Dan le lagumucha lan Heowá hau gürigia wuribatiña, wéridi lumutiña san saragu wéiyaasu?

ABAN sásaamu sun oura lechekürüni lumahinan lun larihini anhein anite lubéi liñawan dan. Aba larihin ayarafadeina liña lan aba lanarime liñawan dan lidoun aban fulasu le ñein lubéi hawinwanda saragu gürigia. Kei nidiheri lan hau gürigia aba lawisaruniña lubaragiñe ladarüdün.

Aba katei ítarati ladügübei Heowá uguñe weyu, lawisaruñanu gürigia ha ubouagubaña layarafada lan aban lanarime liñawan dan le denchatimati sügǘ luéi furumiñeguarügü liñawan dan. Ida liña lawisahan Heowá? Ani ka uagu chouru wabalin líchuguña lan saragu dan houn gürigia lun harihin kaba lan hadüga? Lun wasubudiruni óunabagülei, akutiha wamá lídangiñe eweridihani le líchugubei Heowá lidan dan le sügühalibei.

EWERIDIHANI LE LÍCHUGUBEI BUNGIU LIDAN DAN LE SÜGÜHALIBEI

Lidan meha tidaani Bíbülia, súnwandan leweridihan Heowá lagumuchuba lan hau ha maganbadibaña lun lugumadin (Ari. 10:25; Her. 30:23). Lidan sun dan, awisahati lau saragu dan luagu lachülürün lanarime liñawan dan burí le ani ariñagati houn ha lúnbaña hasufuriruni kaba lan hadüga lun hagundaaragüdüni (2 Uru. 17:12-15; Neem. 9:29, 30). Lun gayara lan hadügüni katei le buídubei, súnwandan layusuruniña lubúeingu ha ubouagubaña lun hawisaha luagu le lunbei lasuseredun ani ariñaga haméi burí houn gürigia megei hamá hadügün somu katei lau lóufudagun (Amos. 3:7).

Noé aban hádangiñe lubúeingu Bungiu úaraguatiña hagía. Lau ganigi, luagu saragu irumu wéridi lumutiña gürigia magíagutiña ani furundetiña ha lídanbaña lidaani luagu ladibira lan ubóu (Agu. 6:9-13, 17). Ariñaga lumuti giñe houn le lunbei hadügüni lun hesefurun. Kei rugua lan lungua lun wadagimanu le, ligía lasubudirunwabei kei apurichihati “houn gafigountiña lun hasakürihan” (2 Fe. 2:5).

Íbini mabuchadun lan meha luagu Noé apurichiha, anihein meha aban lanarime mafiñeni hawagu gürigia ha lídanbaña lidaani, madügüntiña gasu lau eweridihani le lúmagiñeti Bungiu. Ladüga lira, aba hóunwegun, dan le “ladibirun ubóu, aba hañaradagun súngubei” (Mat. 24:39; Ebü. 11:7). Siñati meha hariñagun meweridirun lániña Bungiu.

Lidan amu dan, wisá lumutiña Heowá gürigia murusun dan lubaragiñe lagumuchun hau ha wuribabaña. Ani ruti saragu dan lun hadügün gürigia somu katei lun hesefuruni habagari. Ítara liña ladügüni dan le lóunahanbei diisi íñanaü Ehiptun. Ariha waméi le asuseredubei lubaragiñe lisedün íñanaü, aba láhuyagüdün lagu huya dereguati le gagünrinchaguaditi. Aba lóunahani Heowá Moisesi luma Aarón awisarei faraón hau sun lubúeingu. Kei laruganba lubéi binaafin lábürühan huya dereguati, gadanitiña meha san ehiptuna lun háluahan halíaba lan haramudagua? Ariñagatu Bíbülia: “Ñéinñanu hádangiñe lánigu urúei anufudeduntiña luéi leweridihan Bungiu, aba hebelaagüdüniña hadamun hama habiñanigu; gama lumoun ñéinñanu híbiri meberesegúntiña lau, aba hígiruniña bóugudi” (Afu. 9:18-21). Furanguti larihín awisaha lan Bungiu lau saragu dan. Seremei lawisahan, sefu hamuti gürigia ha gaganbadibaña habagari luéi le gayaraabei ladügüni huya dereguati ligía houn.

Wisá lumuti giñe Heowá faraón hau sun lubúeingu lubaragiñe lóunahani lidiisin íñanaü (Afu. 4:22, 23). Gama lumoun, meberesentiña, ani madügüntiña gasu. Ma lirun harihin hóunwegun hágiramu! (Afu. 11:4-10; 12:29). Gadaanitiña yebe san lun hadügün somu katei lun hesefurun? Anha. Ka uagu wariñaga anha lan? Wisá lumutiña Moisesi ísüraelina luagu íñanaü ligía ani ariñaga lumuti houn ida luba lan hesefuruniña haduheñu (Afu. 12:21-28). Átiriñanu aganbuti? Según lariñawagún séfutiña ǘrüwa míñunu gürigia luéi lagünrinchaguniña Bungiu. Amu hawéi ísüraelina “ñǘdüntiña saragu hawuyerigu gürigia hama” ha terenchana, íbini ehiptuna (Afu. 12:38).

Kei le aubei warihei lidan sügǘ burí le, súnwandan lígirun Heowá saragu dan lun haganbuni gürigia leweridihan (2 Lur. 32:4). Ka uagu ladügei? Afuranguagüda lumuti apostolu Féduru mabusenrun lan Heowá “lun leferidirun ni aban hádangiñe; labusenrun lun hasakürihan sun gürigia” (2 Fe. 3:9). Ítara liña, nidiheriti Heowá hau gürigia. Le labuserunbei lun hasakürihan luma lun hafalaruni ladundehan lubaragiñe liabin lasiadihan (Isa. 48:17, 18; Rom. 2:4).

ADÜGA WAMÁ GASU LAU LEWERIDIHAN BUNGIU

Uguñe weyu mosu gaganbadi hamá sun gürigia lau lóufudagun lun uganu le ichugúbei lidan sun ubóu. Dan meha le ya lubéi Hesusu ubouagu, ariñagati lagünrinchawaguba lan ubóu le lidan “saragu asufuriruni” (Mat. 24:21). Ruti aban profesía le ñein lubéi lariñagei le lunbei harihini luma le lunbei hawinwanduni ha afalarubalin eibu layarafadun dan ligía. Adimurehati meha luagu lanarime katei le lunbei lasuseredun ubouagu ani warihiñein (Mat. 24:3-12; Luk. 21:10-13).

Según burí profesía le, ínchaha lumutiña Heowá sun gürigia lun heseriwidun lun luma lun gaganbadi hamá lun. Busenti lun buidu lan habagari sun ha gaganbadibaña lun guentó ani resibi hagíame abiniruni lidan iseri ubóu (2 Fe. 3:13). Lun gayara lan híchuguni gürigia hafiñen luagu le füramase lubéi Heowá, ru laali “uganu buiti le luáguti larúeihan”, aba uganu le lunbei lesefuruni habagari. Ariñagati Hesusu lapurichihóuba lan “lidan sun ubóu lun lasubudirúniwa lidan sun fulasu” (Mat. 24:14). Aranseha laaña Bungiu lubúeingu lun hapurichihani uganu le lidan kéiburi 240 ageiraü luma fulasu. Busenti lun haganbuni hiibe-agei gürigia awisahani lun hanurahan luéi lanarime liñawan dan le lunbei laduurun danme le liabin lasiadihan Bungiu (Sof. 1:14, 15; 2:2, 3).

Ligíati, masudininti álügüdahani anhein ru lubéi Heowá dan nófuti houn gürigia lun haganbuni leweridiha. Ladüga anihein katei chóurugüda lumuti woun súnwandan lan líchugun dan nófuti lun haganbuni gürigia leweridihan. Álügüdahani le súdinibei, anhein hadügüba lubéi gürigia gasu lau sun anihagua lan dan. Sigí wamá, wagía le anügübalin luganute Bungiu íderaguaña sun gürigia ha wayaraatiña lun hesefuruni habagari danme le lagünrinchawagun ubóu le.