LEKSIÓUN 2

Ariñaga huméi katei kei ligaburi hayanuhan

2 Korintuna 2:17

LE LUNBEI HADÜGÜNI: Yusu humá dimurei le ménrengunti gunfurandawa lan ani ariñaga huméi katei kei ligaburi hayanuhan, furangu láamuga larihíniwa le hasandirubei luagu le hariñagubei luma hawagu gürigia ha aganbubalün.

IDA LUBA HADÜGÜNI?

Furíei humá lun Bungiu ani aranse humá buidu. Amuriaha humá luma Heowá lun líderagunün ibiha lun hetenirun gürigia lun uganu le híchugubei lubaragiñe hetenirun hun. Gabaroun huméi ka lan ariñahani súdinitimati habusenrubei hafuranguagüdün. Magufurumada humá láurügü haliihani le bürüwañubei. Írida huméi katei kei ligaburi hayanuhan.

Anhaün aliiha somu fánreinti tídangiñe Bíbülia o amu agumeiraguagüdüni, áfaagua humá lun hasubudiruni fánreinti ligía buidu, fararagua láamuga haliihani. Anhein anihein lubéi ariñahani ñein le lunti haliiruni kei aubei labürüdǘwa, ru humá ibagari lun le haliihabei ani moun lumuti hásügürün lidan ligaburi hadügüni.
Ru humóun hanigi lidoun le hariñagubei. Samina huméi ka lan uagu megei habéi gürigia haganbuni le hariñagubei houn. Teni humá houn. Anhein hadüga ítara, larihúba lidan ligaburi lesetirun húgubu luma lidan higibu lau lan sun taruman hanigi hayanuha ani gamadoun humá.

Masaminara humá ligiaméme lan lariñaguni gürigia katei kei ligaburi layanuhan luma layanuhan lau mekeeni. Írida huméi dimurei buidu ani kei ligaburi lariñawagún lidan hiñeñe, lau láamuga inebesei haganbei gürigia uganu le híchugubei houn.
Ariha humá luagun gürigia le aganbubalün. Anhein masandiragunbaña lubéi gürigia houngua wuriba, aríagua humaña hagibuagun. Danme híchugun aban yanu, lubaragiñe harihin hawagun sun ha aganbubalün, ariha humá luagun aban gürigia furumiñe, lárigiñe ábame harihin luagun amu, ñéingiñe luagun amu, ítareina.