Ladügǘn le buídubei:: Aban katei le lunbei wasaminarun luagun
Anhein hamuga busén hubéi hachülürün lidoun aban fulasu le mídinñahagidün ñein, kaba hamuga hadüga?
1. Hafalaruñein hamuga san émeri le uágubei hasaminara ligía lan le buídutimabei?
2. Hafalaruñanu hamuga san híbiri gürigia ladüga samina humá subudi hamani üma?
3. Háluahaña hamuga san aban adundehani le chóuruti kéiburi aban GPS, aban mapa o hálügüdün aban umadaü le subuditi üma lun?
Anhein hanúadira le furumiñeti o le libiaman, chóuruti hachülürüba lan lidoun somu fulasu, íbini ítara, háfuga machülürünbadün lan lidoun fulasu le ñeinhin lubéi habusenra hachülürün. Luagu aban oubaü, anhein hanúadira le lǘrüwan, chóuruti hachülürüba lan lidoun fulasu le ñeinhin lubéi habusenra hachülürün.
Ítara liña ibagari kei aban wéiyaasu, súngubei wagía busentiwa wadariruni émeri le lunbei líderaguniwa adarira ugundani. Wachülürüba lidoun fulasu ligía según le wanúadirubei wadügün, ligía súdini lubéi lun wáluahan aban adundehani le chóuruti ani le gayaraati wafiñerun luagu.
Inarüni maweirin lan lisudinin liibe-agei katei le wanúadirubei lidan wabagari, gama lumoun, anihein fiu lídangiñe gayaraabei lasansiruni wabagari. Le wanúadirubei lidan katei burí le, arufuda lumuti ligaburi wasaminan luagun le buídubei lumoun le wuribabei. Ani lau lásügürün dan, gánibei le wanúadirubei lidan wabagari luma lidan habagari waduheñu lun lan yebe buiti o lun wuribati. Laganagua katei burí ligía anihein:
agamariduni luma maríei
wadagimanu, seinsu luma arumani lidan sun katei
hagüriahóun isaanigu
ligaburi wanaagun woungua hama amu
Ida luba hachoururuni líderagubadün lan le hanúadirubei lidan hibagari lun gunda humá luma lun gunda hamá hiduheñu?
Le linarün katei, sun wagía lunti wálügüdagun woungua: “Kaba san íderaguana lun nanúadiruni buidu ka lan buídubei o ka lan wuribabei?”
Tidan garüdia to, harihibei ka lan uagu gayara lubéi hafiñerun tuagu Bíbülia lun hasubudiruni ka lan buídubei luma ida luba lan líderagunün katei le.