Anihein san somu relihión le gadünati lafiñerúniwa luagu?

Anhein yeeda laadün lubéi somu relihión, másiñati mafiñehadün lan luagu ni aban. Gama lumoun, gayarati hachoururuni anihein lan aban relihión le uágubei gayara lan hafiñerun. Dan meha ya lubéi Hesusu ubouagu, adügati aban sétanu hau lani disipulugu ani aba larufudahan houn abagarida úaragua luma lilurudun Bungiu. Uguñe weyu, añaheingua lánigu Kristu disipulugu ha inarünitiña, gürigia ha áfaagubaña tídangiñe sun hanigi lun úaragua lan habagaridun luma lúrudu le lunbei hafalaruni kristiánugu. Kátaña san gürigia ha?

Ariñagatu Estela, to buga uáguboun wayanuha: “Dan le naturiahanbarun Bíbülia hama gefentiña luagu Heowá ligíaali nagumeserun gunfurandoun. Inarüni le lariñagubei Huan 8:32: ‘Ábame hasubudiruni inarüni, ábame lesefurunün inarüni’”.

Ariñagati giñe Ray: “Aba meha harufuduni gefentiña luagu Heowá nun tau Bíbülia mama lan ladüga Bungiu wasufurirunbei. Ani íbini gani lan buiti resun lun lígirun lun ñein lan wuribani, füramaseti lagidarubei lan yarafa madise”.

Hénrenguti ladügǘniwa le buídubei dan le hadügüñein lan hiibe-agei gürigia le wuribabei, gama lumoun gayarati ladügǘniwa. Gíbetiña gürigia busentiña hiderawagún gunfurandei le tarufudahabei Bíbülia luma lun hawinwanduni le tarufudahabei. Ligía sagü lubéi dimaasu, lidan sun ubóu, híchuguña gefentiña luagu Heowá külase tídangiñeti Bíbülia houn saragu míñunu gürigia hábiñe sin haguburahan. Hafurendeiruñein saragu gürigia kátima le tarufudahabei Bíbülia, hayarafaduña lun Bungiu ani gúndaatimati habagari.a

Dánmeya le hayanuhan hama, amuriaha humá hama lun hafuranguagüdüni hun ka lan uagu afiñe habéi luagu hani relihión. Akutiha huméi le harufudahabei luma ligaburi hóuserun ani ariha huméi hungua anhein anihein lubéi aban relihión le uágubei gayara lan hafiñerun.