Álügüdahani Le Hadügübei Aliihatiña
Ariñagati san Dawidi lalawahabei lan liri Bungiu “lun súnwandan”, dan le labürüdünbalin dimurei le lídanbei Sálumu 61:8, luagu móunwenbei lan?
Uá. Le labürüdübei Dawidi ñein linarün ani ítara liña.
Samina humá luagu le labürüdübei lidan bérusu le, luma le labürüdübei lidan amu bérusu le lenegebei le. Ariñagati: “Ítara luba nalawahani biri lun súnwandan, gúnfulineime nidaradun sagü weyu”. “Nabureme, Nubungiute, neremuhaba bun tau sun nanigi, níchuguba uéiriguni lun biri lun súnwandan” ani “nalawahabei biri lun súnwandan” (Sal. 61:8; 86:12; 145:1, 2).
Dan le labürüdünbalin Dawidi dimurei le, masaminarunti meha luagu móunwenbei lan. Subudi lumuti meha luagu lachülürüba lan aban weyu lun lounwen ladüga lídangiñe lan figóu liabin óunweni. Subudi lumuti meha Dawidi guánarügü gafigoun lan (Agu. 3:3, 17-19; Sal. 51:4, 5). Ani subudi lumuti meha íbini lan lubúeingu Heowá ha aubei lagundaara —kei burí Abüraámü, Isaakü luma Hakobu— hilagua hamá. Lanwoun lira, subudi lumuti lachülürüba lan meha dan lun lagumuchun libagari (Sal. 37:25; 39:4). Gama lumoun, arufudati dimurei le lídanbei Sálumu 61:8 aranseñu liña lan Dawidi lun lalawahani Heowá lun súnwandan, mini lan lira, sun dan le lanügübei wínwanñu (2 Sam. 7:12).
Anihein dan abürüha lan luagu le winwan laalibei, kei warihini lidan burí dimurei le lídanbei lagumeseha kapítulu le lídanbei Sálumu 18, 51 luma 52. Lidan Sálumu 23 ayanuhati luagu Heowá ñein kei aban hóuniri mudún le adundehabaliña mudún, le íchugubei darangilaü houn ani góunigi laña. Ítara liña meha lóunigiruniña Dawidi lilügüniña mudún, ligía busén lubéi meha leseriwidun lun Heowá lidan sun libagari (Sal. 23:6).
Haritagua waméi giñe lúmagiñe lan Bungiu liabin sun le labürüdübei Dawidi. Lídangiñe le labürüdübei anihein burí profesía le lunbei burí lagunfulirun lau lásügürün dan. Kéiburi lidan Sálumu 110, ariñagati Dawidi lachülürüba lan weyu lun lañuurun Aburemei luéigiñe lóunwenren Bungiu sielu ani leresibiruba lan saragu ubafu. Lau ubafu le, lagañeirubaña láganigu Bungiu ani “lasiadirubaña néchanigu”. Aban lídangiñe ladügawagun Mesíasi, Dawidi; le lunbei larúeihan lúmagiñe siélugiñe ani Fádiribei “lun súnwandan” (Sal. 110:1-6). Ariñagati Hesusu profesía lan le lídanbei Sálumu 110 ayanuha lan luagu ani lagunfuliruba lan ámuñegü (Mat. 22:41-45).
Kei le aubei warihei, adundeha lumuti Heowá Dawidi lun labürüdüni katei le lunbei lasuseredun lidan lidaani luma luagu burí katei le lunbei lasuseredun ámuñegü danme láguyugun ani gayaraahalime lalawahani Heowá lun súnwandan. Ani ida liña líderaguniwa katei le lun gunfuranda wamani Sálumu 37:10, 11, 29? Íderagua lumutiwa bérusu burí le, lun gunfuranda wamani ida liña lan meha katei lidan binadu Ísüraeli ani ida luba lan, le lunbei wawinwanduni ámuñegü lidan sun ubóu danme le lagunfuliruni Bungiu le füramase lubéi (ariha huméi tidan garüdia to párafu 8 fánreinti le gíribei “Númabadibu lidan Paraísu”).
Íderagua lumutiwa Sálumu 61:8 luma burí amu bérusu arihei busén lan meha Dawidi lalawahani Heowá lidan binadu Ísüraeli sun meha winwan lan. Arufuda lumuti katei le woun kaba lan ladüga Dawidi ámuñegü danme le lagiribudagüdüni Heowá libagari lun.