‘Deregegua humá hungua lun afurieidúni’

1, 2. a) Ka uagu súdini lubéi ‘deregeguañu wamá woungua lun afurieidúni’? b) Ka burí álügüdahani lunbei wadügüni wóuniwagua luagu afurieidúni?

“DAN le layarafadun larugadun ligía oura le hénrengutimabei lun herederun gürigia agagudúañu”, ítara liña lariñaguni aban wügüri le meha nadagimeinbei áriebu. Chóuruti ligiaméme lan hasaminanbei saragu gürigia ha mósubei herederun marumugunga sun áriebu. Sun kristiánugu uguñe weyu lídanñadiwa aban sügǘ libe lira, lugundun limigifen áriebu lidan ubóu le lábugiñebei lubafu Satanási lídanñein oura le búritimabei, ani málühali agumucha (Rom. 13:12). Wéiribei peliguru ánhawa eredera arumuga lidan dan awanseeli le! Súdiniti lun ‘aranseñu wamá’ ani sigí wameime adundehani tídangiñeti Bíbülia lun ‘deregeguañu wamá woungua lun afurieidúni’ (1 Fe. 4:7).

² Kei le wawinwanduña lubéi lidan aban dan súdiniti, lunti wálügüdagun woungua: “Ténitina san buidu lun nafurieidun? Adügatina san sun luwuyeri afurieidúni? Furíeitina san súnwandan? Héchutina san afurieida hawagu amu, odi luágurügüñein le nemegeirubei luma le nabusenrubei nafurieida libe-agei dan?, ani, súdiniti san furíei lun nasalbarun?”.

“SUN LUWUYERI AFURIEIDÚNI”

3. Írida humá fiú luwuyeri furíei.

³ Tidan ligaradan apostolu Pábulu houn Éfesuna, yusu lumuti dimurei “sun luwuyeri afurieidúni” (Efes. 6:18, TNM). Ma sun dan wamuriahan luma Heowá lun líderaguniwa ibihei le wemegeirubei luma lun wiñuragun lídangiñe somu turóbuli? ‘Le aganbubalin furíei’ aganba lumuti sun le wamuriahabei luma lau ínsiñeni (Sal. 65:2). Gama lumoun, mosu giñe wetenirun lun amu luwuyeri furíei, kéiburi le lánina alawahani, eteingiruni luma ayumuraguni.

4. Ka uagu lunti lubéi walawahani Heowá lidan wafurieidun súnwandan?

⁴ Anihein saragu resun le uágubei lunti lan wayusurun dimurei lánina alawahani lidan wafurieidun lun Heowá. Kei hénpulu, sanditiwa busén wamá walawahani luagu “katei gabafuti le ladügübei” luma luagu “luéirigun le mébehabei” (aliiha huméi Sálumu 150:1-6). Sisi bérusu le lídanbei Sálumu kapítulu 150 ínchaha lumutiwa 13 wéiyaasu lun walawahani Heowá. Ani eremuhati ábanya abürühati sálumu lau saragu inebesei: “Eremuhatina bun súnwandan” (Sal. 119:164). Chóuruti luagu yuu lan lalawahóun Heowá. Ligía lunti lubéi walawahani lidan wafurieidun “súnwandan”.

5. Ida liña líderaguniwa wayusurun dimurei lánina eteingiruni dan le wafurieidun?

⁵ Eteingiruni ligía ábanya luwuyeri furíei súdiniti. Ariñagati apostolu Pábulu houn kristiánugu filipuna: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun” (Fili. 4:6). Íderagua lumutiwa wíchugun eteingiruni lun Heowá lidan furíei. Ida? Wawinwanduña lidan “lagumuhóun dan”, ani geyegu waña hau gürigia ‘meteingiraditiña’ (2 Tim. 3:1, 2). Ánhawa móunigiragun woungua, gayarabei labadülerun igaburi le wawagu. Wíchugun eteingiruni lun Bungiu lidan wafurieidun íderagua lumutiwa lun móuserun wamá kei gürigia ha “magufurumadaditiña” ani súnwandan hekeharun luagu ida liña lan lidin houn lidan habagari (Hud. 16). Gayarati híderagunun lichügüdina familia hani weiriou hama hasaanigu lun geteingiradi hamá lau hayusurun dimurei lánina eteingiruni dan le hafurieidun hama.

6, 7. Ka san ayumuragunibei, ani ka katei uágubei gayara lan wayumuragun lun Heowá?

⁶ Ayumuraguni ligía luwuyeri furíei le ídanbei hasagarei gürigia sun le hasandirubei. Ka burí sügǘ ídanbei gayara lan wayumuragun lun Heowá? Chóuruti adüga wamani dan le wasufurirun éibaahouni o somu sandi le wéiriti. Lidan burí kesi le, ayumuraguatiwa lun Heowá lidan furíei. Gama lumoun, luágurügüñein san katei burí le gayara lan wayumuragun lun Heowá?

⁷ Samina wamá luagun furíei le lígirubei Hesusu woun keisi hénpulu ani ariha waméi le lariñagubei luagu liri Bungiu, luagu Larúeihan luma luagu lugundan (aliiha huméi Matéu 6:9, 10). Buin liña ubóu le lau wuribani, ani siñaguatiña urúeigu houngua lun híchuguni hemegeirun gürigia houn. Furanguti mosu lan wayumuragun lun Wáguchi le siélubei lun ladügǘn liri sándume luma lun lagumuchun Larúeihan lau lubafu Satanási. Buiti giñe lun wayumuragun lun lun ladügǘn lugundan ya ubouagu keisi ladügǘniwa sielu. Ligíati, lunti agagudúañu wamá ani adüga wagíame sun luwuyeri afurieidúni.

AFURIEIDA HUMÁ SÚNWANDAN

8, 9. Ka uagu moun lumuti lubéi wayanuhan wuriba luagu Féduru ni hawagu ha híbiri apostolugu ladüga harumugun lidan fuluri-agei Hetüsemaní?

⁸ Íbini ariñaga lan apostolu Féduru houn kristiánugu lunti lan ‘hederegeragun houngua lun afurieidúni’, le linarün katei, íbini meha ligía charati lidan katei le íbini aban wéiyaasu. Ligía meha aban hádangiñe disipulugu ha arumugubaña dan le anihan lan Hesusu afurieida lidan fuluri-agei Hetüsemaní. Ariñagaali meha Hamaisturun houn: “Agagudúañu humá, afurieida huguyame”. Gama lumoun, madügün hamuti (aliiha huméi Matéu 26:40-45).

⁹ Lunti san wafuresehan ayanuha wuriba luagu Féduru luma hawagu ha híbiri apostolugu ladüga merederun hamá agagudúañu? Le linarün katei, mosu waritaguni weiri lan lubucha hawagu weyu ligía. Adüga hamaali meha aransehani lubá Luéyuri Esefuruni ani efeduha haméi. Lárigiñe, adüga lumuti Hesusu Ladinerun Aburemei keisi hénpulu lun larufuduni ida luba lan ladügǘn Aritaguagülei lánina lounwen (1 Ko. 11:23-25). Ani “lárigiñe heremuhani sálumu, aba houdin luagu wübü Oliwu”, mosu meha héibugun bandi lídangiñe libüraüraü lémeri Herusalén (Mat. 26:30, 36). Lumoun oura ligía, háfuga binarü lásügüra amidi áriebu. Lun hamuga ñéinñadiwa lan hama lidan fuluri-agei Hetüsemaní, háfuga warumuguña hamuga giñe. Lubaragiñe layanuhan Hesusu wuriba hawagu apostolugu buchaña uagu ha, ariñagati lau ínsiñeni: “Inarüni luagu anha tan huani lun katei le buídubei; ánheinti húgubu, débiliti”.

10, 11. a) Ka leksióun lafurendeirubei Féduru dan le larumugunbei lidan fuluri-agei Hetüsemaní? b) Ka hafurendeirubei lídangiñe le asuseredubei lun Féduru?

¹⁰ Furendeiti meha Féduru aban leksióun hénrenguti ani súdiniti lidan guñoun le larumugunbei lidan fuluri-agei Hetüsemaní. Lubaragiñeraü oura ligía, ariñagati Hesusu: “Hasandiraguba sun huguya hungua lau maguraasuni nuagu áriebu to”. Ábati lariñagun Féduru: “Gayaraati hígirunibu súngubei bábugua, anhein au mígirun nubadibu”. Dan le lariñagunbei Hesusu leyedaguba lan lau ǘrüwa wéiyaasu, aba lasigirun Féduru ariñaga: “Gayaraati nounwen buma, meyeedagunbadina bau” (Mat. 26:31-35). Ítara kei meha lariñaguni Hesusu, yéedaguati Féduru luagu subudi lan Hesusu lun. Dan le líchugunbei fe luagu le ladügübei, “aba layahun lau igarigu” (Luk. 22:60-62).

¹¹ Furendei lumuti Féduru leksióun, ani aba mafiñerun haali lan luougua, ani chóuruti íderagua lani furíei lidan katei le. Ani lúmagiñe liabin adundehani lun ‘wederegeragun woungua lun afurieidúni’. Falá wamuti san adundehani lúmagiñeti Bungiu le? Furíeitiwa san súnwandan arufudei ítara megei wamani lídehan Heowá? (Sal. 85:8.) Ítarameme, lunti waritaguni eweridihani le líchugubei apostolu Pábulu: “Le lubeiti haritaguabei luagu deregüdagua lan léibugun luma Bungiu, góunigila, ábürühadügüliñein” (1 Ko. 10:12).

ÓUNABA LUMUTI HEOWÁ LAFURIEIDUN NEEMÍASI

12. Ka uagu aban lubéi hénpulu buiti Neemíasi woun?

¹² Samina wamá luagun Neemíasi, aban wügüri úaraguati, le meha eseriwidubei íchahei likopun Árütaherühesi, le lurúeite Perüsia, lidan sígulu V lubaragiñe wadaani. Lubúein Bungiu le ligía aban buiti hénpulu lani aban gürigia le afurieidubei tídangiñe sun lanigi. Luagu saragu weyu ‘ayunarati, afurieida ligía lun Bungiu le siélubei’ luagu lirun gádantiña huríu ha Herusalénbaña (Neem. 1:4). Dan le lálügüdünbalin Árütaherühesi ka lan uagu lírunbei larihini, ani ka lan labusenrubei lúmagiñe, ‘aba lederegeragun Neemíasi lungua lun Bungiu le siélubei’ (Neem. 2:2-4). Ka resultóubei? Óunaba lumuti meha Heowá lafurieidun ani aba ladundehani sun katei lun habuidun lílana ageiraü (Neem. 2:5, 6). Chóuruti héregüda lani katei le lafiñen Neemíasi!

13, 14. Ka lunbei wadügüni lun here lan wakipuruni wafiñen lidan anihan lan Satanási áfaagua lun ledebilidagüdüni wafiñen?

¹³ Wafurieidun súnwandan, kei meha ladüga Neemíasi, íderagua lumutiwa lun here lan wafiñen. Magudemenehabuti Satanási, ani libe-agei dan agayuahati dan le débili wamá. Anhein wageindaguña lubéi luma aban sandi, o luma lanarime íruni, gayarati genege lan woun murusunrügüñein lan larihini Heowá dan le wásügürübei lidan wani ministeriu. O háfuga anihein binadu sügǘ le adügübei lun mederaguagüdün lan wasaminan. Busenti Satanasi lafiñeragüdüniwa mebegi wamá ni kata, ani yusu lumuti katei le wasaminarubei lun ledebilidagüdüni wafiñen. Gama lumoun ánhawa ‘ederegeragua woungua lun afurieidúni’, gayarabei wakipurun aban afiñeni le héreti. Ani mabulieida waméi anhein lan ‘wanüga wafiñen kei lanügüni súdara lidaüdina’, gayarabei ‘wararamunu sun gimara durunguatu to lachüühaboun Mafia’ (Efe. 6:16).

¹⁴ Ánhawa ‘ederegeragua woungua lun afurieidúni’, danme le liabin somu óuchawaguni lun wafiñen aranseñu waba. Ka gayarabei wadügüni lidan somu sügǘ le gayarati ladügün lun weferidiruni wamadagua luma Bungiu? Haritagua wamá luagun Neemíasi, ani afurieida wamá lun Bungiu óurameme ligía, láurügübei lídehan gayara lan wawandun sin wéiguadun lidoun óuchawaguni.

FURÍEI WAMÁ HAWAGU HA HÍBIRI

15. Ka burí álügüdahani lunbei wadügüni wóuniwagua luáguti wafurieidun hawagu amu?

¹⁵ Ayumuraguati meha Hesusu lun Bungiu lun medebilidun lan lafiñen Féduru (Luk. 22:32). Epafürasi, aban kristiánu úaraguati le awinwandubei lidan furumiñeti sígulu, áyeiha lumuti meha Hesusu ani furíeiti tídangiñe sun lanigi hawagu líbirigu kolosana, ha únbaña labürüha Pábulu: “Súnwandan lafurieidún [Epafürasi] huagu lun deregüdagu humá lidan hafiñen ani deregeguñu hungua buidu buidu lun hadügüni lugundan Bungiu” (Kol. 4:12). Buiti lun wálügüdagun woungua: “Ayumuraguatina san lun Bungiu hawagu níbirigu ha lídanbaña sun ubóu? Kada san átiri dan nafurieida hawagu ha asufurirubaña ladüga somu chagaguaü lánina liñawan dan? Ida buga san lagumuhóun wéiyaasun nafurieidun hawagu ha wéiribei hani buligasion tidan lóundarun Heowá? Furíeihadina san lidan sun weyu le hawagu íbirigu lidan damuriguaü ha gaturóbulinbaña?”.

16. Huuti funa san wafurieidun hawagu amu?

¹⁶ Dan le wafurieidun luagu hafulesein amu, gayarati líderaguniña saragu (aliiha huméi 2 Korintuna 1:11). Mama mosu lóunabun Heowá ladügarügü gibe hamá lubúeingu afurieida lun, gama lumoun, gabaroun lumuti hadiheri súngubei lidan lóurate lóunabuni hafurieidun. Ligía lunti lubéi seriu lan warihini chansi luma buligasion le wibihibei lun wafurieidun hawagu amu. Ítara kei Epafürasi, mosu warufuduni ínsiñehabuni le wasandirubei hawagu wíbirigu lau wafurieidun luagu hafulesein. Gúndaatimabadiwa giñe ítara, lugundun “fuleseiwatimati le íchugubei sügǘ lau le eresibirubei” (Adü. 20:35).

YARAFAALI LUÉYURI WASALBARUN

17, 18. Ida liña líderaguniwa ‘wederegeragun woungua lun afurieidúni’?

¹⁷ Lubaragiñe meha lariñagun Pábulu: “Áriebuhaali, yarafaali lun larugadun”, abürühati: “Dánhali lun wagagudún lídangiñe idabagu, lugundun yarafatimaahali oura lun lagiribudun Wasalbaragüle ubouagun sügǘ lau dan meha le wafiñerunbei luagu uganu luáguti asalbaruni” (Rom. 13:11, 12). Yarafaali iseri ubóu le füramase lubéi Bungiu, ani háfuga yarafatimaahali wasalbarun sügǘ lau le wasaminarubei. Marumuga wamá lidan weseriwidun lun Bungiu, ani mígira wamá lun ladügün amu katei le lídanbei ubóu le lun madaani wamá lun werederun wábuguarügü afurieida lun Heowá. Lubaragiñe lira, ‘deregegua wamá woungua lun afurieidúni’, lugundun líderagubadiwa lira lun ‘haruma lan wabagaridun, deregeguañu woungua lun Bungiu sunsuinagubei’ lidan awanha lan agurabahei luéyuri Heowá (2 Fe. 3:11, 12). Ítarati, larufudubei ligaburi wabagaridun luagu agagudúañu waña lan luma luagu afiñe wamá yarafaali lan lagumuchun ubóu wuribati le. Ligíati, “afurieida [wamá] lun Bungiu sun dan” (1 Tesa. 5:17). Ítara kei Hesusu, áluaha wamá chansi lun wafurieidun lun Heowá wábuguarügü. Ayanuha wamá luma sin wafuresehan. Kei resultóu, ábame yarafatima wamá lun (Sant. 4:7, 8). Anihein san aban abinirúni buítimati luéi le?

¹⁸ Ariñagatu Bíbülia: “Dan meha le laganóunbei Kristu ya ubouagu, afurieidati, ayumuragua ligía meha lau umalali héreti luma saragu águiraü lun Bungiu le gabafubei lun lesefuruni lídangiñe óunweni le lunbei lasufuriruni. Aba laganbuni Bungiu ladüga deregeguañu liña lan lungua lun lugundan Bungiu” (Ebü. 5:7). Afurieidati meha Hesusu lun Lúguchi ani kíputi giñe úaraguni lun darí lagumuchun libagari ya ubouagu. Ligía lesefurunbalin Heowá lídangiñe óunweni ru ligía ibagari magumuchaditi lun sielu. Ánhawa ‘ederegeragua woungua lun afurieidúni’ sun dan, gayarabei giñe úaragua wamá lun Wáguchi le siélubei ligibugiñe furumiñeguarügü óuchawaguni, ani resibi wameime ibagari magumuchaditi.