Ida liña líderaguniwa lilurudun Bungiu?

1. Ka uagu megei wabéi wadundehóun?

Chútimati lau Heowá wawéi. Keisi aban Úguchili hínsiñehabuti saminati wawagun. Madügün lumutiwa lun wawinwandun sin ladundehan (Heremíasi 10:23, TNM). Ítara kei megei hamá irahüñü lun hadundehaniña hagübürigu, mégeitiwa giñe ladundehaniwa Bungiu (Isaíasi 48:17, 18). Adundehani le líchugubei lilurudun Bungiu, ligía aban lubuidun idewesei lúmagiñe. Aliiha huméi 2 Timotéu 3:16.

Lúrudu burí le líchugubei Heowá arufudahati woun lun buídutima lan wabagari luma lun wibihin abinirúni le magumuchaditi ámuñegü. Kei ligía lubéi adügübaliwa, agurabúati lun wánharun lun lilurudun lau sun wagundan. Aliiha huméi Sálumu 19:7, 11 luma Arufudúni 4:11.

2. Ida liña tadundehaniwa Lererun Bungiu?

Anihein fiú inarüni méiniti tidan Bíbülia le arufudubalin woun ida liña lan labusenrun Bungiu lun wóuserun lidan ámuñegueinarügü kesi. Anihein giñe lúrudu le íchugubei eweridihani le furanguti woun (2 Lúrudu 22:8). Mosu wayusurun lichú aau lun gunfuranda wamani kaba lan wadüga según adundehani le tídanbei Bíbülia (Ariñawagúni 2:10-12). Kei hénpulu, arufudahatu Bíbülia aban lan idewesei lúmagiñeti Bungiu ibagari. Adundeha lumutiwa inarüni méiniti le lidan wawadigimari, wábiñe o dan le waweiyasuhan, lugundun haritaguagüda lumutiwa moun lumuti lan wíchuguni wabagari lidan peliguru. Aliiha huméi Adügaü 17:28.

3. Ka bián gumadi súdinitimabei?

Ayanuhati Hesusu luagu bián gumadi le súdinitimabei. Le furumiñeti arufuda lumuti ka lan lisuunibei wabagari: wasubudiruni Bungiu, línsiñedun woun luma weseriwidun lun lau úaraguni. Mosu gabaroun wamani gumadi le lidan sun le desidírü wabéi (Ariñawagúni 3:6). Ha awinwanduti habagari según gumadi le, lumadagubaña Bungiu, hibihiba ibagari magumuchaditi luma ugundani le inarüniti. Aliiha huméi Matéu 22:36-38.

Le libiaman gumadi adundeha lumutiwa lun buidu lan wanaagun woungua hama amu (1 Korintuna 13:4-7). Dan le wagunfuliruni lidan wabagari, wáyeihañein ligaburi lóuseruniña Bungiu gürigia. Aliiha huméi Matéu 7:12 luma 22:39, 40.

4. Ida liña líderaguniwa lilurudun Bungiu?

Arufudahati lilurudun Bungiu houn iduheñu kaba lan hadüga lun ñein lan ínsiñeni luma úarani hadan (Kolosana 3:12-14). Arufudahatu giñe Lererun Bungiu mosu lan yebe ladurarun maríei lun súnwandan. Aliiha huméi Agumesehani 2:24.

Dan le wafalaruni adundehani le tídanbei Bíbülia íderagua lumutiwa lun wagunfulirun lau wani buligasion luma lun buidu lan wasandiragun woungua. Kei hénpulu, lidan saragu wadagimanu himei hamutiña gürigia ha gúnfulitiña ani benefatiña (Ariñawagúni 10:4, 26; Ebüréu 13:18). Arufudahatu giñe Lererun Bungiu woun lun gufuruma wamá lau wibihini katei súdinitimati le wemegeirubei luma lun wíchuguni wamadagua luma Heowá lidan furumiñeti lúgaaru. Aliiha huméi Matéu 6:24, 25, 33 luma 1 Timotéu 6:8-10.

Íderagua lumutiwa giñe lilurudun Bungiu lun wóunigiruni wátuadi; kéiburi lúrudu le eweridihabei luéi átaguni, tóunigi lumutiwa luéi sandi luma burí danaguaü le gayarati lagidaruni wabagari (Ariñawagúni 14:30; 22:24, 25; 23:20). Inarüni ígira lan Heowá lun watun diwéin, gama lumoun lunti wadügüni lau duari, lun mabacharuadun wamá (Sálumu 104:15; 1 Korintuna 6:10). Íderagua lumutiwa lilurudun Bungiu lun wóunigiruni wagaburi luma wasaminan (Sálumu 119:97-100). Keisi kristiánugu, inebeti lilurudun Bungiu woun mámarügü lun buidu lan lidin woun, adüga wamuti lun wíchugun uéiriguni lun Heowá. Aliiha huméi Matéu 5:14-16.