Ka uagu mageindagun wabéi lidan wuribu, kei meha hadügüni ísüraelina?
LIDAN lidaani Libiaman Wuribu Wéiriti, aba lagúaragun aban úfisi nasi houn fiu gefentiña luagu Heowá: “Anhein mabusenrun aban hídangiñe lun lageindagun hama faransuna luma hama ingülatérana, sun huguya hóunweguba!”. Íbini anihein lan aban sétanu hani súdaragu ha lánina SS yarafa ñein aranseñu haña tau saragu áruma lun háfarahan, úati ni aban hádangiñe wábirigu adüraaguti lilurudun Heowá. Ma lanarime ganigi! Aban hénpulu buiti le, le arufudubalin ida liña lan warihini wagía gefentiña luagu Heowá wuribu: mageindaguntiwa lidan burí wuribu le ubouagubei mídintiwa luéigiñe hóubadina ni aban íbini hasiadiruniwa háfaraguaadiwa lan.
Gama lumoun, mama sun gürigia ha ariñagubaña hawougua kristiánugu hamá lun úara hamá luma saminaü le. Saragu hádangiñe afiñetiña lunti lan ani mosu lan hageindagun kristiánugu luéigiñe hageira. Háfuga saminatiña: “Ñǘdüntiña meha ísüraelina ha lumutuniña Bungiu ha lánina binadu dan awuribuha. Ligíati, ka uagu madügün habalin kristiánugu ha uguñebaña weyu ligiaméme?”. Kaba hamuga wóunaba anhein ñübuin aban gürigia ariñaga aban katei ítarati woun? Gayaraabei wafuranguagüdüni houn, amu lan gádantiña ísüraelina hawéi lumutuniña Heowá ha uguñebaña weyu. Ariha wamá seingü katei ka lan uagu ligira Heowá lun hawuribuhan binadu lumutuniña.
1. SUN MEHA LUBÚEINGU BUNGIU LÍLANA MEHA ÁBANMEME NÉCHANI
Lidan dan le sügühalibei, anúadirati Heowá aban néchani lun hagía lan lumutuniña, subudiwati néchani ligía kei: Ísüraeli. Ariñagati Heowá hawagu ísüraelina “huguyaba numutuniña ha hínsiñetimabaña nun hádangiñe sun gürigia” (Afu. 19:5). Ruti giñe aban ageiraü houn lun hawinwandun ñein. Ligíati, dan le lóunahaniña Heowá awuribuha hama amu néchanigu, mábürühantiña ísüraelina hawagu amu lubúeingu Bungiu ani máfaragun hamutiña giñe.a
Uguñe weyu, sun lubúeingu Heowá lídangiñetiña “sun fulasu, sun rasa, sun iñeñein luma néchanigu” (Aruf. 7:9). Ánhaña hamuga ñüdün awuribuha, hawuribuhaña hamuga —ani háfaraguñanu hamuga giñe— hábirigu.
2. HEOWÁ MEHA ARIÑAGUBEI HOUN ÍSÜRAELINA LUN HOUDIN AWURIBUHA
Lidan dan le sügühalibei, Heowá meha anúadirubalin ídaba lan ani ka lan uagu mosu lubéi hidin ísüraelina awuribuha. Kei hénpulu, ariñagati houn lun hawuribuhan hama kananna, ladüga subudiwatiña gürigia ha kei áhuduragutiña houn máfianu, luma luagu lanarime burí magíaguni le hadügübei ani subudiwatiña giñe luagu ganigi hamá hágudahaniña harahüñü lidan sákürifisiu. Ariñagati Heowá houn ísüraelina lun hagumuchun hau gürigia ha lídangiñe Fulasu Füramasewati luéi láfadarun luriban hagaburi hawagu (Fad. 18:24, 25). Dan meha le lídanhaña Fulasu Füramasewati, ruti Bungiu üma houn lun hawuribuhan hama áganiñu ha furundetiña (2 Sam. 5:17-25). Gama lumoun mígirun lumutiña lun houdin awuribuha lau hagundan guánarügü. Ligíati, dan meha le houdin awuribuha míchuga Heowá üma houn, liibe-agei dan wuribati lidin houn (1 Lur. 14:41-45; 2 Kro. 35:20-24).
Uguñe weyu, mama Heowá óunahabaliña gürigia lun houdin awuribuha. Ageindaguatiña néchanigu luagu le habusenrunbei, mama luagu le labusenrubei Bungiu. Másiñati hádaragun houngua lidoun wuribu ladüga busén hamá lun gabafu hamá luagu amu burí fulasu, o lun habihin lanwoun harisin o lun hadügüni le hasaminarubei lidan polítika. Ánhañati ha ariñagubaña hageindaguña lan lidan liri Bungiu o hageindaguña lan luagu hafiñen luma lun hagumuchun hau láganigu Bungiu? Mama giñe Bungiu óunahabaliña adügei katei le. Ariñagati Heowá ligíaba lan óunigiraña lubúeingu ha inarünitiña ani lagünrinchagubaña lan háganiñu lídanme aban wuribu le lunbei liabin ámuñegü: Arümahedón (Aruf. 16:14, 16). Lídanme wuribu ligía, lisudaranigu Bungiu ha siélubaña, hagíarügübaña ageindagua lidan wuribu ligía, mama lumutuniña ha yáabaña ubouagu (Aruf. 19:11-15).
3. FERUDUNA HAMUTI ÍSÜRAELINA HABAGARI HA ARUFUDUBAÑA AFIÑENI LUAGU HEOWÁ
Dan le lawuribuhabei Heowá hama lílana uburugu Herikó, ferudunawati tibagari Raabü habu sun tiduheñu ladüga afiñeni le tarufudubei. Susereti san ligiaméme lidan wuribu uguñe weyu?
Lidan dan le sügühalibei, arufudatiña súdaragu ísüraelina gudemehabu houn gürigia ha arufudubaña afiñeni luagu Bungiu, ani hárügüñanu lasiadirun Heowá lun hóunwegun hagíarügüñanu háfaragua. Ariha wamá bián hénpulu. Íbini ariñaga lan Heowá lun lagünrinchaguniwa uburugu Herikó, sefu hamuti ísüraelina tibagari Raabü hau sun tiduheñu ladüga afiñeni le tarufudubei (Hos. 2:9-16; 6:16, 17). Ani dan lárigiñe, ferudunawati habagari sun ha awinwandubaña Gabaón ladüga inebesei le harufudubei lun Bungiu (Hos. 9:3-9, 17-19).
Uguñe weyu, súdaragu ha ñǘdünbaña awuribuha úati feruduna hamani habagari gürigia ha arufudubaña afiñeni luagu Bungiu, ani anihein dan áfaratiña gürigia ha maduruntiña.
4. MOSU MEHA HASIGIRUNI ÍSÜRAELINA LÚRUDU LE LÍCHUGUBEI BUNGIU LIBÜGÜRÜ WURIBU
Lidan dan le sügühalibei, ruti meha Heowá adundehani houn súdaragu ísüraelina dan meha le houdin awuribuha. Anihein dan amuriahati Heowá hama ísüraelina lun hebelurun lidan úarani hama lílana ítaga uburugu ha láganigu lun hebelurun lidoun “darangilaü” (2 Lur. 20:10). Ruti meha giñe Heowá gumadi lun haruma hamá súdaragu dandu hagía kei hakianpun-agei (2 Lur. 23:9-14). Ani máhati giñe Heowá háguraguniña würiña ha lídanbaña fulasu le hagañeirubei, kei burí hadaagun amu súdaragu ha lílana amu néchani ha habesinanigu. Anhein meha busén lubéi aban súdara ísüraelina lamarieidun tuma aban hádangiñe würiña ha hárügüdübaña lidan hawuribuhan, mosu meha lagurabahan aban hati (2 Lur. 21:10-13).
Uguñe weyu, liibe-agei ageiraü séinihali aban daradu lidan sun ubóu le asubudiragüdübalin lúrudu lánina wuribu. Íbini lun lan hóunigiruniña gürigia ha maduruntiña lúrudu ligía, híruti wariñaguni meberesenwa lan lau.
5. AGEINDAGUATI MEHA BUNGIU HAWEIGIÑE LUMUTUNIÑA
Ageindaguati san Bungiu hawagu fiu néchanigu uguñe weyu kei meha ladügüni lidan hadaani ísüraelina dan le hawuribuhabei hama lílana uburugu Herikó?
Lidan dan le sügühalibei, ageindaguti Heowá haweigiñe ísüraelina, ani liibe-agei dan adügati milaguru lun gayara lan hagañeirun. Kei hénpulu ídehati lun hárügüdüni uburugu Herikó. Lau hasigiruni ísüraelina ladundehan Heowá, aba “hagumeserun agúaraha lau sun here, aba lábürühan lubarieirun uburugu” Herikó. Ítara liña laranseruni Heowá üma lun hárügüdüni uburugu ligía (Hos. 6:20). Dan lárigiñe, aba hagañeiruniña ísüraelina amoruna, ha háganiñu. Ida? Lau “láhuyagüdün Wabureme óunwenbu burí dübü hawagun, aba láfaragun saragu Amoruna sügǘ hau ha táfaragubaña hefeinte Ísüraelina” (Hos. 10:6-11).
Uguñe weyu, mageidagunti Heowá haweigiñe ni aban néchanigu. Larúeihan Bungiu, le lúhaburugubei Urúei Hesukrístu, “mama lánina ubóu le” (Huan 18:36). Satanási agumadirubalin sun harúeihan wügüriña. Ligíati, arufuda lumuti luriban ligaburi lanarime burí wuribu le lídanbei burí ubóu le (Luk. 4:5, 6; 1 Huan 5:19).
ÁFAAGUATIÑA KRISTIÁNUGU INARÜNITIÑA LUN ÑEIN LAN DARANGILAÜ
Kei le aubei warihei, amu le gádanbaliwa luéi le gádanbaliña binadu ísüraelina. Mámarügüñein ladüga amu lan le gádanbaliwa luéi le gádanbaliña ísüraelina midin wabéi awuribuha; anihein ámuya katei. Kei hénpulu, ariñagati Bungiu lídounme lan lagumuhóun dan ha lan ígiraguagüdübaña houngua lun larufudahan marufudahoualime “houn luagu wuribu”. Ani mawuribuhanbaña giñe (Isa. 2:2-4). Ariñagati giñe Kristu, mama ñalame “lánigu ubóu lani disipulugu”; mádaragunbaña lan houngua lidoun liturobulin ubóu ani mídinbaña lan luéigiñe hóubadina ni aban (Huan 15:19).
Amuriahati Kristu hama lani disipulugu hadügün lanwoun lira. Ariñagati houn lun lan hígiruni sun katei le anügübei iyereehabúni, igañi luma wuribu (Mat. 5:21, 22). Arufudahati houn lun hadügün lun ñein lan darangilaü luma lun hínsiñe hamá háganiñu houn (Mat. 5:9, 44).
Ka mini lubéi dimurei le woun kada aban wádangiñe? Chóuruti mabusenrun wamá woudin awuribuha. Anihein san somu katei tidan wanigi le gayaraabei wadügün lun ñein lan fánreinguaü luma ageindaguni lidan damuriguaü? Sigí wamá adügei sun wayaraati lun wagidaruni furumiñeguarügü saminaü líbeina le tídangiñe wanigi (Sant. 4:1, 11).
Wagía kristiánugu míderagun wamuti ubóu le lidan luwuribun, lubaragiñe lira, adügatiwa lun ñein lan darangilaü luma ínsiñeni waganagua (Huan 13:34, 35). Aranseñu waña lun midin wamá luéigiñe lóubadina ni aban sunme awanha lan agurabahei lagumuchaguagüdüni Heowá wuribu lun súnwandan (Sal. 46:9).
a Inarüni anihein lan meha dan awuribuha hamá türibu lani Ísüraeli hámagua, gama lumoun mínsiñeti meha katei le lun Heowá (1 Uru. 12:24). Anihein dan, ígirati Bungiu lun hawuribuhan türibugu ha hámagua ladüga hebedaagun lun o ladüga adügaña lan amu burí figóu wéinamuti (Ali. 20:3-35; 2 Kro. 13:3-18; 25:14-22; 28:1-8).