Ariñahani le lunbei lakutihóun lidan adamuridaguni Habagari Kristiánugu luma Heseriwidun
5-11 lidan Sisi-hati
ARUFUDAHANI GEBEGITI TÍDANGIÑETI BÍBÜLIA | HEREMÍASI 51, 52
“Gúnfuliti íbini lagumuhóun dimurei le lariñagubei Heowá”
(Heremíasi 51:11, 28.)
it-2-S páh. 356 pár. 2, 3
Médiana, Media
Hagía hama pérüsiana ábürühabaña luagun Babilónia. Ariñagati Isaíasi lidan aban profesía lidan sígulu widü lubaragiñe lidaani Kristu, línchahabaña lan meha Heowá médiana, “gürigia ha meberesegúnbaña lau pülata ni lau golu”, lun hábürühan luagun Babilónia. Ariñagati giñe “háfaragubaña [lan] nibureintiña tau gimara” (Isa 13:17-19; 21:2). Lidan profesía le, másiñati layanuhóuña lan hawagu pérüsiana lau dimurei “médiana”. Yusu hamuti meha giñe güriegu ha abahüdagubaña luagu dan le sügühalibei, dimurei “Médiana” lun hayanuhan dandu hawagu médiana kei hawagu pérüsiana. Lau lariñagun profesía meberesegun hamá lau pülata ni lau golu, furanguti larufuduñein mámatimaaba lan luagu hasagarahani médiana hama pérüsiana lirisin Babilónia hábürüha luagun, hagañeiruni meha habusenrubei, ligía meseriwínbei lubéi meha houn babilóniana hálugun hafayeirun liseinsuna gumadi o gürüti houn médiana lun habakürün hárigoun. Gimara meha áruma tótima hayusuruboun dandu médiana kei pérüsiana. Liibe-agei dan, lauti meha fulansu tebu hagimaran, íbini anihein lan meha lídangiñe lauti buronse o kóbüre (konpararualá luma Sal. 18:34). Háfuga lau burí lan tebu gimara ítarati hachüüha médiana hama pérüsiana wisiu gimara to gágiritu hawagun nibureintiña babilóniana lun táchourun hawagu buidu buidu, hilagua hamaamuga (Her 51:11).
Ariha huméi ariñaga lan Heremíasi (51:11, 28) ábürüha hamá meha “lurúeitegu Media” luagun Babilónia. Arufudati layanuhóun luagu lóugiñe aban urúei anihagua lan meha aban o lóugiñe aban urúei médiana lidaaniwagu Siru, ha lábugiñetiña habafu amu, aban igaburi le meha kamanibei lidan binadu dan (konpararualá giñe luma Her 25:25). Kéiburi dan le hóundaragunbei súdaragu médiana, pérüsiana, elamüna hama lílana amu burí türibu ha yarafabaña houn lun hárügüdüni Babilónia, aban meha médiana gíriti Daríu “agumadihabei lidan arúeihani hadan Kalüdéana”, ani genegeti urúei lan meha Siru, le pérüsiana, íchugubalin keisi urúei ñein (Dan 5:31; 9:1; arihualá DARÍU núm. 1).
(Heremíasi 51:30.)
it-2-S páh. 450 pár. 3
Nabonídu
Gadünati lun wasaminarun luagun le lariñagubei ariñahani le libügürü áriebu le lábürühanbei Babilónia: “Belutiña lisudaranigu Siru Babilónioun mawuribuhanga”. Úarati dimurei burí le luma le lariñagubei Heremíasi lidan aban profesía: “Rédeiha hageindagun lisudaranigu Babilónia” (Her 51:30).
(Heremíasi 51:37, 62.)
it-1-S páh. 273 pár. 1
Babilónia
Lúmagiñe irumu 539 lubaragiñe lidaani Kristu, aba lagumeserun Babilónia ábürüha eferidireinaléi luéirigun. Biámañein wéiyaasu lebedaagun lun urúei pérüsiana Daríu I, ani lidan libiaman wéiyaasu aba lagünrinchawagun. Ebeedaguati aban uburugu le magumuchungili meha laransehóun lun Hérühesi I ábati líweruhoun sun le lídanbei. Álugati yebe Alehánduru le Wéirigubei ladügüni Babilónia lichügüdiname lageira, gama lumoun hilati sódini lidan irumu 323 lubaragiñe lidaani Kristu. Gañei lumuti Nikatoru Babilónia lidan irumu 312 lubaragiñe lidaani Kristu ábati lanügün saragu lídangiñe lumegegun uburugu ligía larun duna Tígürisi lun lábunaguni iseri lichügüdina lageira, uburugu Seleusia. Gama lumoun, lidan meha hadaani furumiñetiña kristiánugu añahagua meha saragu huríu awinwanda lidan uburugu ligía, ligía lídinbei apostolu Féduru bisidaña kei lariñawagún tidan aban gárada to labürüdüboun (1 Fe 5:13). Arufuda lumuti abürüdǘni burí le adarirubei ñein luagu aniheingua lan meha ténpulu babilóniana le gíribei Beli lidan irumu 75 lárigiñe lidaani Kristu. Lídanti sígulu gádürü lárigiñe lidaani Kristu, günringuaali meha uburugu ligía ani lau lásügürün dan úaalime ni lárigirugu. Rédeiti “kei ifei” (Her 51:37).
Darí wamá pérüla lánina lichú aau
(Heremíasi 51:25.)
it-2-S páh. 423 pár. 2
Dabíara, áraabu, wübü
Yúsuati lun ladimurehóun luagu agumadihani. Dan le layusurun dimurei wübü tidan Bíbülia gayaraati layanuhóuña lan luagu arúeihani o agumadihani (Dan 2:35, 44, 45; konpararualá luma Isa 41:15; Aruf 17:9-11, 18). Wáwati tun Babilónia kei “wübü gagünrinchaguaditi” ladüga günringua hamutiña meha gañei hamaña lisudaranigu Babilónia amu burí néchani (Her 51:24, 25). Lidan aban Sálumu le ayanuhabei luagu ligaburi lagayuahan Heowá hawagun wuriburuguna ariñawagúati wéirigutima lan “sügǘ lau burí áraabu le magumuchadibei” (Sal 76:4). Dan le layusurún dimurei “áraabu le magumuchadibei” háfuga layanuhaña lan luagu burí arúeihani le wéiribei luriban (konpararualá luma Naún 2:11-13). Ariñagati Dawidi luagu Heowá: “Derebugugüda bumutina lidan fulasu chóuruti”, másiñati lariñaguña lan luagu awanseragüda laali lan meha Heowá larúeihan Dawidi derebugugüdalei sunsuinagubei (Sal 30:7; konpararualá luma 2 Sam 5:12). Kei gayara lubéi luagu lan burí arúeihani layanuhóua dan le layusurún dimurei wübü tidan Bíbülia, íderagua lumutiwa katei le gunfurandei ka lan uagu layanuha Arufudúni 8:8 dan le ladimurehan luagu “aban katei [le ítarabei] kamá hamuga aban óunwenbu wübü durunguati”. Arufudati ítara liña lan aban agumadihani kamá wübü durunguati le gagünrinchaguaditi kei watu.
(Heremíasi 51:42.)
it-2-S páh. 304 pár. 4
Barana
Saragu súdaragu. Ariñagati Heremíasi ítara liña lan laganbun hamalali ha ábürühabaña luagun Babilónia “kei liréin barana” (Her 50:42). Dan lubeiti lariñagun profesía luagu ladouraguba lan “barana” lau Babilónia chóuruti layanuhaña lan meha hawagu saragu súdaragu médiana hama pérüsiana ha ábürühabaña luagun uburugu (Her 51:42; konpararualá luma Dan 9:26).
12-18 lidan Sisi-hati
ARUFUDAHANI GEBEGITI TÍDANGIÑETI BÍBÜLIA | AYAHUNI 1-5
“Ídehati ‘hemenigi’ wamá luagu Heowá lun wawandun lénrengunga”
(Aya 3:21, 24.)
“Ábame télemuchagun buani nuagun”
Íbini hiru lan Heremíasi, arufudati buin liña lan meha lau emenigini, ladüga aba layumuragun lun Heowá: “Chóuruti baritaguba lan nuagun, ábame télemuchagun buani nuagun” (bérusu 20). Chouru lumuti meha Heremíasi tídangiñe sun lanigi mabulieidun lubéi lan Heowá ani mabulieidun lubaña lan giñe lubúeingu ha asakürihabaña. Gama lumoun, kaba ladüga Bungiu Suntigabafu? (Arufudúni 15:3.)
Chouru lumuti Heremíasi luagu ‘lélemuchaguba’ lan buga Heowá hawagun ha asakürihabaña. Adügati dimurei le lun warihini Heowá kei aban gürigia hínsiñehabuti. Aranseñu liña “Le Íñugutimabei ligibuagu sun ubóu” lun lélemuchagun, o lǘnabudaguagüdün lungua, lun líderaguniña lubúeingu asansirei gádantiña lun harandarun luma (Sálumu 83:18). Ruti emenigini le dǘgüdaguaü lun Heremíasi le meha hírubei lasandirunu lanigi. Ligía desidírü lubéi lagurabahan lau gurasu darí desidírü lan Heowá líchuguni lúhabu lun lesefuruniña lumutuniña ha asakürihabaña (bérusu 21).
w11-S 15/9 páh. 8 pár. 8
Heowá walagantebei
8 Mosu meha harihini lani Lewí türibu Heowá kei alagan le yuubei houn. Yusu hamuti fiu hádangiñe dimurei “[Heowá] sun káteibei nun”, ítara, arufuda hamuti hemenigin luagu Bungiu luma deregeguaaña lan meha houngua lun (Aya. 3:24). Seriwiti meha Asafü, aban hádangiñe Lewitagu, keisi abürühati luma eremuhati. Gayaraati giñe aban lan meha hádangiñe lílana luban Asafü, le alidihabaliña eremuhatiña lidaaniwagu urúei Dawidi, abürühati ligía (1 Kro. 6:31-43). Aliihatiwa lidan Sálumu 73 wuribati lan meha lasandiragun abürühati ligía lungua lau larihini awanse hamá ha salufuribaña lidan habagari. Wéiriti gimugaü le lasandirubei darí lun lariñagun: “Málati haruma tan nanigi, ani haruma ligía núhabu lídangiñe sun wuribani”. Másiñati aban lan labulieiduni aban lan meha óunwenbu chansi leseriwidun lun Heowá luma larihini keisi alagan le yuubei lun. Lau sun lira, aba lederebugudun lafiñen lárigiñe “lebelurun lúbiñoun Bungiu” (Sal. 73:2, 3, 12, 13, 17).
(Ayahuni 3:26, 27.)
w07-S 1/6 páh. 11 pár. 3, 4
Puntu méiniti tídangiñeti liliburun Ayahuni
3:21-26, 28-33. Ka lunbei wadügüni lun wawandun íbini dan le hanarime lan wasufurirun? Ariñaga lumuti Heremíasi woun le lunbei wadügüni. Mabulieida waméi weiri lan línsiñehabu luma lugudemehabu Heowá. Ani haritagua waméi láurügü gabagari wamá ligía ábanbei resun buiti lun meferidirun wamani wemenigin, lunti giñe wagurabahani lasalbaragüle Heowá sin wekeharun. Lanwoun lira, lunti ǘnabugu wamá “darí ladagarun [wagibu] múarugun”, mini lan lira lunti lan wawanduni lénrengunga lau ǘnabuguni, gabarounga waméi anhein lan ígira lubéi Bungiu lun lasuseredun gániti aban resun buiti lun ladügüni.
3:27. Gayaraati lóuchawaguba lan hafiñen nibureintiña lau ladügǘn bula hau luma hawandun lénrengunga; gama lumoun “buítimati lederegeragun gürigia lungua lúmagiñe ñǘraügili”. Ka uagu? Ladüga ídehati meferidirun hamani nibureintiña hafiñen dan le lídanñadiña lan lénrengunga lun aranseñu hamá lun hagagibudagun luma amu burí turobuli ámuñegü.
Darí wamá pérüla lánina lichú aau
(Ayahuni 2:17.)
w07-S 1/6 páh. 9 pár. 4
Puntu méiniti tídangiñeti liliburun Ayahuni
2:17. Ka “lererun” Heowá luáguti Herusalén lagunfuliragüdübei? Genegeti layanuhaña lan luagu le lariñagubei lidan Fádirigu 26:17, ariñagati ñein: “Mámabadina húmagiñe, háfarahabadün háganiñu, háfarahabadün ha iyereehabúbaña hun, hanurahaba úouga éibaahatün”.
(Ayahuni 5:7.)
w07-S 1/6 páh. 10 pár. 5
Puntu méiniti tídangiñeti liliburun Ayahuni
5:7. Fáyeigüda lumutiña san Heowá gürigia luagu hachara hagüchagu? Uá, mabeichun lumutiña Heowá gürigia luagu hafigoun hagüchagu. Ariñagatu Bíbülia: “Kada lubeiti aban wádangiñe, laguseruba luougua luma Bungiu” (Rómana 14:12). Íbini ítara, gayaraati ladurarun luriban burí katei le lanügübei hachara binadu agüchagu darí lun hasufuriruni hadügawagun. Kei hénpulu, adügati háhuduragun binadu ísüraelina houn guáriua lun hénrengu lan meha houn ísüraelina úaraguatiña ha awinwandubaña saragu dan lárigiñe lun gaganbadi hamá lun Heowá (Áfuriduni 20:5).
19-25 lidan Sisi-hati
ARUFUDAHANI GEBEGITI TÍDANGIÑETI BÍBÜLIA | ESEKIÉLI 1-5
“Wéiriti meha línsiñe lun Esekiéli lasubudiragüdüni luganute Bungiu”
(Esekiéli 2:9–3:2.)
w08-S 15/7 páh. 8 pár. 6, 7
Le lunbei wadügüni lun wagagibudagun luma lénrengunga dan le wapurichihan tidan burí muna
6 Arufudati líburu le labürüdübei Esekiéli ámuya katei le lunbei líderaguniwa ayanuha lau ganigi. Lidan aban arufudúni, ruti Heowá aban líburu hóuburatu lun profeta Esekiéli to ídanboun bürüwañu lan “ayahuni, igarigu luma áünhani” dandu tanagangiñe kei tigibugiñe, ani ariñagati lun lun léiginu. Lariñaga lun: “Liráü wügüri, houboun líburu to [...] buíngüdabei buragei tau”. Ka lílabei arufudúni le? Mosu meha labuinchun Esekiéli lau luganute Bungiu sunsuinagubei le meha lunbei lapurichihani. Mosu meha giñe lararamagun asaminara luagun dimurei burí le tídanbei líburu tuguya lun lachülürün lidoun tilulin-agei lanigi. Ariñagati Esekiéli: “Aba néiginu, ani bímetu nasandirunu kamá sírudu”. Wéiriti meha lubuidun lasandiragun Esekiéli lungua lau lapurichihani uganu lúmagiñeti Bungiu ítara liña kamá hamuga látuña maba. Wéiriti meha leteingiradi Esekiéli luagu leseriwidun lun Heowá kei profeta íbini mosu lan meha lapurichihan aban uganu dǘgüdati houn gürigia ha meha mabusenrunbaña haganbuni (aliiha huméi Esekiéli 2:8–3:4, 7-9).
7 Daritiwa aban lubuidun arufudahani houn lubúeingu Bungiu uguñe weyu lidan arufudúni le larihibei Esekiéli, lugundun mosu giñe wapurichihan aban uganu dǘgüdati houn gürigia ani anihein dan minebenti le wadügübei houn. Lun wasigirun arufuda eteingiruni luagu chansi le líchugubei Heowá woun lun wapurichihani luganute mosu waturiahanu Lererun buidu buidu. Anhein dísegua lubéi waturiahanu Bíbülia o maturiahan wamanu hulili siñabei lachülürün uganu le tídanbei tidoun wanigi. Gayaraati san gabügürügua lan buídutima ligía ligaburi haliihanu luma haturiahanu Bíbülia? Ka uagu mararamagun hubéi asaminara luagu le haliihabei sagü haliihanu Bíbülia? (Sal. 1:2, 3).
it-1-S páh. 823
Isasaü
Sagá lumuti isasaü sun le lemegeirubei wágubu lídangiñe éigini, chagaléi le memegeirun lubéi. Lidan aban arufudúni le larihibei Esekiéli, yúsuati katei le keisi hénpulu lun larufudúniwa kaba lan buiti lasagara dandu lidan lisaminan kei lidan lumadagua luma Heowá anhoun meha leiga líburu hóuburatu lun labuinchagüdüni luragei (ebü. me·ʽím) tau. Lídehaba meha lararamagun Esekiéli asaminara luagun dimurei burí le bürüwañubei tidan líburu hóuburatu tuguya luma lakipuruni lidan lisaminan lun lárügüdün erei lidan leseriwidun lun Heowá. Ítara liña leresibiruni ariñahani lúmagiñeti Bungiu rúa ligía aban uganu lun lun lapurichihani (Ese. 3:1-6; konpararualá luma Aruf. 10:8-10).
(Esekiéli 3:3.)
w07-S 1/7 páh. 12 pár. 3
Puntu méiniti tídangiñeti liliburun Esekiéli (furumiñeti fánreinti)
2:9–3:3. Ka uagu bime lubéi lasandirunu Esekiéli líburu lánina ayahuni luma áünhani? Ligaburi meha larihini Esekiéli wadagimanu le ichugúbei lun adügübei lun bime lan lasandirunu líburu hóuburatu kei maba. Wéiriti meha leteingiradi Esekiéli luagu leseriwidun lun Heowá kei profeta.
Darí wamá pérüla lánina lichú aau
(Esekiéli 1:20, 21, 26-28.)
Téibaaguña likarün Heowá lau lóufudagun
10 Arufudahatu Bíbülia anihein lan giñe aransehani buiti hadan lumutuniña Heowá sielu. Arihati Esekiéli aban arufudúni le ídanbei larihei Heowá tigibuagu aban karü to hanarimeti loufun téibaagun lidoun furumiñeguarügü oubaü le ñeinhin lumuti labusenra Heowá (Esekiéli 1:4-28). Karü tuguya aban sínbolu lani fánreinti tani lóundarun Heowá le siélubei. Súnwandan aranseñu liña lan fánreinti tánina lóundarun Heowá le lun lafalaruni ladundehan. Ani ligía giñe adundehabalin fánreinti le yaabei ubouagu. Samina wamá luagun sun asansiruni le adügǘwaalibei tidan lóundarun Heowá lidan lagumuhóun 10 irumu. Málühali Kristu le Liráü Bungiu agumucha lau ubóu wuribati le. Ítarati inebebei Heowá houn sun gürigia, inebehabubaña giñe lun liri luma lun liricha lun larúeihan.
(Esekiéli 4:1-7.)
w07-S 1/7 páh. 12 pár. 4
Puntu méiniti tídangiñeti liliburun Esekiéli (furumiñeti fánreinti)
4:1-17. Le san lúgubu arufuda lani meha Esekiéli sügǘ le arufudubalin ida luba lan legeyedawagun Herusalén? Kei ígira lani Heowá Esekiéli lun layusurun amu katei lun lábouagun arufudati lira le lan lúgubu arufuda lani Esekiéli sügǘ luáguti legeyedawagun Herusalén. Aba labalachun luéigiñe lubaünan lun larufuduni lidurun arúeihani lánina diisi türibu luagu ǘrüwa-san-gádürü-wein-diisi irumu, lúmagiñe lagumeserun lidan irumu 997 lubaragiñe lidaani Kristu darí lagünrichawagun Herusalén lidan irumu 607. Lárigiñe, aba labalachun luéigiñe lóunwenren lun larufuduni bián-wein irumu le haubei lílana Hudá afigouha, lúmagiñe líriduniwa Heremíasi profetame lidan irumu 647 lubaragiñe lidaani Kristu darí irumu 607. Lidan sun dan le ladurarubei gádürü-san-darandi weyu ligía, murusunrügüñein éigini le léigibei Esekiéli luma duna le látubei, ítara, arufuda lumuti ilamaü le meha lunbei liabin danme buga legeyedawagun Herusalén.
26 lidan Sisi-hati darí 2 lidan Sedü-hati
ARUFUDAHANI GEBEGITI TÍDANGIÑETI BÍBÜLIA | ESEKIÉLI 6-10
“Hamakürǘba san lun herederun wínwanñu?”
(Esekiéli 9:1, 2.)
Álügüdahani burí le hadügübei aliihatiña
Lidan aban arufudúni, arihati Esekiéli aban wügüri barüina liña ílagu le lánina abürühani liranaagua hama sisi wügüriña tau hárumate háhaburugu. Ka san mini lubéi katei le?
▪ Layanuhaña hawagu súdaragu siéluna ha meha ídehabaña lidan lagünrinchawagun Herusalén ani hídehaba giñe danme le lagünrinchawagun ubóu le lani Satanási lidan Arümahedón. Iseriti afuranguagüdüni le. Ka san uagu wasansirei ligaburi wafuranguagüdüni profesía le?
Lubaragiñe irumu 607 lubaragiñe Kristu, adügati Heowá lun larihini Esekiéli le lunbei lasuseredun Herusalén lubaragiñe lagünrinchawagun. Lidan arufudúni ligía, ariha lumuti meha Esekiéli sun katei wuribati le hadügübei gürigia lidan uburugu. Lárigiñe, aba larihin hebelurun sisi wügüriña, “kada aban tau lárumate lúhaburugu”. Arihati giñe “aban wügüri tautu linu ladaüragun barüina liña ílagu le lánina abürühani” (Esekiéli 8:6-12; 9:2, 3). Aba lariñagun Heowá lun wügüri ligía: “Éibugabei sun uburugu Herusalén, ábame bíchugun aban seini hereberugu sun ha hírubaña luagu burí katei wuribati le adügǘbei ñein uburugu”. Lárigiñe lira, mosu meha houdin sisi wügüriña tau hárumate áfaraguaña sun ha meha úati seini hereberugu (Esekiéli 9:4-7). Ka gayaraabei wafurendeirun lídangiñe arufudúni le? Katei san wügüri le laubei “ílagu le lánina abürühani”?
Ariñaga lumuti Esekiéli profesía le lidan irumu 612 lubaragiñe Kristu. Ani gúnfuliti luagu furumiñeti wéiyaasu seingü irumu lárigiñe, dan le lígirunbei Heowá lun hagünrinchaguni súdaragu babilóniana Herusalén. Ítara liña meha layusuruniña Bungiu babilóniana lun hagumuchun hau ha maganbadibaña lun (Heremíasi 25:9, 15-18). Ka méhati asuseredubei houn huríu úaraguatiña ha meha asufurirubaña luagu sun katei wuribati le meha asuseredubei Herusalén? Sefu lumutiña Heowá luéi óunweni.
Lidan arufudúni ligía, míchuti Esekiéli ni aban makü le gayarati larihín luagu ni aban gürigia ani madan lumuti giñe lagünrinchawagun Herusalén. Ánheligu meha alidihabalin günringuaü ligía. Adügati profesía le lun gayara lan warihini le asuseredubei sielu. Ariñagati meha Heowá houn lani ánheligu lun lan halidihani hagünrinchawagun ha wuribabaña ani lun hesefuruniña ha buídubaña luéi óunweni.
Lagunfulirayaba profesía le ámuñegü. Ida, ani ídaba lagunfulira? Afuranguagüda wamuti meha tidan burí wani agumeiraguagüdüni kristiánugu lan anuadirúaaña ha añaheinguabaña ubouagu mini lubéi wügüri le laubei ílagu lánina abürühani. Ariñagatiwa meha giñe resibi hamani gürigia makü lun hásügürün lau ibagari dan le haganbuni ani resibi haméi uganu. Gama lumoun ariha wamaali mosu lan wasansiruni ligaburi wafuranguagüdüni katei le. Ka uagu? Ladüga málügili lúmagiñe waturiahani Matéu 25:31-33 ani aba warihin Hesusuba lan aguseragüdaña gürigia, ani ladügübei lan ámuñegü, lidan óunwenbu asufuriruni. Lídanme dan ligía, ligíaba desidírü kátaña lan ítarabaña kei mudún ani kátaña lan ítarabaña kei gábara. Hásügürüba mudún lau ibagari, ánhañati gábara, hóunweguba.
Kati wafurendeirubei lídangiñe arufudúni le larihibei Esekiéli? Furendeitiwa seingü katei:
1) Lubaragiñebei lagünrinchawagun Herusalén, yusu lumuti Heowá Esekiéli, Isaíasi luma Heremíasi lun hawisaruniña gürigia luagu le lunbei lasuseredun lidan uburugu. Uguñe weyu, yúsuti Heowá aban liraüraü sétanu hani kristiánugu anúadiruaña lun harufudahan houn gürigia luma lun heweridiruniña lubaragiñe lagumeserun óunwenbu asufuriruni. Le linarün katei, sun lubúeingu Heowá ídehatiña lidan wadagimanu lánina eweridihani le (Matéu 24:45-47).
2) Míchugunti meha Esekiéli ni aban makü hawagu gürigia ha lúnbaña hásügürün lau ibagari. Uguñe weyu, míchutiña giñe lubúeingu Bungiu aban makü hawagu gürigia. Apurichiharügütiña lun hasubudiragüdüni houn gürigia kaba lan asusereda ámuñegü. Ani gúnfuli hamuti wadagimanu le lidan sun ubóu lau hídehan ánheligu (Arufudúni 14:6).
3) Ítara kei lidan lidaani Esekiéli, ha lúnbaña hesefurun lidan wadaani, úati aban makü hereberugu. Ka lunbei hadügüni gürigia guentó lun hesefurun? Dan le haganbuni eweridihani, mosu hafurendeirun afalarei lani Kristu hénpulu, hederegeragun houngua lun Bungiu ani íderagua hamañame líbirigu Kristu lau hapurichihani uganu luáguti Larúeihan Bungiu (Matéu 25:35-40). Lidan óunwenbu asufuriruni, hanúadiruba gürigia hagía lun hásügürün lau ibagari.
4) Hesusu mini lubéi wügüri le laubei “ílagu le lánina abürühani”. Lídanme lidaani óunwenbu asufuriruni, lamakürübaña Hesusu “saragu gürigia” danme le anúadira laaña keisi mudún. Ábameti heresibiruni chansi lun hawinwandun lun súnwandan ubouagu (Matéu 25:34, 46, TNM).
5) Uguñe weyu, ha sisi wügüriña ha táubaña áruma aba sínbolu hani súdaragu siéluna ha lalidihabaña Hesusu. Yarafa madise hagumuchuba hau sun néchani luma lau sun wuribani (Esekiéli 10:2, 6, 7; Arufudúni 19:11-21).
Íderagua lumutiwa seingü leksióun le lun wafiñerun luagu magumuchunbei lan Heowá hau ha richaguabaña danme le lagumuchun hau ha wuribabaña (2 Féduru 2:9; 3:9). Ani haritaguagüda lumutiwa giñe súdini lan wadagimanu lánina apurichihani uguñe weyu. Sun gürigia mosu haganbuni eweridihani lubaragiñe liabin lagumuchagüle ubóu (Matéu 24:14)
(Esekiéli 9:3, 4.)
(Esekiéli 9:5-7.)
Darí wamá pérüla lánina lichú aau
(Esekiéli 7:19.)
w09-S 15/9 páh. 23 pár. 10
Úati arufudahani buítimati luéi le líchugubei Bungiu
10 Kei subudi lani Heowá buidu le lunbei lasuseredun yarafa madise ligíarügüñein gayara íderaguawa aranseha lubá le lunbei liabin ámuñegü. Ligía ariñagubei ka lan lunbei lasuseredun houn gürigia ámuñegü (Isa. 46:9, 10). Ariñagatu Bíbülia luagu yarafaali lan “lanarime luéyuri” Heowá (Sof. 1:14). Lídanme weyu ligía lagunfuliruba dimurei burí le abürüdǘbei lidan Ariñawagúni 11:4: “Úabei hu lan irisini lidan luéyuri aguseruni, ánheinti richaguaü, sefu lumutiña gürigia lídangiñe óunweni”. Súdinitimabei wamadagua luma Bungiu luéi furumiñeguarügü katei danme lachülürün dan lun lagayuahan luagun ubóu le lábugiñebei lubafu Satanási. Úabei hu lan seinsu, lugundun kei lariñaguni Esekiéli 7:19: “Hágurubei pülata ǘmada; hachagarubei hagolun kamá hamuga ifei”. Líderagubadiwa wasubudiruni katei le lun desidírü wamá buidu lúmagiñe guentó.
(Esekiéli 8:12.)
w11-S 15/4 páh. 26 pár. 14
Ígira wamá lun ladundehaniwa lani Bungiu sífiri sandu
14 Arufudatiwa inarüni lan wafiñen dan le warihini Heowá kei aban Bungiu inarüniti. Anhein marihin wabalin ítara, ménrengubei hamuga woun lun wéiguadun lidoun figóu. Samina wamá luagu le asuseredubei lidan lidaani Esekiéli. Arufuda lumuti Bungiu lun profeta Esekiéli katei burí wuribati le meha hadügübei fiu hádangiñe lumutuniña aramudaguarügü, ariñageina lun: “Liráü wügüri ariha bumuti san le hadügübei ábutigu ísüraelina aramudaguarügü? Háhuduraguña hábiñe haguariuan. Haritaguatiña luagu marihin nani le hadügübei, luagu úaadina lan fulasurugu” (Ese. 8:12). Ariha wamuti san halíagiñe lan liabin turobuli? Saminatiña meha ibidiñe lan lun Bungiu ka lan hadaagubei. Le lúgubu, marihin hamuti meha Heowá kei Bungiu inarüniti.