Álügüdahani le hadügübei aliihatiña

Ariñagatu Bíbülia mégeiwa hamá bián gürigia gefentiña lun lachoururúniwa aban katei (1 Lur. 35:30; 2 Lur. 17:6; 19:15; Mat. 18:16; 1 Tim. 5:19). Gama lumoun, lábugiñe Lúrudu anhein láguragua aban wügüri aban würi nibureingiru “áraabu” ani gadaradunhaaru ani wáguatu, ligía gadurunbei lidan agabarahani, anhoun tuguya maduruntu. Kati uagu wügüri lubéi gadurunbei, anhein ua habéi ni aban arihiti águrawaguni?

Meteniti abahüdaguni le lídanbei 2 Lúrudu 22:25-27 anhein gadurun lubéi wügüri ladüga afuranguagüda waali lira. Le uágubei letenira lúrudu luagu madurun tan würi. Teni wamá lun le bürüwañubei lidan lúrudu le.

Le uágubei layanuha bérusu le lubaragiñebei le, layanuhaña luagu aban wügüri le agamaridubei aban würi “uburugu” to gadaradunhaaru. Ladüga aban würi to gadaradunhaaru barǘ watu kamá hamuga maríeiharu, ligíati wügüri le águragubarun ligía gadurunbei luagu agabarahani. Ati würi? “Ladüga magúaragun tan amuriaha ídemuei” ligía gadurun tubéi. Lun hamuga wagua tan chóuruti hamuga taganbuba lan yebe ani hagidaruboun hamuga luéi. Kei le magúaragun tan gaduruntu giñe lidan agabarahani. Ligíati, biángubei hagía gaduruntiña (2 Lur. 22:23, 24).

Guentó arufudati lúrudu amu sügǘ: “Gama lumoun anhoun ladarira aban wügüri ladari amu wügüri áraabu, aba lafosurunu lun tarounrun luma, wügürirügübei ligía afarúa. Tuguya madügǘnwabei ni kata tau, lugundun madügüntu duru le lunti tafarún luéigiñe; ítara liña kesi lira kei wügüri le ageindagubei luma ábanya wügüri aba láfaruni hilagubei; lugundun tábugua ladariroun würi irahü tuguya áraabu, íbini hamuga tagúaragun úabei yebe íderagutu” (2 Lur. 22:25-27).

Lidan kesi le, afiñetiña aguseragüdütiña tun würi. Samina wamá wagua tan yebe amuriaha ídemuei ani úati aganbutu. Ligíati madügüntün agabarahani. Ánheinti wügüri gadurunti lau láguragunu luma lau ladügün agabarahani tau, “ladüga lafosurunu lun tarounrun luma”.

Ligíati, íbini luagu lan madurun tan würi layanuha lúrudu le, arufuda lumuti abahüdaguni wügüri lan gadurunbei ladüga láguragunun ani adüga ligía agabarahani tau. Gayaraati wachoururuni akutiha hamani aguseragüdütiña kesi le hulili ani adüga hamuti katei según adundehani furanguti le líchugubei Bungiu lidan saragu ókaasion (Afu. 20:14; 2 Lur. 13:14; 17:4).