Álügüdahani burí le hadügübei aliihatiña

Ka uagu hefeindihei gefentiña luagu Heowá apostolu Pábulu lau murusun ídiburi o heluñu lábulugu?

Le linarün katei, uguñe weyu íbidiñewati ídatima liña lan meha laríawagun apostolu Pábulu. Arufudati dibuhu luagu apostolu Pábulu le áfuachubei tidan wani agumeiraguagüdüni ábanrügü saminaü luagu ida liña lan meha laríawagun, mama lídangiñe ariñahani le chóuruti le adarirúbei luagu katei binaduti lasagarúa.

Gama lumoun, anihein burí katei le gayaraabei larufuduni ida liña lan meha laríawagun apostolu Pábulu. Kéiburi, le tariñagubei garüdia La Atalaya to lánina 1 lidan ǘrüwa-hati, irumu 1902 tuagu dugumedu to gíriboun Hechos de Pablo y Tecla, to abürüdǘboun lidan irumu 150 lárigiñe Kristu. Daritiwa ariñahani tidan luagu ida liña lan laríawagun apostolu Pábulu ani másiñati ligíatima lan ariñahani le buídubei lídangiñe súngubei, létima uágubei harabacha saragu gürigia. Ariñagatu dugumedu to: “Aban meha wügüri mágubuti saragu, heluti lábulugu, baünguati lugudi, héreti, dúnguati líseguse ani migiferaüti lígiri”.

Ariñagatu aban dimurei-agei luagu gayara lan inarüni lan ariñahani le tídanbei dugumedu Hechos de Pablo y Tecla (The Oxford Dictionary of the Christian Church [to lánina irumu 1997]). Lidan meha furumiñeti burí sígulu lánina wadaani, inebeti meha le tariñagubei dugumedu to houn gürigia, lugundun sügügüdawatu dugumedu to lidoun güriegu luma lidoun burí 80 iñeñei. Ligíati, úarati efeindihani luma burí dibuhu le wadügübei luma fiu binadu ariñahani le ayanuhabei luagu ligaburi meha laríawagun apostolu Pábulu.

Lau sun lira, lunti waritaguni anihein lan katei súdinitimati sügǘ lau lasubudiruniwa ida liña lan meha ligaburi laríawagun Pábulu. Dan meha le lapurichihanbei añahein adimurehatiña wuriba luagu ani ariñagatiña débili lan ani mínsiñegu lan ligaburi ladimurehan (2 Kor. 10:10). Gama lumoun, mabulieida waméi ida liña lan ladügagun Pábulu lungua kristiánume, ladüga ladimurehan Hesusu luma siélugiñe. Gayaraati giñe wasaminarun luagu le libihubei kei wügüri anuadirúaali lun ladimurehan luagu Hesusu houn ha “mámabaña huríu” (Adü. 9:3-5, 15; 22:6-8). Ani lunti giñe wasaminarun luagu ligaburi tíderaguniwa líburu to tídanboun Bíbülia to labürüdüboun lau lídehan Bungiu.

Mabürühangubeiti Pábulu luagu ligaburi laríawagun mapantahan ligía luagu le meha ladügübei lubaragiñe ladügagun lungua kristiánume (Adü. 26:4, 5; Fili. 3:4-6). Ariñagarügüti: “Au [...] ni kátatimabei hadan apostolugu, madünatina ni lun nanügǘn keisi apostolu” (1 Kor. 15:9). Ani dan lárigiñe, ariñagati: “Ǘnabutimatina sügǘ lau le ǘnabutimabei hadan lánigu Bungiu; lau sun lira, ru laali ubafu le nun lun napurichihan houn ha mámabaña huríu luagu lueirin lirisin Kristu le mébehabei” (Efe. 3:8). Chóuruti, hu lan uganu le lapurichihabei Pábulu sügǘ luéi wasubudiruni ida liña lan meha ligaburi laríawagun.