Subuditi san hun?

Yúsuati meha sanadundehani le lídanbei Lilurudun Moisesi lun laransehóun turóbuli lánina ibagari lidan binadu Ísüraeli?

ARUFUDA lumuti hénpulu le anihein lan dan yusua lan meha. Ariñagati 2 Lúrudu 24:14, 15: “Mamudiragua huméi le wéiribei ugudemen, madarasarun ligíame hafayeiruni, gayaraati aban lan hupaisanun o aban lan terencha le aganóuti lidan aban lídangiñe huburugute” ladüga “layumuraguba huagu lun Bungiu, ani gafigoubadün”.

Yarafa lun uburugu Asüdódu dariwati aban murusun cerámica le lánina sígulu sedü lubaragiñe lidaani Hesusu. Tidan dugumedu tuguya ayanuhóuati luagu aban kesi libe le iridúbei lidan 2 Lúrudu 24. Genegeti bürüwa tan dugumedu tuguya lun aban ábunaguti nadü le nege mederegerunbalin lalubahan le lunbei yebe lederegeruni. Ariñagati: “Lárigiñebei labudahani bubuein [le ageindagubalin kesi] sun le alubahóubei fiú weyu lubaragiñe le, aba liabin Hoshayahu le liráü Shobay ani aba lanügünu ladaüragun bubuein. [...] Sun nánigu paaná ha nadagimeinbaña numa alubaha lábugiñe lara weyu hariñagubei [...] inarüni lan le nariñagubei. Maduruntina. [...] Anhein samina lubéi gumadimati mama lan lani buligasion ladügün lun tagiribudagüdǘniwa ladaüragun bubuein lun, adüga huméi ladüga nugudemen hun. Moun lumuti berederun maniñu dan le rédeihali bubuein madaüragunga”.

Ariñagati aban abahüdaguti gíriti Simon Schama “mámarügü lan luagu lidiheri aban nadagimeinti lunya libihinu ladaüragun layanuha katei le woun”. Ani ábaya lariñagun: “Arufudati giñe le subudi lumuti lan meha le ageindagubalin kesi, lúrudu le tídanbei Bíbülia tidan haliburun Fádirigu luma 2 Lúrudu le asíadirubalin houserún gudemetiña wuriba”.