“Kristiánugu” san sun ha ariñagubaña kristiánugu hamá?
SUBUDITI san hun átiriñanu lan kristiánugu lidan sun ubóu? Según líburu Atlas of Global Christianity, lidan irumu 2010 añahein meha kéiburi 2,300 míñunu kristiánugu, gama lumoun fánreinguatiña lidan lóugiñe 41,000 relihión, ani kada aban lídangiñe ámuñegueinarügüti larufudahan luma lilurudun. Hau saragu ariñagutiña “kristiánugu” hamá gunfurandawati ibidiñe lan houn fiú gürigia kaba lan hasaminara ani adügati le lun hírudun. Gayarati álügüdagua humá hungua: “Kristiánugu san sun ha ariñagubaña kristiánugu hamá?”.
Ariha waméi katei le lídangiñe amu oubaü. Anhein busén hubéi hebelurun lidoun amu ageiraü, ida luba hamuga harufuduni lídangiñetün lan ageiraü le hariñagubei? Ma úati buídurügü lan hariñaguni? Mosu harufudun aban pasapórute o amu dugumedu to arufudubalin inarüni lan. Ítarameme lun aban humá kristiánu le inarüniti, úati buídurügü lan hariñagun afiñe humá luagu Kristu. Mégeitün harufuduni. Ariha waméi ida luba lan.
Gumesewati dimurei lánigu Kristu o kristiánugu ayusurúa fiú dan lárigiñe irumu 44 lidan lidaani Hesusu. Ariñagati Lúkasi aban abürühati Bíbülia, lidan lan meha “Antiokía laguarúa houn afiñetiña furumiñe ‘Lánigu Kristu’” (Adügaü 11:26). Ligíati, wáwati meha houn lani Hesusu disipulugu, kristiánugu. Gama lumoun, ka lílabei aban lan lani Hesusu disipulu aban gürigia? Afuranguagüdatu Diccionario Teológico del Nuevo Testamento: “Lafalaruni aban gürigia Hesusu mini lan líchuguni libagari sunsuinagubei [...] lun súnwandan”. Lidan amu dimurei, aban kristiánu inarüniti falá lumuti sun larufudahan luma ladundehan Hesusu.
Añahein funa san gürigia ha ítaratiña uguñe weyu haganagua ha ariñagubaña kristiánugu hamá? Ka katei lariñagubei meha Hesusu lasubudiragüdübaña lan ha afalarubalin? Amisuraha wamutün akutihei ida liña lan tóunabuni Bíbülia álügüdahani burí le. Lidan arütíkulu le asigirubei wakutihaba seingü katei le lariñagubei Hesusu, lasubudiragüdübaña lan lani disipulugu. Warihubei giñe ida liña lan meha híchuguni kristiánugu ha awinwandubaña lidan furumiñeti sígulu hénpulu. Lárigiñemeti wóuchuba lun wasubudiruni kátaña lan hádangiñe sun ha ariñagubaña kristiánugu hamá, adügübalin ligiaméme uguñe weyu.