Gayaraati gunda lan hibagari íbini guentó!
SAMINA humá luagu aban ibagari ámuñegü úouga sandi, aweiyaduni ni óunweni. Gayaraabei hibihini lubuidun ibagari le. Íbini ítara, awanhagua agagibudagua luma saragu turobuli uguñe weyu. Ka gayaraabei hadügüni lun gunda lan hibagari íbini guentó? Anihein adundehani tidan Lererun Bungiu le gayaraati ladügün lun gunda humá luma lun gasuuni lan hibagari. Akutiha wamá fiu lénrengunga ani ariha wamá ida liña lan líderaguniwa adundehani le tídanbei Lererun Bungiu.
GUNDA WAMÁ LAU WÁMATI
Adundehani le tídanbei Lererun Bungiu: “Míchiga huméi hínsiñehabu luagun seinsu; gunda humá lau le húmati” (Ebüréu 13:5).
Uguñe weyu, anihein saragu katei le uágubei hariñaga gürigia lunti lan gama wamani. Ánhounti Lererun Bungiu, ariñagatu gayara lan gunda wamá lau wámati. Ida?
Lau wadisedun luéi línsiñegu seinsu. Adügati “línsiñegu seinsu” lun meberesegun hamá gürigia hagadeiruni hátuadi, habagari keisi iduheñu, heferidiruniña hamadagu, móuserun hamá lau arumani o hawiyeduni hiri (1 Timotéu 6:10). Ma lirun sansi hamani katei le gebegitimabei luagu seinsu! Ani “le hínsiñehabubei lun seinsu súnwandan busén lan lanwoun” (Apurichihati 5:10).
Lau waritaguni gebegitima hamá gürigia sügǘ lau umegeguni. Inarüni hu lan burí umegeguni, lau sun lira, siñati lasandirun katei burí le ínsiñeni wawagu kei le gayaraabei hasandiruni gürigia. Adügati wanaagun woungua luma aban umadaü buiti lúntima gunda wamá (Ariñawagúni 17:17).
GÚNDAABADIWA ANHEIN WAFALARA ADUNDEHANI LE TÍDANBEI LERERUN BUNGIU
WAGAGIBUDAGUN LUMA SANDI
Adundehani le tídanbei Lererun Bungiu: “Árani buiti anigi gúndaatu” (Ariñawagúni 17:22).
Ítara liña ugundani kei aban “árani buiti” lun wagagibudagun luma sandi. Ka gayaraabei wadügüni lun gunda wamá dan le sandi wamá?
Geteingiradi wamá. Dan le luágunrügü lan waturobulin wasaminara, “wuribati” sun weyu woun (Ariñawagúni 15:15). Ánhounti Lererun Bungiu, ariñagatu woun: “Geteingiradi humá” (Kolosana 3:15). Ru humá seremei luagu katei buiti le lídanbei hibagari, íbini ñüraü lan. Gayaraati ladügün katei kéiburi aban lubuidun lálüdün Weyu, lisemén láfuhan garabali o láhayachun somu hiduhe o humada huagun lun buídutima lan hasandiragun hungua.
Wadügün katei buiti hawagu amu. “Gúndaatimáati le íchugubei sügǘ lau le erésibirubei”, inarüni dimurei le íbini anhein wuriba lubéi wátuadi (Adügaü [Hechos] 20:35, Lererun Bungiu to lánina iseri daradu). Wéiriti wagundan dan lichugúniwa seremei woun luagu somu katei le wadügübei ani aba wabulieidagun luéi waturobulin. Ánhawa adüga lun buídutima lan hasandiragun amu houngua, buídutimabei wasandiragun woungua.
DEREBUGUGÜDA HUMÉI HIBAGARI KEISI MARÍEITI
Adundehani le tídanbei Lererun Bungiu: Anúadira huméi “katei le buídubei [o le súdinitimabei]” (Filipuna 1:10).
Gayaraati hadisedagun maríeitiña hawariuagua ánhaña másügürün saragu dan úara. Ligía buidu lubéi lun híchuguni maríeitiña hamarieidun lidan furumiñeti lúgaaru, lun ligía lan aban lídangiñe katei le súdinitimabei houn lidan habagari.
Adüga humá katei úara. Lubaragiñe letenirun kada aban hídangiñe lúnrügü katei le hínsiñebei lun, ka uagu madügün hubéi aransehani lun hadügün katei úara?”. Ariñagatu Lererun Bungiu: “Buítimatiña biama luéi aban” (Apurichihati 4:9). Gayaraati hábougun úara, háfuridun asariñaha, hatun bachati o hadügün amu katei lun hásügürün lubuidun dan úara.
Arufuda humá ínsiñehabuni húniwagua. Ariñagatu Lererun Bungiu lunti lan hínsiñegua hamá maríeitiña hámagua, óuseragua hagíame hámagua lau inebesei (Éfesuna 5:28, 33). Gayaraati ladügün aban lubuidun áhayachuni, aban salalaguaü le arufudati ínsiñehabuni o aban liraüraü idewesei lun buídutima lan hanaagun hungua. Ani haritagua huméi wügürirügüñein lan tuma würi ha maríeitiña gayara harounrun hámagua (Ebüréu 13:4).