Ariñahani le lunbei lakutihóun lidan adamuridaguni Habagari Kristiánugu luma Heseriwidun
2-8 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | MATÉU 26
“Luéyuri Esefuruni luma Aritaguagülei: le ídanbei genegegua lan luma le ídanbei menegegua lan”
nwtsty dibuhu luma bidéu
Adineruni le lánina Luéyuri Esefuruni
Lidan adineruni le lánina Luéyuri Esefuruni, súdiniti meha lun ñein lan: 1) mudún le ásürahouarügüti (le máhalachawagunti ni aban lídangiñe labu), 2) fein maganatu lébini, 3) híduru gífiti (Afu 12:5, 8; 1 Lu 9:11). Chóuruti adüga lan meha híduru gífiti ligía lun haritaguni ísüraelina ligifi ibagari le hanügübei dan meha le idamunigiña Ehiptu. Yusu lumutu Hesusu fein maganatu lébini lun layanuhan luagu lúgubu le mafigounbei (Mt 26:26). Ariñagati giñe apostolu Pábulu Hesusu lan “mudunbei [le] lánina wesefurun” (1 Ko 5:7). Lidan furumiñeti sígulu, gurawatu meha giñe 4) diwéin lidan adineruni le lánina Luéyuri Esefuruni. Yusu lumutu Hesusu diwéin lun layanuhan luagu lita, le meha lunbei láwiyurun keisi sákürifisiu (Mt 26:27, 28).
(Matéu 26:26.)
nwtsty abürüdǘni lau lanwoun ariñahani luagu Mt 26:26
núgubu [mini tubéi fein to, TNM]: Gayaraati lásügürawagüdün dimurei güriegu estín kei “le mini lubéi; le lílabei; le liyawadinabei”. Ligía meha gunfuranda habéi lani Hesusu apostolugu weyu ligía, lugundun harihiñoun meha fein maganatu lébini aríagu hagía lun Hesusu. Ligíati, siñati meha lúgubu guánarügü lan Hesusu líchugubei houn lun héigini. Gunfurandatima wamuti lira dan le wasaminarun luagu yusua lan giñe dimurei güriegu le lidan Matéu 12:7 le ásügürawagüdübei tidoun saragu Bíbülia kei “mini lan”.
nwtsty abürüdǘni lau lanwoun ariñahani luagu Mt 26:28
Nita le, le añuuragüdübalin iseri daradu: Hama kristiánugu anuadirúaaña ladügei Heowá iseri daradu le ani lau lani Hesusu sákürifisiu lachoururagüdüwa (Ebü 8:10). Lidan bérusu le, yusu lumuti Hesusu dimureimeme le meha layusurubei Moisesi dan le lederegerunbalin Heowá Daradu lánina Lúrudu lun ligibuagu Wübü Sinaí lun líchuguni houn ísüraelina (Afu 24:8; Ebü 9:19-21). Ítara kei meha adüga lan hata bágasu hama gábara lun gebegi lan Daradu lánina Lúrudu le meha ladügübei Bungiu hama Ísüraelina, ítara luba meha giñe ladügün lita Hesusu lun gebegi lan iseri daradu le meha lunbei ladügüni Heowá hama kristiánugu anuadirúaaña. Ñuruti daradu ligía lidan Pentekosutesi le lánina irumu 33 lárigiñe lidaani Kristu (Ebü 9:14, 15).
Darí wamá pérüla lánina lichú aau
(Matéu 26:17.)
nwtsty abürüdǘni lau lanwoun ariñahani luagu Mt 26:17
Le furumiñeti weyu lidan fedu le ñein lubéi teigua fein maganatu lébini: Gumeseti meha fedu le ídanbei teigúa fein maganatu lébini lidan weyu 15 lidan hati huríu le gíribei nisán, aban weyu lárigiñe lefeduhóun Luéyuri Esefuruni (14 lidan nisán), sédüñein meha weyu lidura (ariha humóun sgd seksióun 19). Dan meha hayanuhan gürigia luagu bián fedu le lidan lidaani Hesusu, adüga hamuti meha kamá hayanuhaña luagu ábanmeme fedu le durati widü weyu, kamá hamuga lidan weyu 14 lidan nisán lagumesera, darí lun anihein lan meha dan hariñagun luagu Luéyuri Esefuruni: “Fedu le lidaani teiginiwa fein to maganatu lébini” (Lk 22:1). Lidan kesi le, gayaraati lásügürawagüdün dimurei “le furumiñeti weyu” kei “weyu le lubaragiñebei”. Lidan Huan 1:15, 30, sügügüdawati dimurei güriegu “furumiñeti” [prótos] kei “lubaragiñe” dan le lariñagunbei Huan le abadiseihabei aban katei ítarati: “Aniheinhali [...] meha nubaragiñe [prótos]”. Ídehati lubeiti binadu hechun huríu le lun wasubudiruni weyu lan 13 lidan hati nisán hadügei disipulugu álügüdahani le lun Hesusu. Weyu giñe ligía houdin aranseha lubá lefeduhóun Luéyuri Esefuruni le meha lunbei lagumeserun “dan le laguñeedunbei” lugundun ligía meha oura lagumeserun weyu 14 lidan hati nisán (Mr 14:16, 17).
(Matéu 26:39.)
nwtsty abürüdǘni lau lanwoun ariñahani luagu Mt 26:39
sefubána luéi uniñein gífiti le: Tidan Bíbülia, anihein dan layusurún dimurei “uniñein [‘kopu’, TNM]” lun layanuhóun luagu lugundan Bungiu, o luagu dasi le líchugubei Bungiu lun aban gürigia. Chóuruti weiri lan meha idiheri le luágubei Hesusu lau lasubudiruni lóunweba lan kei aban gürigia le gadurunti luagu lanabaguni Bungiu o kei aban le garabaguaali lungua luagun urúei lugundun lanügüba meha lira luriban iri lun Lúguchi, ligía lafurieidunbei amuriaha lun lesefurúniwa luéi “uniñein” gífiti ligía.
9-15 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | MATÉU 27, 28
“Ka uagu wadüga disipulugu, halía ani ida?”
(Matéu 28:18.)
w04-S 1/7 páh. 8 pár. 4
Heiba adüga disipulugu
4 Rúaali sun ubafu lun Hesusu luagu damuriguaü kristiánu. Lábugiñe haali giñe lubafu Hesusu Larúeihan Bungiu lúmagiñebei lagumeserun lidan irumu 1914 (Kolosana 1:13; Arufudúni 11:15). Ligía hábutibei ánheligu, lábugiñeñanu lererehan saragu míñunu súdaragu ha siélubaña (1 Tesalónikana 4:16; 1 Féduru 3:22; Arufudúni 19:14-16). Rúhali Lúguchi üma lun lun “lagünrinchaguni [...] sun líbiri luwuyeri arúeihani, ubafu, luma erei” le hawagubei láganiñu sun le richaguabei (1 Korintuna 15:24-26; Éfesuna 1:20-23). Ani mámarügüñein hawagu gürigia nibagaritiña gabafu lan Hesusu. Ariñagatu Bíbülia rúaali lan ubafu lun lun “laguseragüdüniña ha wínwangiñabaña hama ha hilaguaañabaña”. Gabafuti Hesusu lun láguyuguagüdüniña hilaaña (Adügaü 10:42; Huan 5:26-28). Furanguti lubeiti moun lumuti lan warufudun mebereseni lun lugumadin Le resibihalibei saragu ubafu ítara. Ligía inebe lubéi lugumadin Kristu woun libügürü woudin adüga disipulugu ani gaganbaditiwa lun lau sun wagundan.
(Matéu 28:19.)
nwtsty abürüdǘni lau lanwoun ariñahani luagu Mt 28:19
adüga humaña nánime disipulugu: Gayaraati giñe lásügürawagüdün dimurei güriegu matheteúo kei “arufudaha” lun híderawagun disipulugu o aturiahatiña lun hafurendeirun (konparárü huméi luma Mt 13:52, ñein lubéi lásügürawagüda dimurei le kei “arufudahati”). Arufudati dimurei badisei luma arufudaha ka lan lílabei gumadi: “Adüga humaña nánime disipulugu”.
lílana sun fulasu: “Sun burí néchani” áfuachubei lidan bérusu le dan le lásügürawagüdün kei meha aubei labürüdǘwa furumiñe. Ani arufudati bérusu burí le geyegubei lau hawagu lan gürigia ha lídangiñetiña sun néchani layanuhóua. Kei ariñawagúa lan lidan bérusu le: badisei humaña, furanguti layanuhóuña lan hawagu gürigia. Iseriti meha gumadi lira. Lubaragiñebei meha liabin Hesusu ubouagun, buíduti meha heresibirúniwa gürigia ha mámabaña huríu ánhaña meha óundara hamoun ísüraelina lun heseriwidun lun Heowá (1 Uru 8:41-43). Ánheinti lau gumadi le, óunaha lumutiña Hesusu lani disipulugu apurichiha houn gürigia ha mámabaña huríu, arufudei ítara, lachülürüba lan buga wadagimanu lánina hadügǘn disipulugu darí lumoun lagumuhóun larigeirugu ubóu (Mt 10:1, 5-7; Aruf 7:9).
(Matéu 28:20.)
nwtsty abürüdǘni lau lanwoun ariñahani luagu Mt 28:20
Arufudaha huguyame houn: Dimurei güriegu le ásügürawagüdübei kei “arufudaha”, mini lan, wíchugun adundehani, wafuranguagüdüni katei, warufuduni houn amu ka lan lébunabei ítaga arufudahani luma ida luba lan hachoururuni houngua anhein inarüni lubéi (ariha huméi abürüdǘni lau lanwoun ariñahani luagu Mt 3:1 tidan mwbr18.01). Gíbeti lunti ladügǘniwa dan le larufudahóuña lan houn amu lun gaganbadi hamá lun sun le uágubei lariñaga Hesusu: warufudahani sun le larufudahabei houn, warufuduni houn ida luba lan hawinwanduni le hafurendeirubei luma ida luba lan háyeihani Hesusu (Hn 13:17; Efe 4:21; 1 Fe 2:21).
Darí wamá pérüla lánina lichú aau
(Matéu 27:51.)
nwtsty abürüdǘni lau lanwoun ariñahani luagu Mt 27:51
korutína: Tubuidun belu wéndetu to meha adüraagubalin fulasu le Sándubei luéi le Sándutimabei tidan ténpulu. Según binadu hafiñen huríu kéiburiñein meha 18 méturu (60 ugudi) timigifen korutína hǘrütu tuguya ani 9 meha méturu (30 ugudi) tidabuberen, ánheinti tigaranan 7.4 sentimeturu (2.9 incha). Lau taheiridagun korutína lidan bián murusun, mama meha larufudarügüñein Heowá weiri lan ligañi hama ha áfarubalin Liráü hilagubei, larufuduñein meha giñe gayaraahali lanme lebelurúniwa sielun (Ebü 10:19, 20).
ténpulu [sanduariu, TNM]: Yúsuati dimurei güriegu naós le áfuachubei ya lun layanuhóun tuagu muna súdinitimatu to meha ñein lubéi Fulasu le Sándubei luma Fulasu le Sándutimabei.
(Matéu 28:7.)
nwtsty abürüdǘni lau lanwoun ariñahani luagu Mt 28:7
ábame hariñagun houn lani disipulugu luagu saraali lan: Würiña ha, asubudirubalin furumiñe luagu águyuguaali lan Hesusu ani hagía ounahóubaña lau ñunsu ligía houn ha híbiri disipulugu (Mt 28:2, 5, 7). Kei tariñaguni aban binadu dugumedu luágutu hechun huríu, máhawati meha lun hadimurehan würiña keisi gefentiña lidan burí guséi. Ánheinti lani Heowá ánheli, ru lumuti lubuidun chansi houn würiña ha lun hasubudiragüdüni lubuidun ñunsu le.
16-22 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | MÁRÜKOSU 1, 2
“Ferudunawaali bifigoun”
jy-S páh. 67 pár. 3-5
“Ferudunawaali bifigoun”
Sun aniha lan Hesusu arufudaha tidan aban muna to buinboun hau gürigia, aba hayabin gádürü wügüriña barüina aban wügüri le deregüdaali úgubu tidan lubarari. Busentiña lun lareidaguagüdüni Hesusu hamada. Kei gibe habéi gürigia ñein, siñati hachülürün le ñein lubéi Hesusu (Márükosu 2:4). Mama funa murusun íruni le hasandirubei! Íbini ítara, aba hamudeirun tábulugun muna, aba hagidarun murusun luéigiñe tábulugu, ábati harariragüdüni sánditi ñéingiñe tidan lubarari.
Gáñiti san Hesusu hama luagu le hadügübei? Uá, ni murusun! Adügarügüti lira lun taweiridun lanigi Hesusu luagu lanarime afiñeni le hawagubei ani aba lariñagun lun sánditi ligía: “Ferudunawaali bifigoun” (Matéu 9:2). Gayaraati funagia feruduna lan Hesusu figóu? Magundantiña ha arufudahabalin lilurudun Moisesi hama fariséugu lau dimurei le, ábati hasaminarun: “Ka san uagu ladimureha ítara? Lanabaguñeinga le Bungiu, ladüga úati ni aban gayaraati feruduna lan figóu luéidigia Bungiu?” (Márükosu 2:7).
Kei subudi lani Hesusu le hasaminarubei, aba lariñagun houn: “Ka san uagu hasaminara ítara? Káteitima san ménrengubei lariñawagún lun sánditi le: ‘Ferudunawaali bifigoun’, o lariñawagún lun: ‘Saraba, budaboun bubarari, beiba’?” (Márükosu 2:8, 9). Gayaraati meha lárügüdün Hesusu luéigiñe sákürifisiu le meha lunbei ladügüni lun feruduna lani lifigoun gürigia ligía.
nwtsty abürüdǘni lau lanwoun ariñahani luagu Mr 2:9
Káteitima san ménrengubei: Ménrengunbei hamuga lun lariñagun furumiñeguarügü gürigia gabafu lan lun feruduna lan figóu anhein mamuriahóunbei lubéi luma lun ladügün somu katei le arufuduti anihein lan ubafu ligía luagu. Ánheinti lau lariñagun Hesusu saraba [...] beiba búbiñoun, mégeiwati meha lun lasuseredun aban milaguru lun larihíniwa furangu gabafu lan lun feruduna lan figóu. Dandu lidan abahüdaguni le kei lidan le lariñagubei Isaíasi 33:24, arihúati furangu figóu lan le galagante wabéi adügübei lun wasandirun.
Darí wamá pérüla lánina lichú aau
nwtsty abürüdǘni lau lanwoun ariñahani luagu Mr 1:11
laganbúniwa lariñagun aban umalali siélugiñe: Anihán furumiñeti lídangiñe ǘrüwa wéiyaasu le ídanbei labahüdawagúa lidan burí Ewanhéliu ayanuha lan Heowá houn gürigia siélugiñe (Hn 12:28).
Buguya niráü: Íbini lubaragiñe nasirua lan Hesusu kei wügüri ubouagu, Liraügubeiñein Bungiu (Hn 3:16). “Liráü [giñe] Bungiu” Hesusu dan le ya lubéi ubouagu, ítara kei meha liráü lan Bungiu Adán lubaragiñebei lafigounhan (Lk 1:35; 3:38, TNM). Gama lumoun, genegeti mama lan lariñagarügüñein Bungiu káteiñein lan Hesusu lau dimurei burí le lariñagubei. Kei úara lan luma lóunahan sífiri sandu luagun Hesusu lariñagei Bungiu dimurei burí le, chóuruti larufuduñein lan meha Heowá wügüri lan ligía Liraübei le ábanrügüti ani anihaya lan meha águrahoua lunya gayara lan lawinwandun sielu ani lanúadiruñein lan giñe lau lani sífiri sandu lun Urúeibei lan luma lun ábanbei lan Fádiri le Íñutimati (konparárü huméi luma Hn 3:3-6; 6:51; Lk 1:31-33; Ebü 2:17; 5:1, 4-10; 7:1-3).
le aubei óunwenbu lan nugundan: Yúsuati giñe dimurei le lidan Matéu 12:18 dan le layanuhóuña lubéi luagu le lariñagubei Isaíasi 42:1 libügürü Mesíasi o Kristu. Lau lóunahani Bungiu lani sífiri sandu luagun Hesusu, ariñaga ligía luagu Liráü lan, larufuduñein furangu Hesusu lan Mesíasi le füramasewabei.
nwtsty abürüdǘni lau lanwoun ariñahani luagu Mr 2:28
Gabafutina [...] luagu luéyuri emeraaguni: Layanuhaña Hesusu luougua lau dimurei burí le (Mt 12:8; Lk 6:5), arufudei ítara luagu gayara lan ladügüni wadagimanu le líchugubei Lúguchi le siélubei lun íbini lidan luéyuri emeraaguni (konparárü huméi luma Hn 5:19; 10:37, 38). Lidan luéyuri emeraaguni ladügei Hesusu milaguru burí le hanarimetimabei lídangiñe sun le ladügübei, kéiburi lareidaguagüdüniña sánditiña (Lk 13:10-13; Hn 5:5-9; 9:1-14). Chóuruti larufuduñein lan sun lira woun luagu wibihiba lan awalidaguni danme lábugiñe haadiwa lagumadihan Hesusu lídanme Larúeihan Bungiu, leme lunbei ítarabei lan kei luéyuri emeraaguni (Ebü 10:1).
23-29 LIDAN GÁDÜRÜ-HATI
ARUFUDAHANI GEBEGITI TÍDANGIÑETI BÍBÜLIA | MÁRÜKOSU 3, 4
“Areidaguagüdati Hesusu sánditiña lidan luéyuri emeraaguni”
jy-S páh. 78 pár. 1, 2
Ka gayaraabei ladügǘn lidan luéyuri emeraaguni?
Lídanya aban luéyuri emeraaguni, aba lidin Hesusu tidan haligilisin huríu, háfuga Galiléa. Ñein lariha aban wügüri le hilaali lúhabu le lóunwenren (Lúkasi 6:6). Aba haríaguni arufudahatiña lilurudun Moisesi hama fariséugu Hesusu dan le ayarafadeina lan lun. Ka uagu? Subudigüda hamuti kátima lan tídanbei hanigi dan le hadügünbalin álügüdahani le: “Gayaraati san lagaranihóun lun aban sánditi lidan weyu le emeraaguagülei?” (Matéu 12:10).
Saminatiña lábutigu relihión ha gayara lan lagaranihóun lun aban sánditi lidan luéyuri emeraaguni ánheingubeirügü lóunweba lubéi gürigia ligía anhein magaranihóun lun. Ítarati, siñati meha lasuparún somu gürigia le aruguchagubei abu o lagürawagun somu diliguati luagu lidan luéyuri emeraaguni, ladüga móunwenbei lan gürigia ligía anhein magaranihóun lun. Furanguti mama lan meha ladüga berese hamá fariséugu hama arufudahatiña lilurudun Moisesi lau fugiabu gürigia ligía hadügünbalin álügüdahani le lun Hesusu. Háluahaña lébuna híchugun lidurun Hesusu lun hóunahan áfaragüdei.
jy-S páh. 78 pár. 3
Ka gayaraabei ladügǘn lidan luéyuri emeraaguni?
Ánheinti Hesusu, subudi lumuti wuribani le tídanbei hanigi. Subudi lumuti ganigi hamá hésegeruni le tariñagubei Lererun Bungiu libügürü le gayaraabei lumoun le siñabei ladügǘn lidan luéyuri emeraaguni (Áfuriduni 20:8-10). Mama furumiñe hayanuhan wuriba luagu burí katei buiti le ladügübei. Guentoti, laranseraguaali Hesusu katei lubá lagagibudagun hama lau lariñagun lun wügüri le hilaalibei úhabu: “Saraba, ráramaba ya hagibugiñe súngubei” (Márükosu 3:3).
(Márükosu 3:5.)
nwtsty abürüdǘni lau lanwoun ariñahani luagu Mr 3:5
lau igañi luma íruni: Lídanrügüñein ewanhéliu le labürüdübei Márükosu lariñawagúa ida liña lan lasandiragun Hesusu lungua dan le larihinbalin tidere hanigi lábutigu relihión lidan ókaasion ligía (Mt 12:13; Lk 6:10). Kei meha aban lan wügüri le ménrengunti tánhingichun lanigi Féduru, másiñati ligía lan abahüdagubalin lun Márükosu ida liña lan lasandiragun Hesusu lungua weyu ligía (ariha huméi bidéu Ariñahani tuagu liliburun Márükosu).
Darí wamá pérüla lánina lichú aau
nwtsty abürüdǘni lau lanwoun ariñahani luagu Mr 3:29
hadimurehan wuriba luagu sífiri sandu: Ladügüñein gürigia lira dan le líchugun luriban iri luagu Bungiu o layanuhan lau menebenehabuni luagu Bungiu o luagu katei burí le sagüráubei. Kei lúmagiñe guánarügü lan Bungiu liabin sífiri sandu, layanuhaña gürigia wuriba luagu Bungiu dan le lasigeneruni lubafu sífiri le luma luadigimari. Arufudati Matéu 12:24, 28 luma Márükosu 3:22 luagu lau sun lan meha ariha hamani lábutigu hani huríu relihión milaguru burí le ladügübei Hesusu lau lubafu lani Bungiu sífiri, ariñagatiña lau lan lubafu Mafia ladügei.
lerederuba hadurun lun sun dan: Genegeti lau lan lichú hau gürigia hadügei figóu le ani máraninati abeichúni le lanügübei houn; úati sákürifisiu gabafuti lun ladouragun lau figóu ítarati (ariha huméi abürüdǘni lau lanwoun ariñahani luagu bérusu lidan dimurei hadimurehan wuriba luagu sífiri sandu).
Gunfuranda wamuti san ka lan mini lubéi?
6 Ka wafurendeirubei lídangiñe hénpulu le? Furumiñe, furendeitiwa siñá lan wafuresehani hawanserun aturiahatiña Bíbülia lidan inarüni. Wasubudiruni luagu siñati lan wadügüni sun katei líderagubadiwa lun madügüdarun wamá hawagu lun habadiseirun. Adüga wamuti sun wayaraati lun wíderaguniña, gama lumoun gunfuranda wamuti luagu hagíaba lan desidírü anhein hederegeraguba lubéi houngua lun Bungiu. Lánharuba Heowá lun wederegeragun woungua lun ánheingubeirügü wadüga ladüga hínsiñe lan woun (Sal. 51:12; 54:6; 110:3).
7 Libiaman, gunfuranda wamani le larufudahabei hénpulu le woun líderagubadiwa lun meferidirun wamani waguraasun danme le marihin wamá resultóu buiti furumiñe. Lunti gaguraasun wamá (Sant. 5:7, 8). Anhein adüga wamaali lubéi sun wayaraati lun wíderaguni aturiahati ani mawanserunti, masaminara wamá marufudaheidi wamá. Tídanrügüñein hanigi gürigia ha busentiña hasansiruni hagaburi lígira Heowá lun gani lan inarüni efekütu (Mat. 13:23). Ligía moun lumuti lubéi wasaminarun buiti lan lidin woun lidan wani ministeriu dánrügü le wanügün somu gürigia lidoun inarüni. Mariñagunti Heowá buiti lan lidin woun lidan wani ministeriu ladüga ligaburi hóunabun gürigia ha únbaña wapurichiha, létima larihibei áfaaguni le wadügübei luma úaraguni le warufudubei (aliiha huméi Lúkasi 10:17-20; 1 Korintuna 3:8).
8 Lǘrüwan, mámaba súnwandan warihini asansiruni le ladügübei aban gürigia. Kei hénpulu, aban feru maríeitiña ha aturiahabarun Bíbülia luma aban misioneru aba hariñagun lun luagu busén hamá háfuridun apurichiha. Aba laritaguagüdüniña mosu lan hígiruni agumulahani anhein busén habéi háfuridun apurichiha. Gama lumoun, aba taweiridun lanigi dan le hariñaguni lun sügühali lan fiu hati lúmagiñe hígiruni luriban échuni ligía. Ka uagu hadügei? Furendeihaña meha luagu iyereegu hamá gürigia biánguatiña igibu lun Heowá ani luagu gayaraabei lan larihiniña agumulaha. Ligía aba lubéi desidírü hamá hadügün aban katei: hagumulahan ligibugiñe misioneru o hígiruni bisiu ligía sunsuinagubei. Ínsiñeni le hagumeserubei asandira luagu Heowá ligía ínchahabaliña lun hadügüni le buídubei. Íbini marihin lágili lan meha misioneru asansiruni ligía hawagu, hawanseruña meha lidan hafiñen.
WABAGARI KEISI KRISTIÁNUGU
(Márükosu 4:9.)
nwtsty abürüdǘni lau lanwoun ariñahani luagu Mr 4:9
Ha garigeirugubaña lun haganbun, aganba hamá: Lubaragiñe labahüdaguni Hesusu hénpulu luáguti ábunaguti, ariñagati: “Aganba humana” (Mr 4:3). Lau giñe dimurei le lagumuchei labahüdaguni hénpulu ligía, arufudei ítara luagu weiri lan lisudinin híchugun sun lánigu arigei lun ladundehan. Fuati giñe dimurei burí ítarati lidan Mt 11:15; 13:9, 43; Mr 4:23; Lk 8:8; 14:35; Aruf 2:7, 11, 17, 29; 3:6, 13, 22; 13:9.
30 LIDAN GÁDÜRÜ-HATI DARÍ 6 LIDAN SEINGÜ-HATI
ARUFUDAHANI GEBEGITI TÍDANGIÑETI BÍBÜLIA | MÁRÜKOSU 5, 6
“Gayaraati láguyuguagüdüniña Hesusu waduheñu ha hilaguañabaña”
nwtsty abürüdǘni lau lanwoun ariñahani luagu Mr 5:39
Móunwentutia [...], tarumugarügüña: Anihein dan tayusuruni Bíbülia dimurei arumuguni dan le tayanuhan luagu óunweni (Sal 13:3; Hn 11:11-14; Adü 7:60; 1 Ko 7:39; 15:51; 1 Tesa 4:13). Kei meha láguyuguagüdaaru lubéi Hesusu irahü tuguya, háfuga ligía lariñagunbalin lira lun larufuduni gayaraaya lan habagaridun hilaaña ítara kei gayara lan hagagudún gürigia ha lídanbaña aban idabagu huliliti. Lúmagiñe meha “Bungiu le íchugubei ibagari houn hilaaña, aniheingüdalei burí katei le úagilibei” liabin ubafu le luágubei Hesusu lun láguyuguagüdünu irahü tuguya (Rom 4:17).
jy-S páh. 118 pár. 6
Nibagariya aban irahü!
Anihein meha dan lariñagun Hesusu houn gürigia ha lareidaguagüdübaña lun mabahüdagun hamani le ladügübei hawagu houn amu, ani ligía giñe lariñagubei houn tagübürigu irahü to. Íbini ítara, le lueirin hagundan agübürigu ha, hámaya amu gürigia, aba haburuchaguagüdüni ñunsu le “lidan sun fulasu ligía” (Matéu 9:26). Herederuba hamuga funagia maniñu lau lueirin ugundani le hasandirubei luagu láguyugun somu hiduhe? Anihán libiaman águyuguagüdüni le ladügübei Hesusu.
Darí wamá pérüla lánina lichú aau
nwtsty abürüdǘni lau lanwoun ariñahani luagu Mr 5:19
ábame babahüdaguni: Ánheinti guentó, amuriahati Hesusu luma wügüri le lun labahüdaguni houn liduheñu ka lan milaguru adügǘbei luagu, aban katei léñaha mamuriahan lumuti Hesusu hama amu dan le ladügün somu milaguru hawagu (Mr 1:44; 3:12; 7:36). Másiñati ladüga lan meha bugá hamaali lan lílana fulasu ligía Hesusu hageiragiñe ani siñaali meha lapurichihan ñein; gayaraabei meha giñe leseriwidun lira lun maweirin lan laburuchagun luriban ñunsu luáguti hóunwegun buíruhu.
nwtsty abürüdǘni lau lanwoun ariñahani luagu Mr 6:11
háfuruduni kaliki luéigiñe hugudi: Lau meha hadügüni disipulugu lira harufuduñein meha madurunbaña lan luagu abeichúni le lunbei lanügüni Bungiu hawagun ha máhabaña haganbun. Yúsuati giñe ligiaméme dimurei lidan Matéu 10:14 luma Lúkasi 9:5. Ani ariñaga lumuti Márükosu luma Lúkasi dimurei liseininme magundani hau. Falá lumuti Pábulu luma Berünawé adundehani le lárigiñebei hapurichihan houn lílana Antiokía le Pisidiabei (Adü 13:51). Adügati giñe Pábulu aban katei ítarati uburugu Korintu dan le láfurudunbarun ladaüragun hawagun lílana, ariñageina: “Huguya guánarügüba gadurun luagu heferidirun, mámaba au” (Adü 18:6). Arihañaha hamaali meha disipulugu ladügǘn lira lugundun héchutiña meha huríu ha wéiribei harabachun luagu hafiñen áfurudei liwiye kaliki le árügüdübei tuagu hageidin lidan haweiyasuhan hageiragiñe ha mámabaña huríu lubaragiñe hebelurun hageiroun. Chóuruti mama lan luagu lira layanuha Hesusu houn lani disipulugu dan le líchugunbalin adundehani le houn.