Sun wagía sagatiwa buiti tídangiñe Leskuela Galaadü

Sagü irumu, houdin saragu íbirigu ha lídanbaña eseriwiduni espechaliti lidan dan dayarüti ha lídangiñetiña sun ubóu tidan Leskuela Galaadü to tani Watchtower, le adügǘbei tidan luban furendei to Pattersonboun (Newayóru).a Furendeitiña ha aturiahabaña tidan leskuela to lun hagunfulirun buidu lau ámuñegueinarügü dasi tidan lóundarun Heowá. Íderagua lumutiña arufudahani le lun híchugun iderebugu lun burí damuriguaü luma tun burí Beteli to lídanboun sun ubóu.

Le lúgubu aban lan leskuela to arufudahaboun houn íbirigu ha lídangiñetiña sun ubóu Leskuela Galaadü. Kei hénpulu, lidan külase 147 ha eresibihabaña lidan irumu 2019, ñéinñanu 56 aturiahatiña ha lídangiñetiña 29 ámuñegueinarügü ageiraü. Sun aturiahatiña ha ñǘdünbaña tidan Leskuela to, lídanñanu somu eseriwiduni espechaliti lidan dan dayarüti, kéiburi eseriwidutiña Betelirugu, misionérugu, prekursorugu espechalitiña hama óunigirutiña sirkuitu.

Gumeseti aransehani tubá Leskuela to saragu dan lubaragiñe lagumeserun külase. Kei hénpulu, adügati Departamentu le Arihibei lau Aweiyasuhani tidan lóundarun Heowá lun lagañeihóun hapasein ha agunbirahóubaña tidoun Leskuela to lun haweiyasuhan tidan awión. Lidan hakesin lílana külase 147, gástawati 1,075 dólarü lidan lipasein kada aturiahati le terencha ñüdün giribuya. Kéiburi aturiahatiña ha awinwandubaña lidan ubouhu Salomón, aweiyasuhatiña tidan gádürü awión lubá hachülürün Patterson, danti le hagiribudunbei hárigoun ragütiña ǘrüwa. Mini lan le aweiyasuha hamá lóugiñe 35,400 kilometuru (22,000 maili). Lidan súngubei, fáyeiwati 2,300 dólarü luagu lipasein kada íbiri. Lun mibe lan seinsu agastarúti, yúsuti Departamentu le Arihibei lau Aweiyasuhani aban programa lun laluahóun paséi le ǘnabuti lebegi. Íbini lárigiñe adügaaña lan daradu, sigiti programa ligía áluaha paséi le ǘnabutimati lidan burí dimaasu o hati le asigirubei. Yusu lumuti giñe Departamentu le Arihibei lau Aweiyasuhani puntu burí le híchugubei gürigia keisi budagia tun lóundarun Heowá, le hagañeirubei dan le háfayahan tidan awión ani gayaraati lasansirún luagu lebegi paséi.

Mégeitiña saragu aturiahatiña aban bisa lun gayara lan hebelurun Merigoun. Ligía ladügünbei Departamentu le Arihibei lau katei luáguti Lúrudu aransehani lun líderaguniña íbirigu ha ibiha aban bisa houn aturiahatiña. Kéiburiñein 510 dólarü lebegi taransehóun gárada burí to lun kada aturiahati.

Ida liña wasagarun sun wagía buiti lídangiñe le arufudahóubei houn aturiahatiña ha? Leseriwiduña Hendra Gunawan kei wéiyaali lidan afiñeni lidan aban damuriguaü Suru Asia le ñein lubéi heseriwida aban feru maríeitiña ha eresibihaañabaña tídangiñe Leskuela Galaadü. Abahüdahati woun: “Úatiña meha prekursorugu ha apurichihabaña ǘrüwa-wein-diisi oura luagu hati lidan damuriguaü le ñein wabéi. Lárigiñe hachülürün maríeitiña ha, adügatiña lun háyeihani íbirigu ubebeni le harufudubei, ítara liña hadügagun saragu hádangiñe houngua prekursorugume. Fiu dan lárigiñe, ñǘdüntu aban íbiri lídangiñe damuriguaü le ñein wabéi tidan Leskuela houn Apurichihatiña Larúeihan Bungiu”.

Lawadigimariduña meha Sergio Panjaitan hama fiu íbirigu ha eresibihaaña tídangiñe Leskuela Galaadü tidan aban Beteli Suru Asia. Ariñagati: “Arufudahani le heresibirubei íbirigu ha mámarügüñein aban abiniruni houn, aban giñe abiniruni woun. Furendeitiña íbirigu ha saragu! Lubaragiñe weiri lan hanaagun houngua hawéi amu, aban harufudahani le hafurendeirubei. Ruti katei le gurasu woun, adüga ligía lun wíchugun gurasu houn amu”.

Ida liña lafayeirúniwa sun le mégeiwabei tun Leskuela to? Lau burí budagia le híchugubei lun lawanserun wadagimanu lánina apurichihani lidan sun ubóu. Saragu lídangiñe ounahóuati lídangiñe ámuñegueinarügü ligaburi layusurún donate.jw.org. Seremei luagu budagia le híchugubei lau sun hugundan. Ligía ídehabei lun gayara lan tadügǘn Leskuela to to ñeinhin lubéi hachülüra íbirigu ha lídangiñetiña ámuñegueinarügü ageiraü.