Wínwantu Lererun Bungiu yusu wamóun!

1, 2. Ka wadagimanu líchugubei Heowá lun Moisesi, ani ka füramase lubéi lun?

IDA liña hamuga san hasandiragun hungua lun hamuga mosu lan hidin ligibugiñe gumadimati le gabafutimabei ya ubouagu ayanuha luagu hafulesein lumutuniña Heowá? Háfuga hanufudebadün hadügüni. Háfuga hadadagaruña hamuga ani ibidiñebei hun kaba lan hariñaga. Ida luba hamuga san haranserun lubá híchuguni ñunsu ligía? Kaba hamuga san hadüga lun dǘgüda lan dimurei le lunbei hariñaguni keisi lóunagüle Suntigabafu?

² Ítara liña meha lasandiragun Moisesi lungua. Ariñagaali meha Heowá lun, “wügüri le manaaguntimabei lungua ubouagu”, luagu lóunahabei lan ayanuha luma faraón lun lesefuruniña lumutuniña lídangiñe amudirawaguni luma asufuriruni le gádanbaliña Ehiptu (1 Lur. 12:3). Aban meha wügüri furundeti faraón ani barüguati lungua. Íbini ítara, busenti meha Heowá lun lidin Moisesi íchiga aban gumadi lun: lun lígirun lun háfuridun saragu míñunu músugu Ehiptugiñe! (Afu. 5:1, 2.) Ligía lálügüdünbalin Moisesi Heowá: “Káteiñadinagia lun nídiba lan lumoun urúei, lun nasagaruniña Ísüraelina Ehiptugiñe?”. Háfuga sandí lan meha Moisesi siñabei lan lagunfuliruni wadagimanu le. Gama lumoun aba füramase lan Bungiu lun mama lan lábuguarügüñein. Aba lariñagun lun: “Ñéinbadina buma” (Afu. 3:9-12).

3, 4. a) Ka meha uéi lanufudeda Moisesi? b) Ida liña gayara lan wasandiragun woungua kei Moisesi?

³ Ka meha san uagu lanufudeda Moisesi? Hanufudeti meha luéi meresibirun lani o maganbun lani faraón le lunbei lariñaguni lóunagüle Heowá. Ani hanufudeti meha giñe luéi mafiñen hamá líbirigu ísüraelina luagu Heowá lan anúadirubalin lun lasagaruniña Ehiptugiñe. Ligía aba lubéi lariñagun lun Heowá: “Mafiñenbaña nun, meberesen hagíame nau. Lubaragiñe lira, ariñagarügübaña nun: ‘Marufudagungili Bungiu lungua bun’” (Afu. 3:15-18; 4:1).

⁴ Háfuga machülübei dan lun mosu lan harufudagun hungua ligibugiñe aban urúei gabafuti. Gama lumoun, chülüti san oura hénrengu lan hun hayanuhan houn somu gürigia luagu Bungiu luma luagu Larúeihan? Óunabagülei le líchugubei Heowá lun Moisesi luma le asuseredubei lárigiñe arufudahati aban leksióun súdiniti woun.

“KA BÚHABURUGUBEI?”

5. Ka líchugubei Heowá lúhaburugun Moisesi? (Ariha huméi dibuhu le lídanbei lagumeseha arütíkulu.) b) Ida liña léredagüdüni le lafiñen Moisesi?

⁵ Dan le lariñagunbalin Moisesi hanufude lan luéi ua hamá aganbuti lererun, aranse lumuti Bungiu lubá le lunbei lasuseredun. Aliihatiwa lidan Áfuriduni: “Ka búhaburugubei? Liña lálügüdüni Bungiu. ‘Aban badun’, liña lóunabun Moisesi. ‘Fuibei múarugun’, liña Bungiu lun. Aba lígiragüdüni Moisesi múarugun, lidan oura ligía, aba lasaliragun badun ligía héweme. Aba léibaagun Moisesi tuéi, gama lumoun lariñaga Bungiu lun: ‘Ragüboun luéigiñe tili’. Dan le lárügüdünu Moisesi, ábaya tasaliragun bádunme. Lariñaga Bungiu lun: ‘Anihán le lun hafiñerun bun luagu arufudaguaali lan Bungiu [...] lungua bun’” (Afu. 4:2-5). Lau lubafu Bungiu, saliguati aban wewe ábanme hewe to gabagaritu! Lau milaguru ligía, gayarati meha larufuduni Moisesi luagu Heowá lan óunahabalin ani anihein lan Heowá luma. Aba lariñagun Heowá lun: “Barübei badun le búmagua, ladüga badügüba burí katei wéirigubuti lau” (Afu. 4:17). Lau badun ligía lúhaburugu, gayarati meha lagumeserun Moisesi adügei le lariñagubei Bungiu le inarüniti lun hagibugiñe lumutuniña luma ligibugiñe faraón (Afu. 4:29-31; 7:8-13).

6. a) Ka lunbei gama wamanu wáhaburugu dan le wapurichihan, ani ka uagu b) Ka san uagu lariñaga Pábulu “wínwantu [lan] Lererun Bungiu”?

⁶ Dan le wanügüni uganu le tídanbei Bíbülia houn gürigia, gayarati giñe ladügǘn ligiaméme álügüdahani woun: “Ka búhaburugubei?”. Libe-agei dan wámaboun Bíbülia wáhaburugu ani aranseñu waba lun wayusurunu. Íbini añahein lan arihitu Bíbülia kéirügü aban líburu furumiñeguarügü, Lererun Heowá Bíbülia, ani tuguya layusuruboun lun layanuhan woun (2 Fe. 1:21). Tidan ladarirúa le füramase lubéi Bungiu luagu le lunbei ladügüni Larúeihan. Ligía labürühanbei apostolu Pábulu: “Wínwantu Lererun Bungiu ani gabafu tuguya” (aliiha huméi Ebüréu 4:12). Ka san uagu lariñaga “wínwantu [lan] Lererun Bungiu”? Ladüga sun lani Bungiu füramasei gúnfuli lumuti (Isa. 46:10; 55:11). Dan le gunfuranda lani aban gürigia murusun fánreinti le, gániti le laliihabei tidan Bíbülia aban óunwenbu efekütu lidan libagari.

7. Ida luba gayara lan wayusurunu “Lererun Bungiu to lánina inarüni kei lubudubu”?

⁷ Ru laaru Heowá Bíbülia, Lererun to wínwanboun, wáhaburugun. Tau Bíbülia gayarati warufuduni luagu lúmagiñeti lan Bungiu uganu le wanügübei ani inarüniti lan. Maweiriduntu wanigi luagu lárigiñe lan labürühanu Pábulu ligaradan houn Ebüréu, aba líchuguni adundehani le lun Timotéu: “Yusubóun Lererun Bungiu to lánina inarüni kei lubudubu” (2 Tim. 2:15, TNM). Ida luba san wasigiruni adundehani le? Lau wanúadahani bérusu le lunbei waliihani houn gürigia ha aganbutiwa buidu, lun gayarabei lan wachülürün tidoun hanigi. Tratadu burí to áfuriduboun lidan irumu 2013 adügǘwatu lun tagunfulirun lau wadagimanu le.

ALIIHA HUMÁ ABAN BÉRUSU LE ANÚADIRA HUMAALI BUIDU

8. Ka lariñagubei aban íbiri le arihibei lau apurichihani tuagu iseri burí tratadu?

⁸ Aban ligaburi tesetirun sun iseri tratadu, ligíati, ánhawa afurendeira ayusura aban tídangiñe, gayarabei wayusurunu súngubei. Abürühati aban íbiri le arihibei lau apurichihani lidan aban damuriguaü Hawái (Meriga): “Ibidiñeti yebe woun wéiribei lan tahuudun iseri burí tratadu to woun dandu lidan apurichihani muna tuagu muna kei ǘmadarugu”. Ka san uagu hu tubéi saragu ani ménrengun ligía tayusurún? Ariha laali luagu adüga lan ligaburi tesetirun lun ménrengun lan hariñaguni gürigia ka lan hasaminanbei, ani súnwandan ladügün katei le lun hagumeserun aban yanu buiti. Genegeti lun ladüga lan saragu álügüdahani le lídanbei furumiñeti ubanaü, lugundun ítara madiheriduntiña gürigia luagu óunabagülei le híchugubei.

9, 10. a) Ida liña tíderaguniwa tratadu lun wayusurunu Bíbülia? b) Ka burí tuwuyeri tratadu íchuguboun resultóu buiti hun, ani ka uagu?

⁹ Kada tratadu amisuraha tumutiwa lun waliihan aban bérusu tídangiñeti Bíbülia le anuadahóuati buidu. Kei hénpulu, ayanuha wamá tuagu tratadu Lachülürüba san dan lun masufurirun wamá? Meberesenga ánhaña ariñaga gürigia “anha”, “uá” o “háfuga”, ábame hidin lidoun ubanaü le asigirubei, ani sin hariñagun amu katei, aba hariñagun: “Anihán le tariñagubei Bíbülia”. Ábameti haliihani Arufudúni 21:3, 4.

¹⁰ Ítarameme, danme le hayusurunu tratadu Ida liña san harihinu Bíbülia?, gayarabei hanúadirun gürigia furumiñeguarügü lídangiñe óunabagülei le lídanbei furumiñeti páhina. Ariñagarügü humá: “Ariha huméi le tariñagubei Bíbülia”. Dará humóun tratadu ani aliiha huméi bérusu le ñeinbei: “Sun le bürüwañubei tidan Bíbülia luganute Bungiu”. Ábameti hariñagun: “Le linarün katei, ariñagati bérusu le saragu amu katei”. Lárigiñe ábame hadaarunu Bíbülia, ábame haliihani 2 Timotéu 3:16, 17.

11, 12. a) Ida luba hasandiragun hungua anhoun hayusura iseri burí tratadu buidu? b) Ida luba tíderagunün iseri tratadu lun haranserun lubá hagiribudun abisidahaña gürigia?

¹¹ Según ida liña lan hóunabun gürigia, háfuga gayarabei haliihan ani akutiha huguya lanwoun ariñahani le tídanbei tratadu. Meberesenga ida liña lan hóunabun gürigia, ígira humaaru tratadu houn, ani gúndaabadün luagu aliiha humá somu katei houn tídangiñe Lererun Bungiu, íbini ábanrügü o biama bérusu lidan furumiñeti bisida. Lidan amu dan gayarabei hagiribudun lun hasigirun ayanuha.

¹² Lidan lagumuhóun páhina tidan tratadu anihein aban fánreinti le gíribei: “Álügüdagua humá hungua”. Ani ǘnabu luéi anihein aban álügüdahani luma bérusu tídangiñeti Bíbülia le gayarabei hakutihani danme le hagiribudun abisidahei gürigia ligía. Tidan tratadu Ka hisaminanbei luagun dan le lunbei liabin?, darí wamuti álügüdahani le: “Ida luba labuiduragüdüni Bungiu ubóu le?”, anihán burí bérusu le ñeinbei Matéu 6:9, 10 luma Danieli 2:44. Tidan tratadu Gayarati funa san habagaridunya gürigia ha hilaguaañabaña?, darí wamuti álügüdahani le: “Ka uagu waweiyada ani hilagua wagía?”, anihán bérusu le ñeinbei Agumesehani 3:17-19 luma Rómana 5:12.

13. Ida luba wayusurunu tratadu lun wagumeserun aturiahani tídangiñeti Bíbülia?

¹³ Yusu humóun iseri burí tratadu lun hagumeserun aturiahani tídangiñeti Bíbülia. Tanagangiñe garüdia anihein aban kódigu QR (lun ladarirún óunabagülei furese). Dan le éskanearü humani kódigu, kéiburi lau aban gágamuru, ábame lanügün lidoun wani páhina lidan Internet lau aban bidéu le amisurahabaliña gürigia lun haturiahanu Bíbülia. Awisahatu giñe tratadu burí to tuagu garüdia Uganu buiti lúmagiñeti Bungiu ani amisuraha tumutiña gürigia lun haliihan somu leksióun tídangiñe. Kei hénpulu, tratadu Káteitima san gamaniharibei lau ubóu? amisuraha tumutiña gürigia lun haliihani leksióun 5, ani tratadu Ka hemegeirubei familia lun gunda lan habagari? óunaha tumutiwa lidoun leksióun 9. Anhoun wayusura tratadu burí to kei lariñawagún woun lun wadügüni, gayarabei wayusurunu Bíbülia danme le wayanuhan hama gürigia luagu furumiñeti wéiyaasu luma danme le wagiribudun abisidahaña. Ani ladügüba le lun gayara lan wagumeserun aturiahani tídangiñeti Bíbülia. Ka amu katei gayarabei hadügüni lun hayusurunu Lererun Bungiu buidu lidan apurichihani?

AYANUHA HUMÁ LUAGU KATEI LE SÚDINITI HOUN GÜRIGIA

14, 15. Ida luba wáyeihani ligaburi Pábulu lidan wani ministeriu?

¹⁴ Dan le meha lapurichihanbei Pábulu, áfaaguati lun gunfuranda lani le gádanbaliña gürigia lun lagañeirun “saragu gürigia” (aliiha huméi 1 Korintuna 9:19-23). Ka uagu ladügei katei le? Ligía guánarügü abürühabei: “Lun nagañeirun [...] huríu [...], lun nagañeiruniña ha lábugiñebaña lilurudun Moisesi, [...] ha mámabaña lábugiñe lilurudun Moisesi, [...] ha lóuguabaña afiñe”. Busenti meha lachülürün hamoun sun “hawuyeri gürigia” lun gayara lan lesefurun fiú hádangiñe (Adü. 20:21). Ida luba wáyeihani ligaburi Pábulu dan le waranserun lun wanügüni inarüni houn “sun gürigia”? (1 Tim. 2:3, 4.)

¹⁵ Tidan Wani Ministeriu sagü hati láfuachun adundehani luagu ida luba lan wapurichihan. Yusu huméi. Ánheinti amu lubéi katei súdinibei houn gürigia ha únbaña wapurichiha? Samina humá ka lan gayarabei hariñaguni houn lun busén hamá haganbunün. Kei hénpulu, álügüdagua humá hungua: “Ka san gádanbaliña gürigia ha lúnbaña nayanuhan hama? Kátima san adiheridagüdübaliña?”. Ábameti hasaminarun luagu bérusu le gayarabei líderaguniña. Ayanuhati aban óunigiruti sirkuitu luagu le ladügübei tuma lani weiriou lun gayara lan hayusurunu Bíbülia: “Hibe-agei gürigia ígira hamutiwa lun waliihan aban bérusu houn anhein wadüga lau lóufudagun. Lárigiñe wabusurun, dará wamaaru Bíbülia lau bérusu le lunbei waliihani, ábati waliihani”. Wariha fiú tema, álügüdahani luma bérusu burí tídangiñeti Bíbülia le rúhalibei buiti resultóu. Ka uagu mouchun hubéi hadügüni?

16. Ida luba gayara lan hayusuruni Isaíasi 14:7 lidan apurichihani?

¹⁶ Anhein gibe lubéi anarimeni luma wuribani lidan fulasu le ñein lubéi hawinwanda, gayarati hálügüdahan: “Samina humá san lun hamuga lachülürün aban weyu lun láfuridun ñunsu tidan sun periodiku luagu anihein lan darangilaü lidan sun Ubóu, úaali lan chagaguaü, ani anihein lan ugundani lidan sun fulasu. Ida liña hamuga san hasandiragun hungua? Ligía tariñagubei Bíbülia lidan Isaíasi 14:7. Le linarün katei, gíbeti füramasei ladügün Bungiu tidan Bíbülia luagu málühali lan ñein darangilaü”. Ábameti haliihan aban lídangiñe füramasei ligía houn.

17. Ida liña gayara lan hayusuruni Matéu 5:3 lidan aban yanu?

¹⁷ Hénrenguti san ibagari lidan fulasu le ñein lubéi heredera? Anhein ítara liña lubéi, gayarabei hagumeserun aban yanu ítara: “Átiriñein funa san seinsu lunti lagañeiruni gürigia lun buidu lan habagaridun liduheñu?”. Lárigiñe lóunabun gürigia, ábame hariñagun: “Añahein gürigia gáñeitiña lóugiñe le, ani magundantiña haduheñu. Ligíati, kátima san hemegeirubei?”. Ábameti haliihani Matéu 5:3 lun ani ábame hálügüdüni anhein busén lubéi laturiahanu Bíbülia.

18. Ida luba hayusuruni Arufudúni 21:4 lun híchugun dǘgüdaguaü houn gürigia?

¹⁸ Hasufuriruña san gürigia ha lídanbaña fulasu le ñein lubéi hawinwanda ladüga somu lamiselu le málügili lasuseredun? Gayarati hariñagun: “Nagúahaña luagu hubenari lun níchugun murusun dǘgüdaguaü hun”. Lárigiñe, aliiha huméi Arufudúni 21:4. Ábame hariñagun: “Ariha humuti san katei burí le lunbei lagidaruni Bungiu? ‘Águiraü’ ‘óunweni,’ ‘ayahuni’, ‘íruni’, luma ‘igarigu’. Ma lubuidun wasubudiruni luagu busén lan Bungiu lun gunda wamá! Gama lumoun, gayarati san lasuseredun le?”. Guentó dará humóun garüdia Uganu buiti lidan somu leksióun le úarati luma le hayanuhanbei.

19. Ida luba hayusuruni Arufudúni 14:6, 7 lun hadimurehan hama gürigia ha gánibaña relihión?

¹⁹ Gánitiña san gürigia ha ñein lubéi hawinwanda relihión? Anhein ítara liña lubéi gayarati hagumeserun ariñaga: “Lun hamuga liabin aban ánheli ayanuha hun, haganbuñein hamuga san?”. Ábameti haliihani Arufudúni 14:6, 7. Lárigiñe gayaraahalime hariñagun: “Ariñagati ánheli le ‘inebelá Bungiu hun’ ani ariñagati giñe ‘hudugua humá lun le adügübalin sielu luma ubóu’. Subuditi san hun ka lan liri le adügübalin sielu luma Ubóu?”. Aliiha huméi Sálumu 124:8, le ariñagubei: “Lúmagiñe [Heowá, TNM] liabin wíderawagun Bungiu le adügübalin sielu luma ubóu”. Ani ariñaga humá gayara lan hafuranguagüdün saragu katei houn luagu Heowá.

20. a) Ida luba hayusuruni Ariñawagúni 30:4 lun harufuduni lun somu gürigia ka lan liri Bungiu? b) Anihein san somu bérusu le rúhalibei buiti resultóu hun lidan apurichihani?

²⁰ Gayarabei hagumeserun aban yanu luma aban nibureinti lau hariñagun: “Hínsiñeti hamuga nun naliihan fiú dimurei tídangiñeti Bíbülia bun le ayanuhabei luagu aban katei súdiniti”. Ábameti haliihani Ariñawagúni 30:4. Lárigiñe gayarabei hariñagun: “Ka san uagu layanuhóua ya? Chóuruti mama lan luagu ni aban gürigia layanuha bérusu le, adián? Ligía furangu lubéi layanuhaña lan luagu Bungiu le adügübalin sun katei.a Ida luba san wasubudiruni ka lan liri? Hínsiñeti hamuga nun narufuduni bun tidan Bíbülia”.

YUSU HUMÉI TUBAFU LERERUN BUNGIU

21, 22. a) Ida liña gayara lan lasansiruni aban bérusu tídangiñeti Bíbülia le anuadirúati buidu habagari gürigia? b) Ka hisaminanbei hadügün lidan hani ministeriu?

²¹ Ibidiñewati kaba lan asusereda dan le wanúadirun aban bérusu tídangiñeti Bíbülia buidu lun waliihani houn gürigia. Kei hénpulu, chülütiña bián Gefentiña australiana adaünha luagu tubenari tuban aban würi nibureintu. Aba lálügüdünu aban hádangiñe: “Subudi humuti san ka lan liri Bungiu?”. Aba haliihani Sálumu 83:18. Aba tabahüdaguni nibureintu tuguya ka lan lánibei dimurei le haliihabei efekütu tuagu: “Aba libidiñedun nun kaba lan nariñaga! Dan le hóudinbei, aba nabugahan 35 maili [56 kilómeturu] lun nidin áluaha aban muna to ñein lubéi talugurahóua líburu lun nachoururuni anhein ariñaga tubalin amu Bíbülia ligiaméme. Áluaha numuti giñe iri ligía tidan aban dimurei-agei. Dan le chouru naali luagu Heowá lan líribei Bungiu, aba nálügüdagun nungua: “Ka funa san amu katei ibidiñebei nun?”. Murusun dan lárigiñe, aba taturiahanu Bíbülia tuguya luma tadari, fiú dan lárigiñe aba habadiseirun.

²² Inarüni sansi tani Lererun Bungiu habagari ha aliihabarun ani furendei hagía afiñera luagu lani Heowá füramasei (aliiha huméi 1 Tesalónikana 2:13). Gabafutimati uganu le tídanbei Bíbülia sügǘ lau furumiñeguarügü katei le gayarabei wariñaguni lun wachülürün tidoun hanigi gürigia. Ítara liña, wínwantu Lererun Bungiu ani wéiriti tubafu. Yusu wamóun súnwandan!