Lun hóunigiruniña hiduheñu hama humadagu lidan lidaani lénrengunga, falá huméi adundehani burí le
DEREBUGUGÜDA HUMÉI HIBAGARI KEISI MARÍEITIÑA
Derebugugüda huméi hibagari keisi maríeitiña
Ariñagatu Lererun Bungiu: “Buítimatiña biama luéi aban […] anhein éiguada aban hádangiñe, liñuragubei le aban” (Apurichihati 4:9, 10). Lunti ítara lan maríeiti kei aban arünei ani lani weiriou kei segandi arünei ha nadagimeinbaña úara lun hachülürün le ñéinhinbaña lubéi, mama kei bián ugunei to lunboun tabugucha lan túmagua.
Íbini dan le gibe lan katei lun hichügü, móuseragua humá húmagua wuriba. Buídutimabei lidin hun anhaün áfaagua lun gaguraasun humá hubaruagua luma lun gunfurandagua humá húmagua.
Direi humá dan íbini ábanrügü wéiyaasu luagu dimaasu lun hayanuhan luagu hiturobulin.
Lunlá laransehóuniwa turobuli hetenira, mama lun líchaagun aban duru luagun le aban.
Sügǘ humá dan úara adüga katei le hínsiñeti hun huguya biángubei. Haritagua huméi sun lubuidun dan le hásügürübei úara, gayaraati haríagunu hiyawa dan le hamarieidunbei o dan le hásügürünbei amu lubuidun dan.
“Háfuga ñeinbei lan katei le ídanbei múaran hamá aban feru maríeitiña, lau sun lira, gayaraati hawadigimaridun úara. Gayaraati hanúadiruni úara kaba lan hadüga, áfaagua hagíame lun buidu lan lasalirun le hasaminarubei hadügün” (David).
KIPU HUMAÑA HUMADAGU
Kipu humaña humadagu
Ru humá dǘgüdaguaü houn humadagu. Maguraba humá lun hagíarügüba lan íchiga dǘgüdaguaü hun. Híderaguba húniwagua anhaün íderagua amu.
Áluaha humá chansi sagü weyu lun hayanuhan hama fiu hádangiñe humadagu lun harihini ida haña lan.
Álügüda humaña humadagu ida liña lan hagagibudagun luma burí turobuli libe le úmabei hagagibudagua.
“Dan le buin biña lan lau turobuli, ítara haña bumadagu bun kei leiti le arufudubalin bun halíagiñeba lan bidin. Anihein dan buídurügübei lan lau haritaguagüdüni le subudi báalibei bun. Hínsiñetibu houn bumadagu ani subudi hamuti giñe hínsiñe hamá bun” (Nicole).
GUNFURANDA HUMAÑA HISAANIGU
Gunfuranda humaña hisaanigu
Ariñagatu Lererun Bungiu: “Kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan” (Santiagu 1:19). Másiñati mabusenrun hamá hisaanigu hayanuhan huma luagu le adiheridagüdübaliña o anufudedagüdübaliña. Lau sun lira, anhaün aganbaña lau gurasu, ménrenguntimabei houn lun hariñaguni hun ka lan hasandirubei.
Adüga humá lun darangilu lan hasandiragun hisaanigu houngua. Añahein isaanigu ha únbaña ménrenguntima lan houn hayanuhan hama hagübürigu dan le darangilu lan hasandiragun houngua, kéiburi dan le héibuguña lan úara o haweiyasuhaña lan tidan karü, sügǘ lau dan le hañuuragüdüniña hagübürigu lun hayanuhan hama.
Áfaagua humá lun mibe lan ñunsu le hanarime buriti harihin o haganbahan hisaanigu.
Ariñaga huméi houn hiduheñu ka burí lan katei hadügübei lun chouru lan hasandiragun houngua.
Ayanuha humá hama hisaanigu luagu kaba lan hadüga anhein asusereda somu katei sódiniti ani asayaha huméi hama.
“Ayanuha humá hama hisaanigu ani ígira humá lun hariñaguni le hasandirubei. Háfuga mariñagun hamagili lan hun hanufude hamá, nidiheri hamá o safagu haña lan. Ariñaga huméi houn susere lan giñe ligiaméme hun ani abahüdaha huméi houn ka burí lan katei hadügübei lun buidu lan hasandiragun hungua” (Bethany).