Aranseedün san lun heresibiruni “múa keisi halagante”?

SUN wagía ayumahatiwa lun lagunfulirun füramasei le lariñagubei Hesusu: “Fuleseiwatiña ha ǘnabugubaña ani mabafu hagía, ladüga heresibirubei múa keisi alagan” (Mat. 5:5). Galagantei habéi kristiánugu anuadirúaaña Ubóu danme harúeiha luma Hesusu sielu (Aruf. 5:10; 20:6). Hiibe-agei kristiánugu ayumahatiña lun galagante hamani Ubóu luma lun hawinwandun lidan lun súnwandan. Úaalime ni murusun charati hawagu, gúndaabaña ani hawinwanduba lidan darangilaü. Lun gayara lan lagunfuliruni sun le, mósume hagunfulirun saragu dasi súdiniti. Lidan aturiahani le warihiba ǘrüwa katei le lunbei hadügüni: hadügüni Ubóu ábanme paraísu, hetenirun houn ha lúnbaña háguyugun luma lun harufudahan houn. Lakutihóuba giñe le gayaraabei hadügüni lúmagiñe guentó lun harufuduni busén humá hadügüni dasi le lídanme iseri ubóu.

ARANSEEDÜN LUN HADÜGÜNI UBÓU LE PARAÍSUME

Dan lariñagubei Heowá houn gürigia “garahüñügua humá saragu, buíngüda huméi ubóu hau hirahüñü ani gumadi huméi”, le labusenrubei lariñagun, lachülürüba lan aban dan lun paraísu lan sun ubóu (Agu. 1:28). Hame lúnbaña hawinwandun lun súnwandan lidan, mósume hagunfuliruni binadu gumadi le. Lárigiñeme Arümahedón mámabei paraísu ubóu, lugundun sügühali saragu milu irumu lúmagiñe úaali lan fuluri-agei Edén. Aniheinbei saragu wadagimanu lun ladügǘn lidan burí fulasu le lagadeirubei wügüri. Wéiribei wadagimanu le!

Adügatiña meha Ísüraelina aban katei ítarati dan le hagiribudunbei Babilóniagiñe lun hageiroun, ani rédeihali meha hageira málouga luagu 70 irumu. Gama lumoun, gayaraati meha haransehani ageiraü lau lídehan Heowá, ítara kei lariñaguni Isaíasi lidan aban profesía: “Nadügübei múa mábeiti le lídanbei fulasu mageirawati fuluri—ágeime, kei fuluri-agei le lábunagubei Aburemei Edén” (Isa. 51:3). Adügatiña meha ísüraelina lun buídumeraü lan laríawagun hageira. Ítarameme, lau lubafu Heowá, sunme ha galagantebalin múa hadügübei sun Ubóu ábanme paraísu. Lúmagiñe guentó anihein katei le gayaraabei hadügüni lun harufuduni busén humá hídehan lidan dasi le.

Aban lídangiñe katei le lunbei hadügüni hakipurunu huban harumañu luma lun haruma lan geyegu tau, según hiyaraati. Anihán katei le gayaraabei hadügüni íbini mechun hamá hubesinanigu adügei. Gayaraati giñe hadügün amu katei, hídehan lidan tarumadahóun Luban Adamuridaguni luma tarumadahóun Luban Adamurini. Anhein gayara lubéi, gayaraati giñe habürüdǘn lun hídehan lidan híderawagun íbirigu dan burí le, ñein lan somu chagaguaü le lanügübei liñawan dan. Ítara luba harufuduni busén humá híderaguniña ha busenbaña ídemuei. Álügüdagua humá hungua: “Gayaraati san nafurendeirun somu fisiu le gayaraabei lahuudun nun ámuñegü ánhana ligira Heowá lun nebelurun lidoun iseri ubóu lun nawinwandun ñein lun súnwandan?”.

Fiu íbirigu hídehaña lidan tarumadahóun luma tounigirún luban adamuridaguni.

ARANSEÑU HUMÁ LUN HETENIRUN HOUN HA LÚNBAÑA HÁGUYUGUN

Dan le láguyuguagüdübarun Hesusu liráü Hairu aba lariñagun Hesusu houn lun híchugun somu katei tun lun teigin (Mar. 5:42, 43). Másiñati, ménrengun lan letenirún tun aban nibureintu to duusuboun irumu tau. Gayaraati wadiraaruni lidan wasaminan sun wadagimanu le lunbei ladügǘn danme le lagunfuliruni Hesusu füramasei le: “Ladüga lachülürüba dan lun haganbuni sun hilaguaaña numalali, ábame háfuridunga lídangiñe hamúaha” (Huan 5:28, 29). Íbini mariñagun tani Bíbülia sun le lunbei lasuseredun, gayaraati wasaminarun mégeibaña lan ha lúnbaña háguyugun éigini, muna tuma daüguaü. Gayaraati san harufuduni lúmagiñe guentó busén humá lun ñein humá lun hídehan? Samina humá luagu álügüdahani burí le.

Ka lunbei hadügüni uguñe weyu lun harufuduni aranseñu hiña lan lun galagante humani Ubóu?

Híchuguña saragu íbirigu buiti achülürüni lau ugundani houn íbirigu ha ñǘbuinbaña lidoun adamurini le ñein lubéi hóundaragua íbirigu lídangiñetiña ámuñegueinarügü ageiraü lidan ageiraü Parisi.

Dan le lichugún awisahani lidan damuriguaü le ñein hubéi luagu labisidahabadün lan óunigiruti sirkuitu, bürügüda humuti san hiri lun hagunbirahani eiga húbiñe? Dan le lounahóun aban íbiri le meha eseriwidubei Betelirugu lun lidin eseriwida lidan amu fulasu o lagumuchuni aban óunigiruti sirkuitu lidasin kei óunigiruti sirkuitu. Gayaraati san híderaguniña íbirigu ha lun hadarirun halíaba lan hawinwanda? Anhein ladügǘba lubéi aban adamurini wéiriti o espechaliti lidan fulasu le ñein lubéi hawinwanda, gayaraati san hídehan lubaragiñe adamurini o lárigiñe, o hídehan lidan heresibirúniwa íbirigu ha achülürübaña?

ARANSEÑU LUN HARUFUDAHAN HOUN HA LÚNBAÑA HÁGUYUGUN

Adügati le lariñagubei Adügaü 24:15 lun wasaminarun háguyuguba lan saragu míñunu gürigia. Saragu hádangiñe machansitiña meha lun hasubudiruni Heowá lubaragiñe hounwen, ánheinmeti lidan iseri ubóu gachansinbaña.a Hídehaba ha eseriwidubaña lun Heowá luagu saragu irumu lidan dasi le (Isa. 11:9). Memeniha tanigi Charlotte aban íbiri to meha apurichihaboun Yuropa Sudamérika luma Áfürika, lun lachülürün weyu ligía. Lau aban lanarime ugundani tuagu, aban tariñagun: “Busenhadina narufudahan houn ha lúnbaña háguyugun. Dan le naliihan luagu somu gürigia le meha awinwandubei lidan dan le sügühalibei, saminatina saragu wéiyaasu: ‘Lun hamuga meha subudi lani gürigia le Heowá, ámubei hamuga libagariʼ. Memeniha nanigi nabahüdahani houn ha lúnbaña háguyugun sun le heferidirubei ladüga libidiñe inarüni houn”.

Íbinime lubúeingu Heowá ha meha awinwandubaña lubaragiñe liabin Hesusu ubouagu mósume hafurendeirun saragu. Maame wagundan wafuranguagüdüni lun Danieli luáguti lagunfulirun profesía le meha labürüdübei ani úati meha gunfuranda lani (Dan. 12:8). Saminaadün san luagu lueirin ugundani danme le tíderawagun Rudu tuma Noemí asubudirei hagía lan aban hádangiñe lagüchagu Mesíasi? Wéiribei ugundani wasandirun lau wídehan lidan programa lánina arufudahani le lunbei lanügün fulasu lidan sun ubóu, úaalime ni kata wuribati lánina ubóu le eberesehawa.

Tíchuguña aban íbiri aban agumeiraguagüdüni tun aban gürigia lidan aban fulasu le ñein lubéi tachibawagún gamisa.

Ida luba harufuduni busén humá lun hídehan lidan dasi lánina arufudahani le? Le lunbei hadügüni lun háfaagun lun habuiduragüdüni harufudahan luma lun gádanlanün apurichihani le adügǘbei lidan sun ubóu (Mat. 24:14). Anhein siñá lubéi hapurichihan saragu uguñe weyu kei le aubei habusenra ladüga hirumudiri o ladüga amu resun, gayaraati harufuduni memeniha lan hanigi harufudaha houn ha águyugubaña lau hadügüni sun hiyaraati lidan dasi lánina apurichihani le guentobei. Anhein híchiga le buídutimabei húmagiñegua, harufudubei aranseñu hiña lan lun harufudahan houn gürigia ha lúnbaña háguyugun.

Buídubei lun hararamagun asaminara luagu álügüdahani le: le san lúgubu busén humá lun galagante humani Ubóu? Busentün san hídehan lun hadügüni ubóu le ábanme paraísu, hetenirun houn ha águyugubaña luma lun harufudahani inarüni houn? Harufudubei aranseñu hiña lan anhein meferidirun humá chansi le húmabei guentó lun gádanlanün dasi le genegeguabei luma le lunbei hadügüni danme le galagante humani Ubóu.

a Ariha huméi aturiahani “Hanügübaña ‘ha adundehabaña saragu gürigia lidoun üma le surubei’”, le tídanbei Garüdia Awisahatu to lánina nefu-hati, 2022.