Fánreinti Lánina Álügüdahani

◼ Lunti san wafurieidun hama gürigia ha úmabaña waturiaha lidan tubenari haban?

Gíbeti buiti asagarúati dan le wagumeseruni ani gumú waméi aban aturiahani tídangiñeti Bíbülia lau aban furíei. Dan le wafurieidun amuriahatiwa sífiri sandu luma Heowá luagu le lunbei wakutihani (Luk. 11:13). Adügati giñe furíei lun larihini aturiahati luagu seriu lan taturiahoun Bíbülia ani arufudahati lun ida luba lan lafurieidun (Luk. 6:40). Ligíati, buidu lubéi wagumeserun afurieida aturiahani lau lóufudagun. Gama lumoun, ámuñegueinarügüti le gádanbaliña gürigia, ligíati mosu lubéi larufudun le íchugubei aturiahani lichú aau lun desidírü lan anhein lafurieiduba lubéi hama gürigia ha aturiahabaña bénabu.

Mosu lasaminarun íchuguti aturiahani luagu fulasu le ñein lubéi ladügǘwa aturiahani. Anhein mibe habéi gürigia yarafa, gayarati ladügǘn aban liraüraü furíei lun hagumeseruni luma lun hagumuchuni aturiahani le íchuguti súnwandan. Gama lumoun, anhein ladügüba lubéi katei le lun haríagunün gürigia, o masandiragunbei lan aturiahati lungua buidu, háfuga buídutimabei lun hagurabahan darime ladügǘn aturiahani lidan aban fulasu le ñein lumuti ua hamá saragu gürigia. Meberesenga halía lan ladügǘwa aturiahani, mosu warufudun lichú aau lun wasubudiruni ídaba lan wagumesera afurieida hama aturiahatiña (ariha humoun Wani ministeriu lidan chumagü lánina ǘrüwa-hati irumu 2005, páhina 4).