri luma igarigu! Buchá nuagu ayahua, madaritina awalidaguni!”. Íbini giñe wagía, adimurehaadiwa ítara dan le buchá lan wawagu, tidan lan yebe wanigi wariñagei o furí lan lídangiñe wayuma. Meberesenga ida liña lan lariñaguni Baruku, aganba lumuti Heowá. Subudi lumuti meha le akutihabarun anigi ka lan adügübei lun lasandiragun Baruku lungua ítara, ligía lóunahanbalin Bungiu Heremíasi erereha lun Baruku lau ínsiñehabuni (aliihoualá Heremíasi 45:1-5). Ka adügübei lun ladiheridun Baruku luma lun labuchadun luagu? Luwuyeri funa san wadagimanu le ichugúbei lun o lénrengunga le ídanbei lagunfulirei? Le linarün katei, tídanñein meha lanigi turobuli. Láluahaña meha Baruku “katei [...] le hanarimeguti”. Ka burí katei? Ka füramase lubéi Heowá lun anhein lafalara ladundehan? Ani ka gayaraabei wafurendeiruni lídangiñe le asuseredubei lun Baruku?

(Heremíasi 45:5b)

w16.07 páh. 4 pár. 6

Áluaha waméi Larúeihan Bungiu, mamalá umegeguni wáluaha

⁶ Samina wamá luagun Baruku, le lani profeta Heremíasi sekretariu. Dan le lagumeserunbei Baruku áluaha ‘katei hanarimeguti lungua’, aba laritaguagüdüni Heowá lun murusunrügaali lan meha dan lubá lagünrinchawagun Herusalén. Gama lumoun, füramaseti lun lesefurubei lan libagari (Heremíasi 45:1-5). Moun lumuti meha lagurabahan Baruku amu katei. Mesefurun lubéi meha Heowá hamegegun gürigia (Heremíasi 20:5). Ka wafurendeirubei lídangiñe le asuseredubei lun Baruku? Uguñe weyu, murusunrügaali giñe dan lubá lagumuchún lau ubóu lani Satanási. Ligíati, mámaali lidaani wáfaagun lun wibihin saragu umegeguni. Masaminara wamá wadarirubei lan sun katei le wámabei guentó lárigiñe óunwenbu asufuriruni, íbini anhein weiri lubéi lebegi woun (Ariñawagúni 11:4; Matéu 24:21, 22; Lúkasi 12:⁠15).

Darí wamá pérüla lánina lichú aau

(Heremíasi 48:13.)

it-2-S páh. 172

Kemosu

Dan le meha lariñagunbalin profeta Heremíasi lidan profesía hagünrinchawaguba lan moábüna, ariñagati giñe lasagarúba lan Kemosu habungiute moábüna létima súdinibei houn úara hama lufadirinigu hama agumadihatiña hageiragiñe. Habusigariduba meha moábüna lau habungiute ladüga lumalan lani, ítara kei meha habusigaridun lílana arúeihani ísüraelina le lánina diisi türibu lau Beteli, háfuga ladüga ñein lan meha háhuduragua tun liyawa bágasu (Her 48:7, 13, 46).

(Heremíasi 48:42.)

it-2-S páh. 411 pár. 5

Moabü

Siñati lasigenerúniwa gúnfuli lan profesía luáguti Moabü ítara kei aubei labürüdǘwa. Sügühali saragu sígulu lúmagiñe hagumuchagun moábüna keisi néchani (Her 48:42). Lídangiñe sun uburugu burí le uágubei lasaminarúa uguñe weyu moábüna lan meha kéiburi Nebu, Esübón, Aroerü, Betü-gamulu luma Baali-meón lárigirugurügaali eredera ani le líbiri ibidiñewagubeiti.

29 lidan Seingü-hati darí 4 lidan Sisi-hati

ARUFUDAHANI GEBEGITI TÍDANGIÑETI BÍBÜLIA | HEREMÍASI 49, 50

“Biní lumuti Heowá le ǘnabugubei ani bei lumuti le íñugubei”

(Heremíasi 50:4-7.)

(Heremíasi 50:29-32.)

it-1-S páh. 62

Ágani

Dan meha hóuserun lumutuniña Bungiu lau múaraguni, ábaha lígirun lun hábürühan áganiñu hawagun (Sal 89:42; Aya 1:5, 7, 10, 17; 2:17; 4:12). Bulíeiguatiña méhati áganiñu asaminara lau lan habafu guánarügü hagañeira ani ábaha híchuguni uéiriguni houn habungiutegu o hasaminarun maguseragüdün lubaña lan Heowá luagu ligaburi hóuseruniña lumutuniña (2 Lur 32:27; Her 50:7). Ligía meha mosu lubéi lǘnabudaguagüdüniña Heowá áganiñu pántatiña ani barügua tungua hagía (Isa 1:24; 26:11; 59:18; Naún 1:2); ani adüga lumuti luagu liri le sándubei (Isa 64:2; Ese 36:21-24).

(Heremíasi 50:38, 39.)

jr-S páh. 161 pár. 15

Adügalá Heowá laritagun

¹⁵ Ariñagati giñe Heremíasi lagünrinchawaguba lan Babilónia arúeihani le lunbei lagañeiruni Ehiptu. Aban sígulu lubaragiñe lasuseredun, ariñaga lumuti Heremíasi sódiniba lan meha lábürüha Babilónia. Ida? Ariñagati lani Bungiu profeta “lamabeidu[ba]” lan duna le mígirunbei lun hábürühan áganiñu luagun ani rédeihali lanme hageindagun lisudaranigu ha hérebaña (Her. 50:38; 51:30). Gúnfuliti sun le lariñagubei profesía le dan le hegeyedunbalin médiana hama pérüsiana lémeri duna Éufüratesi, hiñugua haméi lun hebelurun Babilónioun, ábati hábürühan hawagun lílana sódini. Ariñawagúati giñe amu katei súdiniti luagu uburugu le, lerederuba lan kei aban fulasu mageirawati ani maganóundigiaaña lanme gürigia ñein (Her. 50:39; 51:26). Arihúati gúnfuli lan profesía lúmagiñeti Bungiu le, lugundun uguñe weyu, lárigirugurügaali Babilónia, uburugu le meha gabafubei, eredera ani málougati ñein.

w98-S 1/4 páh. 20 pár. 20

Aban líburu lúmagiñetu Bungiu

²⁰ Mawinwandunti Isaíasi lun larihini lerederun Babilónia málouga. Íbini ítara, gúnfuliti profesía, lugundun lau lásügürün dan, aba “lerederun lárigirugu” Babilónia kéirügü saragu life dübü (Heremíasi 51:37). Abahüdaguati aban aturiahati hererun luma hechun ebüréugu gíriti Heronimu, le nasiruabei lidan sígulu gádürü lárigiñe lidaani Hesusu, aban lan meha fulasu le ídanbei houdin éibaahatiña agaliruha Babilónia ani éibugañahadügü haña lan meha “sun hawuyeri animaalugu áraabuna” ñein lidan lidaani ani darí guentó, úamemegiña gürigia aganawa ñein. Ani lau sun aransehóua lan le erederubei lídangiñe uburugu Babilónia lun gayara lan houdin asariñahatiña arihei, gumugua “lirahüñü hama libañan” Babilónia lun súnwandan, kei lariñaguni profesía le labürüdübei Isaíasi (Isaíasi 14:22).

Darí wamá pérüla lánina lichú aau

(Heremíasi 49:1, 2.)

it-1-S páh. 117 pár. 2

Amonna

Genegeti gumese hamá meha amonna awinwanda lidan hamúan lílana lani Gadü türibu lárigiñebei lasagaruniña Tigülátü-pileserü III luma urúei le lárigiñebei lílana arúeihani ísüraelina le luéigiñebei nórute hageiragiñe (2 Uru 15:29; 17:6), fulasu le meha uéigiñebei hageindagua amonna luma Hefüté magañeirúnga (konparáruala luma Sal 83:4-8). Adeinhati Heowá houn amonna lidan profesía le lasubudirágüdübei Heremíasi houn ladüga hóuyedun lau halagante gádüna ani wisá lumutiña málühaña lan meha agünrinchawagúa lau sun Milükómu le habungiute (Her 49:1-5). Díseti meha lárigi hariban amonna lugundun óunahatiña híwerutiña íchiga lidere dan houn lílana Hudá lidoun burí lagumuhóun irumu le laubei Hoakimü arúeiha ñein (2 Uru 24:2, 3).

(Heremíasi 49:17, 18.)

jr-S páh. 163 pár. 18

Adügalá Heowá laritagun

¹⁸ Gúnfuliti giñe amu profesía lidan furumiñeti sígulu lárigiñe lidaani Hesusu, profesía lúmagiñeti Bungiu le lasubudirágüdübei Heremíasi libügürü ñeinbei lan giñe Edomu laganagua néchani burí le lunbei hárügüdüni babilóniana (Her. 25:15-17, 21; 27:1-7). Mámarügüñein ligía lariñaga Bungiu luagu Edomu. Ariñagati giñe lerederuba lan kei Sodoma luma Gomora. Subudi wamaali ka lan mini lubéi lira: lerederuba lan málouga lun súnwandan, úaalime néchani Edomu (Her. 49:7-10, 17, 18). Ani ligía asuseredubei. Halía wadarirei iri Edomu luma edomuna uguñe weyu? Anihein san tidan burí mapa to lánina dan le? Uá. Liibe-agei dan, tídanrügüñein burí binadu líburu luma lidan abahüdaguni le tídanbei Bíbülia o tidan somu mapa to lánina dan ligía wadarirei. Según Flavio Josefo, aba meha hafosurún edomuna lun hánharun lun hafiñen huríu lidan libiaman sígulu lubaragiñe lidaani Hesusu. Ligíati, gumuguatiña kei néchani dan le lagünrinchawagunbei Herusalén lidan irumu 70 lárigiñe lidaani Hesusu.

ip-2-S páh. 350 pár. 6

Lagañeiruni Heowá lubuidun ladimurehóun luagu

⁶ Kati uagu awuribuhaali lubéi Heowá hama edomuna? Ladüga sigí hamani gáganiguaü le meha lagumeserubei Esaú, le hagücha, lau iyereegu hamá lumutuniña Bungiu ha úmabaña ladüga daradu houn (Agumesehani 25:24-34; 1 Lúrudu 20:14-21). Arufudatima hamuti edomuna hayereehabu houn lílana Hudá dan le híchugunbei dǘgüdaguaü houn lisudaranigu Babilónia lun hasigirun habaruaguóun lidan hábürühan luagun Herusalén (Sálumu 137:7). Barǘ lumuti Heowá iyereehabúni ligía luouguoun. Ligía maweiridun tubéi wanigi lau desidírü lan lasagarunu lefeinte lídangiñe tagei lun lafayeiragüdüniña lílana Edomu luagu hariban (Isaíasi 34:5-15; Heremíasi 49:7-22).