ÁLÜGÜDAHANI BURÍ TUAGU BÍBÜLIA

Gayarati san gunfurandawa tan Bíbülia?

Lererun Bungiu Bíbülia. Ítara tiña kei aban gárada to labürühan aban úguchili hínsiñehabuti (2 Timotéu 3:16). Tidan, afuranguagüda lumuti Bungiu woun ida luba lan wagundaaragüdüni, ka lan uagu lígira lun ñein lan asufuriruni luma kaba lan ladüga luagu hafulesein gürigia ámuñegü. Gama lumoun, kei le sánsigua hamaali lan lábutigu relihión arufudahani le tídanbei Bíbülia, gíbetiña gürigia saminatiña siñá habóun lan gunfuranda (Adügaü 20:29, 30).

Busenti Heowá Bungiu lun wasubudiruni inarüni luagu, ligía líchugunbei aban líburu woun to gayarati gunfuranda wamanu. (Aliiha huméi 1 Timotéu 2:3, 4.)

Kaba íderaguaün lun gunfuranda humanu Bíbülia?

Ru lumutu Heowá Bíbülia woun ani ruti giñe ídemuei lun gunfuranda wamanu. Óunaha lumuti Hesusu lun larufudahan woun (Lúkasi 4:16-21). Ani yúsuti meha Hesusu ámuñegueinarügü bérusu lun lafuranguagüdünu Lererun Bungiu. (Aliiha huméi Lúkasi 24:27, 32, 45.)

Adüga lumuti Hesusu damuriguaü kristiánu lun lasigirun wadagimanu le meha lagumeserubei (Matéu 28:19, 20). Uguñe weyu, sun ha afalarubalin Hesusu lau sun hanarün íderagua hamutiña gürigia lau sun hagundan lun gunfuranda hamani le tarufudahabei Bíbülia luagu Bungiu. Anhein busén hubéi gunfuranda humani giñe, ayanuha humá hama gefentiña luagu Heowá. (Aliiha huméi Adügaü 8:30, 31.)