“Higougu numoun, [...] emeraaguagüda náamugaün”

1. Según Matéu 11:28-30, ka füramase lubéi Hesusu?

ADÜGATI Hesusu aban lubuidun füramasei hagibugiñe saragu gürigia ha aganbubalin. Ariñagati: “Higougu numoun, [...] emeraaguagüda náamugaün” (aliiha huméi Matéu 11:28-30). Mama aban füramasei málati le. Samina wamá luagu le ladügübei tuagu aban würi to lauboun aban lanarime sandi.

2. Ida liña líderagunu Hesusu aban würi sánditu?

² Mégeitu meha würi tuguya ídemuei lau lóufudagun. Ñǘdünharu meha hamoun saragu surusiagu, gama lumoun, lárigiñe duusu irumu lau sandi sándimemegiru. Ani ariñagati meha Lúrudu wiye tan (Fad. 15:25). Ábati tíchugun fe lareidaguagüdüñanu lan Hesusu sánditiña. Dan le tadunragunbei luma, aba taguurun tuagu taru ladaüragun aba tareidagun lau lóufudagun. Mama adügarügüti Hesusu lun tareidagun, adügati giñe lun tasandiragun tungua hínsiñewa tan. Kei hénpulu, ayanuhati tun lau ínsiñeni luma lau inebesei lau lagúarun tun: “niráü”. Ma funa lanarime awalidaguni le tasandirubei würi tuguya? (Luk. 8:43-48).

3. Kaba álügüdahani wóunaba lidan arütíkulu le?

³ Samina wamá luagu le, le furumiñe tadüga würi tuguya, aba tidin áluahei Hesusu. Ani ligiaméme lunbei wadügüni. Lunti wáfaagun lun wayarafadun lun Hesusu. Uguñe weyu, mareidaguagüdün lumuti hasandi ha áluahabalin lau milaguru. Gama lumoun, anihagua agunbirahaña: “Higougu numoun, [...] emeraaguagüda náamugaün”. Lidan arütíkulu le, wóunabuba seingü álügüdahani: Ida luba wayarafadun lun Hesusu? Ka labuserunbei Hesusu lariñagun lau dimurei “resibi huméi narufudahan” o “barǘ huméi niyugu”? (TNM), Ka wafurendeirubei lúmagiñe Hesusu? Ka san uagu ru lubéi dasi le líchugubei woun awalidaguni? Ida luba wasigirun asandira awalidaguni lábugiñe larufudahan?

“HIGOUGU NUMOUN”

4, 5. Ka ida amu katei gayara lan wayarafadun lun Kristu?

⁴ Aban katei le lunbei wafurendeiruni luagu Hesusu lau wadügüni sun wayaraati lun wafurendeirun luagu sun katei le lariñagubei luma le ladügübei (Luk. 1:1-4). Ligíati mosu wafurendeirun luagu abahüdaguni luáguti libagari. Lugundun úatiña ni aban lun hadügüni lira wawagu. Ábaya katei, aba giñe wayarafadun lun Hesusu dan le wadügagun woungua lánime disipulugu ani badisei wagía.

⁵ Ábaya giñe igaburi lun wayarafadun lun Hesusu dan le wáluahaniña wéiyaaña lidan afiñeni dan le megei wamá ídemuei. Aban idewesei íbirigu ha, lúmagiñe Hesusu, hagía layusurubaña lun lóunigiruniña lubúeingu (Efe. 4:7, 8, 11; Huan 21:16; 1 Fe. 5:1-3). Magurabaha wamá haliihabei lan wéiyaaña lidan afiñeni wasaminan lun hasubudiruni ka lan wemegeirubei, lunti wagíaba lan áluaha ídemuei hama. Ariha waméi le lariñagubei aban íbiri gíriti Julian: “Mosu meha náfuridun Beteligiñe ladüga luriban nátuadi, aba lariñagun aban numada nun lun lan namuriahan hama wéiyaaña lidan afiñeni lun habisidahanina. Furumiñe aban nasaminarun luagu memegeirun nani. Lagumuhóun aba namuriahan lun habisidahanina, aba níchugun fe ligía lan aban idewesei hanarimetimati le neresibirubei lidan sun nibagari”. Wéiyaaña lidan afiñeni ha úaraguabaña, kei bián ha abisidahabalin Julian, gayaraati híderaguniwa lun wasubudiruni ka lan ‘lisaminanbei Kristu’, mini lan gufuranda hamani ani áyeiha hamuti ligaburi lisaminan luma ligaburi lóuserun (1 Ko. 2:16; 1 Fe. 2:21). Inarüni aniha lan aban lídangiñe idewesei buiti le gayaraabei híchuguni woun.

“BARǗ HUMÉI NIYUGU”

6. Ka labuserunbei Hesusu lariñagun lau dimurei “resibi huméi narufudahan”?

⁶ Dan le lagunbirahabadiwa Hesusu lun ‘wanügüni liyugu’, másiñati le lan labuserunbei lariñagun lun ‘gaganbadi wamá lun lugumadin’, lun wawadigimaridun lun Heowá úara luma. Meberesenga ka lan labuserunbei Hesusu lariñagun, le lunbei wadügüni wawadigimaridun.

7. Según Matéu 28:18-20, ka dasi rúaalibei woun ani ka gayaraabei wachoururuni?

⁷ Ánhatiwa lun agunbirahani le, dan le wederegeruni wabagari lun Heowá ani badisei wagía. Agunbiraha lumutiña Hesusu sun gürigia. Maweiyasunti Hesusu amahara houn ni aban ha busenbaña heseriwidun lun Bungiu tau sun hanigi (Huan 6:37, 38). Sun ha afalarubalin Hesusu gachansintiña lun hídehan lidan dasi le líchugubei Heowá lun. Gayaraati wachoururuni líderagubadiwa lan Hesusu súnwandan lidan dasi le (aliiha huméi Máteu 28:18-20).

“FURENDEI HUGUYAME NÚMAGIÑE”

8, 9. a) Ka san uagu hayarafada gürigia ǘnabugutiña lun Hesusu? b) Ka álügüdahani lunbei wadügüni wóuniwagua?

⁸ Ménrengunti meha lun hayarafadun gürigia ǘnabugutiña lun Hesusu (Mat. 19:13, 14; Luk. 7:37, 38). Ka uagu? Samina wamá amu lan meha ligaburi Hesusu hawéi fariséugu. Marufuduntiña alidihatiña relihión hagía ínsiñehabuni ani barüguatiña meha houngua (Mat. 12:9-14). Ánheinti Hesusu hínsiñehabuti ani ǘnabugu ligía. Ánhañati fariséugu hínsiñeti meha lubuidun-agei ubaraü houn ani apantaha hagía luagu, mítaranti meha ligaburi Hesusu, arufudahati houn ha afalarubalin lun hamahadun lun habusenrun lubuidun ubaraü, lun ǘnabugu hamá luma lun heseriwidun houn amu (Mat. 23:2, 6-11). Gumadi hamutiña meha fariséugu gürigia lau hanufudehaniña (Huan 9:13, 22). Amu meha ligaburi Hesusu hawéi, ruti meha gurasu houn lau lubuidun lóuseruniña gürigia luma lubuidun dimurei le lariñagubei lau ínsiñehabuni.

⁹ Furendeihadiwa san lúmagiñe Hesusu? Álügüdagua wamá woungua: “Subudiwatina san kei aban gürigia darangiluti ani ǘnabuguti? Aransetina san lun nadügün somu dasi le masudininti laríawagun lun neseriwidun houn amu? Óusera numutiña san gürigia lau ínsiñehabuni?”

10. Ka ladügübei Hesusu lun hasandiragun lani disipulugu houngua buidu

¹⁰ Adügati Hesusu lun buidu lan hasandiragun lani disipulugu houngua luma lun darangilu hamá, ani gúndaati lau larufudahan houn (Luk. 10:1, 19-21). Ínchaha lumutiña lun hálügüdaguni ani busenti meha lun lasubudiruni ka lan hasaminanbei (Mat. 16:13-16). Ítara kei labouchun weiri ligía ani gin ligía nadü le abunúbei lidan fulasu le esetirúbei lun bunaguaü; ligiaméme giñe ladügübei Hesusu houn lánigu disipulu lugundun seti lumutiña lau larufudahan houn ani adügati le lun hadügüni hadasin buidu.

11. Ka álügüdahani lunbei wadügüni?

¹¹ Anhein anihein lubéi murusun ubafu wama, álügüdagua wamá woungua: “Ka san nadügübei lun buidu lan léibugun katei lidan wadagimanu luma hadan iduheñu? Adügatina san lun ñein lan darangilaü? Ínchaha numutiña san amu lun hadügün álügüdahani nun? Beresetina san lau le hasaminarubei?”. Maweiyasun wamá asandiragua woungua kei fariséugu, ha meha agañidubaña hama ha adügübaña álügüdahani houn ani éibaaha hamutiña ha ámubei hasaminan hawéi (Mar. 3:1-6; Huan 9:29-34).

‘HADARIRUBA EMERAAGUNI’

12-14. Ka uagu wasandira awalidaguni dan le wadügüni dasi le líchugubei Hesusu woun?

¹² Ka uagu sandí wabéi emeraaguni o awalidaguni dan le wadügüni dasi le líchugubei Hesusu woun? Ariha wamá fiu lídangiñe.

¹³ Añahein óunigirutiwa ha buítiña. Íbini Heowá lan óunigiruti le íñutimabei, mama aban Bungiu meteingiraditi ani madereti lilurudun. Gebegiti wadagimanu le wadügübei lun (Ebü. 6:10). Ani ru lumuti erei le wemegeirubei lun wanügüni wanügün (2 Ko. 4:7; Gal. 6:5). Ru lumuti Hesukrístu le Warúeite hénpulu le buídutimabei luáguti ida luba lan wóuseruniña amu (Huan 13:15). Áfaaguatiña wéiyaaña lidan afiñeni ha óunigirubadiwa lun háyeihani Hesusu “Hóuniri mudún le wéiritimabei” (Ebü. 13:20; 1 Fe. 5:2). Áfaaguatiña lun híchugun gurasu woun, lun hínsiñehabu wamá, lun ganigi wamá, lau harufudahan woun luma lau hóunigiruniwa.

¹⁴ Añahein paaná buítiña wama lidan wadagimanu. Úati ni aban gürigia ubouagu gúndaati lasandiragun lungua kei hasandiragun lubúeingu Bungiu houngua lau le habihibei, úati giñe ni aban gürigia asandiraguti lungua lídanñein lan aban hama lumadagu lau ínsiñeni kei le wasandirubei. Samina wamá luagu le: gachansintiwa lun wawadigimaridun úara hama gürigia ha afalarubalin gumadi íñutimati luáguti laruman ibagari, masaminaruntiña giñe buidu hamá hawéi amu. Gayaraaguatiña houngua, gama lumoun ǘnabugutiña ani óusera hamutiña amu kamá hamuga íñutiña hawéi. Marihin hamutiña hapanaagu kei ni kata, hariha hamutiña keisi umadagu. Ani hínsiñetiña houn darí aranseñu haña lan lun hederegeruni habagari wawagu.

15. Ka lunbei wasandiruni luagu dasi le wadügübei?

¹⁵ Adüga wamuti dasi le buídutimabei. Arufudaha wamuti inarüni houn gürigia luagu Heowá ani arufudaha wamuti yee lan Mafia (Huan 8:44). Ruti Mafia anügüni houn gürigia le hásiñarun anüga. Kéiburi, busenti lun wafiñerun ua lan feruduna lani Heowá figóu ani madüna wamá lun hínsiñegu wamá. Aban iyeeni wuribati lira. Dan le wayarafadun lun Kristu, ferudunawati wafigoun. Le linarün katei, hanarimeti wínsiñe lun Heowá (Rom. 8:32, 38, 39). Ma wagundan lau warufudahan houn amu lun hafiñerun luagu Heowá luma lau warihini ida liña lan líderaguniña inarüni!

SIGÍ WAMÁ IBIHA EMERAAGUNI LÁBUGIÑE LARUFUDAHAN HESUSU

16. Ka uagu amu lubéi anügüni le uágubei lagunbirahawa Hesusu lun wanügüni luéi amu anügüni le lunbei wawanduni?

¹⁶ Anügüni le líchugubei Hesusu woun lun wanügüni ámuti luéi le lunbei wawanduni. Kei hénpulu, lárigiñe hawadigimaridun saragu wádangiñe sun weyu mama sandirügütiwa lubucha uagu, madügün wamuti giñe le wabusenrubei wadügün. Ánheinti dan le leseriwidun gürigia lun Heowá luma lun Kristu sanditi aban lanarime ugundani. Gayaraati lárigiñe lan wawadigimaridun sun weyu sandí wama lubucha uagu ani adügarügütiwa erei lun woudin adamuridagua. Ma inarüni dan le lan wagiribudun aban lan wasandiragun woungua buidu ani lau erei? Ligiaméme asuseredubei woun dan le wáfaagun lun wáfuridun apurichiha o waturiahan wábuguarügü. Afayeiruahaü le weresibirubei adügati lun buidu lan wasandiragun woungua.

17. Ka lunbei wasubudiruni ani ka uagu mosu lubéi wasaminarun buidu?

¹⁷ Mosu wasubudiruni gébeha lan were. Ligía mosu wasaminarun buidu ka lan ida wawesirei were. Kéiburi hamuga, wawesiruni were saragu lun wóundaraguagüdün umegeguni. Ariha waméi le lariñagubei Hesusu lun aban nibureinti rísiti le álügüdübalin ka lan lunbei ladügüni lun libihin ibagari magumuchaditi. Inebeti meha Lúrudu lun nibureinti ligía ani chóuruti aban lan meha gürigia buiti, ladüga ariñagati ewanhéliu lani Márükosu aba lan lasandirun Hesusu ínsiñeni luagu. Ligía lariñagunbalin dimurei le lun: “Beiba, alugurabéi sun le búmabei, [...]. Lárigiñe biábinme, ábame bafalarunina”. Hénrenguti katei le lun nibureinti le, según warihini maweirinti labusenrun lafalaruni Hesusu kei burí lígiruni saragu “lirisin” (Mar. 10:17-22). Le ladügübei wügüri le aba lamaharun lun larufudaha Hesusu, lun lidamun lan “seinsu”.

18. Ka burí lunbei wadügüni ani ka uagu?

¹⁸ Ligía buidu lubéi lun wakutihani ka lan katei himei wabéi. Ka uagu? Ladüga ítararügüba wachoururuni wayusuruñein lan were buidu. Ariha waméi le asuseredubei lun aban nibureinti gíriti Mark. Ariñagati: “Luagu saragu irumu saminatina yebe mibe lan númati. Gama lumoun, íbini prekursoru nan, súnwandan nasaminaruña lan luagu seinsu luma luagu ida luba lan buídutima lan dan nun. Ábati nálügüdagun nungua ka lan uagu hénrengu lubéi nibagari. Aba níchugun fe níchuguñein lan le himei nubéi lidan furumiñeti lúgaaru ani dan luma erei le ígiragubei nun ligía lan níchugubei lun Heowá”. Aba lasansiruni Mark ligaburi lisaminan luma ligaburi lawinwandun lun laganwoundagüdüni leseriwidun lun Heowá. Ariñagati: “Anihein dan aban lebelurun lueirin idiheri nun. Gama lumoun, lau lídehan Heowá luma giñe lídehan Hesusu, anahamémegua eseriwida houn”.

19. Ka uagu súdini lubéi wasubudiruni gádantiwa?

¹⁹ Wasigiruba asandira awalidaguni lau weresibiruni larufudahan Hesusu ánhawa adüga ǘrüwa katei. Furumiñe, warihini katei lau aban lubuidun igaburi. Wadügüñein wadagimanu le líchugubei Heowá woun kei aubei labusenrei. Wagía nadagimeinbaña lun, ani ligía Wayubudiribei (Luk. 17:10). Ánhawa áluga wadügüni dasi le líchugubei Heowá woun lau wagaburi, labuchaduba wawagun ani wadügüba dañu wóuniwagua. Kei hamuga, anhein ñüdün aban bulu bágasu ñeinhin lubéi labusenra ani mama le ñein lubéi labusenra labureme lau yugu le luágubei, ladügüba hamuga dañu lúniwagua ani labuchaduba hamuga luagu. Luagu le aban oubaü, adügatiwa katei le magurabun wamuti wadügübei lan ani furitiwa lídangiñe furumiñeguarügü lénrengunga ánhawa asigirei ladundehan Heowá. Haritagua waméi ua hamá ni aban lun hararamuni lagunfuliruni Heowá lugundan (Rom. 8:31; 1 Huan 4:4).

20. Ka igaburi lunbei gagaburi wamani lun wánharun lun larufudahan Hesusu?

²⁰ Libiaman, buidu lan lébuna wadügüni katei. Le wabusenrubei lun wíchugun uéiriguni lun Wáguchi Heowá le hínsiñehabubei. Lidan meha furumiñeti sígulu añahein meha gürigia adügatiña somu katei ladüga hangi o igaadua hamá. Adügati katei le lun magundan hamá ani aban hígiruni larufudahan Hesusu (Huan 6:25-27, 51, 60, 66; Fili. 3:18, 19). Luéigiñe amu oubaü, añahein adügütiña katei ladüga hínsiñe lan Bungiu houn ani hínsiñetiña giñe gürigia houn. Ánhatiña lau ugundani lun larufudahan Hesusu sun añahán lan awinwanda ya ubouagu lau emenigini lun heseriwidun luma Kristu sielu. Gúndaabadiwa giñe ánhawa ánhara lau aban igaburi le buiti lun larufudahan Hesusu.

21. Según Matéu 6:31-33, ka gayaraabei wagurabuni lun ladügüni Heowá?

²¹ Lǘrüwan, Warihini le lunbei lasuseredun lau aban lubuidun igaburi. Anúadiraadiwa aban ibagari buin lau sákürifisiu luma wadagimanu le héreti. Ani wisá lumutiwa Hesusu wéibahouba lan. Gayaraati wafiñerun líchugubei lan Heowá erei le wemegeirubei woun lun wagagibudagun luma furumiñeguarügü lénrengunga. Eibu wawandun, derebugutimabadiwa (Sant. 1:2-4). Gayarati giñe wemenigidun líchugubei lan Heowá le wemegeirubei woun, lóunigirubadiwa lan Hesusu luma giñe híchuguba lan wíbirigu gurasu woun (aliiha huméi Matéu 6:31-33; Huan 10:14; 1 Tesa. 5:11). Anihein sun le wemegeirubei wama lun wawandun furumiñeguarügü lénrengunga.

22. Ka uagu gayara lubéi gunda wamá?

²² Würi to meha lareidaguagüdüboun Hesusu buiti meha tasandiragun tungua weyu ligía. Gama lumoun, anhein meha tasigira Kristu lau úaraguni tadariruba meha aban awalidaguni lun súnwandan. Kati tadügübei? Anhein meha falá tubalin larufudahan Hesusu, teresibiruba meha aban lubuidun afayeiruahaü: teseriwidun luma Hesusu sielu. Furumiñeguarügü sákürifisiu le lunbei meha tadügüni, móubati lumoun abinirúni le lunbei teresibiruni. Meberesenga halíañein lan wemenigin anhein sielu lubéi o ubouagu lan, gayaraati wasandiragun woungua gúndaañu lau wánharun lun agunbirahani le ladügübei Hesusu woun lau dimurei le: “Higougu numoun”.