Barütu áfisi lánina ásügüragüdüni buiti houn saragu míñunu gürigia

Hóugiñe ǘrüwa-wein hádangiñe san ásügüragüdütiña, tídanñanu burí áfisi to bóugudiboun tuéi Beteli. Ka buiti asagarúbei lídangiñe le? Ka burí umegeguni hemegeirubei ásügüragüdütiña ha tídanbaña burí áfisi lánina ásügüragüdüni? Ka uagu ídeha tubéi áfisi lánina ásügüragüdüni lun buídutima lan wadagimanu le adügǘbei?

Seremei tun burí áfisi lánina ásügüragüdüni, gayara lubéi hawinwandun ásügüragüdütiña lidan fulasu le ñein lubéi layanuhóua iñeñein le hásügüragüdübei. Ariñagatu Karin, to ásügüragüdübouni lidoun iñeñein bajo alemán: “Lúmagiñebei wáguyun tidoun áfisi lánina ásügüragüdüni to lídanboun uburugu Cuauhtémoc, Chihuahua (Méhiku), bajo alemán wayanuhabei súnwandan. Mámarügü hama ásügüragüdütiña o lidan apurichihani; ligía giñe wayanuhabei dan le woudin agañeingua. Geyegu waña hau gürigia ha ayanuhabalin iñeñein le. Aganbatiwa burí dimurei le lüha lúmagiñe maganbun wamani. Guentó, subudi wamaali ligaburi hayanuhan gürigia sagü weyu”.

Gana lawinwanda James ani lawadigimariduña lidan sétanu le ásügüragüdübei lidoun Frafra. Ariñagati luagu anihein lan burí dan lálugun hawagu íbirigu ha tídanbaña Beteli. Ariñagati giñe: “Lau sun lira hínsiñeti nun lun tidan nan áfisi lánina ásügüragüdüni. Hínsiñe ligía nun napurichihan lidan iñeñein le ayanuhóubei ya ani hingí lumutu giñe nanigi narihini ligaburi hóunabun gürigia lidan apurichihani”.

Ida liña lanuadahóun fulasu le ñeinba lubéi tichugúa aban áfisi lánina ásügüragüdüni? Joseph, le ídehabei lidan Departamentu le Arihibei lau Adibuhani luma Tábunawagun Muna lidan sun Ubóu Warwick (Newayóru), afuranguagüdati: “Aban lídangiñe turobuli le úmabei wagagibudagua, anihein lan fulasu le ídanbei mama lan súnwandan ñein lan duna luma elekütrisida, ani mídehanti Interneti lun gayara lan warariragüdüni ariñahani le lunbei wásügüragüdüni. Ligíati, lubaragiñe wanúadirun halíaba lan wafidira aban áfisi lánina ásügüragüdüni, akutiha wamuti ida liña lan léibugun katei lidan saragu fulasu le ñein lubéi layanuhóua iñeñein ligía”.

Lidan liibe-agei kesi, lun furese lan ani meserun ligía, aba ladügǘn aransehani lun tichugún áfisi lánina ásügüragüdüni tidan aban Muna lun Adamurini, tidan Luban Wadamuridagun o tidan aban muna to ñein lubéi hawinwanda misionéru, lun gayara lan haweiyasuhan ásügüragüdütiña ñüdün giribuya. Anhein siñá lubéi ladügǘniwa ni aban lídangiñe katei le, aba hamuriahan íbirigu üma lun hagañeihan muna le ñein lumuti gayara lan tichugún áfisi lánina ásügüragüdüni luma lun hawinwandun íbirigu ñeinmeme. Anhein asansira gádantiña ásügüragüdütiña, gayaraati talugurún muna burí to lau lumenrengun ani ábame layusurún seinsu le ñein lumuti lemegeirúa.

Aranseñu lun wasigirun nadagimein

Lidan irumu lánina eseriwiduni 2020, yúsuati 13 míñunu dólarü lun tamainirún burí áfisi lánina ásügüragüdüni. Mégeitiña ásügüragüdütiña konputadora, programa burí lun tuadigimaridun luma burí katei le mégeiwabei lun gürawárua lan ariñahani ani mégeiwati giñe Interneti, elekütrisida o katei líbeina lira. Kei hénpulu, mégeiwati 750 dólarü lun tagañeihóun aban konputadora aransewa tuguya lau burí programa le agañeihóuarügüti. Lanwoun lira, megei hamuti ásügüragüdütiña programa Watchtower Translation System, le íderagubaliña lun buidu lan haransehani hawadigimari, luma lun hebelurun áluahoun dugumedu to hemegeiruboun lun hásügüragüdün.

Ibihatiña giñe ásügüragüdütiña máhina burí lun gürawárü hamá tidan áfisi to ñein habéi. Wéiriti teseriwidun máhina burí to dan le laburuchagunbei sandi COVID-19, ladüga ítara gayaraati meha hanügüni ásügüragüdütiña máhina burí ligía hábiñoun lun hasigirun ásügüragüda luma gürawárü agumeiraguagüdüni luma burí bidéu.

Añahein giñe amu burí íbirigu echekühei le sügügüdawaalibei hama ha ídehabaña lidan taransehóun luban ásügüragüdüni. “Añahein saragu íbirigu ha gachansintiña lun hayusuruni le hayaraabei adüga lun hídehan kéiburi apurichihatiña hama prekursorugu”, liña Cirstin, le nadagimeinbei tidan áfisi to lánina ásügüragüdüni lidoun iñeñein afrikáans uburugu Kabo (Suru Áfürika).

Wéiriti hagundan íbirigu ha. Kei hénpulu, ariñagatu aban íbiri to ídehaboun tidan aban áfisi lánina ásügüragüdüni “ítara liña lan kamá láfurun aban garabali diliti”. Añahein íbirigu yusu hamuti hamalali lun gürawárua lan ariñahani. Juana, to ásügüragüdüboun lidoun iñeñein totonaco Veracruz (Méhiku), ariñagatu: “Lau wawinwanduña lan yarafa lun burí fulasu le ñein lubéi layanuhóua wañeñe, ménrenguntimati lun hayabin íbirigu gürawárei hamalali tun burí agumeiraguagüdüni luma bidéu”.

Le san lúgubu ídeha tan áfisi lánina ásügüragüdüni lun buídutima lan ásügüragüdüni? Ariñagatiña saragu míñunu aliihatiña luagu anha lan. Cédric, le nadagimeinbei lidan sétanu le ásügüragüdübei lidoun iñeñein kongo lidan Republika Demokratiku Kongo, afuranguagüdati: “Añahein meha íbirigu ariñagutiña wásügüragüdüña lan lidoun iñeñein kongo le ayanuhóubei ‘tidan Watch Tower’, ladüga menegegua lan luma iñeñein le hayanuhabei. Ánheinti guentó, ariñagatiña luagu wásügüragüdüña lan lidoun kongo le uguñeti weyu lugundun anihán lan iñeñein hayanuhabei sagü weyu”.

Andile, le ásügüragüdübei lidoun iñeñein xhosa, ariñagati woun luagu susere lan aban katei ítarati Suru Áfürika: “Gíbetiña arihiti sánsihali lan ásügüragüdüni. Añahein irahüñü ha meha aliihabarun Garüdia Awisahatu lidan inglesi, guentó haliihañoun lidan iñeñein xhosa. Hínsiñetu Traducción del Nuewo Mundo to chéküwaaruboun houn ladüga yusu tani dimurei burí le hayusurubei gürigia dan le hadimurehan”.

Lídangiñe budagia burí le ichugúbei lun lawanserun wadagimanu lánina apurichihani lidan sun ubóu láfurida sun seinsu le ayusurúbei lun tichugún áfisi lánina ásügüragüdüni, taransehóun luma hamainirún íbirigu ha nadagimeinbaña tidan, le ichugúbei luéigiñe donate.jw.org. laganagua.