LEKSIÓUN 10
Asansiheina huméi humalali
Matéu 10:27
LE LUNBEI HADÜGÜNI: Asansiheina huméi liñun humalali, lufuresen luma ligaburi hariñaguni dimurei, furangutima láamuga ariñahani le habusenrubei hafuranguagüdün luma lun hánhingichunu hanigi gürigia.
IDA LUBA HADÜGÜNI?
Asansiheina huméi liñun humalali. Iñura huméi humalali lun hafuranguagüdün somu puntu súdiniti luma lun hánhingichunu hanigi gürigia ha aganbubalün. Adüga huméi ligiaméme danme haliihan aban asíadihani lúmagiñeti Bungiu. Rarigüda huméi humalali lun hadügün lun hagurabuni gürigia kaba lan hariñaga o lun hadügün lun lasandirúniwa anufudei o idiheri.
Asansiheina huméi ligaburi hariñaguni dimurei. Anhein gayara ladügǘn lira lidan hererun, mahürüdagüda huméi humalali danme harufudun ugundani o hayanuhan luagu lueirin o lidise katei. Ani danme harufudun íruni o idiheri hǘrügüda huméi humalali.
Asansiheina huméi lufuresen hariñaguni dimurei. Fureselá hadimurehan anhein busén hubéi harufudun ubebeni. Ayanuha humá lau lámarun danme híridun somu puntu súdiniti.