Le hasaminarubei saragu gürigia luagu furíei
“Dan le nafurieidun, sanditina kamá anihán Bungiu nóubagiñe árügüdana luéigiñe núhabu ani adundeha lánina dan le nasandiragun nungua féridiñu” (MARÍA).
“Hilatu nani weiriou lárigi tageindagun luma kánserü luagu 13 irumu. Haritagua nágili sagü lan meha weyu nafurieidun lun Bungiu ani sanditina meha aganba lani nafurieidun lun lidan nigarigu lugundun ruti meha darangilaü nun” (RAÚL).
“Aban lubuidun idewesei lúmagiñeti Bungiu furíei” (ARNE).
Ariha tumuti María, Raúl, Arne hama saragu amu gürigia furíeigi kei aban idewesei espechaliti. Dan le hafurieidun lun, sanditiña gayara lan hayanuhan luma Bungiu, híchugun eteingiruni lun luma hamuriahan ídemuei luma. Chouru hamuti inarüni lan le tariñagubei Bíbülia luagu lafurieidúniwa lun Bungiu: “Hemenigitiwa luagu Bungiu, lugundun subudi wamuti luagu ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14).
Lau sun lira, gíbetiña gürigia ha güreweiti houn hafiñeruni le tariñagubei Bíbülia luagu furíei. Ariñaga lumuti Steve ka lan meha lasaminarubei: “Dan meha le 17 lubéi irumu nau, hilaguatiña ǘrüwa hádangiñe numadagu: aban lidan aban danaguaü tau karü, ha híbiri biama, ñaraguarügütiña baranaha”. Ka ladügübei Steve? “Aba nálügüdüni Bungiu ka lan uagu lasusereda sun le ani móunabun lumuti nafurieidun. Ábati nálügüdagun nungua: ‘Kati un hu lan furíei?’”. Gíbetiña gürigia asandiragutiña houngua ítara ani aba hálügüdagun houngua anhein lunti lubéi hasigirun afurieida.
Anihein giñe amu katei le adügübei lun hasaminarun gürigia mahuudun lan furíei. Añahein asaminarutiña kaba lan uagu hafurieida lun Bungiu anhein subudi laali lubéi sun katei, dandu le wemegeirubei.
Añahein amu, afiñetiña móunabun lani Bungiu hafurieidun ladüga katei wuribati le meha hadügübei luagu aban dan. Ariñagatu Jenny: “Létima nituróbulinbei, sandí nan mebegi nan ni kata. Adügaadina katei burí le uágubei nasaküriha lárigiñe, ligía samina nubéi madüna nan lun laganbunina Bungiu”.
Agia huguya, ka hisaminanbei? Sandiñaha humaali san ligiaméme machouruni libügürü furíei? Anhein ítara liña lubéi, gúndaabadün lau hasubudiruni gayara lan tíchuguni Lererun Bungiu óunabagülei le hemegeirubei hun. Gayaraati hafiñeruni le tariñagubei Bíbülia luagu furíei.a Tíderagubadün adarirei lóunabagüle álügüdahani burí le:
Le san lúgubu aganba lani Bungiu furíei?
Ka uagu anihein lubéi furíei le móunabun lumuti?
Ida luba wafurieidun lun laganbuniwa Bungiu?
Ka buiti lanügübei furíeigi hun?
a Bürüwañu liña saragu hafurieidun lubúeingu Bungiu tidan Bíbülia, lafurieidun Hesusu laganagua. Tídanrügü Abürüdǘni Ebüréu, to subudiwaboun kei Binadu Daradu, dariwati lóugiñe 150 furíei.