Yarafaali Paraísu!

Katei burí wuribati le asuseredubei Ubouagu arufudati yarafaali lan Paraísu. Lüha meha tariñagun Bíbülia warihuba lan dan hérenguti lubaragiñe Paraísu lan Ubóu. Guentó wabagariduña lidan dan ligía. Nihán lídangiñe burí katei le tariñagubei Bíbülia lasusereduba lan:

Wuribu wéinamuti. “Lageindaguba aban ageiraü luma aban, lawuribuhaba aban fulasu luma aban.” (Matéu 24:7.) Gúnfulihali profesía le. Lúmagiñe irumu 1914 ñeinhali bián wuribu wéinamuti luma burí amu wuribu ñÿraütimati. Hilatiñu miñonu gürigia lidan wuribu burí ligía.

Burugua sandi. Ñeinbei “sandi lidan ámuñegueinarügü fulasu” (Lúkasi 21:11). Gúnfulihali san seini le? Anha. Sandi kei kánserü, tisandi anigi, tunú, malaria, sida, luma ámuñegueinarügü sandi áfara haali miñonu gürigia.

Lilóuguan éigini. Lidan sun ubóu añahein gürigia míbeti éigini hama lun héigin. Hilatiñu miñonu gürigia sagü irumu ladüga ilamaü. Katei le ábanya seini luagu yabei lan Paraísu lau lóufudagun. Erengatu Bíbülia: “Ñeinbei [...] ilamaü” (Márükosu 13:8).

Hárabaganali. “Ñeinbei [...] hárabaganali lidan saragu fulasu.” (Matéu 24:7.) Katei le gúnfulihali giñe lidan wadaani. Hilaguatiñu hóugiñe aban miñonu gürigia ladüga hárabaganali lúmagiñe 1914.

Gürigia wuribatiña. ‘Hínsiñebei seinsu houn’ gürigia ‘hóunguarügübei gürigia habusenra buiti’. ‘Háluahabei hagundan guánarügü lubaragiñe hamuga háluahani Bungiu.’ Irahüñü “maganbunhabaña hagübürigu” (2 Timotéu 3:1-5). Ma añahein bandi gürigia ítaratiñu uguñe weyu? Minebenti Bungiu houn ani agubuhatiñu turóbuli houn ha óuchubaña hafurendeirun luagu Bungiu.

Duru o wuribani. Ñeinbei giñe “saragu wuribani” (Matéu 24:12). Gánwounhali wuribani lídoun lagumuhóun irumu burí le, ma ítara liña? Peligurugaali lidan sun fulasu, gayarati líweruhounua le humabei, hamañourunua (heyeedunua) o ladügǘn damichi hun.

Sun katei le arufudati yarafaali lan Arúeihani le lani Bungiu. Erengatu Bíbülia: “Danme giñe le harihini lasuseredun burí katei le, subudi huméi luagu madiseeli lan lidaani Bungiu lun larúeihan” (Lúkasi 21:31). Gama lumoun, ka Arúeihanibei le lani Bungiu? Aban arúeihani lani Bungiu sielu le lunbei ladügüni Ubóu paraísume. Lanügübei Arúeihani le lani Bungiu hafulasun sun arúeihatiñu ubouagu (Danieli 2:44).