Álügüdahani le hadügübei aliihatiña
Lárigiñe lágurahoun Hesusu Belén, ka uagu lerederunbei Hosé tuma María ñein lubaragiñe hamuga hagiribudun hábiñoun Nasarétün?
Mariñagun tumuti Bíbülia ka lan uagu, gama lumoun ariñagatu fiu ariñahani súdiniti ka lan uéigiñe hanúadirubei herederun ñein.
Dan le lariñagunbei ánheli tun María tadageinaduba lan ani tágurahaba lan aban irahü, Nasarétü meha tawinwanda luma Hosé, aban uburugu Galiléa (Luk. 1:26-31; 2:4). Dan lárigiñe, dan le hayabinbei Ehiptugiñe, aba hagiribudun Nasarétün. Kei lidan lubéi uburugu ligía laweirida Hesusu, gayaraati meha lariñawagúniwa Nasarétüna lan ligía (Mat. 2:19-23). Ligíati wasaminarunbei luagu Nasarétü dan le layanuhóun luagu Hosé, María luma Hesusu.
Anuhein meha aba tiduhe María to awinwanduboun Hudéa ani Isawéli meha tíribei, lani meha fádiri Sakaríasi weiriou ani tuguya lúguchuboun Huan le abadiseihabei (Luk. 1:5, 9, 13, 36). Aba tidin María abisidahoun Isawéli, aba terederun ñein kei burí ǘrüwa hati tuma ani lárigiñe, aba tagiribudun Nasarétün (Luk. 1:39, 40, 56).
Lau lásügürün dan, aba lichugún aban gumadi lun habahüdǘniwa sun lílana ageiraü. Lun gaganbadi lan Hosé lun gumadi le, mosu meha laweiyasuhan Nasarétügiñe lun Beléun, “le meha ñein lubéi lágurahoua Dawidi”, le meha uágubei lariñaga profesía ñeinba lan lágurahoua lan Mesíasi (Luk. 2:3, 4; 1 Sam. 17:15; 20:6; Mik. 5:2). Ñein lágurahoua Hesusu, ani furanguti mariñagunbei lan Hosé tun María lun hadügüni limigifen aweiyasuhani le hárigoun lau aban irahü figigili. Aba herederun Belén, le yarafabei lun Herusalén, le erederubei kei burí 9 kilometuru (6 maili) lúmagiñe ñéingiñe. Ani buiti lidin houn ladüga gayaraati meha houdin arufudei irahü ténpulurugu luma lun híchuguni adagaragüdüni le uágubei lariñaga Lúrudu (Fad. 12:2, 6-8; Luk. 2:22-24).
Lunti giñe waritaguni ariñaga lan lani Bungiu ánheli tun María lichugúba lan tisaani “lidan lubara larúeihan Dawidi”, lun Urúeibei lan. Subudi lumuti meha san Hosé tuma María ka lan mini lubéi lagüriahóun Hesusu Belén, uburugu le ñein lubéi lagüriahóua Dawidi kei meha lariñaguni profesía? (Luk. 1:32, 33; 2:11, 17). Háfuga aba meha hasaminarun buídutimabei lan houn lun herederun Belén lun hagurabahan líchugun Bungiu lanwoun adundehani houn.
Arufudati le asuseredubei luagu redei hamá saragu dan ñein Belén. Íbini ibidiñe lan woun átiriñein lan dan hau ñein dan le hachülürünbei aturiahatiña waruguma abisidahaña, le wasubudirubei mámaali lan meha aban irahü figigili Hesusu, wéiriaraühali meha, ani gábanhaña meha lagübürigu ñein (Mat. 2:11). Ligíati, lubaragiñe hagiribudun Nasarétün, genegeti aba lan herederun awinwanda ñein Belén.
Aba lóunahan Erodesi “áfaraguaña sun irahüñü ha biántiña irumu hau lun ǘnabun, ha aganóubaña Belén” (Mat. 2:16). Kei le aba lubéi lawisaruni aban ánheli Hosé luagu denchaü le ñeinbei Belén, aba lanurahan Hosé tuma María Ehiptun lau Hesusu, ani aba herederun ñein darí lounwen Erodesi. Lárigiñe, aba lanügünu Hosé María luma Hesusu awinwanda Nasarétü. Ka uagu moudin habéi Beléun? Ladüga lagumadihaña lan meha aban liráü Erodesi Hudéa le gíribei Arükeláu ani furundeti meha, ábati lawisaruni aban ánheli Hosé luagu denchaü le ñeinbei. Séfuñu luba meha Hesusu Nasarétü ani ñein gayaraabei meha hagüriaruni lagübürigu kei aban lubúein Bungiu (Mat. 2:19-22; 13:55; Luk. 2:39, 52).
Genegeti meha hilá lan Hosé lubaragiñe líchuguni Hesusu libagari lun gachansin hamá gürigia wawinwandun sielu. Anhein hilá lubéi Hosé lubaragiñe lounwen Hesusu láguyuguba Hosé ya ubouagu ani gachansinbaña saragu gürigia lun hasubudiruni luma lun hálügüdüni ka lan uagu lanúadira lerederun Belén lárigiñebei lagüriahóun Hesusu.