Le ladügübei Bungiu lun lesefuruniña gürigia ubouagu

Füramaseti Bungiu lun Abüraámü le lubúein hádangiñeba lan liduheñu liabin ‘adügawaguni’. Ani habinirúba lan sun gürigia ubouagu lídangiñe adügawaguni ligía (Agumesehani 22:17, 18). Dan lárigiñe, aba láguyun Hakobu, le libari Abüraámü, lun Ehiptun. Ñein, aba hasigirun liduheñu aganwounda darí lun aban hamá néchani, binadu néchani Ísüraeli.

Lárigiñe, aba ladügün aban hádangiñe lurúeitegu Ehiptu lun heseriwidun ísüraelina músume. Lun lasagaruniña Bungiu ñéingiñe, aba ladügün lun lafanreinraguni profeta Moisesi barana Funati lau aban milaguru. Lárigiñe lira, aba líchugun Bungiu lúrudu houn lun ladundehaniña luma lun lóunigiruniña. Laganagua lúrudu burí ligía anihein meha Diisi Gumadi luma lúrudu le ídanbei lamuriahóua hama lun hadügün adagaragüdüni lun ferudunawa lan hafigoun. Lau lídehan Heowá, ariñagati meha Moisesi houn ísüraelina lóunahaba lan Bungiu ábanya profeta. ‘Adügawaguni’ le füramasewabei ligía meha profeta ligía.

Gádürü sígulu lárigiñe, füramaseti Bungiu lun urúei Dawidi le lan ‘adügawaguni’ le lunbei liabin, le uágubei layanuhóua lidan Edén, lanügüba lan aban arúeihani le lunbei ladurarun lun súnwandan. Ligíaba meha Mesíasi, Esefuragülei le líridubei Bungiu lun lesefuruniña gürigia ani adüga ligíame lun paraísu lan Ubóu.

Yusu lumuti meha Heowá Dawidi hama amu profetagu lun lasubudiragüdüni Mesíasi. Lubaragiñebei meha liabin, ariñagatiña ǘnabugubei lan ani areidabei lan. Ariñagatiña giñe lábugiñe lanme lugumadin Mesíasi úabei lan ilamaü, ni marichaü, ni wuribu, ani hawinwanduba lan sun gürigia lidan darangilaü hámagua luma hama animaalu. Lagumuchaguba sandi, asufuriruni luma óunweni, lugundun úagubeiñein katei burí le lidan lisuuni Bungiu. Ani sun ha hilaguaañabaña hawinwandayaba ubouagu.

Ariñagati Bungiu liyumulugugiñe profeta Mikeasi luagu Belenba lan buga nasirua lan Mesíasi, ani liyumulugugiñe Danieli ariñagati lafarúba lan Mesíasi. Gama lumoun, láguyuguagüdübei meha Bungiu ani íridaleime Urúeime sielu. Abürühati Danieli lagidarubei lan Larúeihan Mesíasi sun arúeihani le ubouagubei lun súnwandan. Susereti san le ariñawagúbei luagu Mesíasi?

(Sagawati lídangiñe Agumesehani 22 darí 50, Áfuriduni, 2 Lúrudu, 2 Samueli, Sálumu, Isaíasi, Danieli, Mikeasi luma Sakaríasi 9:9.)