Fiú katei gúnfuliti luma bandi magunfulirunti

Hínsiñeti hamuga san hun hasubudiruni le lunbei lasuseredun ámuñegü? Saragu gürigia hínsiñeti hamuga houn. Ligía añahein lubéi saragu hóuchatiña lun hasubudiruni, ani ámuñegueinarügüti resultóu hibihin. Kei hénpulu:

• ATURIAHATIÑA SIENSIA chagatiña saragu seinsu ani yusu hagía tanarime burí máhina lun hasubudiruni le lunbei lasuseredun, kéiburi ka lan lánibei iwiyei efekütu luagu Ubóu, ida luba lan ligaburi dan haruga, o amu katei.

• AKUTIHATIÑA SÜGǗ áluahatiña hasubudiruni le lunbei lasuseredun lidan luáguti polítika luma luáguti lawanserun somu ageiraü. Warren Buffett, aban hádangiñe gürigia ha rísitimabaña ubouagu, subudiwati kei aban “profeta” ladüga ariñaga lani kaba burí lan bísinisi ibiha resultóu buiti. Amu akutihati, Nate Silver, álügüdati saragu gürigia lun hariñaguni lun ka lan hasaminanbei lun gayara lan lariñaguni kaba lan asusereda lidan ámuñegueinarügü tema, lúmagiñe luáguti polítika darí lumoun kaba lan pelíkula agañeirei furumiñeti lúgaaru.

• FIÚ DUGUMEDU TO LǗHARU afuranguagüdawatu kamá hamuga profesía. Kei hénpulu, gíbetiña gürigia saminatiña lagunfuliruña lan profesía burí le meha labürühabei Michel de Notredame (Nostradamus), lidan sígulu XVI. Anuhein aban binadu kalendariu hani maya to agumuchuboun 21 lidan duusu-hati irumu 2012 adügatu lun hasaminarun saragu luagu lasusereduba lan aban chagaguaü weyu ligía.

• SARAGU LÁBUTIGU RELIHIÓN ayanuhaaña luagu lasusereduba lan chagaguaü wéinamuti lidan sun ubóu lun heweridihaniña gürigia luma lun hachawahaniña hawouguoun. Aban profeta hínsiñeti lun lawisahan luagu chagaguaü gíriti Harold Camping hama lánigu, awisahatiña meha lidan sun fulasu luagu lagumuchaguba lan Ubóu lidan irumu 2011. Ani charatiña.

• HA ARIÑAGUBAÑA GALIIHADI HAMÁ LUN HASAMINAN GÜRIGIA ariñagatiña gayara lan hasubudiruni le lunbei lasuseredun ámuñegü. Edgar Cayce luma Jeane Dixon íridatiña lasusereduba lan fiú katei lidan sígulu wein, ani susereti, gama lumoun gíbeti lídangiñe katei ligía masuseredunti. Kéiburi Dixon ariñagati lagumeseruba lan Lǘrüwan Wuribu Wéiriti lidan irumu 1958, ani ariñagati giñe Cayce luagu labuluchuba lan uburugu Nueva York labadinagua irumu 70 luma 80.

Anihein san somu igaburi lun wasubudiruni lau ichouruni kaba lan asusereda ámuñegü? Chóuruti aban lan álügüdahani buiti le. Lun hamuga gayarati wasubudiruni kaba lan asusereda, ámuti hamuga katei lidan wabagari, adián?