Ariñahani le lunbei lakutihóun lidan adamuridaguni Habagari Kristiánugu luma Heseriwidun
3-9 LIDAN SISI-HATI
ARUFUDAHANI GEBEGITI TÍDANGIÑETI BÍBÜLIA | GALASIANA 4-6
“Aban sügǘ le súdinibei woun”
it-1-S páh. 65 pár. 1
Agarü
Según apostolu Pábulu, Agarü ábanboun hádangiñe bián würiña ha arufudubaña bián daradu, yúsuatu keisi hénpulu lánina néchani Ísüraeli le meha óundarubei lumoun Heowá dan ladügǘnbei daradu lánina Lúrudu luagu wübü Sinaí ani “idamuni” lirahüñübaña daradu ligía. Kei meha gafigoun habéi lílana néchani le, mibihintiña hagunfulirun lau sun le lanügübei daradu ligía. Sun meha dan le haubei ísüraelina lábugiñe daradu lánina Lúrudu, sigitiña keisi lidamun figóu le anügübaliña lidoun óunweni (Hn 8:34; Rom 8:1-3). Agarü meha ayusurúboun keisi hénpulu lun layanuhóun luagu Herusalén le lidaaniwagubei Pábulu, lugundun uburugu meha ligía lichügüdinabei Ísüraeli ani yúsuati meha lun layanuhóun luagu néchani le, le ídanbei idamuni hamá lirahüñü. Ánhañati kristiánugu anuadirúaaña lau sífiri sandu, hagía tirahüñübaña “Herusalén [...] siéluna”, to ítaraboun lun Bungiu keisi aban weiriou. Ítara kei meha mama lan idamuni Sara, mama giñe idamuni Herusalén siéluna, ani ítara kei éibaaha lani Ísümaeli Isaakü, éibaaha hamutiña giñe lílana Herusalén le idamunibei tirahüñü “Herusalén [...] siéluna” (ha meha sefu láañabaña Liráü Bungiu). Ani ítara kei meha bugawa tan Agarü labu sun tiráü, chagá lumuti giñe Heowá binadu néchani Ísüraeli (Gal 4:21-31; arihualá giñe Hn 8:31-40).
Afiñe humá sunsuinagubei luagu Larúeihan Bungiu
11 Íbini gúnfuli lan daradu le ladügübei Bungiu luma Abüraámü dan le habihinbalin ladügawagun Fulasu Füramasewati keisi alagan, arufudatu Bíbülia luagu aniheinbei lan meha aban agunfuliruni le wéiritimati (Gal. 4:22-25). Ariñagati apostolu Pábulu lau lídehan Bungiu luagu Kristu lan fánreinti le súdinitimabei lidan agunfuliruni wéiritimati ligía ani ha lan 144,000 kristiánugu anuadirúaaña libiamanbei fánreinti (Gal. 3:16, 29; Aruf. 5:9, 10; 14:1, 4). “Herusalén [...] siéluna” tuguya würi to águrahabalin adügawaguni, ani ligía giñe fánreinti tani lóundarun Bungiu le siélubei, le ñein habéi saragu sífirigu úaraguatiña (Gal. 4:26, 31). Ítara kei lachoururuni daradu le adügǘbei luma Abüraámü, lanügüba meha tadügawagun würi abinirúni houn gürigia.
Darí wamá pérüla lánina lichú aau
w09-S 1/4 páh. 13
Subuditi san hun?
Ka uagu layusurei Hesusu dimurei “Abba, Úguchili” lidan lafurieidun lun Heowá?
Lidan bérusu le yusu lumuti Hesusu dimurei araméu ’abbá’ le gayaraabei mini lan “úguchili” o Núguchi”. Lidan kada aban lídangiñe ǘrüwa wéiyaasu le ídanbei láfuacha dimurei araméuna le tidan Bíbülia, súnwandan layanuhóuña lan luagu Heowá, súnwandan layanuhóuña lan lun Heowá, Wáguchi le siélubei, lidan ayumuraguni o furíei. Ka uagu súdini lubéi yusu lani Hesusu dimurei le?
Afuranguagüdatu aban líburu: “Lidan meha lidaani Hesusu, kamaniti meha layusurún dimurei ’abbā’ ani irahüñütima meha ayusurubalin lun hayanuhan lun háguchi lau gamadaguaü luma ínsiñehabuni, ani lau sun lira, arufudeina inebesei” (The International Standard Bible Encyclopedia). Ligaburi layanuhóun lun úguchili lau ínsiñehabuni le, ábanbei lídangiñe furumiñeti dimurei le meha lafurendeirubei irahü. Yusu lumuti Hesusu dimurei le lidan aban kesi espechaliti. Dan meha lídanñein lubéi fuluri-agei Hetüsemaní fiu oura lubaragiñe lounwen, ayanuhati lun Heowá tídangiñe sun lanigi, ariñageina: “Abba, Úguchili” (Márükosu 14:36, TNM).
Ariñagatu giñe líburu to buga iridúboun: “Tidan burí líburu to meha habürüdüboun huríu lidoun burí hadaani güriegu hama rómana, díseguati ladarirúniwa dimurei ’abbā’ ñein lun layanuhóuniwa lun Bungiu, chóuruti ladüga lan meha arihúa lan layanuhóun lun lau gamadaguaü kei menebenehabuni”. Kati larufudubei le tariñagubei líburu to? Afuranguagüda tumuti: “Lau layusuruni Hesusu [...] dimurei le lidan lafurieidun, chóurugüda lumuti woun weiri lan meha lubuidun lanaagun lungua luma Bungiu”. Le líbiri bián wéiyaasu le ídanbei láfuacha dimurei ’abbá’ tidan Bíbülia —biángubei tidan burí gárada to labürüdüboun apostolu Pábulu— arufudati yusu hamani meha giñe furumiñetiña kristiánugu dimurei le lun hayanuhan lun Bungiu (Rómana 8:15, TNM; Galasiana 4:6, TNM).
w10-S 1/11 páh. 15
Subuditi san hun?
Ka uagu lariñaga Pábulu: “Anihein makü luagu núgubu keisi aban lidamun Hesusu”? (Galasiana 6:17, TNM).
▪ Gíbeti meha katei gayaraati hasaminaruni kristiánugu lánina furumiñeti sígulu ha aganbubalin Pábulu lau dimurei lira. Kéiburi échuni le meha lídanbei binadu dan, le ídanbei layusurúa gürabu süti lun hamakürǘn gürigia ha arügüdǘbaña lidan wuribu, ha burí ebelurubaña íweruha tidan burí ténpulu hama idamuni ha álugubaña hanurun hawéi haburiña. Nibusigarídünati meha luwuyeri makü lira.
Lau sun lira, anihein meha makü le adügǘbei luagu hágubu gürigia le maribanti larihín. Gíbetiña meha gürigia gawagutiña makü hawougua le aubei harufudei lílana hamá ítaga türibu o relihión. Ariñagatu aban líburu: “Deregeguatiña meha síriana houngua lun bungiu Adadü luma lun bungiu Atarügati lau hadügün makü luagu hafuñen o luagu hagiina [...]. Anihein meha giñe lumakün aban ubanaü péisini hawagu ha áhuduragubaña lun Dionisiu” (Theological Dictionary of the New Testament).
Uguñe weyu, añahein saragu sásaamu ha saminatiña layanuhaña lan meha Pábulu luagu lárigirugu wounu le meha luágubei lúgubu lárigi sun le lasufurirubei lidan burí luéiyasun kei mísioneru (2 Korintuna 11:23-27). Íbini ítara, másiñati mama lan meha luagu somu makü le luáguti lúgubu Pábulu layanuha lau dimurei “makü” le arufudubalin kristiánu lan ligía, lubaragiñe lira, layanuhaña meha luagu ligaburi lanügüni libagari.
10-16 LIDAN SISI-HATI
ARUFUDAHANI GEBEGITI TÍDANGIÑETI BÍBÜLIA | ÉFESUNA 1-3
“Laransehan Heowá luma luadigimari”
it-2-S páh. 981 pár. 2
Laransehan Bungiu le meha aramudañubei
Larúeihan Bungiu le ídanbei Mesíasi lan Urúeibei. Tidan burí gárada to labürüdüboun Pábulu, íderagua lumutiwa gunfurandei arufudúni luáguti laransehan Bungiu le meha aramudañubei libügürü Kristu. Lidan Éfesuna 1:9-11, afuranguagüda lumuti Pábulu subudigüda laali lan meha Bungiu “laransehan le meha aramudañubei” según lugundan, ariñagati: “Aritaguni lan le lasaminarubei ladügün, lun buga lóundarubei lan sun katei lidan Kristu, danme buga lagunfulirun dan ligía, dandu le burí siélubei kei le ubouagubei. Lidan Kristu, anúadira lumutiwa Bungiu lúmagiñe binarü lun weresibiruni wafanran lidan le lunbei líchuguni; ani sun le, lídanñein lugundan Bungiu le adügübalin sun katei kei labusenruni”. Lidan “laransehan [Bungiu] le meha aramudañubei”, anihein uganu luáguti aban arúeihani, Larúeihan Bungiu le ídanbei Mesíasi lan Urúeibei. Dan le layusurunbalin Pábulu dimurei “sun katei [...] le burí siélubei”, layanuhaña hawagu ha hemenigibaña gafanran hamá lidan Larúeihan Bungiu le siélubei le ídanbei Kristu lan Urúeibei. Danti layusurunbalin dimurei “sun katei [...] le ubouagubei”, layanuhaña hawagu ha lúnbaña hawinwandun ubouagu lábugiñe Arúeihani ligía. Arufudahati Hesusu houn lani disipulugu luagu lan Larúeihan Bungiu layanuhóua dan layusurún dimurei laransehan Bungiu le meha aramudañubei, dan le lariñagunbei houn: “Subudigüda laali Bungiu katei aramudaguati le lánina larúeihan hun” (Mr 4:11).
Óundaraguagüda lumutiña Heowá lufamilian
3 Úarati sun le ladügübei Heowá luma lisuuni. Gumeseti Heowá aransehei sun katei sielu luma ubouagu lun lóundaruni lidan aban. Wati lun wadagimanu ligía ‘aransehani’ (aliihoualá Éfesuna 1:8-10). Ladügübei aransehani le lidan bián fánreinti. Furumiñe, aranse lumutiña kristiánugu ha anuadirúaañabaña lun hawinwandun sielu lun hawadigimaridun lábugiñe lagumadihan Hesukrístu le Hachügüdina. Gumeseti fánreinti le lidan Pentekosutesi irumu 33 lárigiñe lidaani Kristu, danbei lagumeserun Heowá óundaraguagüdaña gürigia ha lúnbaña harúeihan luma Kristu sielu (Adü. 2:1-4). Seremei lani Kristu sákürifisiu le afayeirubalin lebegi asalbaruni, richaguagüdawaaña kristiánugu ha anuadirúaañabaña, ligíati, garichatiña hawinwandun lun súnwandan. Ánhatiña lau sun hagundan lun ‘lirahüñühaña lan Bungiu’ (Rom. 3:23, 24; 5:1; 8:15-17).
4 Lidan libiaman fánreinti, laranseruñanu ha lúnbaña hawinwandun ubouagu lidan aban Paraísu lábugiñe lagumadihan Larúeihan Bungiu. “Saragu gürigia” ha lúnbaña háfuridun wínwanñu lárigiñe Arümahedón, hagíaba awinwanda furumiñe lidan fuluri-agei (Aruf. 7:9, 13-17; 21:1-5). Ani lídanme anihán lan Arúeihani lánina Milu irumu agumadiha, hásaaruba saragu míñunu gürigia lun hawinwandun ubouagu úara hama (Aruf. 20:12, 13). Mame lubuidun chansi le lunbei lanügüni águyuguni woun, lúntima warufuduni úarani le wádanbei! Danme le gumuhali milu irumu, lóuchawaguba ‘katei le ubouagubei’ lagumuhóun wéiyaasu, hámeti úaraguabaña hayabinba lun ‘lirahüñübaña lan Bungiu’ ha lúnbaña hawinwandun lidan ubóu le (Rom. 8:21; Aruf. 20:7, 8).
Darí wamá pérüla lánina lichú aau
Ualá adügüti lun meresibirun wamani luéirigun Bungiu
15 Ídehati awanduni le warufudubei lidan wadügüni lugundan Heowá lun habihini amu gürigia luéirigun Bungiu. Abürühati apostolu Pábulu houn kristiánugu éfesuna: “Ligía nayumuragunbei hun lun mábürühan lan harüna luéigiñe le nasufurirubei huagu, lugundun uéirigunirügüñein katei lira hun” (Efe. 3:13). Ka meha labusenrubei lariñagun? Ka uagu uéiriguni lubéi lanügübei lasufurirun houn? Ladüga sigiti íderaguaña líbirigu íbini lidan lénrengunga; ítara liña larufuduni houn eseriwiduni lan lun Bungiu chansi le buídutimabei. Lun hamuga aba lan lígiruni Pábulu leseriwidun ladüga lénrengunga, ma larufuduña hamuga ítara mebegi lan lumadagua luma Heowá lun ni ministeriu luma lemenigin? Lau lawandun, ru lumuti áhuduraguni kristiánu lidan ubaraü le yuubei lun ani arufudati gebegi lan furumiñeguarügü sákürifisiu le wadügün lun lani wamá Kristu disipulugu.
cl-S páh. 299 pár. 21
“Gayara láamuga gunfuranda humani línsiñehabu Kristu”
21 Dimurei güriegu le ásügürawagüdübei kei “gunfuranda”, mini lan “larihini gürigia katei lungua lau lawinwanduni”. Dan hínsiñe hamá gürigia wáledi woun kei meha ladügüni Kristu —lau wíchaagun woungua houn masaminarunga wawouguounrügü, lau warufudun gudemehabu houn lau wíderaguniña lidan le hemegeirubei luma feruduna wamaniña tídangiñe sun wanigi—, aba gunfuranda wamani buidu ida liña lan meha lasandiragun Kristu lungua. Ítarati, ariha wamuti woungua ani gunfuranda wamuti “línsiñehabu Kristu [...] le wéiritimabei luéi sun le wayaraabei asubudira”. Moun lumuti giñe wabulieiduni éibutima lan genegegua lan wagaburi luma ligaburi Hesusu, yarafatimabei wasandiragun woungua lun Bungiu le láyeihabei machararunga: Heowá, Wáguchi le hínsiñehabubei.
17-23 LIDAN SISI-HATI
ARUFUDAHANI GEBEGITI TÍDANGIÑETI BÍBÜLIA | ÉFESUNA 4-6
“Daü humóun sun daüguaü to líchuguboun Bungiu”
Nibureintiña, mígiraguagüda humá hungua lun leyeedunün Mafia
ARIÑAGATI apostolu Pábulu ítara haña lan kristiánugu kei aban súdara le awuribuhabei. Mama hama gürigia wageindagua, hama sífirigu. Satanási hama lumafianu wáganigubaña. Íbini siñá lan warihiniña, inarünitiña. Gawuribuhatiña ani barühaña saragu dan awuribuha. Másiñati samina wamá siñabei lan wagañeiruniña. Ani gayaraati genege lan nibureintiña lan mabafutimabaña lidan wuribu le. Gayaraati funa san hagañeiruniña nibureintiña sífirigu wuribatiña ha? Chóuruti gayara lan, ani ligía hadügübei. Ida liña hadügüni? Ibihatiña erei lúmagiñe Wabureme Heowá. Ani kei súdara hamá ha arufudahóuati houn buidu, daü hamutu “sun daüguaü to líchuguboun Bungiu houn sun lánigu” (aliihabéi Éfesuna 6:10-12).
w18.05 páh. 28, 29 pár. 4, 7, 10
Nibureintiña, mígiraguagüda humá hungua lun leyeedunün Mafia
4 Ítarameme, góunigi lumutiwa inarüni le wafurendeirubei tídangiñe Lererun Bungiu luéi wuribani le lanügübei arufudahani mama inarüniti (Huan 8:31, 32; 1 Huan 4:1). Éibutima línsiñedun inarüni woun ménrenguntimabei woun wawinwandun úara luma lilurudun Bungiu le richabei (Sal. 111:7, 8; 1 Huan 5:3). Anhein gunfuranda wabalin inarüni le tídanbei Lererun Bungiu buidu, buídubei wasandiragun woungua danme le wayanuhan luagu houn ha mínsiñehabutiña lun (1 Fe. 3:15).
7 Arufuda lumuti lidáü laniguagu súdara buidu ligaburi lóunigirunu lilurudun Bungiu wanigi (Ari. 4:23). Ítara kei masansirun lubéi lan aban súdara lidáü laniguagu le laubei gürabu luagu amu le mama gürabu o le meseriwínti, ítara liña giñe, masansirun wabéi ladundehan Heowá luagu wasaminan guánarügü. Gébehati le wasubudirubei ani siñati lóunigiruniwa kei wemegeiruni (Ari. 3:5, 6). Ligía súdini lubéi lun estodi wamá echekürei anhein barǘ wabalin lilurudun Heowá le richabei güragu tidan wanigi.
10 Daü hamutu meha súdara rómana sabadu to lubá hawuribuhan, ánhounti ‘sabadu’ to wadaürüboun keisi kristiánugu íderagua tumutiwa lun wapurichihani uganu le lánina darangilaü (Isa. 52:7; Rom. 10:15). Íbini ítara, mégeitiwa ganigi lun wapurichihan dan le wadarirun chansi lun wadügüni. Ariñagati Bo, aban nibureinti 20 irumu lau: “Hanufudetina meha napurichihan houn nupanaagu leskuelarugu. Ladüga funa nibusigari nan. Le linarün katei, ibidiñeti nun ka lan meha uagu nasandiragua nungua ítara. Guentó, gúndaatina lau napurichihan houn nibureintiña ha niseisin”.
w18.05 páh. 29-31 pár. 13, 16, 20
Nibureintiña, mígiraguagüda humá hungua lun leyeedunün Mafia
13 Iyeeni burí luagu Heowá ábanboun tídangiñe “gimara durunguatu” to gayaraaboun lachüühanu Mafia buagun, kéiburi meberesegun lan Heowá bau ani mínsiñe ban lun. Ariñagatu Ida, aban nibureintu to 19 irumu tau: “Liibe-agei dan, sanditina kamá díseti Heowá nuéi ani mabusenrun lan lun Numada lan”. Ka tadügübei dan le tasandiragun tungua ítara? Ariñagatu: “Íderagua lumutina adamuridaguni saragu. Luagu meha aban dan, lidan adamuridaguni, miñurun numuti meha núhabu lun níchugun óunabagülei. Genegeti meha nun meberesegun hamá ha híbiri lau le lunbei nariñaguni. Ánheinti guenlé, aransetina lubá adamuridaguni ani áfaaguatina lun níchugun óunabagülei bián o ǘrüwa wéiyaasu. Lau sun hénrengu lan nun, buídutimati nasandiragun nungua dan le nadügüni. Ani rútiña íbirigu gurasu nun. Sagü náfuridun lídangiñe adamuridaguni, chouru numuti hínsiñe nan lun Heowá”.
16 Ítara kei meha lóunigiruni lubunidin súdara lichügü, góunigi lumuti giñe wemenigin luagu wasalbarun wasaminan, lidan amu dimurei, lun wasaminarun buidu (1 Tesa. 5:8; Ari. 3:21). Íderagua lumutiwa wemenigin lun wetenirun lun füramasei le adüga láalibei Bungiu luma lun warihini turobuli keisi lubudubu (Sal. 27:1, 14; Adü. 24:15). Gama lumoun, lun lóunigiruniwa ‘wabunidin’ mosu wadaürüni, mama lun wanügüni wáhaburugu. Mini lan le, lunti lan warihini wemenigin kei aban katei le inarüniti woun.
20 Ariñagati Pábulu ítara tiña lan Lererun Bungiu kei aban eféin to líchuguboun Heowá woun. Lunti wayusurunu Lererun Bungiu buidu dan le wayanuhan luagu wafiñen o dan le wáfaaguña lan lun wasansiruni ligaburi wasaminan (2 Ko. 10:4, 5; 2 Tim. 2:15). Ka gayaraabei badügüni lun bahandilihanu Lererun Bungiu buidu? Ariñagati Sebastian, aban nibureinti le 21 irumu lau: “Dan le naliihanu Bíbülia nábuguarügü, aba nabürüdün aban bérusu lídangiñe kada kapítulu le naliihabei. Nadügüña aban lísüta lau sun bérusu le hínsiñetimabei nun. Ítara liña úaratima lan nisaminan luma ligaburi lisaminan Heowá”. Ariñagati Danieli, nibureinti le uágubei wayanuha lidan párafu 8: “Dan le naliihanu Bíbülia aba burí nanúadirun bérusu le gayaraati líderaguniña gürigia ha lídanbaña fulasu le ñein lubéi napurichiha. Ariha naali buidu lan hóunabun dan le harihin hínsiñe lan le tarufudahabei Bíbülia nun ani adüga nani sun niyaraati lun níderaguniña”.
Darí wamá pérüla lánina lichú aau
it-2-S páh. 938 pár. 5
Arumani
Sífiri sandu. Lábugiñeñein Lubafu Heowá sífiri sandu ani súnwandan lagunfuliruni Lisuuni. Harumati sífiri le, úati ni murusun iwiyei luagu ani sánduti, direi laali Bungiu lun layusurún lun katei buiti. Ligía lariñawagúnbei luagu “sandu” lan sífiri le, wawa ligía lun “sífiri le sándubei” (Sal 51:11; Lk 11:13; Rom 1:4, TNM; Efe 1:13). Dan le lábugiñeñein lan lubafu sífiri sandu aban gürigia, ínchaha lumuti óusera lidan aban igaburi sánduti o harumati. Sun óuseruni le wíyeti o mabuidunti adügati lun lírudun sífiri le (Efe 4:30). Lau sun aban lan erei mabagariti sífiri sandu, gayaraati ladügǘniwa lun lírudun ladüga ligía lan ábanbei lídangiñe katei le aubei larufudei Bungiu ligaburi. Eredeha lumuti furumiñeguarügü wuribani luadigimari sífiri sandu (1 Te 5:19) ani anhein asigira gürigia adaaguei wuribani le ladaagubei, lanabaguñein lani Bungiu sífiri sandu, ani gayaraabei ladügün lira lun larihini Bungiu gürigia maganbaditi ligía keisi lágani (Isa 63:10). Gayaraati giñe lanabaguni gürigia sífiri sandu, figóu le lariñagubei Hesusu úabei lan ferudunawa lan ni lidan ubóu le, ni lidan le anitebei (Mt 12:31, 32; Mr 3:28-30; arihualá ESPÍRITU).
it-1-S páh. 255 pár. 5
Igaaduaü
Arihúati lidan ligaburi lóuserun gürigia. Arufuda lumuti gürigia igaadua lan lidan somu katei le ladügübei le arufudubalin furangu ayumaha lan somu katei wuribati ani memenihabu lan. Ariñagati abürühati Bíbülia le gíribei Santiagu woun wuriba lan ayumahani le lugundun lídangiñe liabin figóu (Snt 1:14, 15). Ligíati, arihúati anhein igaadua lubéi aban gürigia lidan ligaburi lóuserun. Ariñagati apostolu Pábulu ligiaméme lan igaaduaü luma láhudurawagun houn guáriua (Efe 5:5). Ariha lumuti gürigia le igaaduabei katei le layumahabei kei aban bungiu ani súdinitimati katei ligía lun sügǘ lau leseriwidun luma láhuduragun lun Bungiu le adügübaliwa (Rom 1:24, 25).
24-30 LIDAN SISI-HATI
ARUFUDAHANI GEBEGITI TÍDANGIÑETI BÍBÜLIA | FILIPUNA 1-4
“Madiherida humá luagu ni kata”
Lidarangilan Bungiu “le wéiritimabei luéi sun subudi”
10 Ka gayaraabei wadügüni lun madiheridun wamá luma lun wibihini lidarangilan Bungiu? Arufudati le lariñagubei Pábulu houn Filipuna woun afurieiduni lan áranibei lun madiheridun wamá. Ligíati, furíei wamá dan le weiri lan wadiheri (aliiha huméi 1 Féduru 5:6, 7). Ani adüga waméi lau afiñeni, chouru wameime sunsuinagubei luagu berese lan Heowá wau. Ru wamá giñe seremei lun luagu sun abiniruni le líchugubei woun. Lederebuguduba wafiñen luagu danme waritaguni gayara lan “ladügün gibe sügǘ lau le wamuriahabei o le lan wasaminarubei” (Efe. 3:20).
Lidarangilan Bungiu “le wéiritimabei luéi sun subudi”
7 Ka hasaminarubei íbirigu Filipuna dan le haliihanbarun gárada to lóunahaboun Pábulu houn? Másiñati haritagua hamani le asuseredubei lun Pábulu luma Sílasi luma ida liña lan líderaguniña Heowá sódini. Ka meha labusenrubei Pábulu larufudahan houn? Moun lumuti lan hadiheridun, ani líchugubei lan Heowá lidarangilan houn ánhaña afurieida. Gama lumoun, ariha waméi ariñaga lan wéiritima lan lidarangilan Bungiu “luéi sun subudi”. Ka mini lubéi le? Sügügüda tumuti saragu Bíbülia dimurei burí le kei “sügügua lumuti sun le gayaraabei wasaminaruni” luma “íñutimaati luéi le gayaraabei wasaminaruni”. Ligíati, lariñaguña meha Pábulu hanarimetima lan lubuidun lidarangilan Bungiu sügǘ lau le gayaraabei wasaminaruni. Ka wafurendeirubei? Íbini lan anihein lan dan marihin wamani ida luba lan wáfuridun lídangiñe waturobulin, gayaraati larihini Heowá, gayaraati giñe ladügün katei le lunbei laweiridagüdünu wanigi (aliiha huméi 2 Féduru 2:9).
Lidarangilan Bungiu “le wéiritimabei luéi sun subudi”
16 Kaba ladüga lidarangilan Bungiu “le wéiritimabei luéi sun subudi” wawagu? Ariñagatu Bíbülia, lóunigiruboun “hanigi luma sun hisaminan, ladüga lídanñadün aban luma Kristu Hesusu” (Fili. 4:7). Lidan iñeñein le ídanbei tabürüdǘwa Bíbülia yúsuati meha dimurei le ásügürawagüdübei kei lóunigiruboun lun layanuhóun luagu hawadigimari súdaragu ha meha óunigirubalin uburugu lidan binadu dan. Ligiaméme asuseredubei Filipu. Arumugatiña meha lílana uburugu buidu ladüga subudi hamani chouru lan fulasu ligía. Ítarameme, dan le anihein lan lidarangilan Bungiu wadan darangilati wasaminan tuma wanigi. Chouru wamuti góunigi lániwa Heowá ani busén lan lun buidu lan lidin woun lidan wabagari (1 Fe. 5:10). Íderagua lumutiwa wasubudiruni katei le lun mígiraguagüdün wamá woungua lun anufudei luma idiheri.
Darí wamá pérüla lánina lichú aau
it-2-S páh. 525 pár. 9
Adagaragüdüni
Idewesei tauti diwéin. Dagagüdawati meha giñe idewesei tauti diwéin úara luma liibe-agei adagaragüdüni, dántima le lídanhali Fulasu le Füramasewabei hawinwanda ísüraelina (1 Lu 15:2, 5, 8-10). Lau dimurei idewesei tauti diwéin (“uniñein gabacharuadaditi”), layanuhóuña luagu adagaragüdüni le meha awiyurúbei luagun latarü (1 Lu 28:7, 14; konparárü huméi luma Afu 30:9; 1 Lu 15:10). Abürühati apostolu Pábulu houn kristiánugu ha Filipubaña: “Íbini níchuguñein lan nibagari guánarügü kei lichugún idewesei le tauti diwéin luagun adagaragüdüni luma eseriwiduni lun Bungiu le ídounbei ladundehaün hafiñen, gúndaatina”. Lidan kesi le, yusu lumuti Pábulu hénpulu luáguti idewesei tauti diwéin lun larufuduni aranseñu liña lan meha lun líchuguni libagari luagu hafulesein líbirigu kristiánugu (Fili 2:17, TNM). Murusun dan lubaragiñe lounwen Pábulu, abürühati ariñaga lun Timotéu: “Au, málühali luéyuri nederegerúniwa keisi adagaragüdüni, yarafaali nounwen” (2 Ti 4:6).
w07-S 1/1 páh. 26 pár. 5
Gumeseeli “furumiñeti ásaaruni lídangiñe óunweni”
5 Lárigiñe, mosu hóundaragun kristiánugu anuadirúaaña, ha lílana “Ísüraeli le lani Bungiu”, luma Wabureme Hesukrístu lidan uéiriguni sielu, le ñeinba lubéi heredera luma “lun sun dan” (Galasiana 6:16, TNM; 1 Tesalónikana 4:17). Lun lira laguarúa “ásaaruni lídangiñe óunweni le gumesegiñebei” o “furumiñeti ásaaruni lídangiñe óunweni” (Filipuna 3:10, 11 TNM; Arufudúni 20:6). Danme súnhali águyuguni le, ligíaalime hagumeserun saragu míñunu gürigia ha hilaguaañabaña águyugua ubouagu lau emenigini lun habihin ibagari magumuchaditi lídanme Paraísu. Ligíati, meberesenga anhein hemenigi wabéi wawinwandun sielu o wawinwandun lun súnwandan ubouagu, lunti busén wamá wafurendeirun luagu “furumiñeti ásaaruni lídangiñe óunweni”. Ka san luwuyeri águyuguni le? Ka dan lasusereda?