Ariñahani le lunbei lakutihóun lidan adamuridaguni Habagari Kristiánugu luma Heseriwidun
4-10 LIDAN ǗRÜWA-HATI
ARUFUDAHANI GEBEGITI TÍDANGIÑETI BÍBÜLIA | RÓMANA 12-14
“Ka mini lubéi warufudun ínsiñeni libe le larufudubei Kristu?”
it-1-S páh. 429
Ínsiñehabuni
Mosu harufudun sun kristiánugu ha lílana damuriguaü ínsiñeni hámagua (lidan güriegu fi·la·del·fí·a, ítara kei aubei labürüdǘwa, mini lan: “ínsiñehabuni luagu íbiri”) (Rom 12:10; Ebü 13:1; arihualá giñe 1 Fe 3:8). Ligía lunti lubéi hanaagun lílana damuriguaü houngua buidu, here ligía hamadagua ani lau saragu ínsiñeni, keisi iduheñu. Lau sun arufuda hamá lílana damuriguaü ínsiñeni hámagua, ínchahouatiña lúntima laganwoundun hínsiñehabu (1 Te 4:9, 10).
Yúsuati dimurei güriegu fi·ló·stor·gos, mini lan “le arufudubei ínsiñehabuni”, lun ladimurehóun luagu aban gürigia le anaagubei lungua buidu buidu luma amu. Stér·gō aban lídangiñe dimurei le asagarúbei lídangiñe ani yúsuati saragu lun layanuhóun luagu larufudún ínsiñehabuni, kei le harufudubei iduheñu hámagua. Ínchaha lumutiña apostolu Pábulu kristiánugu lun harufuduni igaburi le (Rom 12:10). Ayanuhati meha giñe luagu larihúba lan wawinwanduña lan lidan lagumuhóun dan ladüga mínsiñehabubaña lan gürigia (lidan güriegu á·stor·goi) ani gadüna habéi lan hounwen (2 Ti 3:3; Rom 1:31, 32).
w09-S 15/10 páh. 8 pár. 3
“Adüga huméi sun le huáraati lun habagaridun lidan darangilaü hama súngubei”
3 (Aliihoualá Rómana 12:17). Arufudahati Pábulu moun lumuti lan wafayeihan lau wuribani houn ha óuserubaliwa wuriba. Wéiritimati lisudinin adundehani le houn kristiánugu ha maríeibaña hama gürigia ha meseriwiduntiña lun Heowá. Mosu lárügüdagun kristiánu lungua lun móunabun lani dimurei gáriti, o marufudunti ínsiñehabuni, le ariñawagúbei lun. Magañeirunbei ni kata lau lafayeirun wuribani luagu wuribani; lubaragiñe lira, gánwounrügübei turobuli.
w07-S 1/7 páh. 24 pár. 12, 13
“Mafayeira humá wuribani luagu wuribani lun ni aban”
12 Ínchaha lumutiwa Pábulu lun wóuseruniña sun gürigia buidu, kristiánugu hamá yebe wáledi o mama hamá kristiánugu, ariñagati: “Mafayeira humá wuribani luagu wuribani lun ni aban”. Súdiniti dimurei burí le lárigiñetima lariñagun: “Iyereegulá wuribani hun”. Le linarün katei, mabuidunbei hamuga lun wariñagun iyereegu lan wuribani woun, ani lárigiñe, aba wayusuruni lun wafayeihan wuribani luagu wuribani. Múaranbei hamuga lira luma “ínsiñeni [...] inarüniti” le lunbei warufuduni. Ariñagati giñe Pábulu woun lunti lan wadügüni “le buídubei hagibugiñe súngubei” (Rómana 12:9, 17). Kati mini lubéi dimurei burí le?
13 Lidoun meha dan ligía, bürǘ laaru meha Pábulu ligaradan houn Korintuna, to ñein lubéi layanuha luagu éibaahouni le hasufurirubei apostolugu ítara: “Ñǘbuinhadiwa lun ábanbadiwa lan aríawasei houn sun lílana ubóu, dandu [houn] ánheligu luma houn gürigia. [...] Dan le híñaraguniwa aba wabiniruniña, dan le wéibaahoun aba wawanduni. Dan le hadimurehan wuriba wawagu, rútiwa dimurei buiti houn lau gurasu” (1 Korintuna 4:9-13). Añahagua gürigia ha lídanbaña ubóu le aríaguaña kristiánugu inarünitiña. Anihein dan buídutima lan hóunabun gürigia ha geyegubaña wau lun uganu le wapurichihabei dan le harihini buiti le wadügübei íbini wouserúña lan lau marichaü (1 Féduru 2:12).
Ferudunagua humá húmawagua
13 Aniheinbei dan le ídanbei gayara lan híderagun somu gürigia le óuserutün wuriba lun lebereserun lau arufudahani tídangiñeti Bíbülia. Abürühati apostolu Pábulu: “‘Anhein lamá habéi báganiñu, ruba éigini houn; anhein mágürabu habéi, ruba duna houn; ítara luba badügün lun léigaaguniña busiganu’. Mígiraguagüdaba bungua lun lagañeirunibu wuribani; lubaragiñe lira, gáñeibei wuribani lau buiti” (Rom. 12:20, 21). Dan le wouserúniwa wuriba ani aba wóuseruniña gürigia buidu gayaraati wadügün lun furangutima lan larihíniwa igaburi buiti le hawagubei. Anhein gunfuranda humá gürigia le achararubei hun gudemehabu hugíame lun, másiñati gayaraabei lan híderaguni afurendeirei inarüni burí tídangiñeti Bíbülia. Meberesenga kaba lan asusereda, gayaraabei ladügün hóunabun lau aban igaburi darangilati lun lararamagun gürigia ligía asaminara luagu lubuidun ligaburi hóuseruni (1 Fe. 2:12; 3:16).
Darí wamá pérüla lánina lichú aau
Ida luba wanúadahan isebáhari buiti
5 Sun le wadügübei lidan wabagari gániti efekütu lidan weseriwidun lun Heowá. Afuranguagüda lumuti Pábulu katei le dan le lariñagunbalin fiu dimurei dǘgüdati le houn kristiánugu rómana: ‘Deregegua humá hungua sunsuinagubei lun Bungiu keisi adagaragüdüni wínwanti, sánduti ani le auti lagundaara Bungiu’ (Rómana 12:1). Dan le lariñagun ‘deregegua humá hungua’ layanuhaña luagu wasaminan, wanigi luma were (Márükosu 12:30). Ida liña wederegeragun woungua keisi sákürifisiu? Dan le weseriwidun lun Bungiu tau sun wawani. Anihein aban eweridihani dǘgüdati lidan dimurei “adagaragüdüni”. Lugundun lábugiñe Lilurudun Moisesi siñati meha hadagaragüdüniwa animaalu ha danimatiña; ladüga meresibirun lumutiña Bungiu (Fádirigu 22:18-20). Ítarameme, ánhawa adüga somu katei mabuidunti lidan weseriwidun lun Bungiu meresibirun lubéi giñe. Ida lubati lasuseredun le?
6 Ariñagati Pábulu houn kristiánugu rómana: “Míchaagua humá hungua lun figóu” (lidan amu dimurei, “ni aban lídangiñe lumegegun húgubu”, La Palabra de Dios para Todos). Ariñagati giñe houn ‘áfara huméi igaburi lánina figóu le hídanbei’ (Rómana 6:12-14; 8:13). Lubaragiñe lira, ayanuhaali luagu fiu lumegegun úgubu luma ida liña lan layusurún lun le wuribabei. Lidan layanuhan hawagu gürigia gafigountiña, ariñagati: “Buin liña hayuma lau íñarawaguni”. “Fureseti hagudi lun houdin áfaraha.” “Maritagungubéitiña luagu linebenwa Bungiu” (Rómana 3:13-18). Lun hamuga layusuruni kristiánu aban lídangiñe lumegegun lúgubu lun ladügün figóu libe lira lawiyeduñein hamuga sun lúgubu. Kéiburi anhein aríagua tagübüri iyawaü to ñein lumuti agamariduni o lanarime wuribani subudiñulei wuriba lan, ‘layusuruñein lagu lun figóu’ ani lawiyeduñein sun lúgubu. Siñaali hamuga ladagaragüdüni lúgubu keisi sákürifisiu le auti lagundaara Bungiu, lugundun mámaali lan aban eseriwiduni sánduti o harumati (2 Lúrudu 15:21; 1 Féduru 1:14-16; 2 Féduru 3:11). Wéiribei liserun lafayeihan ladüga lanúadahan isebáhari le wuribati.
w08-S 15/6 páh. 31 pár. 4
Puntu méiniti tídangiñeti gárada houn Rómana
13:1. Ida liña Bungiu lan íchugubaliña gumadimatiña lidan ubaraü gébehati le hámabei? Ladüga Bungiu lan ígirubei lun hagumadihan gumadimatiña. Dan le ladügünbei lun labürüdǘniwa profesía hawagu fiu gumadimatiña tidan Bíbülia, gayaraati lariñawagún labusenrun lan “Bungiu añahein lubéi”.
11-17 LIDAN ǗRÜWA-HATI
ARUFUDAHANI GEBEGITI TÍDANGIÑETI BÍBÜLIA | RÓMANA 15, 16
“Áluaha waméi Heowá lun líchugun gurasu luma dǘgüdaguaü woun”
“Hayahua hama ha ayahubaña”
11 Amu luéi abahüdaguni luáguti lounwen Lásaru, le gáribei lun Hesusu saragu, anihein saragu bérusu burí tidan Bíbülia le gayaraabei líchugun gurasu woun. Ani maweiriduntu wanigi luagu le, ladüga “sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rom. 15:4). Féridihadün san somu hiduhe lidan óunweni? Anhein ítara liña lubéi, gayaraati líchugun bérusu burí le asigirubei saragu dǘgüdaguaü hun:
▪ “Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sal. 34:18, 19).
▪ “Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sal. 94:19).
▪ “Wabureme guánarügü Hesukrístu luma Wáguchi Bungiu, le arufuda láalibei línsiñehabu woun lau lareini, ru ligía ámalihouni le magumuchaditi woun luma aban emenigini buiti, rula dǘgüdaguaü tun hanigi, derebugugüda laünme” (2 Tesa. 2:16, 17).
Ígira wamá lun labuiduragüdüni awanduni wagaburi
5 Wamuriahan luma Heowá lun líchugun erei woun. Ariñagatu Bíbülia ruti lan Heowá “gurasu luma dǘgüdaguaü” (Rom. 15:5). Heowatima gayaraabei líderaguniwa awanda ladüga ligíarügüñein gunfurandei gádantiwa buidu, gunfuranda lumuti giñe ida liña lan wasandiragun woungua luma sun le susereelibei lidan wabagari. Ligíati, subudi lumuti ka lan wemegeirubei lun wawandun. Ariñagatu Bíbülia “gúnfuli lumuti [lan Bungiu] hayumahan ha inebehabubaña lun; dan hamuriahan luma lun líderaguniña, aganba lumutiña, sefuláña” (Sálumu 145:19). Gama lumoun, ida liña san lóunabuniwa Bungiu dan le wamuriahan luma lun líchugun erei woun lun wawandun?
‘Hínsiñela Heowá le Bubungiute bun’
11 Ruti Heowá aban emenigini woun le abuinchagüdübadiwa lau ugundani luma darangilaü (Rom. 15:13). Emenigini luagu wawinwanduba lan lun súnwandan ligía íderagubaliwa lun wawandun dan le lóuchawagun wafiñen. Kristiánugu anuadirúaaña ha úaraguatiña heresibirubei “ibagari magumuchaditi” sielu (Aruf. 2:10). Ani ha híbiri lubúeingu Bungiu ha úaraguatiña hagundaaruba lau ibagari magumuchaditi lidan aban paraísu ubouagu (Luk. 23:43, TNM). Ida liña san wasandiragun woungua lárigiñe wibihini emenigini le? Ma buíngüda lumutiwa lau ugundani, darangilaü luma ínsiñeni luagu Bungiu, le úmagiñebei weresibirei “sun le ichugúbei woun, le úabei mégeiti luagu”? (Sant. 1:17.)
Darí wamá pérüla lánina lichú aau
w89-S 1/12 páh. 24 pár. 3
“Harufuduni hínsiñehabu lau híchugun tau sun hanigi”
Chóuruti busenbaña lan meha kristiánugu ha mámabaña huríu híchugun ídemuei houn kristiánugu ha Herusalénbaña, lugundun “dúei” hamutiña meha lidan aban igaburi espechaliti. Ma funagia Herusaléngiñe liabin uganu buiti houn ha mámabaña huríu? Ligía meha lasaminarubei Pábulu, ligía lariñagunbei: “Ítara kei hafanreinraguni afiñetiña ha huríu harisin le lánina sielu hama ha mámabaña huríu, lunti giñeti híderaguniña afiñetiña ha mámabaña huríu afiñetiña ha huríu luagu hemegeirun ya ubouagu” (Rómana 15:27).
it-2-S páh. 708 pár. 5
Le subudiwabei, lasubudirún le lunbei lasuseredun lubaragiñe dan
Mesíasi meha, lememe Kristu, Adügawagunibei le füramasewabei, ligíaba ayusurúa lun habinirúniwa sun gürigia richaguatiña ha hádanbaña sun iduheñu ha ubouagubaña (Gal 3:8, 14). Iridúati adügawaguni le luagu furumiñeti wéiyaasu lárigiñe ebedaaguni lidan fuluri-agei Edén ani lubaragiñebei nasirua lan Aweli (Agu 3:15). Susereti lira lóugiñe gádürü-milu irumu lubaragiñe lasubudirúniwa Mesíasi lan adügawaguni le uágubei layanuha Bungiu lidan “laransehan le meha aramudañubei”. Ligía gayara lubéi lariñawagún aramudagu liña lan meha lira “lúmagiñe lubaragiñe lagumeserun ubóu” (Rom 16:25-27; Efe 1:8-10; 3:4-11).
18-24 LIDAN ǗRÜWA-HATI
ARUFUDAHANI GEBEGITI TÍDANGIÑETI BÍBÜLIA | 1 KORINTUNA 1-3
“Gürigia san le mibihinbalin sífiri huguya, o gürigia le gámabalin sífiri sandu?”
Ida liña gürigia le rúguabei lungua lun Bungiu?
4 Furumiñe ariha waméi ida liña lan lasaminarun gürigia le mibihinbalin sífiri. Téniti lun le layumahabei ladüga lígiraguagüdün lungua lun igaburi ubouaguna, le unbei lagúaha Pábulu “sífiri le agumadihabei garabalirugu, le nadagimeinbei hádangiñe ha maganbadibaña lun Bungiu” (Efe. 2:2). Adügati sífiri le lun hígiraguagüdün hiibe-agei gürigia houngua lun hadügüni le hadaagubei ha híbiri gürigia. Adüga hamuti le genegebei houn buidu lan ani máfaaguntiña lun gaganbadi hamá lun lilurudun Bungiu. Wéiriti hadiheridun gürigia ha mibihinbalin sífiri luagu kaba lan hariñaga gürigia hawagu ani áfaaguatiña lun habihin umegeguni o hageindaguni haricha según gufuranda hamani.
5 Gürigia le mibihinbalin sífiri, falá lumuti “layumahan ǘgürügü” (Gal. 5:19-21). Tidan furumiñetu ligaradan Pábulu lun damuriguaü le Korintubei, íridati ámuya igaburi le hawagubei gürigia burí ha: sigenetiña, álugatiña hafanreinraguagüdüniña gürigia, adügatiña lun hebedaagun, barǘ hamutiña ligibugiñoun lúrudu, úati inebe lan lúrudu houn ani súdinitimati heigin luma hatun houn. Ábaya katei, siñá hamuti óuchawaguni awanda (Ari. 7:21, 22). Ariñagati disipulu Húdasi úa lan sífiri sandu hadan fiu hádangiñe (Hud. 18, 19).
Ida liña gürigia le rúguabei lungua lun Bungiu?
6 Amu ligaburi gürigia le gámabei sífiri sandu. Bereseti lau lumadagua luma Bungiu ani áfaaguati lun láyeihani (Efe. 5:1). Mini lan le, áfaagua hamá hasaminarun kei Heowá ani ariha haméi katei kei larihini. Inarüniti Bungiu houn. Inebeti lilurudun houn lidan sun le hadügübei lidan habagari (Sal. 119:33; 143:10). Áfaaguatiña harufuduni “igaburi le líchugubei sífiri” mama “layumahan ǘgürügü” (Gal. 5:22, 23). Líderagubadiwa le lunbei warihini guentó lun gunfuranda wamani ka lan mini lubéi gürigia wamá ha rúguatiña houngua lun Bungiu. Dan le letenirun gürigia lun eremuhani ani hínsiñe ligía lun, ariñawagúati luagu deregegua lan lungua lun eremuhani. Ligiaméme ariñawagúbei luagu gürigia le hínsiñebei katei lánina Bungiu lun ariñawagúati luagu deregegua lan lungua lun Bungiu.
Ida liña gürigia le rúguabei lungua lun Bungiu?
15 Ida luba wáyeihani Kristu? Ariñagatu Bíbülia lidan 1 Korintuna 2:16 lunti lan aban lan wasaminan kei “lisaminan Kristu”. Ariñagati giñe Rómana 15:5 (TNM), lunti lan aban lan ligaburi wasaminan “kei ligaburi lisaminan Kristu Hesusu”. Ligíati, lun ítara wamá kei Kristu, mégeitiwa wasubudiruni lisaminan, ligaburi luma le ladügübei. Súdinitimati meha lumadagua Kristu luma Bungiu lun. Yarafagüda lumutiwa lun Heowá gagaburi wamani ligaburi Hesusu. Ligía súdini lubéi wafurendeirun asaminara kei ligía.
Darí wamá pérüla lánina lichú aau
it-2-S páh. 886 pár. 5
Lichú aau
Lau sun lichú hau lílana ubóu, máhatiña meha lun le líchugubei Bungiu houn lídangiñe Kristu ladüga ariha hamani kei aban libidiounigan aau; íbini meha másiña lan gumadimatiña lan ha huáliti hachügü ani gayaraaguatiña houngua arihibaña lau sun katei, chülüti dan lun “hádaraguni Kristu luagu wagabu” (1 Ko 1:18; 2:7, 8, TNM). Ánheinti Bungiu, arufuda lumuti libidiounigan lan aau lichú aau le ubouagubei, lugundun ruti busiganu houn wügüriña ha chúbaña aau lau layusuruni le harihibei wügüriña ha kei “libidiounigan aau lidan Bungiu” hama gürigia ha harihubaña kei ‘ibidiougua tau, débilitiña ani ǘnabugutiña’ lun lagunfulirun lau lisuuni le siñabei lagünrinchawagun (1 Ko 1:19-28). Haritaguagüda lumutiña Pábulu kristiánugu ha korintuna luagu mama lan lánina ubóu le lichú aau ligía ani mama lan giñe hani ha agumadihabaña ya ubouagu, ha madiseelibei hagumuchagun; ligíati, mama meha lídangiñe uganu lúmagiñeti Bungiu le lanügübei apostolu lichú aau ligía (1 Ko 2:6, 13). Eweridihati Pábulu houn kristiánugu ha Kolosabaña lun mígiraguagüdün hamá houngua lun heyeedúniwa “lau burí arufudahani málati [fi·lo·so·fí·as, kei aubei labürüdǘwa, “ínsiñeni luagu lichú aau”], lídangiñeti binadu échuni luma burí ligaburi haritagun gürigia lánina ubóu le” (Kol 2:8; konparárü huméi luma burí bérusu 20 darí 23).
w08-S 15/7 páh. 27 pár. 6
Puntu méiniti tídangiñeti burí gárada houn Korintuna
2:3-5. Dan lídinbei Pábulu apurichiha Korintu, másiñati meha álügüdagua lan lungua anhein gayaraabei lubéi lánhingichunu lanigi somu gürigia lidan óunwenbu fulasu ligía le meha buinbei lau saragu arufudahani güriegu le málati. Íbini ítara, mígiraguagüdünti lungua lun anufudei ni lun igaburi mabuidunti le luágubei, lubaragiñe lira, gúnfuliti lau ministeriu le meha ru laalibei Bungiu lun. Moun lumuti giñe lábürühan warüna ánhawa agagibudagua luma sügǘ le úati kamani lan. Kei ladügüni Pábulu, amuriahatiwa ídemuei luma Heowá ani sigitiwa apurichihei uganu buiti luáguti Larúeihan Bungiu.
25-31 LIDAN ǗRÜWA-HATI
ARUFUDAHANI GEBEGITI TÍDANGIÑETI BÍBÜLIA | 1 KORINTUNA 4-6
“Résigüda lumutu murusun lébini sun fulúaru”
it-2-S páh. 212
Lébini
Yusu lumuti apostolu Pábulu ligiaméme hénpulu dan le lariñagubei houn lílana damuriguaü le Korintubei mosu lan labugún wügüri le adügübei iwiyei lídangiñe damuriguaü. Ariñagati: “Ibidiñeti san hun résigüda lanu murusun lébini sun fulúaru to ídounboun lichugúa? Gidá huméi lubeiti binadu lébini haganaguagiñe lun aban humá fulúaru iseri, ítara kei hubéi, maganouga lébini. Ladüga íbini Kristu, le mudunbei lánina wesefurun, dagagüdawaali wawagu”. Ani lárigiñe, aba lariñaguni furangu ka lan uagu layanuha dan le lariñagunbalin dimurei “lébini”: “Ítara liña lubeiti, lunti wefeduhani luéyuri esefuruni lau úarani luma inarüni, le ítarabei kei fein maganatu lébini, mama lun wefeduhani lau wuribani luma salufuri, le ítarabei kei fein gaganatu binadu lébini” (1 Ko 5:6-8). Yusu lumuti Pábulu le mini lubéi hafedun huríu le gíribei tufedun fein maganatu lébini, le efeduhóubei lárigiñe Lufedun Luéyuri Esefuruni, lun layanuhan luagu amu katei. Ítara kei furese lan ladügün murusun lébini lun teresirun fulúaru to añoundawaguboun tun fein, anhein meha masagarún wügüri gafigounti ligía lídangiñe damuriguaü, wíyebei meha damuriguaü ligibugiñe Heowá. Ítara kei siñá lan meha ñein lan lébini hábiñe ísüraelina lidan burí luéyuri fedu, mosu meha giñe lagidarún “lébini” lídangiñe damuriguaü.
it-2-S páh. 972
Satanási
Ka mini lubéi lederegerún aban gürigia lun Mafia lun lagünrinchawagun lúgubu?
Dan líchugunbei apostolu Pábulu adundehani houn lílana damuriguaü le Korintubei luagu le meha lunbei ladügǘn lun lílana damuriguaü le adügübei wuribani lau lagamaridunu lani lúguchi weiriou, abürühati: “Derege huméi wügüri ligía lun Mafia lau hasagaruni lídangiñe hidamurin, lun lagünrinchawagun lúgubu” (1 Ko 5:5). Aban meha gumadi le lun labugúniwa wügüri ligía lídangiñe damuriguaü ani moun lumuti meha hanaagun lílana houngua luma (1 Ko 5:13). Mini lan meha lederegerún aban gürigia lun Mafia, bóugudi haali lanme luéi damuriguaü lidan ubóu le lábugiñebei lubafu Mafia ani le ídanbei ligía lan búngiubei. Ítara liña meha wügüri ligía kei “murusun lébini” tidan “sun fulúaru”, lidan amu dimurei, kei úgubu le afalarubalin layumahan ǘgürügü lidan damuriguaü; lagünrinchawaguba meha úgubu ligía lau labugún wügüri le agamaridubarun liduhe haganaguagiñe lílana damuriguaü, ha afalarubalin ladundehan Bungiu (1 Ko 5:6, 7). Ítara liña giñe lederegeruni Pábulu Imenéu luma Alehánduru lun Mafia, dan le heferidirunbalin hafiñen ladüga hígiruni hafiñen luma laruman hasaminan (1 Ti 1:20).
Hínsiñe hamá ha hínsiñebaña lun Bungiu woun
19 Anihein dan agurabúati lun wadüraaguni wamadagua hama gürigia ha adisedutiña luéi damuriguaü. Susereti le, dan le ladüraaguni aban kristiánu lilurudun Bungiu, mabusenrunti lasakürihan ani mosu labugún lídangiñe damuriguaü. Ligiaméme asuseredubei dan le ladimurehan wuriba luagu lafiñen lau larufudahan iyeeni o ladisedun, lidan amu dimurei, dan le lariñagun mabusenrunhali lan lílana lan damuriguaü. Furanguti tariñaguni Lererun Bungiu: ‘Móundara humá hama’ (aliiha huméi 1 Korintuna 5:11-13; 2 Huan 9-11).a Gayaraati hénrengu lan woun wadisedun, dántima le aban lan waduhe o aban wamada. Kábati wadüga? Wadiseduba san luéi gürigia ligía arufudei ítara ru wamani úaraguni lun Heowá luma lun lilurudun le richabei lidan furumiñeti lúgaaru? Mabulieida waméi weiri lan lebegi úaraguni luma gaganbadi lun Heowá.
Darí wamá pérüla lánina lichú aau
w09-S 15/5 páh. 24 pár. 16
Ánheligu: sífirigu ha eseriwidubaña lun Bungiu
16 Ariñagatu Lererun Bungiu anihein lan katei le ídanti ítara haña lan kristiánugu ha agagibudagubaña luma lénrengunga kei “aríawasei” houn ánheligu (1 Ko. 4:9). Ariha hamuti ida liña lan wóuserun ani aba hagundaarun saragu dan le harihin úaragua wamá. Gúndaatiña giñe dan le lasakürihan aban afigouhati (Luk. 15:10). Ténitiña giñe ánheligu lun aban igaburi espechaliti le harufudubei íbirigu würiña. Ariñagatu Bíbülia lunti lan “tadouragun würi lau tichügü lidan hadamurin afiñetiña keisi liseinin tagunfuliruni lagumadihan wügüri” ani lunti tadügüni lira hawagu ánheligu (1 Ko. 11:3, 10). Ítara liña, hínsiñeti houn ánheligu harihin ida liña lan gaganbadi hamá, dandu íbirigu würiña kei ha híbiri lubúeingu Bungiu, lau herederun lábugiñe hererehan wügüriña ha anúadira láañabaña Heowá lun hanügüni ubaraü tidan lóundarun. Huuti waganbadi kei hénpulu houn lirahüñü Heowá ha siélubaña.
it-2-S páh. 216
Lúrudu
Lúrudu le ichugúbei houn ánheligu. Lau sun íñutimati lan habara ánheligu hawéi gürigia, lábugiñeñanu lilurudun luma lugumadin Bungiu (Ebü 1:7, 14; Sal 104:4). Ruti Heowá gumadi íbini lun Mafia, ani ariñaga lumuti lun halíaba lan lébeda (Hob 1:12; 2:6). Arufuda lumuti Arükánheli Migeli inebe lan lubara Heowá lun keisi Aguseragüdüti le Íñutimabei dan lasigenehanbei luma Mafia lugundun ariñagati lun: “Ébecha labu Wabureme Bungiu” (Hud 9; konparárü huméi luma Sak 3:2). Ru laaña Bungiu Heowá sun ánheligu lábugiñoun lubafu Hesukrístu le unbei lichugúa uéiriguni (Ebü 1:6; 1 Fe 3:22; Mt 13:41; 25:31; Fili 2:9-11). Óunahati Hesusu aban ánheli íchiga uganu lun Huan (Aruf 1:1). Lidan 1 Korintuna 6:3 ariñagati apostolu Pábulu hídehaba lan ha lúnbaña harúeihan luma Kristu lidan haguserawagüdün ánheligu, mini lan lira hídehaba lan lidan lagunfulirúniwa hasiadirún sífirigu wuribatiña.
[Abürüdǘni]
a Hadeiruba lanwoun ariñahani “Ida luba wóuserun aban gürigia le bugawaali lídangiñe damuriguaü”, hawagu bugawaaña hama ha ariñagubaña mabusenrunhaña lan lílana hamá damuriguaü.